Jesus, tuˈuk jeˈeyë ttukniˈˈijxë yˈëxpëjkpëtyë relijyongë tëyˈäjtënbë, ets ojts tˈijxkijpxyë mët tuˈugë tuˈu diˈib mënëjkxp mä jukyˈäjtënë winë xëëbë, per niwaanë diˈib jap tëjkëdëp (Matewʉ 7:14). Dios yëˈëyë kyupejkypy pënaty mëduunëp extëmë Biiblyë tyukniˈˈixë, ets ko duˈun tkuytyundë, ta tuˈugyë yajpäättë. Käjpxë Fwank 4:23, 24; 14:6, etsë Éfesʉ 4:4, 5.

Ixë bideo ¿Kyupëjkypyë Dios tukëˈëyë relijyonk?

Jesus ojts tnaskäjpxë ko jaˈˈatäämbë jäˈäy diˈib jënäˈänandëp ko tmëdattë tëyˈäjtën ets twinˈëënäˈändë jäˈäy. Duˈun nyayajnaxäˈänëdë extëmë Dios mëduumbë. Per mijts mbäät xyˈëxkapyë relijyonk diˈib tëyˈäjtën, pes yaˈijxëdëbë jäˈäyˈäjtën diˈib yajtukˈëxkäjptëp ko tpanëjkxtë Kristë. Käjpxë Matewʉ 7:13-23.

Min nˈokˈijxëm mëgoxk peky diˈib yajtukˈëxkäjptëp:

• Yˈijxtëbë Biiblyë extëmë Diosë yˈAyuk. Tyuundëbë mëjää parë tmëmëdowdë Diosë yˈanaˈamën diˈib yajpatp mä Biiblyë, kyaj yëˈë tpanëjkxtë wiˈixë naxwinyëdë jäˈäy tyukniˈˈixë (Matewʉ 15:7-9). Ets nan kyuytyuundëp diˈib kyäjpxwäˈkxtëp. Käjpxë Fwank 17:17 etsë 2 Timotee 3:16, 17.

•   Myëjˈijxtëbë Diosë xyëë, Jyobaa. Jesus myëjˈijxë Tyeetyë xyëë mët ko tnimaytyaky. Tyukmëtmaytyakë jäˈäy mä pënën Jyobaa ets nan tyukniˈˈijxë parë tninuˈkxtäägë Diosë xyëë ets wyäˈätsët (Mateo 6:9, NM). Mä mtsëënë, ¿diˈibë relijyonk nyimaytyakypyë Diosë xyëë? Käjpxë Juan 17:26 etsë Romanos 10:13, 14, NM.

• Kyäjpxwäˈkxtëbë Diosë yˈAnaˈam Kyutujkën. Jesus miin yä Naxwiiny parë tkäjpxwäˈkxët ja oybyë ayuk diˈib mä Diosë Kyutujkën, diˈib yajminaambyë jotkujkˈäjtën. Ets duˈun ttuuny axtë ko yˈoˈky (Lukʉs 4:43; 8:1; 23:42). Nan yˈanmääyë yˈëxpëjkpëty parë tnimaytyäˈäktëdë tadë gobiernë. Pääty, pën jam pën mniminyëty ets mdukmëtmaytyaˈagyëtyë Diosë yˈAnaˈam Kyutujkën, ¿diˈibë relijyongëdaa tyukˈijtëp? Käjpxë Matewʉ 24:14.

• Kyaj ttuktëkëdë tijatyë jäˈäy tyuundëp. Jesusë yˈëxpëjkpëty kyaj ttuktëkëdë politikë ets tijatyë jäˈäy yajtsiptaktëp (Fwank 17:16; 18:36). Nan kyaj jyukyˈattë ets yˈadëˈëtstë extëmë naxwinyëdë jäˈäy. Käjpxë Santya̱ˈa̱gʉ 4:4.

• Yajnigëxëˈktëp ja tsojkën. Diosë yˈAyuk yëˈë diˈib tukniˈˈijxëdëp parë nyaywyingutsëˈëgëdët nixim niyam oy mä tsyoondët. Relijyonk diˈib kyaj tyëyˈäjtënëty tyuktëjkëdëbë tsip, per pënaty jyantsy pyanëjkxtëbë Kristë kyaj ttuktëkëdë (Miqueas 4:1-3). Niˈigyë tiempë dyajtundë etsë myeeny syentääbë parë tpudëkëdë ets tmëjämoˈoytyë myëguˈuktëjk. Käjpxë Fwank 13:34, 35 etsë 1 Fwank 4:20.

¿Wiˈix mˈokwinmay? ¿Diˈibë relijyonk tukniˈˈijxëp extëmë Biiblyë jyënaˈany, myëjˈijxypyë Diosë xyëë ets nyimaytyakypy ko Diosë Kyutujkën yëˈëyë yajminaambyë jotkujkˈäjtën yä Naxwiiny? ¿Diˈibë relijyonk jyantsy yajnigëxëˈktëbë tsojkën ets kyaj ttuktëkëdë tsip? Käjpxë 1 Fwank 3:10-12.