Ko Saúl yˈoˈky, ta David tyëjkë rey, ja netyë jyëmëjt 30. Kanäk jëmëjtë nety kujk yˈaneˈemy, per mä tuˈugë ux, ta pyejty tyëjknikëjxy ets tˈijxy tuˈugë toxytyëjk diˈib jantsy tsuj. David ta ojts dyajnidëwë ets tnijäˈäwë ko txëwˈaty Bat-Seba ets ko yëˈë myëmëjjäˈäyˈajtypyë Urías diˈib soldäädë. Ta David ojts tnigaxë Bat-Seba parë yajwoominët mä pyalasyë, ta mëët tsyënääy ets ta Bat-Seba ojts wyeˈemy uˈunkmëët. David jyakuyuˈutsan ti nety të ttuny. Pääty ojts tˈanëëmë ja diˈib nyiwintsënˈäjtypy ja tsiptuumbëty parë Urías yajpëjtäˈägët tsipjëjpˈam ets yajnikaktäˈäyët. Urías ta yˈoˈky, ets ok, ta David pyejky mëdë Bat-Seba.

Perë Jyobaa yˈijx tijatyë netyë David të ttuny. Pääty, ¿tidaa tyuun? Yëˈë kyajxë kugajpxy Natán parë nëjkx tmëtmaytyaˈagyë David. Natán duˈun tˈanmääy: “Tamˈäjtpë nety tuˈugë mëkjäˈäy diˈib myëdäjtypy mayë byorreegë ets tuˈugë ayoowbë jäˈäy diˈib myëdäjtypy jeˈeyë tuˈugë byorreegë diˈib mëk jyantsy tsyojkypy. Per ja mëkjäˈäy, ta ojts tpëjkxë ja tukpäjkpë byorreegë tyäˈädë ayoowbë jäˈäy”. David ta jyantsy jotˈambëjky ets jyënany: “¡Tadë mëkjäˈäy nitëjkëbë oˈkën!”. Ta netë Natán yˈanmääyë: “¡Duˈun mijts extëmë tadë mëkjäˈäy!”. Ta David nyayjäˈäwë mon tuk ets tˈanmääyë Natán: “Tëts nmëbokytyunyë Jyobaa”. Ko duˈunë David pyokytyuuny, mëjwiin kajaa tpatyë amay jotmay ets nan kyuˈayoˈowë ja fyamilyë. Jyobaa tyukumëdoowë David, per kyaj ojts dyaˈooky mët ko kyupëjk ja tyëgoˈoyën ets ijt yujy tudaˈaky.

David yëˈë nety kyojaambyë Jyobaa tyëjk. Perë Jyobaa yëˈë wyinˈijxë Salomón, ja myäängë David parë yëˈë tkojët. Ta David tˈijxtääy tijaty  mbäät dyajtunyë Salomón ets jyënany: “Jyobaa tyëjk jantsy oy tsuj mbäät yajkojy. Salomón mutsknëm, per ëjts nbudëkëyaampy parë yaˈijxtäˈäyët tijaty tunäämp”. David ta tnayajky mayë meeny sentääbë parë yajkojët ja tëjk. Yˈëxtääyë jäˈäy diˈib jyäjt nyijäˈäwëdëp ja tuunk, yajtuˈukmujkë oorë, platë ets jam dyajtsoˈonyë äjë kepy Tiro ets Sidón. Ko netyë David yˈooganë, ta tmooyë Salomón ja neky mä nety të yajdibujaraty wiˈix yajkojët ja tëjk ets tˈanmääy: “Jyobaa yëˈëts diˈib të xyˈanëëmë wiˈixëts ngëxjäˈäyët ets parë nmoˈoyët. Jyobaa mbudëkëyanëp, kyaj mtsëˈëgët. Tsojkëp mˈitët amëk jotmëk ets xytyunëdë tyäˈädë tuunk”.