1, 2. ¿Pën diˈib mbäät nˈaˈoˈkëm?

OKWINMAY ko tuˈam myajpääty ets ta ajotkumonë tsäjp jyantsy wyindujktäˈäy. Ta jyantsy nyojktaˈagyë anaaw jëtsuk ets jyantsy tyëkë komduubë. Ta mijts mjantsy tsyoony jotëgoy parë xyˈëxtäˈäyaˈany mä mˈoktuutsoˈogët. Ta xyˈijxpääty tuˈugë tëjk patwäˈäts, ets xyˈixy ko tëˈëts jap ets mbäät mguwäˈänyëty. ¡Jotkujk mjantsy nyayjawëdët ko nety të xypyaaty mä mduutsoˈogët!

² Tyam kutsëˈëgë tiempë ets kujotmay, pes niˈigyë yˈoˈktëyë jukyˈäjtën. Per tam pën mbäät nˈaˈoˈkëm, ets diˈib mbäät dyaˈoyë waˈan tim diˈibëtyë jotmay diˈib tyam kyaj mbäät pën dyaˈoyë. ¿Pën yajmaytyakp? Okˈix wiˈixë Biiblyë jyënaˈany: “Nˈanëëmëyaˈanyëtsë Jyobaa: Mijts nˈaˈoˈkëp ets mä mijts nnaygyumatsyëty, mijts nDiosˈäjtypy, diˈibëts njantsy tyukˈijxpataampy” (Salmo 91:2).

3. ¿Ti mbäät nduˈunëm parë Jyobaa xykyuentˈäjtëm?

³ ¡Jantsy oy nnayjäˈäwëm ko mbäät  xykyuentˈäjtëmë Jyobaa diˈib tijaty të dyajkojtäˈäy ets diˈib yˈanaˈamdaapy tukëˈëyë! Pes ni pën ets nitii duˈunë mëjääw tkamëdaty extëmë Jyobaa. Ets oy nbatëmë ayoˈon jotmay, Jyobaa mbäät dyaˈoˈoyëtyaˈay. Per ¿ti net mbäät nduˈunëm parë Jyobaa xykyuentˈäjtëm? Tsojkëp nmëdäjtëmë mëbëjkën ko yëˈë mbäät xypyudëjkëm. Biiblyë xyˈanmäˈäyëm nanduˈun: “Naymyëdatëdë mët ja Diosë tsyojkën” (Juudʉs 21). Duˈunë duˈun, nˈoktsojkëmë Dios xëmë ets ninäˈä ngamastutëmë nDeetyˈäjtëmë tsäjpotmëdë. Pën nduˈunëm duˈun, ta nˈijtëm seguurë ko yëˈë mbäät xykyuentˈäjtëm. Per ¿ti mbäät nduˈunëm parë nˈijtëm tuˈugyë mëdë Jyobaa?

4, 5. ¿Wixatyë Dios xytyukˈijxëm ko xytsyojkëm?

⁴ Diˈib mbäät xypyudëjkëm parë xëmë ntsojkëmë Dios, yëˈë ko nˈijxëm wixaty yëˈë xytsyojkëm. Okwinmay tijaty tukniˈˈijxënë të xynyijawë mä Biiblyë ko të xyˈëxpëkyë tyäˈädë liibrë. Extëm nˈokpëjtakëm, parë njukyˈäjtëm agujk jotkujk, Jyobaa të xymyoˈoyëmë tyäˈädë Naxwinyëdë jantsy tsuj, mä jyaˈˈaty tukëˈëyë diˈib mbäät nijukyˈäjtëm, jyaˈˈatyë jeˈxy pëky, nëë, ääy kepyë tsujatypyë etsë jëyujk animal. Nanduˈun nnijäˈäwëm ko Biiblyë yëˈë Diosë yˈAyuk, ets jap mä nnijäˈäwëm ti Dios txëˈaty ets wiˈix jyaˈayˈaty. Nanduˈun tmaytyaˈaky ko Dios ojts tkexyë yˈUˈunk yä Naxwiiny ets ojts tnaˈixy yˈayowët ets yˈoogët ëtsäjtëmgyëjxm (Fwank 3:16). Oyjyaˈayë Jyobaa, pääty ojts xytyuknigajxëmë yˈUˈunk ets mët yëˈëgyëjxm mbäät nˈawijx njëjpˈijxëm ja jotkujkˈäjtën diˈib miin këdakp.

⁵ Ets nbäädäˈänëmë tyäˈädë jotkujkˈäjtën, mët ko Jyobaa të nanduˈun dyajnaxkëdaˈaky tuˈugë gobiernë  jam tsäjpotm mä yˈAnaˈamäˈänyë Kristë. Tyäˈädë Anaˈamën, tsojk dyajjëjptëgoyaˈanyë ayoˈon jotmay ets dyajjëmbitäˈänyë Naxwinyëdë extëm tuˈugë it lugäärë tsujpë. ¡Okwinmay wiˈix jantsy oy yˈixˈatäˈäny! ¡Taanëmë net tuˈugyë njukyˈatäˈänëm agujk jotkujk ets xëmëkyëjxm! (Salmo 37:29). Ets tyam mä kyajäˈtynyëmë tyäˈädë tiempë, Dios xymyoˈoyëmë käjpxwijën parë oy njukyˈäjtëm. Ja tuk pëky wiˈixë Jyobaa tsyojkën dyaˈixyëty, ja ko mbäät nmënuˈkxtakëm oytyim näˈäjëty ets oytyim määjëty. Diˈib yam tuˈuk majtsk të nnijäˈäwëm, yëˈë mdukˈijxëp ko Jyobaa mtsojkëp ets ko nan tsyejpy niˈamukë jäˈäy.

6. ¿Wiˈix mbäät xymyëjjawë ko mtsekyëtyë Jyobaa?

⁶ Oknayajtëwëdë net, “pënë Jyobaa xytsyojkpëts, ¿wiˈixëtsë net ndukˈixët ko ntsejpyëts nanduˈun?”. Mbäät mayë jäˈäy jyënäˈändë, “pes kots ntsokët nanduˈun”. ¿Nanduˈun mijts mjënäˈäny? Wenë, Jesus ojts jyënaˈany ko tadë anaˈamën diˈib niˈigyë jyëjpˈamëty, yëˈë: “Mtsoktëp ja mWintsën Dios mët winë mjot, [...] es mët winë mjot mwinmäˈäny” (Matewʉ 22:37). Kanäk pëky jyaˈˈaty tiko mbäät xytsyekyë Jyobaa. Per parë xytsyokët mët tukëˈëyë mjot mgorasoon, mniniˈkx mgëbäjk etsë mjot mwinmäˈäny, ¿tsobäädëbëdaa ko jeˈeyë xyjawët tuˈugë tsojkën?

7. Parë xytsyokëdë Jyobaa mët tukëˈëyë mjot mgorasoon, ¿tsobäädëp ko jeˈeyë xyjawët tuˈugë tsojkën? Oknimaytyäˈäk tiko duˈun mˈatsoy.

⁷ Mä Biiblyë jyënaˈany ko parë ntsojkëmë Jyobaa kyaj jeˈeyë tˈandijy njäˈäwëm tuˈugë tsojkën. Wenë, jëjpˈam ets jawyiin njäˈäwëm tuˈugë tsojkën parë mbäädë  Jyobaa ntsojkëm mët tukëˈëyë jot korasoon. Parë niˈigyë xyjaygyukët, min nˈokpëjtakëm tuˈugë ijxpajtën: pën mijts mtsejpy tuˈugë mansanë, ¿mgomformaratëp ko jeˈeyë myajmoˈoyët tuˈugë mansanë päjk? Pes kyaj, mijts yëˈë mtsejpy ja ujts tsäˈäm. Per parë yonët tuˈugë mansanë kepy ets dyakët ja tyëëm, jawyiin tsyekyëty ja mansanë päjk. Nanduˈunën jyaty mëdë tsojkën diˈib jawyiin njäˈäwëm mä Jyobaa, tsojkëp yaagët. Mä Biiblyë jyënaˈany: “Es ko ntsojkëm ja Dios, nguytyuˈunëmë nety yëˈë yˈanaˈamën. Es kom xyˈuˈunkˈäjtëm ja Dios es ntsojkëm, kyaj mëk njäˈäm es nguytyuˈunëm diˈibë yëˈë xytyukˈanaˈamëm” (1 Fwank 5:3). Pääty, pën njantsy tsyojkëmë Jyobaa Dios, tsojkëp nyajnigëxëˈkëm mä jukyˈäjtën, duˈunxyëp extëm ko nˈyäjkëm ja ndëëmˈäjtëm (käjpxë Matewʉ 7:16-20).

8, 9. ¿Wiˈix nyaˈijxëm ko ntsojkëmë Jyobaa ets ko nmëjjäˈäwëm tijaty yëˈë të xytyukmëduˈunëm?

⁸ Nyaˈijxëmë nety ko ntsojkëmë Jyobaa ko  nmëmëdoˈowëmë yˈanaˈamën ets nguytyuˈunëm. Kyaj tsyipëty ets nan kyaj myëkëty. Yëˈë të xymyoˈoyëmë yˈanaˈamën parë nˈijtëm jotkujk ets ndukxondakëmë jukyˈäjtën (Isaías 48:17, 18). Ko nasˈijxëm etsë Jyobaa xytyuˈumoˈoyëm, yëˈë nety nyaˈijxëm ko nmëjjäˈäwëm mëjwiin kajaa tijaty yëˈë të ttuny ëtsäjtëmgyëjxm. Per jotmay myëët njënäˈänëm ko mayë jäˈäy kyaj tmëjjawëdë. Ëtsäjtëm kyaj duˈun njäˈäyˈatäˈänëm extëm näägë jäˈäy diˈib kyaj ojts tmëjjawëdë tijatyë Jesus tyuun. Extëm tëgok, Jesus ojts dyaˈˈagëdaˈaky nimäjkë jäˈäy diˈibë nety myëdäjtypyë leprë päˈäm, per jeˈeyë tuˈuk ojts myoˈoyëtyë dyoskujuyëm (Lukʉs 17:12-17). Ëtsäjtëm duˈun njäˈäyˈatäˈänëm extëm ja jäˈäy diˈib ojts dyakyë dyoskujuyëm, ets kyaj dyuˈunëty extëm ja nidaxtujkpë diˈib ninuˈun ojts tkamëjjawëdë.

⁹ ¿Diˈibatyë netë Jyobaa yˈanaˈamën mbäät nmëmëdoˈowëm? Të kanääk yajnimaytyaˈaky mä tyäˈädë liibrë. Min nˈokˈajamyajtsëm tuˈuk majtsk, pes pën nmëmëdoˈowëmë Diosë yˈanaˈamën, ta yëˈë mbäät xypyudëjkëm parë ntsojkëmë Dios xëmë.

10. ¿Tiko jyëjpˈamëty nˈakˈixyˈäjtëmë Jyobaa Dios?

¹⁰ Parë nmëwingoˈonëmë Jyobaa tsojkëp nˈixyˈäjtëm yajxon. Ets xëmë nˈixyˈäjtˈadëˈëtsäˈänëm. Okwinmay ko mijts myajpääty kamoty ets jam xyajnaxäˈänyë tsuˈum, jantsy xujxp o tëtyky, ta xyajmëjë jëën parë mjokxpëkäˈäny. ¿Mnaˈixëp ets ja jëën pyiˈitsët wanaty wanaty? Pes kyaj. Seguurë ko niˈigyë xypyëjtäˈägëdë jäˈäxy parë këdiibë pyiˈitsët, yëˈko mbäät axtë mxux juuny ko ja jëën pyiˈitsët. Pes duˈun extëmë jäˈäxy niˈigyë dyajmëjë jëën, nanduˈunë “Diosë yˈëxpëjkën”, niˈigyë dyajmëjwindëkë  ja tsojkën diˈib njäˈäwëm mä Jyobaa (Proverbios 2:1-5).

11. ¿Wiˈix ojts wyimbëtsëmy tukëˈëyë diˈibë Jesus ojts ttukniˈˈixëdë ja yˈëxpëjkpëty?

¹¹ Jesus tsyojk ets ja yˈëxpëjkpëty kyaj dyajxaamdët ja tsyojkën diˈibë nety myëdäjttëp mä Jyobaa ets mä yˈAyuk. Pääty mä nety të jyukypyeky, ojts ttukmëtmaytyaˈaky nimajtskë yˈëxpëjkpë tijatyë nety të dyaˈˈadëy mä Biiblyë. ¿Wiˈix ojts wyimbëtsëmy? Ok ja yˈëxpëjkpëty ojts jyënäˈändë: “¿Këdii jantsy oyë jot korasoon të njäˈäwëm ko të xymyëgäjpxëm tuˈääy, ko të xytyukmëtmaytyaktäˈäyëmë Diosë jyaaybyajtën?” (Lucas 24:32, TNM).

12, 13. 1) ¿Wiˈix mayë jäˈäy të jyatyë tsyojkën diˈib myëdäjtypy mä Dios ets mä Biiblyë? 2) ¿Ti mbäät nduˈunëm parë kyaj xyaamëdë tsojkën?

¹² Ko xyˈëxpëjktsondaky wiˈixë Biiblyë tyukniˈˈixë, ¿këdii mëk agujk jotkujk ojts mnayjawëty ets mëk ojts xyjawë ja tsojkën mä Dios? Nanduˈun mayë jäˈäy nyayjawëdë. Per tsojkëbë net ets niˈigyë xyajmëjwindëkëdë mtsojkën ets kyaj xyaamët. Pes mayë jäˈäy të dyajxaamdë tsyojkën extëmë Jesus ojts tnaskäjpxë: “Kyaj ja jäˈäyëty tnakymyëdattët ja tsojkën” (Matewʉ 24:12). ¿Ti mbäät xytyuny ets kyaj xyaamëdë mtsojkën diˈib mjäˈäwëp mä Jyobaa ets mä ja tëyˈäjtën diˈib miimp mä Biiblyë?

¹³ Ixyˈäjtˈadëˈëts niˈigyë Jyobaa etsë Jesukristë (Fwank 17:3). Winmay këkpäät ko xykyäjpxëdë Diosë yˈAyuk ets nayajtëwëdë: ¿Titsë tyäˈädë xytyukniˈˈijxëp mä Jyobaa? ¿Xypyudëjkëbëts niˈigyë ets ntsokëdëtsë Jyobaa mët tukëˈëyë njot ngorasoonëts, njot nwinmäˈänyëts etsë niniˈkx ngëbäjkëts? (käjpxë 1 Timotee 4:15). Pën mbawinmaapy duˈun, ta ninäˈä kyaxaamëdë mtsojkën diˈib mmëdäjtypy mä Jyobaa.

14. ¿Tiko jyëjpˈamëty nuˈkxtakëm parë kyaj xyaamëdë tsojkën diˈib njäˈäwëm mä Jyobaa?

 ¹⁴ Ja tuk pëky diˈib mbäät mbudëkëty ets kyaj xyaamëdë mtsojkën mä Jyobaa, yëˈë ko xëmë xymyënuˈkxtäˈägët (1 Tesalónikʉ 5:17). Mä kapitulo 17 të nnijäˈäwëm ko Jyobaa tsyejpy ets nmëgäjpxëm. Ko janäämëty ngäjpx nmaytyakëm mët tuˈugë jäˈäy ets nˈanmäˈäyëm ti nwinmäˈäyëm o ti njäˈäwëm mä jot korasoon, ta niˈigyë kyëktëkë naymyayë. Nanduˈunën jyaty mëdë Jyobaa, ko nmënuˈkxtakëm janäämëty, ta kyaj tyëgoyëdë naymyayë diˈib nmëdäjtëm mët yëˈë. Tsojkëp nduˈunëmë mëjääw ets kyaj agëbajkyë Jyobaa nmënuˈkxtakëm o naa tim duˈunyëm nˈanmäˈäyëm. Nˈokmëgäjpxëmë Jyobaa extëm tuˈugë mutsk ënäˈk tmëgajpxyë tyeety. Jeˈeyë ko nmëgäjpxëm mëdë wintsëˈkën, per mbäät ndukmëtmaytyaktäˈäyëm tijaty njäˈäwëm mä jot korasoon (Salmo 62:8). Duˈunë duˈun, parë nmëduˈunëmë Jyobaa tsojkëp ets naytyuˈuk nˈëxpëjkëmë Biiblyë ets nuˈkxtakëm mët winë jot korasoon. Ko duˈun nduˈunëm, yëˈë diˈib nëjkx xypyudëjkëm ets ntsojkëmë Dios xëmë.

15, 16. Ko njoˈomëm ëwäˈkx käjpxwäˈkxpë, ¿tiko mbäät jotkujk nnayjäˈäwëm ets tiko mbäät nˈijxëm extëmë Dios të xytyukmayˈäjtëm?

¹⁵ Ta Diosë tyuunk diˈib nduˈunëm anaytyuˈuk extëm ko ngäjpxëmë Biiblyë ets ko nuˈkxtakëm. Per nDios mëduˈunëm nanduˈun ko ndukmëtmaytyakëmë jäˈäy tijaty nmëbëjkëm. ¿Të mijts ogäˈän xytyukmëtmaytyaˈagyë jäˈäy ja tëyˈäjtën diˈib yajpatp mä Biiblyë? Pën të, tëdën jotkujk mnayjawëty ko të xytyuunë Diosë tyuunk (Lukʉs 1:74). Ko ndukmëtmaytyakëmë jäˈäy tijaty kujk nnijäˈäwëm mä Jyobaa, ta nguytyuˈunëm diˈib  të nyajtuknipëjkëm: nˈëwäˈkx ngäjpxwäˈkxëm ja oybyë ayuk diˈib mä Diosë yˈAnaˈam Kyutujkën (käjpxë Matewʉ 24:14; 28:19, 20).

¹⁶ Apostëlë Pablo ojts tmëjjawë tyäˈädë tuunk, pääty jyënany ko Diosë nety të tyukmayˈatyëty (2 Korintʉ 4:7). Nitii tuunk kyaduˈunëty extëm ko nigäjpx nimaytyakëmë Jyobaa ets tijaty tyuknibëjtakëp. Ets njënäˈänëm duˈun mët ko oyë tadë Wintsën diˈib nmëduˈunëm, ets ja tuk pëky, mët ko mëjwiin kajaa ndukˈoyˈäjtëm. Ko njoˈomëm ëwäˈkx käjpxwäˈkxpë, ta nbudëjkëmë jäˈäy diˈib jyantsy myëwingonandëbë Jyobaa Dios ets tpanëjkxtët ja tuˈu diˈib mënëjkxp mä jukyˈäjtënë winë xëëw winë tiempë. Kyaj jyaˈˈatyë wiinkpë tuunk diˈib mbäät niˈigyë xymyoˈoyëmë jotkujkˈäjtën, ¿këdii? Ko nigäjpx nimaytyakëmë Jyobaa etsë yˈääw yˈAyuk, niˈigyë myëjwindëkë mëbëjkën etsë tsojkën mä Jyobaa. Ets yëˈë kyaj tjäˈäytyëgoyaˈany ko duˈun nbëjtakëmë jot mëjääw (Ebreeʉsʉty 6:10). Pääty, ko xëmë nmëduˈunëmë Dios yëˈë diˈib mbäät xypyudëjkëm ets xëmë ntsojkëm (käjpxë 1 Korintʉ 15:58).

17. ¿Tidën ko tsojk yajtunangojˈyë tadë tuunk mä ngäjpxwäˈkxëm?

¹⁷ Tsojkëp njamyajtsëm ko tyäˈädë tuunk mä nˈëwäˈkx ngäjpxwäˈkxëm jotëgoy yajtunäˈäny. Mä Biiblyë jyënaˈany: “Käjxwäˈx ja Diosë yˈayuk [“tuungojën tsojk”, TNM]” (2 Timotee 4:2). ¿Tidën ko tyäˈädë tuunk tsojk tyim yajtunangojy? Yëˈko Diosë yˈAyuk jyënaˈany: “¡Ja Jyobaa myëj xëëw wingon yˈity! ¡Wingon yˈity, ets jantsy jotëgoy myiny!” (Sofonías 1:14). Duˈunë duˈun, wingoomp ja xëëw mä Jyobaa dyajkutëgoyaˈanyë axëkjäˈäy diˈib jaˈäjtp yä Naxwiiny. ¡Ets tsojkëbë jäˈäy tnijawëdët! Tsojkëbë jäˈäy tjaygyukët ko tyamën ttiempëty ets tmëmëdowëdë Jyobaa extëmë yˈanaˈambë, pes ja kutëgoˈoyën “¡kyaj jyakäˈäny!” (Habacuc 2:3).

18. ¿Tiko jyëjpˈamëty nˈawdäjtëmë Jyobaa mëdë nmëguˈukˈäjtëm diˈib mëët nˈëxpëjkëm?

 ¹⁸ Jyobaa tsyejpy ets nˈawdäjtëm mëdë wiinkpë nmëguˈukˈäjtëm diˈib mëët nˈëxpëjkëm. Pääty mä Biiblyë jyënaˈany: “Es nˈokˈëxtäˈäyëm ja winmäˈäny ets nnaybyudëjkëm  nixim niyam es nmëdäjtëm waanë niˈigyë tsojkën es nduˈunëm diˈibë oy. Näägëty kyaj nyekynyaymyukëdë mët ja myëˈˈëxpëjkpëty. Kyaj nˈadëtsëm extëm yëˈëjëty, nˈoknayjyotmëkmoˈoyëm nixim niyam, es waanë niˈigyë tyam, mët ko tyim patnëp mä Jesus jyëmbitäˈäny” (Ebreeʉsʉty 10:24, 25). Ko nduˈukmujkëm mëdë nmëguˈukˈäjtëm diˈib mmëbëjktëp, ta mbäät nmëjkumäˈäyëmë Jyobaa ets nˈawdäjtëm. Nanduˈun nayjotmëkmoˈoyëm ets nnaymyëjämoˈoyëm nixim niyam.

19. ¿Ti mbäät nduˈunëm parë nyajkëktëjkëmë tsojkën mëdë nmëguˈukˈäjtëm diˈib mëët nduˈukmujkëm?

¹⁹ Ko njoˈomëm mä naymyujkën, ta niˈigyë nyajkëktëjkëmë naymyayë etsë tsojkën mëdë nmëguˈukˈäjtëm diˈibë Jyobaa myëduundëp. Oy ko nˈijxëmë oybyë jyaˈayˈäjtën, duˈun extëmë Jyobaa yëˈë yˈijxypyë oybyë jäˈäyˈäjtën. Ni tuˈugë nmëguˈukˈäjtëm diˈib mëët nduˈukmujkëm kyawäˈätsjäˈäyëty. Jamyats ko niˈamukë nduundëgoˈoyëm ets ko wiˈixëm niduˈuk niduˈugë jäˈäy wyimbety mä Diosë tyuunk (käjpxë Kolosʉ 3:13). Ko mnaymyayëdët mëdë jäˈäy diˈib tsyejpyë Jyobaa mët tukëˈëyë jyot myëjääw, ta niˈigyë mwimbatët mä Diosë kyäjpn. Pën mmëduumbyë Jyobaa mëdë mëguˈuktëjk diˈibë Dios myëduundëp, yëˈë mbudëkëdëp parë xytsyokëdë Dios xëmë. Minë net nˈokˈijxëm wiˈixë Jyobaa tkunuˈkxy pënaty xëmë mëduunëp ets tsojkëp.

20, 21. ¿Ti duˈun yˈandijpy ja jaantsypyë jukyˈäjtën, ets tiko jyantsy yˈoyëtyë tyäˈädë jukyˈäjtën diˈib nˈaxäjëyäˈänëm?

²⁰ Tadë kumäˈäyën diˈibë Jyobaa myoopy pënaty xëmë mëduunëp, yëˈë jukyˈäjtën, per ¿diˈibë jukyˈäjtën yajmaytyakp? Mbäät njënäˈänëm ko jukyˈäjtëm yam, pes käˈäy ukëm ets nwijtsëmë poj. Ets axtë ko njantsy  jyotkujkˈäjtëm mbäät njënäˈänëm: “Tyäˈädë duˈun yˈandijpy jukyˈäjtën”. Perë Biiblyë jyënaˈany ko tyam duˈunxyëp extëm ni tuˈugë naxwinyëdë jäˈäy kyajukyˈaty.

²¹ Mä Biiblyë jyënaˈany ko niˈamukë mbäät nbatëm “ja jikyˈäjtën diˈibë tëyˈäjtënbë” (1 Timotee 6:19). Ko jyënaˈany “ja jikyˈäjtën diˈibë tëyˈäjtënbë”, yëˈë yˈandijpy ja jukyˈäjtën diˈib nˈawijx njëjpˈijxëm. Ko nety të njëmbijtënë wäˈätsjäˈäy, ta nˈaxäjëyäˈänëm ja jukyˈäjtën diˈib tëyˈäjtën, pes duˈun nëjkx njukyˈatäˈänëm extëmë Dios ojts ttuknibëjtäägë. Ko netyë tyäˈädë naxwinyëdë të jyëmbity tsuj ets nyajpatëm oy mëk ets agujk jotkujk, taanëm nëjkx nmëdatäˈänëm ja jukyˈäjtën diˈib tëyˈäjtën o ja jukyˈäjtën diˈib xëmëkyëjxm (1 Timoteo 6: 12, TNM). ¿Këdii jantsy oyë jukyˈäjtën diˈib nˈawijx njëjpˈijxëm mä tiempë myiny kyëdaˈaky?

22. ¿Wiˈix mijts mbäät xyˈaxäjë ja jaantsypyë jukyˈäjtën?

²² ¿Wiˈix mbäät tuˈugë jäˈäy tpääty ja jaantsypyë jukyˈäjtën? Wenë mä netyë apostëlë Pablo tkamaytyaˈakynyëmë tyäˈädë jukyˈäjtën, jawyiin ojts tˈanëëmëdë ja Dios mëduumbë ets “ttundët diˈibë dëˈën oy” ets nyayajmëkjäˈäytyäˈägëdët “mët ja oybyë tuunk” (1 Timotee 6:18). Extëm yä nˈijxëm, yëˈë tsobäädäämp nanduˈun wiˈix nguytyuˈunëm diˈib nˈëxpëjkëm mä Biiblyë. Per ko apostëlë Pablo ojts jyënaˈany tundë diˈibë duˈun oy, ¿yëˈë duˈun yˈandijpy ko pën nduˈunëmë oyˈäjtën nbäädäˈänëm ja jaantsypyë jukyˈäjtën? Kyaj, pes ja jukyˈäjtën yëˈë Dios xynyamoˈoyäˈänëm, mä Biiblyë jyënaˈany: “Niˈigyë myëjjëty ja mayˈäjtën diˈibë Dios tyuun” (Romanʉs 5:15). Jyobaa jotkujk nyayjawëty ko tkumayaˈany pënaty xëmë mëduunëp. Yëˈë tsyejpy ets mijts xyˈaxäjët ja “jaantsypyë jukyˈäjtën”, tuˈugë jukyˈäjtën diˈib xëmëkyëjxm ets agujk jotkujk. Ja jukyˈäjtën diˈib yˈawijx jyëjpˈijxtëp pënaty xëmë tsyojktëbë Dios.

23. ¿Tiko jyëjpˈamëty ntsojkëmë Dios xëmë?

 ²³ Pääty niduˈuk niduˈuk yˈoyëty nnayajtëˈëwëm: “¿Nmëduumbyëtsë Dios extëm tniˈanaˈamë mä Biiblyë?”. Pën jënäˈänëm ko nmëduˈunëmë Dios tuˈuk tuˈugë xëëw nyaxy, oyë nety ja tuˈu diˈib nbanëjkxëm. Ets mbäät nˈijtëm seguurë ko Jyobaa mbäät xykyuwäˈänëm. Pes yëˈë kyuentˈataambyë kyäjpn diˈib kyaj myastuˈutyëty mä tyäˈädë tiempë diˈib kutsëˈëgë ets kujotmay aknäjxp. Nanduˈun xymyoˈoyäˈänëm ja jembyë jukyˈäjtën diˈib tim wingon ijtp. ¡Jantsy oyën yˈixˈatäˈäny! ¡Agujk jotkujk nëjkx njantsy nyayjäˈäwëm pën nbëjtakëmë jot winmäˈäny ets nmëduˈunëmë Jyobaa mä tyäˈädë tiempë! Pën mijts mbëjtakypyë mjot mwinmäˈäny parë xymyëdunëdë Jyobaa, nëjkxëp mjukyˈaty xëmëkyëjxm ets nëjkxëp xypyaaty ja jaantsypyë jukyˈäjtën, ja jukyˈäjtën diˈibë Dios xëmë tsyojk ets nmëdäjtëm.