¿Myajmëjwindëkëyaambyë mʼëxpëjkënë diʼib mä Biiblyë? ¿Mnijawëyaampy wiʼix yajnimaytyaʼaky tuʼugë bersikulo, lugäär, jäʼäy o tijaty tuun jäjtë diʼib myaytyakypyë Biiblyë? ¿Të mnayajtëyëty pën mbäät mbudëkëtyë Diosë yʼAyuk parë xyaʼoyëdë mjotmay? Pën duʼun, oy ko mnëjkxët mä bibliotekë diʼibëts nmëdäjttëp mä ja Tëjk mäjëts nʼëxpëktë.

Mä bibliotekë tap diʼibëts xypyudëjkëdëp parëts tijaty nbayoʼoytyë. Waʼan kyaj xymyëdäjtäʼäyë ëxpëjkpajn mä mʼayuk diʼib yajpëtsëëmdëbë Jyobaa tyestiigëty, per mä bibliotekë diʼib yajpatp mä ja Tëjk mäjëts nʼëxpëktë, tap mayë ëxpëjkpajn diʼib näämnëm pëtsëëmp. Nan waʼan jyapëty kanäk pëkyë Biiblyë etsë diksionaaryë etsë wiinkpë ëxpëjkpajn diʼib mbäät mbudëkëty. Mbäät jap mʼëxpëky mä kyajnëm tsyondaʼaky ja naymyujkën o ko nety të jyëjpkëxy. Ets pën jap tuʼugë komputadoorë, mbäät tmëdatyë programë Watchtower Library, diʼib myëmiimpy mayë ëxpëjkpajn ets mä mbäät xyʼëxtäʼäy tijaty mdimnijawëyaampy, mbäät tuʼugë ayuk o tuʼugë bersikulo.

Kajaa pyudëkëdë diʼib të yajkujayëdë mä Wiʼix njukyʼäjtëm ets nDiosmëduʼunëm. Mbäät xyʼëxpëky mä bibliotekë ti mbatëp. Diʼib kyuentʼäjtypyë bibliotekë, yëʼë diʼib yajnäjxypy mä Wiʼix njukyʼäjtëm ets nDiosmëduʼunëm, yëʼë yʼijxypy parë jyapʼatët ja ëxpëjkpajn diʼib näämnëm pëtsëëmp ets nan yëʼë diʼib myäʼkxtaapy. Mbäät yëʼë o diʼib myaʼëxpëjkëp mdukniʼʼixëty wiʼix xypyäädët ja ëxpëjkpajn diʼib mtsejpy. Per jamyats ko kyaj mbäät xymyënëjkxyë liibrë diʼib mä bibliotekë ets nan oy ko xykyuentʼatët, kyaj xywyinjayët.

Biiblyë jyënaʼany ko parë nbatëm ja “Diosë yʼëxpëjkën”, tsojkëp nduʼunëmë mëjää parë nʼëxtäʼäyëm “extëm ti diʼib ijtp yuʼutsy diʼib tsobatp” (Proverbios 2:1-5). Ets mbäät xyʼëxtääytsyondaʼaky mä bibliotekë diʼib yajpatp mä ja Tëjk mäjëts nʼëxpëktë.

• ¿Tijaty yajpatp mä bibliotekë mä ja Tëjk mäjëts nʼëxpëktë parë tijaty yajpayoʼoy?

• ¿Pën mbäät mbudëkëty parë xytyukʼoyʼatët tijaty yajpatp mä bibliotekë?