Jam Cesarea, tamë nety tuˈugë yetyëjk diˈib tuump soldäädë wintsën diˈib xyëwˈäjtypy Cornelio. Oyë nety kyaj jyudiyëty, mëjˈijxëdëp ja jäˈäyëty. Pes jantsy oyjyaˈay yˈijty, mët ko ttukmëduny ja oyˈäjtënë ayoowbë jäˈäy. Cornelio myëbëjkë Jyobaa ets xëmë ijty nyuˈkxtaˈaky. Tëgok, ta tuˈugë anklës myëgäjpxë ets yˈanmääyë: “Dios të tmëdoowˈityë mnuˈkxtakën. Kaxë mduumbë jam Jope, mä yajpäätyë Pedro, ets yaˈˈanëëmët parë myajniminët”. Cornelio ta netyë tkejxy nidëgëëk ja tyuumbë jam Jope, ja nety jyagamëty naa 50 kilometrë diˈib wëˈëmp abatkëˈëytsyoo.

Ko netyë Pedro yajpääty Jope, ta tˈijxy mä tuˈugë kumäˈäy ja jëyujk animal diˈib kyaj mbäät ttsuˈutstë ja judiyëtëjk. Ta net tmëdooy ko yaˈˈanëëmë ets ttsuˈutstët. Pedro kyaj ttsuˈutsany ets jyënany: “Ninäˈänëmëts ngatsuˈutsy tuˈugë jëyujk animal diˈib kyaj wyäˈätsëty”. Ta yaˈˈanmääy: “Kyaj mjënäˈänët ko kyaj wyäˈätsëtyë tyäˈädë jëyujk animal, mët ko wäˈäts tyamë Dios dyajnaxy”. Ta jatëgok yaˈˈanmääy: “Tap tëjkˈagëˈëy nidëgëëk tyanëdë yetyëjk, panëjkx”. Pedro ta ojts nyijkxy mä ja tëjkˈääw ets ta dyajtëëy ja yetyëjkëty tiko nety të myindë. Ta yˈatsoowdë: “Yëˈëts të xykyaxtë Cornelio, tuˈugë soldäädë wintsën diˈib Roma. Yëˈëts të xyˈanëëmëdë parë nwoownëjkxtët mä tyëjk jam Cesarea”. Pedro ta  tˈanmääy ja yetyëjkëty parë jam myääwëˈëmdët, ets jakumbom, ta ojts mëët nyëjkxtë Cesarea. Nan ojts näägë nmëguˈukˈäjtëm diˈib Jope tpanëjkxtë Pedro.

Ko jyajtyë Pedro, ta netyë Cornelio nyaygyoxtënääytyakë. Perë Pedro ta yˈanmääyë: “Pëdëˈëk. Nan jäˈäyëts extëm mijts. Yëˈëtsë Dios të xyˈanëëmë parë niminët mä mdëjk, oyë judiyëtëjk kyaj tyëkëdë mä jyëën tyëjk diˈib kyaj jyudiyëty. Tunë mayˈäjtën, tukmëtmaytyakëts tikots të xynyigaxë”.

Cornelio ta ttukmëtmaytyakyë Pedro: “Tyaxk xëëwëp, tatsë nety nmënuˈkxtaˈagyë Dios, tats tuˈugë anklës xyˈanmääy parë nnigaxët. Tunë mayˈäjtën, tukniˈˈijxëdëgëts tijatyë Jyobaa nyiˈanaˈamëp”. Pedro ta yˈatsooy: “Tyamnëmëtsë net njaygyukë ko Dios kyaj winˈixy wingexyë jäˈäy ttsoky, kyupëjkypy niˈamukë pënaty awdatanëp”. Pedro ta tijaty ttukniˈˈijxë mä pënën Jesus. Ta Cornelio ets pënatyë nety jam mëët yajpäättë ojts tˈaxäjëdë espiritë santë ets nyëbajttë.