Mä jyëjpkëxy
“Niˈigyë xypyanëjxtët ja tyuˈunënëty ja diˈibë myëduundëp ja Dios mëdë [“mëbëjkën etsë maˈkxtujkën”, Traducción del Nuevo Mundo (TNM)] es dëˈën tˈaxäjëdë ja kyumäˈäny diˈibë Dios oj twandaˈaky.” (EBREEɄSɄTY 6:12)
1, 2. ¿Tiko tyam jyëjpˈamëty ets nmëdäjtëmë mëbëjkën? Nimaytyäˈäk mët tuˈugë ijxpajtën.
MËBËJKËN, ko nwinmäˈäyëmë tyäˈädë ayuk, ta nˈijxëm ko kajaa tsyobääty. Nan oyxyëp ko nwinmäˈäyëm jatuˈugë ayuk: njotëgoˈoyëm. ¿Tiko? Yëˈko pën kyajnëm nmëdäjtëmë mëbëjkën tsojkëp njotëgoˈoyëm parë nmëdäjtëm, ets pën nmëdäjtëm, jëjpˈamë net nguentˈäjtëm ets niˈigyë nyajkëktëjkëm. ¿Tiko?
2 Okwinmay ko mduˈuyoˈoy mä tuˈugë lugäärë äänëˈëk tëëtsëˈëkpë. Mëk mjantsy tyëëtsë, ets ta jam xyˈijxpäätyë nëë, ta xykyuwäˈäny parë kyaj xëˈan yajtëˈëtsëdët. Per ta nanduˈun xyaˈutsy ja mˈabëjkënë extëm mbäät myadaˈaky parë mjäˈtët mä të xynyitsoonë. Nanduˈun tyam yˈamääytyaˈagyë mëbëjkën, kyaj mayë jäˈäy tmëdattë mëbëjkën diˈib tëyˈäjtën, mbäät pojënë tyëgoy pën kyaj nguentˈäjtëm ets pën kyaj niˈigyë nyajkëktëjkëm. Pääty, jëjpˈam nmëdäjtëmë mëbëjkën parë oy nˈijtëm mëdë Jyobaa, duˈun extëm jyëjpˈamëtyë nëë parë njukyˈäjtëm (Rom. 1:17).
3. ¿Ti naybyudëkë të xymyoˈoyëmë Jyobaa parë niˈigyë nyajkëktëjkëmë mëbëjkën, ets ti majtsk pëky mbäät nduˈunëm?
3 Jyobaa nyijäˈäwëp nuˈun tyam nyajtëgoyˈäjtëmë mëbëjkën ets ko tsiptakp nmëdäjtëm ets nyaˈijxëm. Pääty ojts dyajwëˈëmy mä yˈAyuk ja ijxpajtënë diˈib mbäät nbanëjkxëm. Duˈun xyˈanmäˈäyëm extëm tkujäˈäyë apostëlë Pablo: “Niˈigyë xypyanëjxtët ja tyuˈunënëty ja diˈibë myëduundëp ja Dios mëdë [“mëbëjkën etsë maˈkxtujkën”, TNM] es dëˈën tˈaxäjëdë ja kyumäˈäny diˈibë Dios oj twandaˈaky” (Eb. 6:12). Päätyë Diosë kyäjpn xyˈanmäˈäyëm ets nbanëjkxëmë yˈijxpajtën ja yetyëjk toxytyëjk diˈib tëëyëp jukyˈäjttë, extëm të nˈijxëm mä tyäˈädë liibrë. ¿Ti mbäät majtsk pëky nduˈunëm? Nyajkëktëjkëm niˈigyë mëbëjkën ets nbëjtakëmë winmäˈäny mä tijatyë Dios të xytyukwandakëm.
4. ¿Ti Satanás të ttuny parë dyajtëgoyaˈany ja mëbëjkën, ets tiko kyaj mbäät xyˈatsëˈkëm?
4 Nˈokˈyajkëktëjkëm niˈigyë mëbëjkën. Satanás diˈib yˈaneˈembyë tyäˈädë naxwinyëdë, yajtëgoyaambyë mëbëjkën. Të dyajjëmbityë extëm tuˈugë lugäärë äänëˈëk tëëtsëˈëkpë, mä mayë jäˈäy kyaj tnekymyëdattë mëbëjkën. Satanás niˈigyë kyumëjääjëty ets kyaj dyuˈunëty ëtsäjtëm, per kyaj mbäät xyˈatsëˈkëm. Mbäät niˈigyë nyajkëktëjkëmë mëbëjkën ets kyaj nyajtëgoˈoyëm. Nˈokjamyajtsëm ko Jyobaa naymyayanëp mët pënaty myëdatandëbë mëbëjkën diˈib tëyˈäjtën. Ets pën yajpatëm Sant. 4:7). Per parë nmadakëm, jëjpˈam njuˈtëmë tiempë jabom jabom parë niˈigyë nyajkëktëjkëmë mëbëjkënë mä Dios. ¿Wiˈix?
mët yëˈë, mbäädë Mëjkuˈu njëjpkuwäˈkëm ets axtë mbäät xykyugakëm (5. ¿Wiˈixë myëbëjkën dyajkëktëjkëdë ja Dios mëduumbë diˈib yajmaytyaktëp mä Biiblyë?
5 Extëm të nˈijxëm, ja Dios mëduumbëty diˈib yajmaytyaktëp mä Biiblyë, kyaj myaxuˈunkˈäjttë mëdë mëbëjkën. Extëm jyukyˈäjttë, yëˈë xytyukˈijxëm ko mëbëjkën yëˈë yajkypyë Diosë myëjää (Gal. 5:22, 23). Ko ijtyë Dios tˈamdowdë naybyudëkë, ta niˈigyë yajkëktëjkxëdë myëbëjkën. Nˈoktuˈunëm nanduˈun ëtsäjtëm. Ninäˈä ngajäˈäytyëgoˈoyëm ko Jyobaa xymyoˈoyäˈänëmë myëjää pën nˈamdoˈojëm ets pën nduˈunëm extëm të nuˈkxtakëm (Luk. 11:13). Per ¿tijaty mbäät nˈaktuˈunëm?
6. ¿Wiˈix mbäädë Biiblyë nˈëxpëjkëm parë xypyudëjkëm extëm yajmaytyäˈäktë ja Dios mëduumbëty?
6 Mä tyäˈädë liibrë, jeˈeyë të nˈijxëm tuˈuk majtskë yˈijxpajtënë Dios mëduumbëty diˈib yaˈijttë mëk ja myëbëjkën. Per tapnëm nimay yajmaytyäˈäktë mä Biiblyë (käjpxë Ebreeʉsʉty 11:32). Pääty ko nˈëxpëjkëm naytyuˈugë Biiblyë, oy ko ngäjpxëm yajxon ets ndukxondakëm. ¡Mëjwiin kajaa xytyukniˈˈixëyäˈänëm wiˈix jyukyˈäjttë! Per parë dyajkëktëkëdë mëbëjkën kyaj jeˈeyë nwingäjpxnäjxëm. Tsojkëp nˈëxtäˈäyëm ets nbayoˈoyëm mä ëxpëjkpajn wiˈix yajnimaytyäˈäktë ets ti tiempë jyukyˈäjttë. Ets pën njamyajtsëm ko nan pokyjyaˈay yajpattë ets ko “dëˈën ijty [jyaˈayˈattë] extëm ëtsäjtëm”, ta nˈijxëm extëmxyëp tyam jyukyˈattë (Sant. 5:17). Ko nnaybyëjtakëm mä lyugäär, mbäät nbawinmäˈäyëm wiˈix nyayjäˈäwëdë ko dyajnäjxtë jotmay diˈib tyam nanduˈun nwinguwäˈkëm.
7-9. 1) ¿Wiˈixxyëp ja Dios mëduumbëty nyayjawëdë koxyëp tyam tmëdundë Jyobaa extëm ëtsäjtëm? 2) ¿Tiko mbäät niˈigyë nyajkëktëjkëmë mëbëjkën ko nduˈunëm tijaty të nyajtuknipëjkëm?
7 Nan nëjkxëp nyajkëktëjkëmë mëbëjkën ko nduˈunëm diˈibë Jyobaa të xytyuknipëjkëm. Pesë “mëbëjkën yˈity extëmë oˈkpë, pën kyaj nduˈunëm ja oybyë” (Sant. 2:26). Nˈokpawinmäˈäyëm wiˈixxyëp jantsy jotkujk nyayjawëdë ja Dios mëduumbë diˈib yajmaytyaktëp mä Biiblyë, koxyëp yëˈë tyam ttundë diˈibë Jyobaa të xytyuknipëjkëm.
8 Extëm nˈokpëjtakëm, wiˈixxyëbë Abrahán tyam nyayjawëty koxyëp yaˈˈanëëmë ets tˈawdatëdë Jyobaa mët mayë myëguˈuktëjk diˈib të tyuˈukmuktë mä nˈëxpëjkëm o mä tyunyëtyë asamblee, ets ko kyaj nyekyjamëty altaar winduuy diˈib të yajniˈˈixë mëdë tsää mä lugäärë aduˈuktumbë. ¡Jyantsy tyukxondakypyxyëbë Abrahán koxyëp tmëdoy wiˈix yajnimaytyaˈaky ja wandakën diˈib jeˈeyë “jagam” yˈijx! (Käjpxë Ebreeʉsʉty 11:13.) O nˈokwinmäˈäyëm wiˈixxyëbë Elías nyayjawëty koxyëp yaˈˈanëëmë ets tninëjkxëdë jäˈäy mä jyëën tyëjk parë ttukmëtmaytyäˈägëdë oybyë ayuk diˈib xyjotkujkmoˈoyëm, ets kyaj parë dyaˈoogët ja kyugajpxyëtyë Baal o tmëdunëdë Dios mä yˈaneˈemy tuˈugë rey diˈib të tmastuˈutyë Dios ets jantsy axëkjäˈäy. Mbäät nˈijtëm seguurë ko pojˈamxyëp tkupëjktë tyäˈädë tuunk diˈib tyam nduˈunëm.
9 Pääty, nˈokˈyajkëktëjkëm niˈigyë mëbëjkën ko nduˈunëm tijaty të nyajtuknipëjkëm. Duˈunë nety nbanëjkxëmë yˈijxpajtën pënaty yajmaytyaktëp mä Biiblyë. Ets nëjkxëp njäˈäwëm extëmë mëtnaymyaayëbë extëm jyënaˈany mä tsyondaˈagyë tyäˈädë liibrë. Tim tsojk mëët nnaybyäädäˈänëm ets nnaymyayäˈänëm.
10. ¿Tiko jantsy jotkujk nnayjawëyäˈänëm mä ja lugäärë tsujpë?
10 Nˈokˈyaˈijtëmë winmäˈäny mä tijaty njëjpˈijxëm. Pënaty tëëyëp kyaj tmastuttë Dios, xëmë tˈawijx tjëjpˈijxtë tijatyë Dios tukwandakëdë. ¿Nanduˈun ëtsäjtëm? Okwinmay wiˈix jotkujk nnayjawëyäˈänëm ko jyukypyëktëdë tyäˈädë yetyëjk toxytyëjk ko nety ja oyjyaˈay jyukypyëktë (käjpxë Apostʉlʉty 24:15). ¿Të xywyinmay tijaty myajtëwaampy?
11, 12. ¿Tijaty myajtëwaampy ja Dios mëduumbëty mä jembyë jukyˈäjtën? 1) Abel. 2) Noé. 3) Abrahán. 4) Rut. 5) Abigail. 6) Ester.
11 Extëm nˈokpëjtakëm, ¿tijaty myajtëwaambyë Abel? Waˈan yëˈë xyajtëwäˈäny wiˈix ijty ja tyääk tyeety o pën ojts myaytyaˈaky mët ja kerubin diˈib kyuentˈäjttëp ja lugäärë tsujpë. ¿Ets tijaty myajtëwaambyë Noé? Waˈan xyajtëwäˈäny pën ojts ttsëˈëgë ja nefilimëty o wiˈix tkuentˈäjty tuk jëmëjt ja jëyujk animal arkoty. ¿Ets ti myajtëwaambyë Abrahán? Waˈan xyajtëwäˈäny pën ojts tsyiptakxëty tmastuˈudët ja kyäjpn, o pën yëˈë Sem tukniˈˈijxë pënën Jyobaa.
12 Nan waˈan tijaty xyajtëwäˈäny ja toxytyëjkëty diˈib tëëyëp jukyˈäjttë. Extëm waˈan xyajtëwäˈänyë Rut ti pudëjkë parë tmëdunëdë Jyobaa, o pënë Abigail ojts ttsëˈëgë ja nyaˈay Nabal ko ttukˈawäˈänë ti nety të ttukmëdunyë David, o wiˈixë Ester mëdë Mardoqueo yˈakjukyˈäjttë diˈib kyaj yˈokˈyajmaytyaknë mä Biiblyë.
13. 1) ¿Tijatyëdaa xyajtëwäˈänëm pënaty jukypyëkandëp? 2) ¿Wiˈix mnayjawëty ko xyˈixyˈatäˈäny ja yetyëjk toxytyëjk diˈibë Biiblyë myaytyakypy?
13 ¡Seguurë ko tyäˈädë yetyëjk toxytyëjk nan nëjkxëp tijaty xyajtëwäˈänëm! Ets nëjkxëp ndukmëtmaytyakëm wiˈix ja xëë tiempë të nˈakˈyajnäjxëm ets wiˈixë Jyobaa të tkunuˈkxyë kyäjpn mä tiempë diˈib tsip nimëjää. Seguurë ko yˈoymyëdowandëp wiˈixë Jyobaa të tkuytyuny tukëˈëyë wyandakën. Ets nan wingëjxm jëjpkëjxm mëët nmaytyäˈägäˈänëm, ¡kyaj jeˈeyë nëjkx nˈokpawinmäˈäyënë! Per mientrës nˈawijxëm ets jyäˈtëdë tyäˈädë tiempë, nˈoktuˈunëmë mëjää parë nbawinmäˈäyëm extëmxyëp tyam jyukyˈattë. Nˈokpanëjkxëmë yˈixpajtënë mä wiˈix dyaˈijxëdë mëbëjkën ets duˈun nmëduˈunëmë Jyobaa mët yëˈëjëty winë xëë winë tiempë.