¿TI YAM mˈijxypy? Yëˈë may tsyiptuumbë poop kuääjygyëjxy. Per ok ix mä tsyoondë. ¡Jam tsyoondë tsäjpotm ets pyëyëˈëktë yootsoty! ¿Ti jamdaa kuääjy tsäjpotm?

Kyaj, tyäˈädë kuääyëty kyaj jyantsy kyuaayëty. Yëˈko kuääjy kyaj mbäät pyëyeˈeky yootsoty, ¿këdii? Perë Biiblyë myaytyakypyë kuääjy jam tsäjpotm. ¿Mnijäˈäp tiko?

Yëˈko tëëyëbë jäˈäy yëˈë yajtuundë kuääjy mä tsyiptuundë. Pääty ko Biiblyë tmaytyaˈaky näägë jäˈäy kyëdaˈaky tsäjpotm ak kuääjygyëjxy, yëˈë xytyukˈijxëm ko Dios tyunaampy tuˈugë tsip mëdë axëkjäˈäy diˈib yä Naxwiiny. ¿Mnijäˈäp ti txëˈatyë tadë tsip? Armajedón, ja mä kyutëgoyaˈany tëgekyë axëkˈäjtënë yä Naxwiiny.

Jesús yëˈë nyiwintsënˈataambyë tyäˈädë tsip mä Armajedón. Jamyats ko Jyobaa yëˈë wyinˈijxë Jesús ets tyunët rey mä yëˈë yˈanaˈamën. Päätyë Jesús tmënejxyë kyoronë. Etsë tadë yˈespäädë yëˈë yˈandijpy ko dyaˈoogäˈäny niˈamukë Diosë myëtsip. ¿Mbäät nmonyˈijx nmonyjäˈäjëm ko Dios dyajkutëgoyaˈany niˈamukë axëkjäˈäy?

Wenë ëxtäˈäyë maytyaˈagyë 10. ¿Ti mˈijxypy? Yëˈë ja mëj Ayoˈonduu mä kyutëgooyë axëkjäˈäy. ¿Pën yaˈAyoˈonduu? Jyobaa Dios. Ok ixë netë maytyaˈagyë 15. ¿Ti jam tuun jäjtëp? Yëˈë mä Jyobaa dyajkutëgooyë Sodomʉ ets Gomorrʉ mëdë jëënduu.

Ok ix mä maytyaˈagyë 33. Ix wiˈix jam jyatyë Ejiptʉ jäˈäyë kyuaajy etsë kyarrë diˈib mëët tsyiptuny. ¿Pën yajnëpaˈtstääjy? Yëˈë Jyobaa. Ttuuny dëˈën ets ja kyäjpn dyajtsoky. Ëxtäˈäyë maytyaˈagyë 36 etsë 76. Jap xyˈixäˈäny ko Jyobaa axtë nyaˈijx etsë kyäjpn kyutëgoyët mët ko axëëk yˈadëtstë.

Pääty kyaj mbäät nmonyˈijx nmonyjäˈäjëm ko Jyobaa tkaxäˈänyë tsyiptuumbëty ets dyajjëjptëgoyëdë axëkˈäjtënë yä Naxwiiny. ¿Ti net ok tunan jatanëp? Yaˈpnax yaptsoo ets nˈijxëm.