Jyobaa ojts dyajkojˈyë Naxwinyëdë parë nduktsënäˈäyëm. Ja tim jawyiimbë yetyëjk etsë toxytyëjk Adán mëdë Eva, kyaj ojts kyojtë parë jyukyˈattët tsäjpotm. Dios të nety dyajkojˈyë anklës parë jam jyukyˈattët (Job 38:4, 7). Jyobaa ojts tpëjtaˈaky ja tim jawyiimbë yetyëjk mä tuˈugë lugäärë tsujpë diˈib xyëˈäjt Edén (Génesis 2:15-17). Dios tsyojk ets jyukyˈatët xëmëkyëjxm yä Naxwiiny agujk jotkujk ets nanduˈun ja yˈuˈunk yˈënäˈk. Käjpxë Salmo 37:29 etsë 115:16.

Mä Adán mëdë Eva yajpëjtaktë, jeˈeyë nety tuk pedasë Naxwinyëdë diˈib tsuj, pääty tsojkëbë nety tmëdattëdë yˈuˈunk yˈënäˈk parë dyajwinduktët ets wanaty wanaty dyajjëmbittët extëm tuˈugë lugäärë tsujpë (Génesis 1:28). Tyäˈädë Naxwinyëdë ninäˈä kyakutëgoyaˈany, xëmë jäˈäy ttuktsëënëyäˈändë. Käjpxë Salmo 104:5.

Ixë bideo ¿Tiko Dios ojts dyajkojˈyë Naxwinyëdë?

Yëˈko Adán mëdë Eva kyaj tmëmëdoodë Dios, ta yaˈëxkajxtë Edén ets dyajtëgooytyë ja lugäärë tsujpë. Tyam ni tuˈugë naxwinyëdë jäˈäy mbäät tkayaˈoyë. Mä Biiblyë jyënaˈany ko tyäˈädë Naxwinyëdë të yajtukëdëkëdë axëëk jäˈäy (Job 9:24). Käjpxë Génesis 3:23, 24.

¿Waˈandaa Jyobaa kyaj tnekykyuytyunäˈäny diˈib të ttuknibëjtäägë parë naxwinyëdë jäˈäy? Kyaj, Jyobaa xëmë tkuytyuny diˈib wyandakypy, yëˈë diˈib tukëˈëyë mëjää myëdäjtypy (Isaías 45:18). Mä tiempë miny kyëdaˈaky, Dios duˈun dyajjukyˈatäˈänyë naxwinyëdë jäˈäy extëm ojts ttuknibëjtäägë. Käjpxë Salmo 37:11, 34.

Jesus extëmë Rey mä Diosë yˈAnaˈam Kyutujkën, yëˈë yajjëmbitaambyë Naxwinyëdë extëm tuˈugë lugäärë tsujpë. Ets mëdë  anklës dyajkutëgoyaˈany mä Armajedon pënaty tyam myëtsipˈäjttëbë Dios. Ta netë Satanás yajtsumäˈäny tuk mil jëmëjt, ja axëk anklës diˈib wyinˈëˈënë Adán mëdë Eva. Perë Dios mëduumbëty kyaj kyutëgoyäˈändë, pes yëˈë Jesus kuentˈatanëdëp ets tuˈumoˈoyanëdëp, taanëmë net jyukyˈatäˈändë mä ja lugäärë tsujpë yä Naxwiiny. Käjpxë Diˈibʉ Jatanʉp (Apocalipsis) 20:1-3 etsë 21:3, 4.

¿Näˈä Dios dyajjëjptëgoyaˈanyë axëkˈäjtën? Jesus ojts tnigajpxy tuˈugë “ijxwëˈëmën” parë yajnijawët ko nety wyingony ja tiempë. Tijaty tyam tuun jäjtëp yëˈë yaˈijxëp ko kyaj mbäädë naxwinyëdë jäˈäy jeky yˈokjukyˈäjnë, ets ko pyatnëp ja tiempë mä jyëjptëgoyanë tyäˈädë jukyˈäjtën. Käjpxë Matewʉ 24:3, 7-14, 21, 22.

Nuˈunë Jesus yˈanaˈamäˈäny tuk mil jëmëjt jam tsäjpotm, dyajjëjptëgoyaˈanyë ayoˈon yä Naxwiiny (Isaías 9:6, 7; 11:9). Ets kom yëˈë tunäämp rey ets saserdotë wintsën, ta tjoˈotsanë pyoky pënaty Dios mëduundëp. Duˈunë duˈun, mët yëˈëgyëjxmë Jesus, Dios dyajjëjptëgoyaˈanyë päˈäm, mëjjäˈäyˈat etsë oˈkën. Käjpxë Isaías 25:8 etsë 33:24.

Yëˈë jukyˈatandëp pënaty myëmëdoodëbë Dios (1 Fwank 2:17). Jesus tyukˈanaˈam ja yˈëxpëjkpëty parë nëjkx tˈëxtäˈäytyë jäˈäy diˈib yujy tudaˈaky ets ttukniˈˈixëdët wiˈix mbäädë Dios kyupëkëdë. Jyobaa miyonkˈam tyamë jäˈäy ttukniˈˈixë parë mbäät jyukyˈattë mä ja lugäärë tsujpë (Sofonías 2:3). Mä yˈëxpëktë Jyobaa tyestiigëty jap mä tuˈukmukyë familyë Dios tmëdundë ets jap mä kasäädë jäˈäy yajtukniˈˈixëdë ets oy tsyëënëdët ets nanduˈun parë yˈittët oy uˈunktääk oy uˈunkteety. Nan jap tnijawëdë wiˈix mbäät ttukˈoyˈattë ja oybyë ayuk diˈib myaytyakypyë Biiblyë. Käjpxë Miqueas 4:1-4.