ËXPËJKËN 6
¿Waˈandaa oˈkpë jyukypyëkäˈändë?
1. ¿Ti oybyë ayuk jaˈäjtp parë pënaty të yˈoˈknëdë?
Ko Jesus jyukyˈajty yä Naxwiiny, ta ja myëtnaymyaayëbë Lázaro yˈoˈky diˈibë nety tsënaapy Betania, naa wingon mä Jerusalén. Ko Jesus jam jyajty, të nety tyaxk xëëjëp yˈoˈknë, ta Jesus tˈanmääyë Marta mëdë María, ja myëgaˈaxëtyë Lázaro parë wyoonëjkxëdët mä nety të nyaxtëkë, ko waanë yˈijty, ta mayë jäˈäy myujktë. ¿Mbawinmaapy wiˈix jyantsy xyondaktë Marta mëdë María ko tˈijxtë Jesus dyajjukypyekyë Lázaro? Käjpxë Fwank 11:21-24, 38-44.
Ja oybyë ayuk diˈib myaytyakypyë Biiblyë, tnigajpxy ko oˈkpë jyukypyëkäˈändë. Marta, të nety tnijawë ko Jyobaa twandaˈaky dyajjukypyëkäˈänyë oˈkpë parë jatëgok jyukyˈattët winë xëë yä Naxwiiny. Käjpxë Job 14:14, 15.
2. ¿Wiˈixë oˈkpë yajpäättë?
Dios tˈanmääyë Adán: “Nax ojts mgojy ets nax jatëgok mjëmbitët” (GÉNESIS 3:19)
Ëtsäjtëm, “nax” të ngojëm (Génesis 2:7; 3:19). Kyaj nmëdäjtëm tuˈugë anmë diˈib jap jukyˈäjtp mä niniˈkx. Nan kyaj ti pyëtsemy diˈib nëjkxp wiinktsoo jukyˈäjtpë. Ko nˈoˈkëm, ta kyaj yˈoktuunë kukoˈoxy ets ta tyëgooytyaˈayë jot winmäˈäny. Pääty ko Lázaro jyukypyejky nitii ojts tkanimaytyaˈaky, yëˈë ko oˈkpë kyaj ti tnekyjawëdë. Käjpxë Eclesiastés 9:5, 6, 10.
Näägë jäˈäy jyënäˈändë ko ta ayodakn mä Dios ttëytyunyë jäˈäy ko yˈooky, per kyaj tyëyˈäjtënëty. Extëm të nˈijxëm, oˈkpë kyaj ti tjawëdë. Pääty ko jäˈäy jyënäˈändë ko jyaˈˈatyë ayodakn kyaj tyëyˈäjtënëty nyiwäämbajttëbë Jyobaa. Mëk axëëgë Jyobaa nyayjawëty ko jäˈäy wyinmaytyë ko dyajnitoyë jäˈäy. Käjpxë Jeremías 7:31.
Ixë bideo ¿Wiˈixë oˈkpë yajpäättë?
3. ¿Mbäädë oˈkpë nmëtmaytyakëm?
Oˈkpë kyaj myëdowdë ets nan kyaj mbäät kyäjpx myaytyäˈäktë (Salmo 115:17). Per ta näägë axëk anklës diˈib duˈun nayajnäjxëdëp extëmë jäˈäy diˈib të yˈoˈknë ets mbäädë jäˈäy tmëtmaytyäˈäktë (2 Peedrʉ 2:4). Päätyë Jyobaa mëk tˈaxëkˈixy ko jäˈäy tmëtmaytyäˈägäˈändë oˈkpë. Käjpxë Deuteronomio 18:10, 11.
4. ¿Pënaty jukypyëkandëp?
Miyonkˈamë jäˈäy diˈib të yˈooktë, jyukypyëkäˈändë jatëgok yä Naxwiiny ets axtë diˈib kyaj të tˈixyˈattë Jyobaa ets të ttundë axëkˈäjtën. Käjpxë Apostʉlʉty 24:15.
Pënaty jukypyëkandëp, nëjkxëp tnijawëdë ja tëyˈäjtën mä pënën Dios, tpëjtäˈäktëdë myëbëjkën mä Jesus ets dyajnigëxëˈëktët ko myëdowdë (Diˈibʉ Jatanʉp [Apocalipsis] 20:11-13). Ko duˈun ttundët, ta nëjkx jyukyˈattë yä Naxwiiny agujk jotkujk winë xëë. Käjpxë Fwank 5:28, 29.
5. ¿Ti xytyukniˈˈijxëm mä wiˈixë Jyobaa jyaˈayˈaty ko oˈkpë jyukypyëkäˈändë?
Ko Jyobaa dyajjukypyëkäˈänyë oˈkpë, ja dyaˈixyëtyë tsyojkën etsë yˈoyjyaˈayˈäjtën diˈib kyaj xyjanitëjkëm. Ets mbäät nˈawijx njëjpˈijxëm mët yëˈëgyëjxm ko tkejxyë yˈUˈunk parë ojts xykyuˈoˈkëm. Ko ja oˈkpë nëjkx jyukypyëktë, ¿pën mˈixaampy jatëgok? Käjpxë Fwank 3:16 etsë Romanʉs 6:23.
