Mä Escrituras Griegas Cristianas kanäkʼok japë apostëlë Pablo yajnimaytyaʼaky mëdë Bernabé. Tyäʼädë yetyëjkëty yëʼë ijty kyuʼijxëdëp ja naymyujkën. ¿Tiko duʼun ttuundë? Yëʼko ttsojktë etsë myëguʼuktëjk oy yajpäättët mëdë Dios. Pablo nyinëjkxan jatëgokë myëguʼuktëjk parë tnijawëyaʼany wiʼix jam yaʼix yajpäättë. Ojts tninëjkxy parë tjotkujkmoʼoyaʼany, oy kajaa ojts tyuʼuyoʼoy (Apostʉlʉty 15:36). Tyam, nan yëʼë duʼumbë tsojkën myëdäjttëp diʼibëts xykyuʼijxëdëp.

Xyjotkujkmooytyëbëts. Diʼib tuump sirkuitë ja tkuʼixë naa 20 naymyujkën, ets windëdujk poʼo nyaxy mä tuʼukpë naymyujkën ets yʼity tuk sëmään. Tyäʼädë nmëguʼuktëjkëtyëts, mëjwiin kajaajëts xypyudëkëdë ets nanduʼun ja nyëdoʼoxy pën kasäädëty. Yëʼëjëty, yʼixyʼatandëbë ënäʼktëjk etsë mëjjäʼäytyëjk, xyjantsy pyanëjkxandëbëts ëwäʼkx käjpxwäʼkxpë ets kyuʼixëyandëbë jäʼäy diʼibëts nyaʼëxpëjktëp. Tyäʼädë nmëguʼuktëjkëtyëts mëdë mëjjäʼäytyëjk xykyuʼijx xykyugäjpxëdëbëts mäjëts ntsëënëdë, ets nan yajnäjxtëbë diskursë mä naymyujkën ets mä asamblee diʼibëts xypyudëjkëdëp (Apostʉlʉty 15:35).

Naytyukjotmaytyuunëdëp niʼamukë jäʼäy. Tyäʼädë sirkuitë diʼibëts xykyuʼijxëdëp, naytyukjotmaytyuunëdëp wiʼix yajpäättë tuʼuk tuʼugë naymyujkën ets wiʼix yʼittë mëdë Dios. Nan tuʼukmujktëp mëdë mëjjäʼäytyëjk ets ja diʼib pyudëjkëbë mëjjäʼäytyëjk parë tnimaytyäʼäktë wiʼix të myëjwindëkë Diosë tyuunk ets nan yajmooytyëbë käjpxwijën parë mas oy tyundët. Yëʼëjëty, pyudëjkëdëp ja prekursoorëty parë oy ttundët ja Diosë tyuunk ets oy wyimbëtsëmët, nan jotkujk nyayjawëdë ko tʼixyʼattë jäʼäy diʼib apenënëm tuʼukmujkp mët ëëtsëty, ets nan tyukxondaktëp ko tnijawëdë wyimbattë mä Diosë tyuunk. Niduʼuk niduʼuk dyajtundë jyot myëjää parëts ndukʼoyʼattë (2 Korintʉ 8:23). Nʼokmëdäjtëmë duʼumbë mëbëjkën ets nʼokmëduʼunëmë Dios (Ebreeʉsʉty 13:7).

• ¿Tiko sirkuitë tkuʼixëdë naymyujkën?

• ¿Wiʼix mbäät xytyukʼoyʼaty kojëts nyajkuʼixëdë?