Jyobaa ojts tˈanëëmë Jacob ko tkuentˈatäˈäny, duˈun extëm tkuentˈäjtyë Abrahán mëdë Isaac. Jacob jam tsyënääytyaknbëjky mä tuˈugë lugäär diˈib xyëwˈäjtypy Harán. Jam pyejky ets tmëdäjty mayë yˈuˈunk yˈënäˈk ets myëkjäˈäytyaky.

Ok, ta Jyobaa tˈanmääyë Jacob: “Jëmbit mä mdääk mdeetyë yˈit lyugäär”. Ta Jacob tyuˈudëjkë mëdë fyamilyë. Per tuˈääy, ta nääk ja tyuumbëtëjk nyimiinëdë ets yˈanmääyëdë: “Yëˈë mmëgaˈax Esaú, ta duˈuntsoo myiny mët 400 yetyëjk”. Ta Jacob ttsëˈkë Esaú ko wiˈix tyunëdët ets ko wiˈix yajtunëdë fyamilyë. Pääty tmënuˈkxtakyë Jyobaa: “Tunë mayˈäjtën yaˈˈawäˈätspëtsëëmgëts mätsë nmëgaˈax”. Jakumbom, ta Jacob ttuknigexyë regalë Esaú: mayë borreegë, tsyiibë, bakë, kameyë etsë burrë.

Mä tadë ux, ko netyë Jacob të wyeˈemy naytyuˈuk, ta nyimiinë tuˈugë anklës ets mëët tyëjkë tsiptuumbë. Duˈun tyim tsiptuundë axtë ko xyëënytyaky. Oyë Jacob tsyayujty, kyaj tnasmäjtsë ja anklës. Duˈun jyaˈˈanmääyë: “Mastutkëts”. Perë Jacob ta yˈatsooy: “Kyaj, axtë kots xykyunuˈkxët”.

Taanëm ja anklës ojts tkunuˈkxyë Jacob. Perë Jacob nyijäˈäwëbë nety ko Jyobaa kyaj tnasˈixëyaˈany parë Esaú yˈaxëktunëdët.

Mä tadë jopy, ta Jacob tˈijxmiinyë Esaú jagam mët 400 yetyëjk. Ta jawyiin tsyoˈony parë tjëjpäädëˈëgäˈäny mä kyajnëm nyaybyäädëdë mët  ja fyamilyë, ets ko Jacob nyaybyatë mëdë Esaú, ta jëxtujkˈok tniwindaky. Esaú ta pëyeˈegyë ojts tninëjkxyë Jacob ets tmëneeny. Ta nimajtsk tyëjkëdë jëëy yaxpë ets ta ojts nyayajtuˈugyëdë. Wiˈix mˈokwinmay, ¿wiˈixëdaa Jyobaa nyayjäˈäwë ko duˈunë Jacob ojts dyaˈoyë tyäˈädë jotmay?

Ko ojts nyayajtuˈugyëdë, ta Esaú jyëmbijty mä tyëjk etsë Jacob ta jatëgok tyuˈudëjkë. Jacob ja nety nimäjmajtskë yˈuˈunk yˈënäˈk. Ja txëwˈäjttë: Rubén, Simeón, Leví, Judá, Dan, Neftalí, Gad, Aser, Isacar, Zabulón, José ets Benjamín. Ok, yëˈë netyë Jyobaa yajtunaambyë José parë dyajnitsoˈogäˈäny ja kyäjpn. ¿Mnijawëyaampy wiˈix? Min nˈokˈijxëm.