1, 2. ¿Tijaty xyaˈˈayoˈowëm, ets ti diˈib mayë jäˈäy nayajtëëwëdëp?

MÄ TUˈUGË paˈis tyuunë mëj tsip ets yˈoˈky milˈamë toxytyëjk etsë ënäˈkuˈunk. Niˈamukë tyäˈädë jäˈäyëty ojts nyaxtëjkëtyaˈaytyë mä tuˈugë mëj jut ets nawdity yajpëjtaky mayë kruus, mä yajkëxjääytyaay: “¿Tiko?”. Tyam nanduˈun mayë jäˈäy nyayajtëwëdë ko tpäättë ayoˈon jotmay. Extëm ko jyaˈˈatyë tsip, päˈäm, tyuny jyatyëtyë ayoˈon, o ko muumë jäˈäy yˈayoˈonbäättë ets yˈooktë jyiiky myëguˈuk, o ko kyutëgoyë jëën tëjk o ko wiˈixëm axëëk yˈayoˈonbäättë, ta jantsy jotmaymyëët nyayajtëwëdë: “¿Tiko duˈun tyuny jyatyëty?”. Nyijawëyandëp tidën ko duˈun tyuny jyatyëtyë ayoˈon.

² Të näˈä mˈoknayajtëëwëbë, ¿tiko Jyobaa Dios tnasˈixë ets jyaˈˈatëdë ayoˈon? Pën yëˈë tuˈugë Dios diˈib myëdäjtypy tukëˈëyë mëjääw, diˈib tsojkp, wijy ets tyuumbyë tëyˈäjtën, ¿tiko nëgoo tyim jaˈäjnë axëkˈäjtën etsë nayˈaxëkˈixë yä naxwiiny?

3, 4. 1) ¿Pënë yˈijxpajtën xytyukˈijxëm ko kyaj yˈaxëëgëty nyajtëˈëwëm tiko Dios tnasˈixë ayoˈon? 2) ¿Wiˈixë Jyobaa tˈixyë axëkˈäjtën etsë ayoˈon?

 ³ ¿Axëëk ko nyajtëˈëwëm tiko Dios tnasˈixë ets jyaˈˈatëdë ayoˈon? Näägë jäˈäy wyinmaytyë ko pën yajtëëwdëp duˈun, kyaj nety tmëdattë mëbëjkën o kyaj nety tmëjˈijxtë Dios. Per ko xykyäjpxëdë Biiblyë, ta xyˈixäˈäny ko tëëyëp jaˈäjtë Dios mëduumbë diˈib duˈun yajtëëwdë. Extëm nˈokpëjtakëm, tuˈugë kugajpxy diˈib xyëwˈäjt Habacuc ojtsë Jyobaa tˈanëëmë: “¿Tikots xytyukˈixyë axëkˈäjtën? ¿Ets tiko xynyasˈixë naytyëytyunë? ¿Tikots nwinduuy jyaˈˈatyë kutëgoˈoyën etsë jäˈäy axëk nyaytyunëdë? ¿Ets tiko jyaˈˈatyë naytsyiik naygyoxë etsë tsip kajpxy?” (Habacuc 1:3).

⁴ ¿Ojtsë Jyobaa tˈooyë tyäˈädë kugajpxy Habacuc ko duˈun yajtëëwë? Kyaj, kyaj ojts tˈooy. Pes pääty ojts yajkujayë yˈääw yˈayuk mä Biiblyë, ets nan ojts yajpudëkë parë myëktäˈägëdë myëbëjkën ets tjaygyukët tidën ko jyaˈˈatyë ayoˈon. Jyobaa nanduˈun mijts mbudëkëyaˈanyëty. Jamyats ko Biiblyë jyënaˈany: “Yëˈë naytyukjotmaytyuunëp mët miitsëty” (1 Peedrʉ 5:7). Dios waanë niˈigyë tˈaxëkˈixyë ayoˈon etsë axëkˈäjtën ets kyaj dyuˈunëtyë naxwinyëdë jäˈäy (Isaías 55:8, 9). Per pën jyantsy yˈaxëkˈijxypy, ¿tiko nëgoo tyim jaˈäjnë ayoˈon yä Naxwiiny?

5. ¿Wiˈix mayë jäˈäy tnimaytyäˈäktë tidën ko jyaˈˈatyë ayoˈon, per wiˈixë Biiblyë tyukniˈˈixë?

⁵ Oy diˈibë relijyongë jäˈäy ttukˈitët, yajtëëwdëbë wyintsëndëjk o diˈib yaˈëxpëjkëdëp tiko nëgoo ndimˈayoˈowënë. Ta yaˈˈatsowdë ko duˈunë Dios ttseky ets ko yëˈë të ttuknibëjtakënë tijaty tunan jatanëp, axtë  ayoˈon diˈib ajotkumonë tuun jäjtëp. Mayë jäˈäy yaˈˈanëëmëdë ko kyaj mbäät pën tnijawë Diosë nyëˈë tyuˈu, o ko Dios yëˈë myënëjkxypyë jäˈäy ets axtë ënäˈkuˈunk parë mëët yˈittët jam tsäjpotm. Per extëm mijts të xynyijawë, Jyobaa ninäˈä tkayajaˈˈatyë axëkˈäjtën. Mä Biiblyë jyënaˈany: “¡Ninuˈun kyajäˈty mä winmäˈäny etsë Diosë tëyˈäjtënbë ttunëdë axëkˈäjtën, ets diˈib myëdäjtypy tukëˈëyë mëkˈäjtën ttunët diˈib kyaj yˈoyëty” (Job 34:10).

6. ¿Tiko mayë jäˈäy tpokymyoˈoytyë Dios ko yëˈë duˈun diˈib yajjaˈäjtypyë ayoˈon yä naxwiiny?

⁶ ¿Mnijäˈäwëp tiko jäˈäy kyäjpxtëgoytyë ko jyënäˈändë ko Dios yëˈë yajjaˈäjtypy tukëˈëyë ayoˈon? Yëˈko wyinmaytyë ko Jyobaa yëˈë diˈib anaˈamp yä naxwiiny. Kyaj tnijawëdë ko Biiblyë tyukniˈˈixë ko pën anaˈamp yä naxwiiny, yëˈë Satanás, extëm të xynyijawë mä kapitulo 3.

7, 8. 1) ¿Wiˈix tyamë jäˈäy dyaˈixëdë jyaˈayˈäjtënë extëmë Satanás? 2) ¿Tiko nbatëmë ayoˈon ko të xynyinäjxëmë poky ets ko jyaˈty “ja tiempë ets tijaty tuun jäjtëp diˈib kyaj nˈawijx njëjpˈijxëm”?

⁷ Mä Biiblyë yajxon tnigajpxy ko “naxwinyëdë jäˈäy  yˈity mä ja axëëkpë dyajtunyë myëkˈäjtën” (1 Juan 5:19, TNM). Tyäˈädë yëˈë diˈib xytyukˈijxëm tidën ko jyaˈˈatyë ayoˈon, ¿këdii? Yëˈë naxwinyëdë jäˈäy duˈun jyaˈayˈattë extëmë Satanás, “diˈib wyinˈiˈimpy nidëgekyë ja naxwinyëdë jäˈäy” (Diˈibʉ Jatanʉp o Apocalipsis 12:9). Satanás winˈëˈëmp, axëkˈijxp ets mëk axëkjäˈäy. Pääty niˈamukë jäˈäy diˈib yëˈë të tjaˈabëky nanduˈun yˈandäˈäktë, yˈaxëkˈixtë ets mëk axëkjäˈäyëty. Tyäˈädë yëˈë tuk pëky diˈib xytyuknijäˈäwëm tiko nëgoo tyim jaˈäjnë ayoˈon.

⁸ Myëmajtsk pëky tiko jyaˈˈatyë ayoˈon, yëˈë extëm të nˈijxëm mä kapitulo 3, ko ja Adán mëdë Eva tkamëmëdoowdë Dios jam Edén, ta jyëmbijttë pokyjyaˈay. Ets kom të xynyinäjxëmë poky, päätyë jäˈäy tjantsy myëdatäˈändë kutujkën, ets mët ko tˈëxtäˈäytyë mëjˈäjtën, ta net jyaˈˈatyë tsip, naytyëytyunë etsë ayoˈon (Eclesiastés 4:1; 8:9). Myëdëgëk pëky tiko jyaˈˈatyë ayoˈon, yëˈko jyaˈty diˈibë Biiblyë myaytyakypy “ja tiempë ets tijaty tuun jäjtëp diˈib kyaj nˈawijx njëjpˈijxëm” (käjpxë Eclesiastés 9:11). Ets komë Jyobaa kyaj tyam tˈaneˈemyë naxwinyëdë jäˈäy, kyaj mbäät tkuwäˈäny. Pääty mbäädë jäˈäy yˈayoˈonbääty, ko yajpäädët mä tuˈugë lugäär mä tyunäˈäny jyatäˈänyëtyë ayoˈon diˈib kyaj pën tˈawixy tjëjpˈixy.

9. ¿Tiko mbäät nˈijtëm seguurë ko tamˈäjtp tidën ko Jyobaa tnasˈixë ayoˈon?

⁹ Xyjotkujkmoˈoyëm nnijäˈäwëm ko Jyobaa kyaj yëˈë dyajjaˈˈatyë ayoˈon. Kyaj yëˈë tpokyëty ko jyaˈˈatyë tsip, nayaˈook nayajtëgoyë ets mä ayoˈonë jäˈäy tyukjäˈtyëty extëmë ayoˈonduu o mëk ujx. Per minë net nˈoknijäˈäwëm, tiko Dios tnasˈixë ets jyaˈˈatët tukëˈëyë tyäˈädë ayoˈon. Jyobaa myëdäjtypy tukëˈëyë mëjääw parë dyajjëjptëgoyëdë  ayoˈon, per ¿tiko tkayajëjptëgoy? Kom të nˈixyˈäjtëmë Jyobaa ets të nˈijxëm ko yëˈë tuˈugë Dios diˈib tsojkp, mbäät nˈijtëm seguurë ko tamˈäjtp tiko tnasˈixë (1 Fwank 4:8).

10. ¿Ti yajjaygyukëyanë Satanás, ets wiˈix jyënany parë duˈun dyajjaygyujkë?

¹⁰ Parë nnijäˈäwëm tiko Dios tnasˈixë ayoˈon, min nˈokjamyajtsëm mä ojts tsyonëˈëky tsyondaˈaky ja amay jotmay. Ko Satanás ojts dyajtuundëgoyë Adán mëdë Eva, ta tyëjkë tuˈugë jotmay. Satanás kyaj dyajjaygyukëyanë ko Jyobaa kyaj tmëdatyë mëjääw, pes nyijäˈäwëp ko Jyobaa myëdäjtypy tukëˈëyë mëjääw. Diˈibën yajjaygyukëyanë, yëˈë pënë Jyobaa patëp ets yˈanaˈamët. Satanás nyiwäämbajtë Dios ko axëëk yˈaneˈemy, ko jyënany ko Dios andakp ets ko nipën tkatukmëtsekyë oyˈäjtën (käjpxë Génesis 3:2-5). Nanduˈun dyajjaygyukëyanë ko ja naxwinyëdë jäˈäy tyukˈoybyëtsëmëp pën kyaj Dios yˈanaˈamëdë. Duˈuntsoo tnibëdëˈky ja madakën diˈibë Jyobaa myëdäjtypy parë yˈanaˈamët.

11. ¿Tiko Jyobaa kyaj ojts dyajkutëgoy jam Edén pënaty kyaj myëmëdoowëdë?

¹¹ Ko Adán mëdë Eva tkamëmëdoodë Jyobaa, duˈunxyëp extëm jyënandë: “Kyaj tyim tsekyëty etsë Dios xyˈanaˈamëm. Mbäät këˈëm nˈijxëm ti oy ets ti axëëk”. ¿Wiˈixë Jyobaa dyaˈoˈoyë tyäˈädë jotmay? ¿Wiˈixë nety tˈokˈyaˈixëdët ko Adán, Eva etsë Satanás kyaj tmëdattë tëyˈäjtën ets ko extëm yëˈë tijaty ttuny duˈunën yˈoyëty? Ta jäˈäy diˈib winmääytyëp ko Dios netyëxyëp ojts dyajkutëgoytyë, ets taxyëbë wiinkpë yetyëjk etsë toxytyëjk ojts  dyajkojy. Perë Jyobaa, yëˈë nety të ttuknibëjtäägë etsë Naxwinyëdë jyëmbitët extëm tuˈugë it lugäärë tsujpë, ets tyuktukët mëdë Adán etsë Eva tyëëm yˈääts (Génesis 1:28). Jyobaa xëmë tkuytyuny diˈib yëˈë tyuknibëjtakëp (Isaías 55:10, 11). Koxyëp netyë dyajkutëgooy pënaty kyaj myëmëdoowëdë jam Edén, kyajxyëp yajnijawë ko yëˈë diˈib myëdäjtypyë madakën parë yˈanaˈamët.

12, 13. ¿Ti ijxpajtën xytyukˈijxëm tiko Jyobaa të tnasˈixë etsë Satanás tˈanaˈamëdë jäˈäyëty, ets nanduˈun parë naxwinyëdë jäˈäy këˈëm nyayˈanaˈamëdët?

¹² Jyobaa duˈun ojts jyaty extëm tuˈugë maˈestrë diˈib tyukmëtmaytyakypyë yˈalumnëty wiˈix twijtspëtsëmdët tuˈugë kuentë diˈib tsip. Per ta tuˈugë yˈalumnë diˈib wijy kyujuundaˈaky ets jyënaˈany ko kyaj yˈoyëty extëm ja myaˈestrë jam dyaˈoyë kuentë, ta dyajjaygyukëty ko ja myaˈestrë kyaj tjaty tyukniˈˈixët. Tyäˈädë alumnë mëktaˈaky jyënaˈany ko yëˈë nyijäˈäwëp wiˈix mas oy twijtspëtsëmët ja kuentë.  Ta näägë myëguˈuktëjk kyujuundäˈäktë ets jyënäˈändë ko tëyˈäjtën extëm jyënaˈanyë tyäˈädë alumnë. ¿Ti net yˈoktunëp ja maˈestrë? Mbäät tjaˈëxkajxtäˈäy ja alumnë diˈib të kyujuundäˈäktë, per ¿wiˈix wyinmayët ja wiinkpë alumnë? Mbäät wyinmaytyë ko ja myëguˈuktëjk diˈib të kyujuundäˈäktë myëdäjttëbë tëyˈäjtën. Ets mbäät dyajtëgoytyë mayˈäjt wintsëˈkën mä ja myaˈestrë ets wyinmaytyët ko ja maˈestrë tsëˈkëp ko yˈanëëgugäˈäjët. Per okwinmayë net ko tyäˈädë maˈestrë, tˈanëëmë ja yˈalumnë diˈib të kyujuundaˈaky ets ttukˈixët ja myëguˈuktëjk wiˈix twijtspëtsëmët ja kuentë.

¹³ Jyobaa nanaduˈunën të ttuny extëmë tyäˈädë maˈestrë. Okjamyats ko jam Edén nanduˈun miyonkˈamë anklës tˈijxtë ti tuun jäjtë (Job 38:7; Diˈibʉ Jatanʉp 5:11). Tyäˈädë anklëstëjk etsë naxwinyëdë jäˈäy pyëkandëbë netyë kuentë wiˈixë Jyobaa dyaˈoyë tyäˈädë jotmay, ets pën diˈib myëdäjtypyë tëyˈäjtën. Pääty, ¿ti Jyobaa të ttuny? Të tmoˈoyë tiempë Satanás ets dyaˈixëdët wiˈix tˈokˈaneˈemyë naxwinyëdë jäˈäy. Ets nan të tnasˈixë ets niˈamukë jäˈäy nyayˈanaˈamëdët extëmë Satanás ttseky.

14. Ko Jyobaa tnasˈixë etsë naxwinyëdë jäˈäy këˈëm nyayˈanaˈamëdët, ¿tijatyë net nbëjkëmë kuentë?

¹⁴ Ja maˈestrë diˈib të yajmaytyaˈaky nyijäˈäwëp ko ja yˈalumnë kujuun mët diˈib të pyuwäˈägëdë, kyaj tmëdattë tëyˈäjtën. Per nan nyijäˈäwëp ko pën nyasˈijxëp ets dyaˈoyët ja kuentë extëm të jyënaˈany, ta ja myëguˈuktëjk tˈixtët pën myëdäjtypy ja tëyˈäjtën. Pes ko tkajatët dyaˈoyët ja kuentë, ta tnijawëdët ko ja myaˈestrë yëˈëyë naytyuˈuk diˈib jyajtypy yaˈëxpëkët. Ets ko yaˈëxkaxtët ja kujuundëjk, nyijawëdëp ja wiinkpë  alumnë tiko të yaˈëxkaxtë. Nanduˈun jyaty mëdë Jyobaa, yëˈë nyijäˈäwëp ko anklëstëjk ets niˈamukë jäˈäy pyëktëbë kuentë ko Satanás mëdë yˈanklëstëjk kyaj tmëdattë tëyˈäjtën, ets ko naxwinyëdë jäˈäy kyaj mbäät nyayˈanaˈamëdë. Ets yˈixtëp ko tëyˈäjtën extëmë kugajpxy Jeremías ojts tkujayë: “Yajxonëts nnijawë, Jyobaa, ko naxwinyëdë jäˈäy kyaj pyaaty nyitëkëtyë nyëˈë tyuˈu. Kyaj yëˈë pyaatyëtyë naxwinyëdë jäˈäy diˈib tuˈuyeˈepy, këˈëm nyaynyëˈëmoˈoy nyaytyuˈumoˈoyëdët” (Jeremías 10:23).

15, 16. 1) ¿Tiko Jyobaa dyajnaxy jekyë tiempë ets jyaˈˈatëdë ayoˈon? 2) ¿Tiko Dios kyaj tjëjpkudijë mä jäˈäy nyayaˈoogëdë ets mä jyaˈˈatyë wiinkpë ayoˈon?

¹⁵ Per ¿tiko Jyobaa dyajnaxy jekyë tiempë ets jyaˈˈatëdë ayoˈon? ¿Ets tiko tnaˈixy ets jyaˈˈatëdë axëkˈäjtën? Min nˈokˈijxëm ti majtsk pëky tyunëp ja maˈestrë diˈib të yˈokˈyajmaytyakpë. Tuk pëky, yëˈë nyasˈixëp ets ja alumnë kujuun dyaˈixëdët wiˈix dyaˈoyët ja kuentë, ets ja tuk pëky, kyaj tpudëkët mä jam dyaˈoyë. Nanduˈun jyaty mëdë Jyobaa, majtsk pëky diˈib yëˈë të ttuny, myëduk pëky, nyaˈijxypyë Satanás ets pënaty puwäˈkëdëp dyaˈixëdët pën myëdäjttëbë tëyˈäjtën. Pääty tnasˈixë jekyë tiempë nyaxët. Kanäk mil jëmëjt kujkë tiempë nyaxy etsë naxwinyëdë jäˈäy të tjaˈijxmäjtstäˈäy oytyim diˈibëty gobiernë, etsë ëxpëkyjyaˈay niˈigyë tijaty tjayajemybyëtsëmdë, per duˈunyëm myëjwindëkë axëkˈäjtën, tsip, jyaˈˈatyë ayoobë jäˈäy ets kyaj pën ttunyë tëyˈäjtën. Ta yajxon nyigëxëˈëky ko naxwinyëdë jäˈäyë gyobiernë kyaj yˈoybyëtsëmy.

 ¹⁶ Myëmajtsk pëky, Jyobaa kyaj tpudëkë Satanás mä tˈaneˈemyë naxwinyëdë jäˈäy. Koxyëbë Dios tˈokjëjpkudijë etsë jäˈäy kyaj nyayaˈoogëdët ets kyaj jyaˈˈatëdë wiinkpë ayoˈon, ¿këdii yëˈëxyëbë nety pyuwäˈkëp pënaty kyaj myëmëdoyëty? ¿Ets këdii mbäätxyëp nanduˈun nwinmäˈäyëm ko naxwinyëdë jäˈäy mbäät këˈëm nyayˈaneˈemyëty ets nitii jotmay tkapäädët? Koxyëbë Jyobaa duˈun ttuny, duˈunxyëp extëmë Satanás tpuwäˈägë mä yˈandaˈaky. Per “kyaj mbäädë Dios yˈandaˈaky” (Ebreeʉsʉty 6:18).

17, 18. ¿Ti tyunaambyë Jyobaa mä tukëˈëyë ayoˈon jotmay diˈib yajjaˈäjtypyë Mëjkuˈu yä naxwiiny?

¹⁷ Per ¿wiˈixë net yˈoyët tukëˈëyë ayoˈon jotmay diˈib jaˈäjtp ko kyayajmëmëdoyë Dios? Nˈokjamyajtsëm ko Jyobaa yëˈë diˈib myëdäjtypy tukëˈëyë mëjääw. Mbäät dyajjëgeˈeky tukëˈëyë ayoˈon jotmay ets tyunaambyë duˈun. Extëm të nˈëxpëjkëm, tyäˈädë Naxwinyëdë oyëyäämp mä të wyindëgoy ets jyëmbitäˈäny extëm tuˈugë it lugäärë tsujpë. Ets mët yëˈëgyëjxm ko Jesus ojts xykyuˈoˈkëm, nˈawäˈätspëtsëmäˈänëm mä tukëˈëyë diˈib tyam xyaˈˈayoˈowëm mët ko nbokyjyaˈayˈäjtëm. Etsë tadë jäj jëmuˈumën diˈib jaˈäjtp ko tuˈugë jäˈäy yˈooky, jyëgaˈagäˈäny ko ja oˈkpë jyukypyëktët. Duˈuntsoo Dios nëjkx dyajtunäˈänyë Jesus “es dyajkutëgoyaˈany diˈibë ja mëjkuˈugopk tyiimpy” (1 Fwank 3:8). Jyobaa yëˈë nyijäˈäwëp näˈä ttunäˈäny tukëˈëyë tyäˈädë. Mbäät jotkujk  nnayjäˈäwëm ko tnasˈixë tiempë, pes mët ko Dios myaˈkxtuky, ëtsäjtëm mbäät nnijäˈäwëmë tëyˈäjtën ets nmëduˈunëm (käjpxë 2 Peedrʉ 3:9, 10). Ets tyamë Dios, yëˈë yˈëxtaabyë jäˈäy pënaty jantsy awdatanëdëp ets tpudëkë parë tmëmadäˈägëdë ayoˈon jotmay diˈib jaˈäjtp yä naxwiiny (Fwank 4:23; 1 Corintios 10: 13, TNM).

¹⁸ Mayë jäˈäy nyayajtëwëdë: “¿Ti waˈanxyëp tukëˈëyë tyäˈädë ayoˈon kyajaaty koxyëbë Dios ojts dyajkojˈyë Adán mëdë Eva parë ninäˈä kyamëdëgoyëdët?”. Parë nnijäˈäwëm, min nˈokˈijxëm wiˈixë Dios ojts xyajkojëm.

19. ¿Wiˈixë Jyobaa të xyajkojëm, ets tiko mbäät nmëjjäˈäwëm?

¹⁹ Extëm të nˈijxëm mä kapitulo 5, Dios ojts dyajkojˈyë jäˈäy parë tmëdatëdë madakën ets këˈëm twinˈixët ti tyunaampy. ¿Këdii jantsy oy extëmë Dios ojts xyajkojëm? Dios ojts nanduˈun dyajkojy mayë jëyujk animal, per yëˈëjëty kyaj twinˈixtë ti tyunaampy (Proverbios 30:24). ¿Jotkujkxyëp nnayjäˈäwëm koxyëbë Dios ojts xyajkojëm extëmë jëyujk animal? Pes kyajxyëp. Pääty mbäät nnayjäˈäwëm jotkujk ko mbäät këˈëm nwinˈijxëm wiˈix njäˈäyˈatäˈänëm, wiˈix njukyˈatäˈänëm ets pënaty mëët nnaymyayäˈänëm. Jotkujk nnayjäˈäwëm ko këˈëm nwinˈijxëm ti ndunäˈänëm, ets duˈunë Dios ttseky ets njukyˈäjtëm.

20, 21. ¿Wiˈix mbäät oy nyajtuˈunëmë tadë madakën diˈibë Dios të xymyoˈoyëm parë nwinˈijxëm ti ndunäˈänëm?

²⁰ Jyobaa tsyejpy ets nmëduˈunëm mët tukëˈëyë jot korasoon (2 Korintʉ 9:7). Duˈun extëmë uˈunktääk  uˈunkteety, niˈigyë tˈoyjawët ko yˈanëˈëmxëdët tuˈugë yˈuˈunk mët tukëˈëyë jyot kyorasoon, “mëk ntseky”, ets kyaj ko pën yˈagäjpxëdët. Pääty, jëjpˈam ets mijts këˈëm xywyinˈixët wiˈix xyajtunäˈänyë mjot mwinmäˈäny diˈibë Jyobaa të mmoˈoyëty. Satanás, Adán etsë Eva mëk axëëk ojts dyajtundë ja jyot wyinmäˈäny, pes kyaj ojts tmëmëdowdë Jyobaa Dios. Ets mijts, ¿ti net mdunaampy?

²¹ Tadë madakën diˈibë Dios të mmoˈoyëty parë xywinˈixët këˈëm ti mdunaampy, mbäät xyajtuny ets xytyunëdë oyˈäjtën. Mbäät mduˈukmuky mëdë tadë miyonkˈambë jäˈäy diˈib të tpuwäˈägëdë Jyobaa. Tyäˈädë jäˈäyëty yajxondaktëbë Jyobaa, pes yaˈijxëdëp ko Satanás mëk kuˈanëë ets ko mëk axëëk yˈaneˈemy (Proverbios 27:11). Mijts nan mbäädë Dios xyajxondaˈaky pën mjukyˈäjtp extëm ttseky. Mä ja tuˈukpë kapitulo yajnimaytyäˈägäˈäny wiˈix mbäät oy njukyˈäjtëm.