Desde tëëyëp, Jyobaa duʼunyëm ttseky etsë familyë ttukniwitsëdët parë yajpäättët tuʼugyë ets parë oy yʼittët mët yëʼë (Deuteronomio 6:6, 7). Pääty ëëtsëty, Jyobaa tyestiigëty, njuʼttëbëtsë tiempë sëmään sëmään parëts nDiosʼawdattë tuk familyë, nʼijxtëbëts ja lugäär mäjëts mbäät oy nnayjawëdë ets yëʼëts nʼëxpëjktëbë Biiblyë diʼibëts mbäät xypyudëkëdë. Ets diʼib naytyuʼuk yajpattëp, mbäät nanduʼun dyajtundë tiempë parë Diosʼawdattët ets tpayoʼoytyët mä Biiblyë ti nyijawëyandëp.

Parë niʼigyë yajmëwingonëdë Jyobaa. “Mëwingondë Dios, es yëʼë nandëʼën mmëwingonëdëp miitsëty.” (Santya̱ʼa̱gʉ 4:8.) Ko ngäjpxëmë Biiblyë, mbäät nʼixyʼäjtëm niʼigyë Jyobaa ets nnijäʼäwëm wiʼix jyaʼayʼaty ets tijaty tyuumpy. Tuk pëky wiʼix mbäät mʼëxpëjktsondaʼaky mëdë familyë, yëʼë ko mëk xykyäjpxtëdë Biiblyë, mbäät xypyanëjkxtë programë diʼib miimp mä Wiʼix njukyʼäjtëm ets nDiosmëduʼunëm sëmään sëmään. Mbäät niduʼugaty mnaytyukniwitsëdë nuʼun xykyäjpxäʼändë ets ta net xynyimaytyäʼäktë ti të mdukniʼʼixëdë.

Parë tuʼugyë yʼittëdë familyë. Ko tʼëxpëktëdë Biiblyë tuʼukmukyë, mbäät niʼigyë nyaymyëwingonëdë ja kasäädë jäʼäy etsë uʼunktääk uʼunkteety mëdë yʼuʼunk yʼënäʼk. Ets yëʼë tuʼugë xëë diʼib niʼamukë agujk jotkujk jyantsy jyëjpʼijxtëp. Ja tääk teety këʼëm mbäät twinʼixtë ti tyukmëtmaytyäʼägandëp ja yʼuʼunk yʼënäʼk diʼib mbäät pyudëkëdë, duʼun extëm tmëdattë ja xyëë jyëmëjt, ets mbäät twinʼixtë mä rebistë Diʼib Xytyukʼawäʼänëm etsë ¡Despertad! o mä Internet jw.org. Mbäät yëʼë tnimaytyäʼäktë ja amay jotmay diʼib pyattëp ja yʼuʼunk yʼënäʼk mä eskuelë ets wiʼix dyaʼoyëdët. Oyxyëp ko nanduʼun tʼixtë JW Broadcasting (tv.pr418.com) ets ok ta tnimaytyäʼäktët. Nan mbäät tʼëwdë ja ëy diʼib yaʼëwäämp mä naymyujkën ets ko dyajjëjpkëxtët mbäädë net ti tjëʼxtë o tʼuuktë.

Kojëts nduʼukmuktë tuk familyë sëmään sëmään mä ja xëë diʼibëts të nwinʼixtë parëts nʼawdattë Jyobaa, yëʼëts xypyudëjkëdëp parëts ndukxondäʼäktëdë Diosë yʼAyuk, ets mëjwiin kajaats nyajkunuʼkxäʼändë kojëts ndundë mëjää (Salmo 1:1-3).

• ¿Tikots njuuttë tiempë parëts nDiosʼawdattë mëdëtsë nfamilyë?

• ¿Ti mbäät ttundë tääk teety parë niʼamukë ttukxondäʼäktët ja ëxpëjkën?