MÄ BIIBLYË kyaj tnigajpxy näˈä meerë Jesus ojts myaxuˈunkˈaty. Per tapë tekstë mä tnigajpxy tiko mbäät njënäˈänëm ko kyaj myaxuˈunkˈäjty disiembrë poˈo.

¿Wiˈix disiembrë poˈo yˈixëtyë tiempë Belén mä Jesus myaxuˈunkˈäjty? Extëmë judiyëtëjkë kyalendaaryë myëmiimpy  tuˈugë poˈo diˈib xyëwˈäjtypy kisleb, ja kyaˈay naa nobiembrë kujkwäˈkxp axtë disiembrë kujkwäˈkxp, mä tuuboˈo xux poˈo. Ta net myinyë tebet diˈib käˈäp naa disiembrë kujkwäˈkxp ets eneerë kujkwäˈkxp, ja mä niˈigyë jyantsy xyuxy o tyëtykyëty ets axtë mumaty käˈäbë tsujx tsäjpˈeˈpyky o yelë. Min nˈokˈijxëm wiˈixë Biiblyë tnigajpxy mä wiˈix yˈixëty jamë tiempë.

Esdras ojts tkujayë mä Biiblyë ko mä tadë poˈo kisleb tuu xujxp. Jyënaˈany ko ojtsë mayjyaˈay tyuˈukmuktë jam Jerusalén “mä ja myëdaxtujk poˈo [kisleb], mä nety yˈany 20 ja poˈo”. Nanduˈun jyënany ko ja jäˈäyëty “jyantsy tsyëyuytyë mët [...] ko jyantsy tyuˈu”. Ets kom tuu xujxpë nety, ta ja mayjyaˈay diˈibë nety jam të tyuˈukmuktë jyënandë: “Tuuboˈo tyam meerë. Kyaj mbäät nyajpatëm tëjäˈp” (Esdras 10:9, 13; Jeremías 36:22). Pääty mbäät njënäˈänëm ko disiembrë poˈo ja borreegë kuentˈäjtpë tsyuumdëp ja jyëyujk yˈanimal parë këdiibë ja tsuˈum dyajnaxtët tëjäˈp.

Perë Biiblyë jyënaˈany ko ja ux mä Jesus ojts myaxuˈunkˈaty, tamë netyë jäˈäy byorreegë kuentˈattë kamoty. Lucas duˈun ojts tkujayë mä Biiblyë: “Es Belén käjpnbëˈääy jap ja jäˈäy myäˈädë aamyoty diˈibë byorreegë kyuentˈäjttëp” (Lukʉs  2:8-12). Extëm nbëjkëmë kuentë kyaj jeˈeyë nyëjkxtë xëëny kamoty, jyënaˈany ko määdëp jam. Jamën kamoty ja byorreegë tnatsunaxtë. Pääty pën disiembrë poˈo mëk tuu mëk xujxp jam Belén, ¿määdëpxyëp ja borreegë kuentˈäjtpë jam kamoty winwäˈätstuuy? Pes kyajxyëp. Pääty mbäät njaygyujkëm ko Jesus kyaj ojts myaxuˈunkˈaty disiembrë poˈo. *

Biiblyë nyigajpxypy yajxon näˈä Jesus ojts yˈooky, per kyaj nëgoo tmaytyaˈaky näˈä meerë myaxuˈunkˈäjty. Tyäˈädë yëˈë xytyukjamyajtsëm extëmë rey Salomón ojts jyënaˈany: “Tuˈugë oybyë xëëw mas oy ets kyaj dyuˈunëtyë oybyë aseytë, ets mas oy ja xëëw mä yˈooky ets kyaj dyuˈunëty ja xëëw mä myaxuˈunkˈaty” (Eclesiastés 7:1). Pääty yajxon njaygyujkëm tiko Biiblyë niˈigyë tmaytyaˈaky mä wiˈixë Jesus jyukyˈajty ets mä wiˈix ojts yˈooky, ets kyaj dyuˈunëty mä ojts myaxuˈunkˈaty.