1-3. ¿Pënë tadë mëtsip diˈib niˈamukë xypyajëdijtëm, ets tiko nnayjäˈäwëm jotkujk ko nˈijxëm wiˈixë Biiblyë tyukniˈˈixë?

OKPAWINMAY ko yëˈë mgugekypy tuˈugë mëtsipë axëkjäˈäybyë, diˈib mas kumëjääw ets peˈtypy ets kyaj dyuˈunëty mijts. Mnijäˈäwëp ko mnaspäädëdët ninuˈun mgapaˈˈayowëdët, pes të xyˈixy ko kanääk kujkë mëtnaymyaayëbë dyaˈoˈknë. Oy nuˈun mjapëyeˈeky, niˈigyë mbaminyëty, kyaj mä tsokën. Per ta tuˈugë jäˈäy mˈanëˈëmxëty ko mbudëkëyaˈanyëty. Tyäˈädë jäˈäy mas kumëjääw ets kyaj dyuˈunëtyë mëtsip, ta myaˈˈawäˈätspëtsëmyëty. ¡Wiˈix jotkujk mdimnayjawëdët!

² Mbäät njënäˈänëm ko ta tuˈugë mëtsip duˈun mbajëdityëty. Ets niˈamukën xypyajëdijtëm, kyaj jyeˈeyëty mijts. Extëm të nˈijxëm mä kapitulo 6, jap të yajnimaytyaˈaky ko tadë mëtsip yëˈë oˈkën. Nipën mbäät tkakugeˈeky ets tkajëjpkudijë. Pes nˈijxëm wiˈix tpëjkë jäˈäyë jyukyˈäjtën diˈib ntsojkëm. Perë Jyobaa yëˈë diˈib mas kumëjääw ets kyaj dyuˈunëtyë oˈkën. Yëˈën diˈib mbäät xyaˈˈawäˈätspëtsëˈëmëm. Të dyaˈixyëty ko mbäät tmëmadaˈaky ets nan wyandakypy dyajjëjptëgoyaˈanyë oˈkën ets ninäˈä kyanekyjaˈˈatët. Mä Biiblyë jyënaˈany: “Ja  okpë mëtsip diˈibë Dios yajkutëgoyaampy, yëˈë ja oˈkën” (1 Korintʉ 15:26). ¡Jantsy oy ko nnijäˈäwëm duˈunë Dios ttunäˈäny!

³ Okwinmay wiˈixë jäj jëmuˈumën dyakyë tyäˈädë mëtsip ko jyaˈty. Ko duˈun nwinmäˈäyëm, ta xyjotkujkmoˈoyëm ko Jyobaa të twandaˈaky dyajjukypyëkäˈäny oˈkpë (Isaías 26:19). Yëˈë diˈib myoˈoyaampy jatëgokë jyukyˈäjtën, ets yëˈë duˈun diˈib yaˈˈawijx yajjëjpˈijxp.

4. 1) ¿Wiˈixë Jyobaa nyayjawëty ko tuˈugë jäˈäy yˈooky, ets wiˈix nnijäˈäwëm? 2) ¿Pënatyë Jesus jantsy oy mëët nyaymyaayëdë?

⁴ ¿Të yˈooky tuˈugë mjiiky mëguˈuk o mëtnaymyaayëbë diˈib mëk mjantsy tsyejpy? Kyaj jyawë mbäät nmëmadakëmë tadë jäj jëmuˈumën etsë mäˈäy täjën, ko nˈijxëm ko kyaj mbäät ti nekytyuˈunëm. Ja net mä tsyekyëty ets nˈëxpëjkëmë Diosë yˈAyuk parë xyjotkujkmoˈoyëm (käjpxë 2 Korintʉ 1:3, 4). Mä Biiblyë xytyuknijäˈäwëm wiˈixë Jyobaa nyayjawëty mëdë Jesus ko yˈooky tuˈugë jäˈäy. Jap tmaytyaˈaky ko Jesus mëk ojts tjawë ko yˈoˈky tuˈugë myëtnaymyaayëbë, ets komë Jesus xëmë jyaˈayˈajty extëmë Tyeety, ta njaygyujkëm ko Jyobaa nan mëk tjawë ko yˈooky tuˈugë jäˈäy (Fwank 14:9). Ko ijtyë Jesus nyijkxy Jerusalén, ta nyaxy Betania mä tkuˈixyë Lázaro mëdë myëgaˈaxëty, Marta etsë María. Mëk ijty naymyayëdë, päätyë Biiblyë jyënaˈany ko mëkë netyë “Jesus tjantsy tsyoktë ja Martë esë Mariië esë Lasarë” (Fwank 11:5). Perë Lázaro ta ojts yˈooky extëm të nˈijxëm mä kapitulo 6.

5, 6. 1) Ko ja Jesus tˈijxy jyëˈëy yäˈäxtë ja Lázaro myëguˈuktëjk etsë myëtnaymyaayëbë, ¿wiˈix ojts nyayjawëty? 2) ¿Tiko xyjotkujkmoˈoyëm ko nnijäˈäwëm ko Jesus mëk tjäˈäwë ja jäj jëmuˈumën?

⁵ ¿Wiˈixë Jesus nyayjäˈäwë ko yˈoˈky ja myëtnaymyaayëbë? Mä Biiblyë tmaytyaˈaky ko ta ojts nyijkxy mä ja  Lázaro myëguˈuktëjk etsë myëtnaymyaayëbë diˈibë nety jam nijëëy niyaxëdëp. Ko ojts tˈixtë, ta mëk tjantsy jäˈäwë ets “nyayjäˈäjë jotmay myëët es yˈamutskˈäjty”, ta “jyëëy” yaxy (Fwank 11:33, 35). ¿Tiko mëk tjäˈäwë? ¿Yëˈë nety yaˈijxëp ko kyaj tmëbëky ko ja oˈkpë pyëdëˈëgäˈändë? Kyaj, pesë Jesus nyijäˈäwëbë nety ti tunan jatanëp (Fwank 11:3, 4). Per oyë nety tjanijawë, mëk ojts tjawë ja jäj jëmuˈumën diˈib yajjäˈäwëp ko yˈooky tuˈugë jäˈäy.

⁶ Ko Jesus mëk tjäˈäwë ja jäj jëmuˈumën, yëˈë diˈib mbäät xyjotkujkmoˈoyëm. Yëˈë xytyukˈijxëm ko Jyobaa mëdë Jesus kyaj ttseky etsë jäˈäy yˈoogët. Jyobaa myëdäjtypyë mëjääw parë tmëmadäˈägëdë oˈkën diˈib nmëtsipˈäjtëm. Min nˈokˈijxëm tuˈugë mëjˈäjtën diˈibë Jesus tyuun mëdë Diosë myëjääw.

7, 8. ¿Tidaa ko may ja jäˈäy wyinmääytyë ko kyaj nety mbäät ti nyekyyajtuny mëdë Lázaro, per ti tyuunë Jesus?

⁷ Lázaro japë nety të yajpëjtaˈagyë nyiniˈkx kyëbäjk mä tuˈugë tsää äänk, ta Jesus ojts tniˈanaˈamë ets jyëgaˈagët ja tsää diˈibë nety yˈagëˈëyˈajtypy. Marta ta ojts tjëjpkugäjpxë ets jyënany ko xuˈknëbë nety, yëˈko të yˈijnë taxk xëëw mä yˈooky (Fwank 11:39). Pääty mbäät ja jäˈäy wyinmääytyë ko kyaj nety ti mbäät nyekyyajtuny.

⁸ Ko ja tsää dyajjëgaktë, ta Jesus mëk ojts kyajpxy: “¡Lasarë, pëtsëm jap!”. ¿Ti net tuun jäjtë? Ta “ja oˈkpë pyëtseemy” (Fwank 11:43, 44). Okpawinmay wiˈix niˈamukë jotkujk jyantsy nyayjäˈäwëdë, pes ja myëgaˈaxëty, myëguˈuktëjk, myëtnaymyaayëbë etsë myëjjëmbäˈä myëdëjkpäˈä nyijäˈäwëdëbë nety yajxon ko ja Lázaro të  yˈooky. Per ta jatëgok nyaybyatëdë mëdë Lázaro diˈibë nety mëk tsyojktëp. Kyaj tmëbëkandë, mbäät nbawinmäˈäyëm wiˈix jyantsy xyondaktë ets tjantsy myäjts tjantsy myënaandë ja Lázaro. ¡Duˈun yajmëmadaky ja oˈkën!

9, 10. 1) ¿Wiˈixë Jesus dyaˈijxë ko kyaj nety yëˈë naytyuˈuk dyajjukypyëkäˈänyë Lázaro? 2) ¿Ti xytyukniˈˈijxëm ko ngäjpxëmë Biiblyë mä yajmaytyaˈagyë oˈkpë ojts pyëdëˈëktë?

⁹ Jesus kyaj jyënany ko yëˈë nety naytyuˈuk tyunaampy ja mëjˈäjtën. Pes mä netyë Lázaro tkamëgajpxy, jawyiin ojts nyuˈkxtaˈaky ets jyënany ko mët yëˈëgyëjxmë Jyobaa myëjääw, dyajjukypyëkäˈänyë Lázaro (käjpxë Fwank 11:41, 42). Kanäk okë Jyobaa dyaˈijxë myëjääw ko dyajpëdëˈkyë oˈkpë, mä Biiblyë ja jap tmaytyaˈaky taxtujkë oˈkpë diˈib jukypyëjktë. * Jantsy oy nnayjäˈäwëm ko ngäjpxëmë Biiblyë mä jap duˈun tmaytyaˈaky. Jap xytyukniˈˈijxëm ko Dios kyaj ttseky winˈixy wingexyë jäˈäy, pes ojts dyajjukypyekyë yetyëjk, toxytyëjk, mëjjäˈäytyëjk etsë ënäˈktëjk, duˈun diˈib israelitë ets diˈib kyaj yˈisraelitëty. Mbäät jap nbëjkëmë kuentë wiˈix ja jäˈäy jotkujk jyantsy nyayjäˈäwëdë. Extëm nˈokpëjtakëm, ko ja Jesus dyajjukypyejky tuˈugë kixyuˈunk “ja jäˈäyëty dëˈënyë wyëˈëmëtyaaytyë” (Markʉs 5:42). Jyobaa yëˈë duˈun diˈib mooyëdë agujkˈäjt jotkujkˈäjtën diˈib ninäˈä tkajäˈäytyëgooytyë.

¹⁰ Tyäˈädë jäˈäyëty diˈibë Jesus yajjukypyëjk ojts yˈooktë jatëgok. ¿Yëˈë duˈun yˈandijpy ko ninuˈun kyatuuny ko jyukypyëjktë? Kyaj, pesë tadë maytyaˈaky  diˈib yajpatp mä Biiblyë, yëˈë xytyuknijäˈäwëm ja tëyˈäjtën mä wiˈixë oˈkpë yajpäättë, ets mbäät xyajnayjäˈäwëm seguurë ko jukypyëkandëp.

11. Eclesiastés 9:5 jyënaˈany ko oˈkpë nitii tkanijawëdë, ¿wiˈixë tyäˈädë tyëyˈäjtëndëkë ko Lázaro jyukypyejky?

¹¹ Mä Biiblyë xytyukniˈˈijxëm ko “oˈkpë nitii tkanijawëdë” (Eclesiastés 9:5). Tyäˈädë yëˈë yˈandijpy ko kyaj mä wiinktsoo jyukyˈattë ets ko nitii tkajawëdë. Duˈunën yajmaytyaˈagyë Lázaro. Ko yëˈë jyukypyejky kyaj jäˈäy ojts ttukmëtmaytyaˈaky wiˈix yˈixëty tsäjpotm, nan kyaj jäˈäy ojts tˈatsëˈëgëdë ko tap tuˈugë infiernë o ayoowdakn. Nimää duˈunë Biiblyë kyajënäˈäny. Ko Lázaro yˈijty taxk xëëw ooky, nitii tkajäˈäwë, duˈunxyëp extëm ojts myaˈay mä oˈkën (Fwank 11:11).

12. Ko yajmaytyaˈagyë Lázaro jyukypyejky, ¿tiko mbäät nˈijtëm seguurë ko jantsy tuun jantsy jäjtë duˈun?

¹² Ko Lázaro jyukypyejky yëˈë nanduˈun xytyukniˈˈijxëm ko seguurë oˈkpë pyëdëˈëgäˈändë, pes kyaj yëˈëjëty tuˈugë jekymyaytyaˈaky o apmaytyaˈaky. Mayë jäˈäy tˈijxtë ko Jesus dyajpëdëˈkyë Lázaro. Ets oy ja diˈib nyiwintsënˈäjttëbë relijyonk tjaˈˈaxëkˈixtë netyë Jesus, kyaj jyotmëktaktë jyënäˈändët ko kyaj nety tyëyˈäjtënëty ko Lázaro të jyukypyeky. Pääty nyayˈanmääyëdë: “¿Ti net nduˈunëm mëdë tyäˈädë yetyëjk diˈibë nëgoo tˈoktuunë ja ijxwëˈëmën diˈibë myëdäjtypy ja mëjˈäjtën?” (Fwank 11:47). May ja jäˈäy diˈib yˈijxtë ko të jyukypyeky ja Lázaro, tmëbëjktë Jesus ets tˈijxtë ko jantsy yëˈë netyë Dios të kyexyëty. Yajxonën nyigëxëˈky ko Jesus yëˈë netyë Dios të kyexyëty,  pääty nääk ja diˈib nyiwintsënˈäjttëbë relijyonk, tˈëxtääytyë winmäˈäny wiˈix dyaˈooktëdë Jesus mëdë Lázaro (Fwank 11:53; 12:9-11).

13. ¿Tiko mbäät nˈijtëm seguurë ko Jyobaa mbäät dyajjukypyekyë oˈkpëty?

¹³ ¿Waˈandaa tuˈugë oˈkpë jyantsy jyukypyëkët? Tiko këdii, pesë Jesus wyandak ko jäˈtäämbë tiempë mä niˈamukë “ja oˈkpëty diˈib të nyaxtëkëdë” pyëdëˈëgäˈändë (Fwank 5:28). Jyobaa yëˈë diˈib yajkypyë jukyˈäjtën, ¿tsipëdaa jatëgok xymyoˈoyëmbijtëm? Kyaj. ¿Mbäädëdaa tjamyetsyë nmëguˈukˈäjtëm diˈib të yˈoˈknë? Min nˈokˈijxëm nuˈunë Jyobaa tijaty tjamyetsy. Okwinmayë tyäˈädë: Yëˈë nyijäˈäwëbë xyëëw tuˈuk tuˈugë mëtsäˈä diˈib miyonkˈam ijtp tsäjpotm (Isaías 40:26). Pes pënë Jyobaa xyëëwmooytyaabyë mëtsäˈä, mbäät tjamyetsy wiˈix yˈixëty ja njiikyˈäjt nmëguˈukˈäjtëm diˈib të yˈoˈknë, ets jënäämbë duˈun ko dyajjukypyëkäˈäny jatëgok.

14, 15. Extëmë Job jyënany, ¿nuˈunë Jyobaa ttsojkënyëˈaty dyajpëdëˈëgäˈänyë oˈkpëty?

¹⁴ Pääty, ¿nuˈunë Jyobaa ttsojkënyëˈaty dyajjukypyëkäˈänyë oˈkpë? Mä Biiblyë jyënaˈany ko tsyojkënyëˈajtypy duˈun ttunäˈäny. Tuˈugë Dios mëduumbë diˈib xyëwˈäjt Job dyajtëëy: “Pën tuˈugë jäˈäy oˈkp, ¿mbäät jatëgok jyukypyeky?”. Job yëˈë nety myaytyakypy ko yˈawixäˈäny jap jutoty axtë ko jyäˈtët ja tiempë mä Dios jyamyatsëdët. Pääty tˈanmääyë Jyobaa: “Mijts xymyëgäjpxäämp ets ëjts atsowäämp. Mjantsy tsyojkënyëˈataampy xyˈixäˈäny diˈibë mgëˈë të dyajkojy” (Job 14:13-15).

¹⁵ ¡Okpawinmay! Jyobaa mëk ttsojkënyëˈaty jyäˈtët ja tiempë mä dyajpëdëˈëgäˈänyë oˈkpë. ¿Këdii xyjotkujkmoˈoyëm  ko nnijäˈäwëm ko Jyobaa mëk ttsojkënyëˈaty duˈun ttunäˈäny? Per ¿wiˈixën tyunäˈäny jyatäˈänyëty? ¿Pënaty pëdëˈëgandëp ets mä?

16. ¿Wiˈix yˈixˈatäˈäny ja jukyˈäjtën ko ja oˈkpë nëjkx pyëdëˈëktë?

¹⁶ Ko ngäjpxëmë Biiblyë mä yajnimaytyaˈagyë jäˈäyëty diˈib jukypyëjktë, ta nnijäˈäwëm niˈigyë ti tunan jatanëp mä tiempë myiny kyëdaˈaky. Ja oˈkpë diˈib jukypyëjktë yä Naxwiiny nnaybyatëdë jatëgok mëdë myëguˈuktëjk. Nanduˈun tyunäˈäny jyatäˈänyëty mä tiempë myiny kyëdaˈaky, jeˈeyë ko oˈkpë pyëdëˈëgäˈändë mä kyaj nety nyekyjaˈˈatyë tsip, päˈäm etsë axëkˈäjtën. Pes extëm të nˈijxëm mä kapitulo 3, Dios të ttuknibëjtäägë dyajjëmbitäˈänyë Naxwinyëdë extëm tuˈugë it lugäärë tsujpë. Jam mä tmëdatäˈändë ja jotkujkˈäjtën ets jyukyˈatäˈändë winë xëëw winë tiempë ja oˈkpë diˈibë nety të jyukypyëktë.

17. ¿Pënaty jukypyëkandëp?

¹⁷ ¿Pënaty jukypyëkandëp? Jesus ojts jyënaˈany, niˈamukë “ja oˈkpëty diˈibë të nyaxtëkëdë myëdowdëp kots ëj ngäjxët”, ta pyëtsëmäˈändë (Fwank 5:28, 29). Nanduˈun tuk pëky jyënaˈany mä Diˈibʉ Jatanʉp: “Mët ko yëˈë jikymyejny të naty tjuˈtäˈäy tëgekyë oˈkpëty diˈibë naty jap myëdäjtypy. Yëˈë oˈkën [...] të naty nandëˈën dyäjktäˈäytyë ja oˈkpëty tëgekyë diˈibë naty yëˈëjëty myëdäjttëp” (Diˈibʉ Jatanʉp o Apocalipsis 20:12-15, OTJ). (Ix Diˈib mëët kyaˈpxy mä jyënaˈany: “¿Tidën yˈandijpy Seol ets Hades?”). Ta wyëˈëmäˈäny tukwäˈäts, ko jyukypyëjktäˈäytyëdë tadë jäˈäy diˈib tyam jap miyonkˈam poˈkxtëp. Apostëlë Pablo ojts jyënaˈany: “Ko yëˈë Dios dyajjikypyëkäˈäny tëgekyë oˈkpë diˈibë ijt oyjyaˈay es nandëˈën  diˈibë ijt kaˈoyjyaˈay” (Apostʉlʉty 24:15). ¿Pënatyë tyäˈädë yajmaytyakp?

18. ¿Pënaty yajtijtëp “oyjyaˈay” diˈib jukypyëkandëp, ets wiˈix xypyudëjkëm ko nnijäˈäwëm ko oˈkpë pyëdëˈëgäˈändë?

¹⁸ Tadë jäˈäyëty diˈib yajtijtëp “oyjyaˈay”, yëˈë diˈib yajmaytyaktëp mä Biiblyë. Diˈib jukyˈäjttë mä netyë Jesus kyaminy yä Naxwiiny, extëmë Noé, Abrahán, Sara, Moisés, Rut, Ester etsë wiinkpë Dios mëduumbë. Mä Ebreeʉsʉty kapitulo 11 jap näägë tyäˈädë yetyëjk toxytyëjk yajmaytyaˈaky. Per nanduˈun yajtijtë “oyjyaˈay” diˈib tyamë Dios myëduundëp ets yˈooktë. Ko nnijäˈäwëm ko oˈkpë pyëdëˈëgäˈändë, mbäät yëˈë xypyudëjkëm ets kyaj ntsëˈkëmë oˈkën (Ebreeʉsʉty 2:15).

19. ¿Pënatyëty yajtijtëp “kaˈoyjyaˈay”, ets ti Jyobaa nyaˈixaampy ets ttundët?

¹⁹ Miyonkˈamë jäˈäy diˈib të yˈooktë kyaj të tˈixyˈattë Jyobaa, pääty kyaj të tmëdundë ets kyaj të ttuunëdë tsyojkën, yëˈë diˈib yajtijtëp “kaˈoyjyaˈay”. ¿Pëdëˈëgandëbëdaa tyäˈädë jäˈäyëty? Pëdëˈëgandëp, kyaj yajjäˈäytyëgoyäˈändë. Jyobaa Dios yajjukypyëkaambyë tyäˈädë jäˈäyëty ets myoˈoyaambyë tiempë parë yˈixyˈatëdët ets myëdunëdët. Nuˈunë tiempë nyaxäˈäny tuk mil jëmëjt, ja mä Jyobaa tnaˈixäˈänyë tyäˈädë jäˈäyëty diˈibë nety të jyukypyëktë, ets myëdunëdët mëdë tadë jäˈäyëty diˈib ninäˈä të kyamastuˈudëdë. Jantsy oy yˈitäˈänyë tadë tiempë, yëˈë diˈibë Biiblyë myaytyakypy mä jäˈäy yajpayoˈoyäˈändë. *

20. ¿Ti yˈandijpy Gehena, ets pënaty jap nëjkxtëp?

²⁰ ¿Yëˈëdën yˈandijpy ko niˈamukë oˈkpë pyëdëˈëgäˈändë? Kyaj, mä Biiblyë jyënaˈany ko nääk yajpäättë Gehena, diˈib mä ayuk Biiblyë të yajkäjpxnaxy “ayodakn”  (Lukʉs 12:5). Per Gehena kyaj yëˈë tˈandijˈyë ayoowdakn, yëˈë ijty duˈun xyëwˈäjtypy tuˈugë postäˈäk koˈodakn diˈib ijtp Jerusalén ëxkëˈëy, mä yajnoˈogyë postäˈäk ets näägë oˈkpë nyiniˈkx kyëbäjk. ¿Ti oˈkpë ijty jap yajkujëduˈuwëdëp? Ja judiyëtëjk yëˈë kyujëduˈuwëdëp ja oˈkpë diˈib mëk axëëk të jyukyˈaty, diˈib kyaj nyitëkëty nyaxtëkët ets ni kyanitëkëty etsë Dios yajpëdëˈëgëdët. Päätyë tadë ayuk Gehena, ja nyikejy kutëgoˈoyënë winë xëëw winë tiempë. Jesus yëˈë diˈib tunäämp fes parë tpayoˈoyaˈanyë jäˈäyëty diˈibë nety të jyukypyëktë, perë Jyobaa yëˈë Fes diˈib myëdäjtypy tukëˈëyë kutujkën (Apostʉlʉty 10:42). Dios ninäˈä tkayajpëdëˈëgäˈänyë jäˈäy diˈib nyijäˈäwëp ko mëk axëkjäˈäy ets kyaj tyëgatsäˈäny.

21, 22. 1) ¿Wiˈix ja tuk pëkyë oˈkpë jyukypyëktë? 2) ¿Pën diˈib tim jawyiin jukypyëjk extëmë anklës?

²¹ Mä Biiblyë nanduˈun jyënaˈany ko ta oˈkpë diˈib jukypyëjktëp extëmë anklës parë jyukyˈattët tsäjpotm. Ets myaytyakypy ko yëˈëyë Jesukristë duˈun jukypyëjk.

²² Ko Jesus jyukyˈajty extëmë naxwinyëdë jäˈäy, ta jäˈäy ojts yaˈoogyëty. Perë Jyobaa kyaj ojts yajwëˈëmyëty jutoty (Salmo 16:10; Apostʉlʉty 13:34, 35). Jyobaa ojts dyajjukypyekyë Jesus, per kyaj dyuˈunëty extëmë naxwinyëdë jäˈäy. Apostëlë Pedro ojts tnimaytyaˈaky ko Kristë “ojts yˈooky extëmë jäˈäy, per jyukypyejky extëmë anklës” (1 Pedro 3:18, TNM). Jesus jukypyëjk jatëgok extëmë anklës diˈib myëdäjtypyë mëjääw. ¡Yëˈë tuˈugë mëjˈäjtënë diˈibë Jyobaa tyuun! (Käjpxë 1 Korintʉ 15:3-6). Jesus yëˈë diˈib tim jawyiin ojts jyukypyeky jam tsäjpotm. Per kyaj nety yëˈë naytyuˈuk duˈun dyajjukypyëkäˈäny (Fwank 3:13).

23, 24. ¿Pënaty yajtijp tuk “mutsk kajpëˈëgë borreegë”, ets ninääk?

 ²³ Jesus nyijäˈäwëbë nety ko tsojk jyëmbitanë tsäjpotm, ta tˈanmääyë yˈëxpëjkpëty diˈib ninäˈä kyamastutëdë: “Nnejxyëts ëj nˈokˈëxkujkë mä miits mˈittët” (Fwank 14:2). Jesus ojts ttijy tuk “mutsk kajpëˈëgë borreegë” pënaty nëjkxandëp tsäjpotm (Lucas 12:32, TNM). ¿Ninääk wyinëˈattë tyäˈädë jäˈäyëty? Diˈibʉ Jatanʉp 14:1 jyënaˈany: “Oknëmts nˈijxy ja Borreeguˈunk [Jesukristë] ko naty jam tyanë mä Syon Kopk. Jamë naty mëët mëgoˈpx ja juxytsyikxymyäjtaxk mil ja jäˈäyëty, diˈibë naty tsäˈäy wyimbokëjxy mët ja syeyë ja Borreeguˈunk esë Dios Teety”.

²⁴ Mä tyäˈädë 144,000 jäˈäyëty, nan tam yajmaytsyowdë Jesusë yˈapostëlë, Dios yajjukypyëjkypyë tyäˈädë jäˈäyëty parë jyukyˈattët tsäjpotm. ¿Näˈä tyäˈädë jäˈäyëty jyukypyëktë? Apostëlë Pablo ojts tkujayë ko ja tyunäˈäny jyatäˈänyëty mä Jesus yajpatnë jam tsäjpotm (1 Korintʉ 15:23). Tyam, yëˈë tyäˈädë tiempë ndukjukyˈäjtëm extëm nˈixäˈänëm mä kapitulo 9. Niwaanë yˈakwëˈëmdë tadë jäˈäy diˈib 144,000. Ko yˈooktë, ta netyë jyukypyëktë jam tsäjpotm parë jam jyukyˈattët (1 Korintʉ 15:51-55). Perë nimaybyë jäˈäy diˈib të yˈooktë, yëˈë diˈib jukypyëkandëp yä Naxwiiny ko nety të jyëmbity jantsy tsuj.

25. ¿Ti nnijawëyäˈänëm mä ja tuˈukpë kapitulo?

²⁵ Mijts mbäät mˈity seguurë ko Jyobaa yëˈë duˈun diˈib yajjëjptëgoyaambyë oˈkën diˈib nmëtsipˈäjtëm, ets ninäˈä kyanekyjaˈˈatäˈäny (käjpxë Isaías 25:8). Per waˈan mnayajtëyëty: “¿Ti tyunandëbë tadë jäˈäy diˈib jukypyëjktëp jam tsäjpotm?”. Anaˈamandëp jam tsäjpotm. Mä ja tuˈukpë kapitulo nnijawëyäˈänëm wiˈix yˈixˈatäˈänyë tyäˈädë anaˈamën.