Ko Satanás yˈandaky tim jawyiin, ta axëkˈäjtën tsyondaky yä Naxwiiny. Yëˈë nety tuˈugë anklës diˈib wäˈäts jäˈäy, per “kyaj ti ttuny diˈibë tëyˈäjtën” (Fwank 8:44). Yëˈë yajmëjwindëjkë ja tsojkën parë yaˈˈawdatët diˈib yëˈëyë patëbë Dios. Satanás wyinˈëˈënë Eva, ja tim jawyiimbë toxytyëjk, parë yëˈë myëmëdowëdët ets kyaj tmëmëdowëdë Dios. Adán nan tim duˈun yˈadëtsy extëm ja nyëdoˈoxy. Ko kyamëdoodë, ta net jyaˈˈatyë ayoˈon etsë oˈkën. Käjpxë Génesis 3:1-6, 19.

Ko Satanás tˈanmääyë Eva parë kyaj tmëmëdowëdë Dios, ta tnibëdeˈkyë Diosë Kyutujkën. Kyaj tˈëxkajpy ko yëˈëyë Jyobaa nitëjkëp yˈanaˈamët. Tyam, mayë jäˈäy kyaj tmëmëdowdë Diosë yˈanaˈamën, yëˈë pyuwäˈkëdëbë Satanás, pääty tyam “yëˈë yˈaneˈembyë naxwinyëdë jäˈäy”. Käjpxë Juan 14:30 etsë 1 Juan 5:19, NM.

Dios ak wäˈäts tijaty ojts dyajkojy. Ja tim jawyiimbë yetyëjk mëdë toxytyëjk ets ja anklësëty ojts kyojtë parë tmëmëdowdët tukëˈëyë Diosë yˈanaˈamën (Deuteronomio 32:4, 5). Dios të xymyoˈoyëmë madakën parë nwinˈijxëm pën ndunäˈänëm diˈib oy o diˈib axëëk. Ets mbäät nyajtuˈunëm parë nmëmëdoˈojëmë Dios mët ko ntsojkëm. Käjpxë Santya̱ˈa̱gʉ 1:13-15 etsë 1 Fwank 5:3.

Jyobaa jeˈeyë tuk tiempë tnasˈixë parë yajnibëdëˈëgëdë kyutujkën. ¿Tiko? Parë nyigëxëˈëgët ko nituˈugë gobiernë mbäät tkapudëkë naxwinyëdë jäˈäy (Eclesiastés 7:29; 8:9). Nuˈun kujk nyaxy tëdujk mil  jëmëjt, yajxonën nyigëxeˈeky ko naxwinyëdë jäˈäyë gyobiernë kyaj mbäät dyajjëgeˈegyë naytyëytyunë, axëkˈäjtën, tsip ets ni yuu päˈäm. Käjpxë Jeremías 10:23 etsë Romanʉs 9:17.

Pën ngupëjkëm etsë Dios xyˈanaˈamëm, nëjkxëp ndukˈoyˈäjtëm (Isaías 48:17, 18). Tim tsojkë Jyobaa dyajkutëgoyaˈanyë anaˈambëtëjk. Ets yëˈëyë jukyˈatandëp yä Naxwiiny pënaty pyuwäˈkëdëbë Diosë kyutujkën as 11:9). Käjpxë Daniel 2:44.

Ixë bideo ¿Tiko Dios tnasˈixë ets jyaˈˈatëdë ayoˈon?

Satanás jyënany ko jäˈäy tmëdunyë Dios mët ko tijaty myoˈoyëty. Per mët ko Dios xymyëmaˈkxtujkëm, mbäät niˈamukë nyajnigëxëˈkëm extëm njukyˈäjtëm ko Mëjkuˈu winˈëˈëmp, ets ko yëˈë nbuwäˈkëmë Diosë kyutujkën kyaj yëˈëjëtyë naxwinyëdë jäˈäy. Käjpxë Job 1:8-12 etsë Proverbios 27:11.

Tim jawyiin, tsojkëp nnijäˈäwëm wiˈixënë Dios ttseky nmëduˈunëm, ets nbanëjkxëm ja relijyonk diˈib tëyˈäjtiˈib tukniˈˈijxëp extëmë Biiblyë jyënaˈany (Fwank 4:23). Ets pën kyaj nduktëjkëmë politikë winmäˈäny ets ni tsip extëmë Jesusta nëjkx nyaˈijxëm ko kyaj nbuwäˈkëmë Satanásë yˈanaˈamën. Käjpxë Fwank 17:14.

Satanás yajtuumbyë myëjää parë jäˈäy ttuktunëdë axëkˈäjtën ets yˈit tsyëënëdët axëëk. Ko njëjpkudijëmë duˈumbë axëkˈäjtën, mbäädë net näägë mëtnaymyaayëbë etsë jiiky mëguˈuk xytyukxikëm o axëëk xytyuˈunëm (1 Peedrʉ 4:3, 4). Ko duˈun njäjtëm, oy ko nduˈukmujkëm mëdë jäˈäy diˈib tsyojktëbë Dios ets nmëmëdoˈojëmë Diosë yˈanaˈamën. Duˈun nëjkx nyaˈijxëm ko Satanás andak ko jyënany ko nipënë Dios tkamëmëdowäˈäny ko tpäädëdë amay jotmay. Käjpxë 1 Korintʉ 6:9, 10 etsë 15:33.

Ijtëm seguurë ko Dios yajjëjptëgoyaambyë ayoˈon etsë axëkˈäjtën mët ko xytsyojkëm. Pënaty jyantsy yaˈijxëdëp ja myëbëjkën ets tpuwäˈägëdë Dios, nëjkxëp jyukyˈattë wieë yä Naxwiiny. Käjpxë Fwank 3:16.