1, 2. ¿Tiko näˈäty nyajtëˈëwëm tijaty?

¿TË MIJTS xypyëkyë kuentë wiˈixë mutskˈënäˈk tijaty tjantsy yajtëwdë? May dyajtëëwtsondäˈäktë tijaty ko kyäjpxëˈëktë. Näˈäty ajotkumonë wyinˈijxpattë ets dyajtëwdë extëm: “¿Tiko tsäjp yˈasulëty?”, “¿Tiko mëtsäˈä tyeˈkxy?” o “¿Pënë joon të ttukniˈˈixë ets yˈëwët?”. Oy njaˈëxtäˈäyëmë winmäˈäny ets nˈatsoowëmbijtëm, näˈäty kyaj nnijäˈäwëm wiˈix nˈanmäˈäyëm. Ets axtë ko oy nˈatsoowëmbijtëm, ta net dyajtëwdë: “¿Ets tiko?”.

² Per kyaj yëˈëjëty jeˈeyë mutskˈënäˈk diˈib myëdäjttëbë kostumbrë ets tijaty dyajtëwdët. Ko nyaˈkënë duˈunyëm tijaty nyajtëˈëwëm, extëm ko nnijawëyäˈänëm wiˈix njäjtëm mä tuˈugë lugäär, o nyajtëˈëwëm pën kyaj muum kyutsëˈëgëty, o näˈäty nëgoo ko tijaty nyajtëˈëwëm. Per ta  mayë jäˈäy diˈib kyaj tijaty tnekyyajtëwdë diˈibxyëp jëjpˈam mbäät tjayajtëwdë, o kyaj net tnekyˈëxtäˈäytyë yˈatsoowëmbijtën.

3. ¿Tiko mayë jäˈäy kyaj tnekypyayoˈoytyë tijaty nayajtëëwëdëp?

³ Okwinmay ti yajtëëpy mä tyäˈädë liibrë nyiˈak, mä tyim tsondaˈaky ets nanduˈun mä tyäˈädë kapitulo tsyondaˈaky. Mayë jäˈäy duˈun nyayajtëwëdë, per kyaj tnekypyayoˈoytyë wiˈix yaˈˈatsoowëmbity. ¿Tiko kyaj? ¿Mbäädëdaa Biiblyë tˈatsoowëmbity? Näägë jäˈäy jyënäˈändë ko jantsy tsip yajjaygyukë wiˈixë Biiblyë tˈatsoowëmbity. Ets nääk kyaj ti dyajtëwäˈändë mët ko tjëjpjawëdë tsyoytyuˈunbäättët. Ets ta net diˈib winmääytyëp ko waˈan yëˈë tˈatsoowëmbittë wintsëndëjk ets diˈib yaˈëxpëjktëp mä relijyonk. ¿Wiˈix mijts mˈokwinmay?

4, 5. ¿Tijaty mbäät nnayajtëˈëwëm, ets tiko mbäät nbayoˈoyëm wiˈix yaˈˈatsoowëmbity?

⁴ Seguurë ko mijts nan mnijawëyaampy wiˈix yaˈˈatsoowëmbity tijaty nnayajtëˈëwëm ko nmëmäˈäy nmëdäjëmë jukyˈäjtën. Mbäät näˈäty mnayajtëyëty extëm: “¿Tiko të nmiˈinëm yä Naxwiiny? ¿Jeˈeyë të nmiˈinëm ets nmaxuˈunkˈäjtëm, nmëjjäˈäyëm ets nˈoˈkëm? ¿Wiˈix jyaˈayˈatyë Dios?”. Oy ko duˈun mnayajtëwëdët, ets oyxyëp ko xypyayoˈoy axtë ko xynyijawët wiˈix yaˈˈatsoowëmbity tëyˈäjtën myëët extëm mbäät xyjaygyukë. Jesukristë diˈib yaˈixyˈäjtp extëmë yaˈëxpëjkpë, jyënany: “Amdowdë, es mˈaxäjëdëp; ëxtäˈäytyë, es mbäättëp; koxtë jënˈää tëjkˈää, es mˈawatsxëdëp” (Matewʉ 7:7).

⁵ Pën mijts mbayoˈoyˈadëtsypy wiˈix yaˈˈatsoowëmbity tijaty mnayajtëëwëp, ta xypyëkëdë kuentë ko kyaj nanëgoobë nety të xypyayoˈoy (Proverbios 2: 1-5). Oy näägë jäˈäy jyajënäˈändë ko kyaj mbäät pën tˈatsoowëmbity, mijts mbäät xynyijawë wiˈix yaˈˈatsoowëmbity, tap myiny mä Biiblyë ets mbäät xyjaygyukë. Ets diˈib niˈigyë oy, yëˈë ko mbäät nˈawijxëmë oyˈäjtën ets axtë mä tyäˈädë tiempë mbäät xymyoˈoyëmë jotkujkˈäjtën. Min nˈokˈijxëm tuk pëky diˈib mayë jäˈäy nayajtëëwëp ets myëmääy myëdäjtëp.

6. ¿Tiko mayë jäˈäy wyinmaytyë ko Dios kyaj tkuentëty extëm yˈayoyë naxwinyëdë jäˈäy?

⁶ Mayë jäˈäy duˈun wyinmaytyë. Jyënäˈändë ko koxyëbë Dios yˈoknaytyukjotmaytyunyëty mët ëtsäjtëm, kyajxyëp dyuˈunëty tyamë jukyˈäjtën. Tyam njukyˈäjtëm mëdë ayoˈon jotmay, jyaˈˈatyë tsip, nayˈaxëkˈixë etsë jäj jëmuˈumën. Niˈamukë nbäˈämbajtëm, nˈayoˈowëm ets yˈoogyë jiiky mëguˈuk. Pääty ta diˈib jënandëp: “Koxyëbë Dios xyˈokkuentëpëjtakëm, ¿ti kyajxyëp dyajjëgeˈegyë tyäˈädë amay jotmay?”.

7. 1) ¿Tiko mbäät njënäˈänëm ko diˈib nyiwintsënˈäjttëbë relijyonk yajwinmääytyëbë jäˈäy ko Dios juunë jyot kyorasoon? 2) ¿Wiˈixë Biiblyë jyënaˈany tiko jyaˈˈatyë ayoˈon jotmay?

⁷ Diˈib niˈigyë axëëk, yëˈë ko mayë jäˈäy diˈib nyiwintsënˈäjttëbë relijyonk dyajwinmaytyë jäˈäy ko Dios juunë jyot kyorasoon. Extëm nˈokpëjtakëm, ko tyuny jyatyëtyë ayoˈon, jyënäˈändë ko duˈunë Dios ttseky. Duˈunxyëp extëm jyënäˈändë ko Diosë pyoky ko ayoˈon jotmay tyuny jyatyëty. Per ¿tëyˈäjtënëdaa? ¿Ti tëyˈäjtën jantsy tukniˈˈijxëbë Biiblyë? Mä Traducción del Nuevo Mundo, Santiago 1:13 jyënaˈany: “Ko nduknäjxëmë ayoˈon jotmay, kyaj pën jyënäˈänët: Diosëts  xypyëjtakp jotmayoty. Yëˈko mëdë axëkˈäjtën kyaj mbäädë Dios tyëkë jotmayoty, ni yëˈë këˈëm tkayajtëkë pën jotmayoty”. Päätyë Dios ninäˈä tkayajjaˈˈatyë ayoˈon diˈib tuun jäjtëp yä Naxwiiny (käjpxë Job 34:10-12). Tëyˈäjtën ko Dios nyasˈijxëp ets tyun jyatëdëdë ayoˈon, per jaˈäjtp tuˈugë tëgatsyˈäjtënë ko pën tnasˈixët ets ti tyun jyatëdët ets ko pën dyajjaˈˈaty.

8, 9. 1) ¿Ti ijxpajtënë mbäät mëët xynyimaytyaˈaky wiˈix tyëgatsyëty ko pën tnasˈixë ayoˈon jotmay ets ko pën dyajjaˈˈaty? 2) ¿Tiko kyaj yˈoyëty nbokymyoˈoyëmë Dios ko tnasˈixë etsë jäˈäy tpëktëdë nëˈë tuˈujë axëëkpë?

⁸ Nˈokpëjtakëm tuˈugë uˈunkteety diˈib kuwijy kuwinmäˈäny ets tsojkp, dyajtsëënë tuˈugë yˈuˈungë mëˈˈënäˈkpë. Per ko tyäˈädë yˈuˈunk kyujuundaˈaky ets jyënaˈany ko kyaj yˈokˈitanë mä tyëjk, tyäˈädë uˈunkteety ta tnasˈixë ja yˈuˈunk. Ta ja yˈuˈunk tpëkyë axëk  nëˈë axëk tuˈu ets nyayajtëkëty jotmayoty. ¿Mjënäˈänëp mijts ko ja uˈunkteety yëˈë duˈun të dyajtëkë ja yˈuˈunk jotmayoty? Kyaj (Lukʉs 15:11-13). Nanduˈun jyaty mëdë Dios, nyasˈijxëp etsë naxwinyëdë jäˈäy tpëkëdë nëˈë tuˈujë axëëkpë, per kyaj yëˈë tˈandijy ko Dios yëˈë diˈib yajtëjkëbë naxwinyëdë jäˈäy jotmayoty, pes këˈëm tˈëxtäˈäytyë jotmay. Pääty ninuˈun kyaˈoyëty nbokymyoˈoyëmë Dios ko wiˈixëm yˈayowdë naxwinyëdë jäˈäy.

⁹ Kanäk pëky jyaˈˈaty tiko Dios tnasˈixë etsë naxwinyëdë jäˈäy tpëkëdë nëˈë tuˈu diˈib axëëk. Ets kyajxyëp tiko yëˈë xytyukmëtmaytyakëm, pes yëˈë tuˈugë Dios diˈib kuwijy kuwinmäˈäny ets kumëjääw, per mët ko xytsyojkëm ta xytyuknijäˈäwëm. Mä kapitulo 11 nnijawëyäˈänëm niˈigyë tidën ko tnasˈixë ayoˈon jotmay. Per mijts mbäät mˈity seguurë ko  Jyobaa kyaj tpokyëty ko nbatëmë amay jotmay. Pes yëˈë niˈigyë xyˈawäˈänëm ko yaˈoyëyaampy tukëˈëyë amay jotmay (Isaías 33:2).

10. ¿Tiko mbäät nˈijtëm seguurë ko Dios yajjëgaˈagaampy tukëˈëyë ayoˈon jotmay diˈibë axëkjäˈäy yajjaˈäjtypy?

¹⁰ Dios wäˈäts nanduˈun (Diˈibʉ Jatanʉp o Apocalipsis 4:8). Tyäˈädë yëˈë yˈandijpy ko nitii axëkˈäjtën tkamëdaty. Pääty, mbäät nbëjtakëmë mëbëjkën amumduˈukjot mä Dios, ets kyaj dyuˈunëty mä naxwinyëdë jäˈäy diˈib näˈäty nayajjëmbijtëdëp mëk axëëk. Pes ni yëˈë jäˈäyëty diˈib oy anaˈamdëp tkamëdatyë mëjääw ets dyaˈoyët diˈibë axëkjäˈäyëty yajwindëgooytyëp. Perë Dios myëdäjtypy tukëˈëyë mëjääw. Yëˈë mbäät dyajjëgeˈeky tukëˈëyë ayoˈon jotmay diˈib jaˈäjtp, ets duˈunën ttunäˈäny. Ninäˈä kyanekyjaˈˈatäˈänyë axëkˈäjtën (käjpxë Salmo 37:9-11).

11. 1) ¿Wiˈixë Dios tˈixyë axëkˈäjtën? 2) ¿Ti Dios jyäˈäwëp ko xyˈijxˈayoˈowëm?

¹¹ ¿Wiˈixë Dios nyayjawëty ko tˈixy tijaty tyam tuun jäjtëp yä Naxwiiny, ets ko tˈixy wiˈix njäjt ngëbajtëm? Biiblyë tyukniˈˈixë ko Dios tsyejpyë tëyˈäjtën (Salmo 37:28; Diˈibʉ Jatanʉp 16:5). Yëˈë yajxon tpëkyë kuentë ti oy ets ti axëëk, ets yˈaxëkˈijxypy tukëˈëyë axëkˈäjtën. Mä Biiblyë jyënaˈany ko Dios “tjäˈäwë mon tukë kyorasoon” ko ja Naxwinyëdë ojts tyuktuky mëdë axëkˈäjtën (Génesis 6:5, 6). Etsë Dios ninäˈä kyatëgatsy (Santya̱ˈa̱gʉ 1:17). Duˈunyëm tˈaxëkˈixyë axëkˈäjtën ets tpaˈˈayoy pënaty ayoowdëp. Mä Biiblyë jyënaˈany: “Yëˈë naytyukjotmaytyuunëp mët miitsëty” (käjpxë 1 Peedrʉ 5:7).

12, 13. 1) ¿Tiko nmëdäjtëmë oyjyaˈayˈäjtën extëmë tsojkën, ets wiˈixë tyäˈädë tsojkën xyajnayjäˈäwëm ko nˈijxëmë ayoˈon yä naxwiiny? 2) ¿Tiko mbäät nˈijtëm seguurë ko Dios yajjëjptëgoyaambyë amay jotmay diˈib jaˈäjtp abëtsemy nyaxwinyëdë?

 ¹² ¿Tiko mbäät nˈijtëm seguurë ko Dios mëk tjawë ko xyˈijxˈayoˈowëm? Wenë, min ja tuk pëky nˈokˈijxëm. Mä Biiblyë jyënaˈany ko Dios ojts dyajkojˈyë jäˈäy duˈun extëm yëˈë (Génesis 1:26). Pääty ëtsäjtëm nmëdäjtëmë oybyë jäˈäyˈäjtën mët ko Dios duˈun jyaˈayˈaty. Extëm nˈokpëjtakëm, ¿mbaˈˈayoopy mijtsë jäˈäy ko yˈayoy diˈib kyaj ti poky tmëdaty? Pën mijts mjäˈäwëp mëk ko jäˈäy yˈayoy mët ko jyaˈˈatyë axëkˈäjtën, mbäät mˈity seguurë ko Dios niˈigyë tmëkjawë.

¹³ Tuˈugë jäˈäyë jyaˈayˈäjtën diˈib wäˈkpëtsëëmp, yëˈë tsojkën. Ko ntsojkëm, ja näjxëmë Dios diˈib të xyajkojëm, pesë Biiblyë jyënaˈany ko “Dios yëˈë dëˈën ja tsojkën” (1 Fwank 4:8, 16). Ntsojkëm mët ko Dios tsojkp. Koxyëp mijts xyˈokmëdatyë mëjääw ets xyajjëgaˈagëdë ayoˈon jotmay etsë axëkˈäjtën diˈib jaˈäjtp yä naxwiiny, ¿këdii myajjëgekypyxyëp? ¿Këdii mduumpyxyëp duˈun mët ko xymyëdatyë tsojkën? ¡Pes mduumpyxyëp! Pääty mbäät mˈity seguurë ko Dios yajjëjptëgoyaampy tukëˈëyë amay jotmay diˈib jaˈäjtp yä naxwiiny. Tadë wandakënë diˈib të xynyijawë mä tyäˈädë liibrë tsyondaˈaky, kyaj dyuˈunëty extëmë tsuu kumäˈäy o diˈib nanëgoobë xyjotkujkmoˈoyëm. Diosën duˈun të jyënaˈany ets seguurë ko yˈadëwäˈäny. Per parë xymyëbëkëdë tyäˈädë wandakën, tsojkëp xyˈixyˈatët yajxonë Dios diˈib duˈun të twandaˈaky.

14. ¿Ti Dios txëwˈaty, ets tiko mbäät nyajtuˈunëmë xyëëw?

¹⁴ ¿Ti diˈib tim jawyiin mduumpy ko xytsyeky ets  pën mˈixyˈatëdët? ¿Këdii jawyiin xyˈanëëmë ti mxëwˈaty? Pes, ¿nan myëdäjtypyëdaa Diosë xyëëw? Mayë relijyonk tyukniˈˈixëdë ko Dios txëwˈaty “Wintsën” o “Dios”, perë tyäˈädë kyaj yëˈëjëtyë tuˈugë xëëw. Duˈun extëm ko njënäˈänëm “rey” o “presidentë”. Mä Biiblyë kanäk naxë Dios yajtijy, extëm “Wintsën” o “Dios”. Per nanduˈun xytyukniˈˈijxëm ko myëdäjtypy tuˈugë xyëëw: Jyobaa. Salmo 83:18 jyënaˈany: “Mijts, mxëwˈaty Jyobaa, mijts jeˈeyë naytyuˈuk diˈib mˈijtp jantsy Këjxm abëtsemy nyaxwinyëdë”. Pën mä mBiiblyë kyaj yajpäätyë Diosë xyëëw, ix Diˈib mëët kyaˈpxy mä jyënaˈany: “Diosë xyëëw wiˈix tyuny ets ti nyikejy” ets xynyijawët tiko kyaj yajpääty. Pes ko tëëyëp yajjääy këˈamë Biiblyë kanäk milˈok jap yajkujäˈäyë Diosë xyëëw. Päätyë Jyobaa tsyejpy ets mijts xynyijawëdë xyëëw ets xyajtunët. Mbäät duˈun yajjaygyukë ko Dios yëˈë yajtuumbyë Biiblyë ets xynyijawët pën yëˈë.

15. ¿Wiˈix nyikejˈyë tadë xëëw Jyobaa?

¹⁵ Tadë xëëw Jyobaa diˈibë Dios këˈëm naymyooyë kajaa nyikejy, yëˈë yajjaygyujkëp ko yëˈë jeˈeyë mbäät tkuytyuny tukëˈëyë wyandakën o diˈib tyuknibëjtakëp. * Extëmë Diosë xyëëw kyaj pën duˈun txëwˈaty, pes yëˈëyë naytyuˈuk diˈib duˈun  mbäät txëˈaty. Duˈunë duˈun, extëmë Jyobaa kyaj pën duˈun. Min nˈokˈijxëm tiko dyuˈunëty.

16, 17. ¿Ti xytyukniˈˈijxëm ko nnijäˈäwëmë Jyobaa yajtijy: 1) “diˈib tëgekyë mëkˈäjtën myëdäjtypy”? 2) “Rey diˈib winë xëë winë tiempë”? 3) ets diˈib tijaty të dyajkojy?

¹⁶ Të nˈijxëm ko Salmo 83:18 tnimaytyaˈaky duˈunë Jyobaa: “Mijts jeˈeyë naytyuˈuk diˈib mˈijtp jantsy Këjxm”. Nan yëˈë naytyuˈuk diˈib yajtijp “diˈib tëgekyë mëkˈäjtën myëdäjtypy”. Diˈibʉ Jatanʉp 15:3 jyënaˈany: “Wintsën Dios diˈibë tëgekyë mëkˈäjtën myëdäjtypy,  jyantsy myëjjëty es jyantsy oy jyantsy tsyujëty diˈibë mdiimpy. Mij myajkutujkp mëdë tëyˈäjtën, mij myajkutijkypy nidëgekyë naxwinyëdë jäˈäy”. Ko Biiblyë jyënaˈany ko Jyobaa yëˈë “diˈib tëgekyë mëkˈäjtën myëdäjtypy”, yëˈë yˈandijpy ko nipën duˈunë mëkˈäjtën tkamëdaty extëm yëˈë. Mä 1 Timotee 1:17 jyënaˈany ko Dios yëˈë “Rey winë xëë winë tiempë”. Tyäˈädë yëˈëdën xytyukˈijxëm ko yëˈëyë naytyuˈuk diˈib xëmë Diosˈäjtp. Salmo 90:2 jyënaˈany: “Winë xëëw winë tiempë ets winë xëëw winë tiempë, mijts mˈity Dios”. ¿Këdii xyajmonyˈijx xyajmonyjyäˈäwëm ko duˈun nnijäˈäwëm?

¹⁷ Jaˈäjtp ja tuk pëky tiko njënäˈänëm ko extëmë Jyobaa kyaj pën duˈun. Yëˈko yëˈëyë naytyuˈuk diˈib tijaty të dyajkojtäˈäy. Diˈibʉ Jatanʉp 4:11 jyënaˈany: “Nintsënˈäjtëm  Dios, mijtsë dëˈën mbatëp es xyˈaxäjët ja mëjˈäjtën, wintsëˈkën esë mëkˈäjtën, mët ko mijtsë dëˈën të xyajkojtäˈäy tëgekyë diˈibë ijtp, es mgëˈëmtsojkëngyëjxm mij xyaˈity es xyajkojy”. Jyobaa yëˈë diˈib të dyajkojy tijaty jaˈäjtp, extëmë anklës diˈib tsäjpotm, mëtsäˈä diˈib tyuktëˈkx tyukjäjjëbë tsäjp, ääy kepy diˈib yajkypyë tyëëm, may äjkx diˈib jukyˈäjttëp mejnyoty ets tukëˈëyë diˈib nˈijxëm.

18. ¿Tiko näägë jäˈäy wyinmaytyë ko ninäˈä mbäädë Dios tkamëwingondë, per wiˈixë Biiblyë tyukniˈˈixë?

¹⁸ Ta jäˈäy diˈib wanaty tsëˈkëdëp ko tnijawëdë wiˈixë Jyobaa jyaˈayˈaty. Wyinmaytyë ko Dios kyaj kyuentëpëjtäˈägëdë ets ko ni jeˈeyë mbäät tkamëwingondë, pes jantsy këjxm yajpääty. ¿Oyëdaa ko duˈun wyinmaytyë? Biiblyë kyaj duˈun tnimaytyaˈagyë Jyobaa Dios, pes jyënaˈany ko yëˈë “kyaj jagam yˈity” mä ëtsäjtëm (Apostʉlʉty 17:27). Axtë xyˈanmäˈäyëm: “Mëwingondë Dios, es yëˈë nandëˈën mëwingonëdëp miitsëty” (Santya̱ˈa̱gʉ 4:8).

19. 1) ¿Wiˈix mbäät nmëwingoˈonëmë Dios, ets ti kumäˈäyën nˈaxäjëyäˈänëm? 2) ¿Diˈibë Diosë jyaˈayˈäjtën niˈigyë mˈoyˈijxypy?

¹⁹ ¿Wiˈix mijts mbäädë Dios xymyëwingony? Wenë, këdii xymyastuˈuty diˈib tyam jam mduumpy, ak ixyˈat niˈigyë Dios. Jesus jyënany: “Esë tyäˈädë jikyˈäjtën winë xëë winë tiempë, jaˈa yëˈë ko [...] mij, tiˈigyë Dios, mˈixyˈatëdë es xyˈaxäjëdëts ëj extëm ja Kristë es tmëbëktët ko mij xykyajxëts yä naxwiiny” (Fwank 17:3). Biiblyë jyënaˈany ko nˈixyˈäjtëmë Jyobaa etsë Jesus, yëˈën mënëjkxäämp mä “jikyˈäjtën winë xëë winë tiempë”. Të nˈijxëm ko Dios “yëˈë dëˈën ja tsojkën” (1 Fwank 4:8, 16). Perë Jyobaa myëdäjtypyë wiinkpë jyaˈayˈäjtën  diˈib mbäät xypyudëjkëm ets nmëwingoˈonëm. Extëmë Biiblyë jyënaˈany ko Dios yëˈë “mëdiˈibë oyjyot oywyinmäˈäny myëëtˈajtypyën. Ets mëdiˈibë päˈëyoop näjtsˈëyoˈowëbën mëdiˈibë maˈkxtujkpën, ets mëj këjaa tsyoky jyäwë, ets ääk mëdëy winë ttuny” (Éxodo 34:6, MNM). Yëˈë tuˈugë Dios diˈib “oyjyaˈay ets listë yˈity parë pyokymyaˈkxäˈäny” (Salmo 86:5). Yëˈë maˈkxtujkp (2 Peedrʉ 3:9). Ets kyaj myastuˈuty (Revelación 15:4, TNM). Ko xykyäjpxˈadëˈëtsëdë Biiblyë, ta xyˈixäˈäny wiˈixë Jyobaa dyaˈixyëtyë jyaˈayˈäjtën.

20-22. 1) Oknimaytyäˈäk. ¿Mbäät nmëwingoˈonëmë Dios oy ngaˈijxëm? 2) ¿Wiˈix mbäät näägë jäˈäy mëdë oyjyot mˈanëˈëmxëty, per ti mijts mbäät xytyuny?

²⁰ Tëyˈäjtën ko Dios kyaj mbäät nˈijxëm, pes yëˈë tuˈugë espiritë (Juan 1:18; 4:24, TNM; 1 Timotee 1:17). Perë Biiblyë myaytyakypy wiˈix yëˈë jyaˈayˈaty. Duˈun extëmë David jyënany ko mijts mbäät xyˈixy wiˈixë Jyobaa jantsy oy jyaˈayˈaty (Salmo 27:4; Romanʉs 1:20). Ko niˈigyë xyˈixyˈatëdë Dios, ta niˈigyë xymyëbëkët ko tamën yëˈë, ets niˈigyë xytsyokët ets mjawëp ko wingon yëˈë yˈity.

²¹ Wanaty wanaty xyjaygyukëyaˈany tiko Biiblyë jyënaˈany ets nˈijxëmë Dios extëmë ndeetyˈäjtëm (Matewʉ 6:9). Kyaj jeˈeyë të xymyoˈoyëmë jukyˈäjtën, tsyejpyë duˈun ets oy njukyˈäjtëm, duˈun extëm tuˈugë uˈunkteety ttukmëtsekyë oyˈäjtënë yˈuˈunk yˈënäˈk (Salmo 36:9). Mä Biiblyë nanduˈun jyënaˈany ko naxwinyëdë jäˈäy mbäät nyaymyayëty mëdë Jyobaa (Santya̱ˈa̱gʉ 2:23). Okpawinmay, ¡mijts mbäät mnaymyayëty mëdë Dios diˈib tijaty të dyajkojtäˈäy!

²² Ko niˈigyë xyˈëxpëkëdë Biiblyë, jaˈˈatäämbë jäˈäy diˈib mbäät mˈanëˈëmxëty mëdë oyjyot ets kyaj mnekyˈëxpëkët.  Mbäät duˈun mˈanëˈëmxëty mët ko kyaj mdukmëtsokëdë ets xyajtëgatsëdë mëbëjkën. Per kyaj xynyaˈixët ets pën mdukmastuˈudëdë tadë naymyayë diˈib mbäät xymyëdaty mëdë Dios, yëˈë duˈunë mas oybyë mëtnaymyaayëbë diˈib mbäät xymyëdaty.

23, 24. 1) ¿Tiko kyaj mbäät mtsëˈëgë ets xyajtëwët diˈib kyaj oy xyjaygyukë? 2) ¿Ti nˈëxpëkäˈänëm mä ja tuˈukpë kapitulo?

²³ Taˈˈatäämp tijaty diˈib kyaj oy xyjaygyukëyaˈany. Per këdii mtsëˈëgë, amdowë naybyudëkë. Jesus ojts jyënaˈany ko oy ko nmëdäjtëmë tudaˈakyˈäjtënë extëmë mutsk ënäˈk (Matewʉ 18:2-4). Të nnijäˈäwëm ko mutsk ënäˈk xëmë tijaty dyajtëwdë. Dios tsyejpy ets xypyäädëdë yˈatsoowëmbijtën tijaty mijts mnayajtëëwëp. Mä Biiblyë tap tmaytyaˈaky näägë jäˈäy diˈib jyantsy tsyojkënyëˈäjttë tˈixyˈatäˈänyë Dios. Pääty ojts tˈëxpëktë yajxonë Biiblyë ets ojts tˈixtë pën tëyˈäjtënë nety diˈib yˈëxpëjktëp (käjpxë Apostʉlʉty 17:11).

²⁴ Tsojkëp ngäjpxëmë Biiblyë parë yajxonë Jyobaa nˈixyˈäjtëm, yëˈë tuˈugë liibrë diˈib tëgatsy nuˈun tukëˈëyë liibrë. ¿Tiko tyëgatsyëty? Yëˈë nˈixäˈänëm mä ja tuˈukpë kapitulo.