Tim tsojk jyaˈˈatäˈäny tuˈugë gobiernë diˈib anaˈamäämp abëtsemy nyaxwinyëdë. ¿Mnijawëyaampy diˈibë?... Yëˈë Diosë yˈAnaˈam Kyutujkën, diˈib yajjëmbitaambyë Naxwinyëdë jantsy tsuj. ¿Mˈaknijawëyaampy wiˈix yajnimaytyaˈaky?...

Tukëˈëyë gobiernë, myëdäjtypy tuˈugë yˈanaˈambë, diˈib yˈaneˈembyë jäˈäy. ¿Mnijäˈäwëp pën anaˈamäämp mä Diosë yˈAnaˈam Kyutujkën?... ¡Yëˈë Jesus! Jam tsyëënë tsäjpotm ets tim tsojk yˈanaˈamäˈäny abëtsemy nyaxwinyëdë. ¿Oyëdaa yˈanaˈamäˈäny? ¿Nëjkxëbëdaa nˈijtëm jotkujk ko nety yˈaneˈemy?...

¡Tiko këdii! Pes mä ja lugäärë tsujpë kyaj jäˈäy nyekytsyiptunäˈändë. Niˈamukë jäˈäy nyaytsyokäˈänëdë. Nipën kyapäˈämbatäˈäny ets kyaˈoogäˈäny. Ja wiints yˈijxpëkäˈändë, ja nat myëdoojëˈëgäˈändë ets pënaty kyaj mbäät yoˈoy nyaxtë, pyutäˈändë ets pyëyëˈëgäˈändë. Niˈamukë jäˈäy tmëdatäˈändë mayë jyeˈxy pyeky. Kyaj wiˈix nyaytyunäˈänëdë jëyujk animal ets nan mbäät nëjkx mëët nˈëyëˈk nguyäjtëm. Ets pënaty  të yˈooktë ¡jukypyëkandëp jatëgok! Extëm ja Rebeca, Rahab, David etsë Elías. ¿Mtsojkënyëˈajtypy xyˈixyˈatäˈäny?...

Jyobaa mtsojkëp mëk ets tsyejpy parë mˈitët jotkujk. Akˈixyˈat ets mmëmëdow, ¡net nëjkx mjukyˈaty winë xëë mä ja lugäärë tsujpë! ¿Mjukyˈatäämp jam?...