ËXPËJKËN 2
Rebeca jotkujkë Jyobaa dyajnayjäˈäwë
Rebeca yëˈë tuˈugë kiixy diˈib tsyojkë Jyobaa. Ja nyaˈay txëˈäjty Isaac, yëˈë nan tsyojkë Jyobaa. ¿Wiˈixë Rebeca tˈixyˈajtyë Isaac? ¿Wiˈix dyaˈijxë ko tsyejpy etsë Jyobaa nyayjawëdët jotkujk? Min nˈokˈijxëm wiˈix yajnimaytyäˈägäˈäny.
Ja tyeetyë Isaac, ja txëˈäjty Abrahán, etsë tyääk Sara. Jam tsyënääytyë Canaán, mä jäˈäy kyaj tˈawdattë Jyobaa. Abrahán kyaj ttsejky etsë Isaac tpëkët tuˈugë kiixy diˈib kyaj tˈawdatyë Jyobaa. Pääty tkejxy niduˈuk ja tyuumbë, (waˈan yëˈëjëtyë Eliezer) parë nyëjkxët jam Harán, mä tsyëënëdë jyiiky myëguˈuk ets tˈëxtäˈäyët pën pyëkëbë Isaac.
Rebeca mëk jyantsy tyuuny parë dyajnëˈuktääyë kameyë
Eliezer ta tsyoˈony mëdë wiinkpë tyuumbëtëjkë Abrahán. Jantsy kajaa ojts tyuˈuyoˈoytyë. Ets ja ojts dyajnëjkxtë nimäjkë kameyë diˈib tyuktsëmëˈktë jeˈxy peky etsë regalë. ¿Wiˈixë nety mbäädë Eliezer tnijawë diˈibë kiixy pyëkëbë Isaac? Ko jyäjttë Harán, ta ojts pyoˈkxtë mä tuˈugë nëgoondakn, pesë Eliezer nyijäˈäwëbë nety ko toxytyëjk myindë nëgoombë. Ta tmënuˈkxtakyë Jyobaa ets tˈanmääy: Tadë kiixy diˈibëts xyajnëˈukp ets diˈibëts nanduˈunë ngameyë yajnëˈuktaapy, yëˈë netyë tadë kiixy diˈib mijts të xywyinˈixy.
Ta Rebeca myiiny nëgoombë. Biiblyë jyënaˈany ko jantsy tsuj ijty. Ta Eliezer yˈamdoojë waanë nëë, Rebeca ta yˈatsooy: Oy tiko këdii. Tyää nëˈuuk ets minëts nˈakˈyajtsoony parë nanduˈun nyëˈuugëdë mgameyë. ¡Okwinmay! Jantsy tëtsëdëp ja kameyë ets jantsy kom nyëˈuuktë, päätyë Rebeca ojts tnijëmbity tniˈadëjy ja nëë. Okˈix mä dibujë. ¿Ti jamë Rebeca tyuumpy?... Eliezer mëjˈixy mëjmëdoy tjäˈäwë wiˈixë netyë Jyobaa të yˈatsoojëmbityëty.
Eliezer ta tmooyë Rebeca oyatypyë regalë. Ta Rebeca wyoojëdë mä tyëjk parë jam jyäjtäˈäktët. Ko jam jyäjttë, ta Eliezer ttukmëtmaytyaky ja Rebeca fyamilyë tiko netyë Abrahán të kyexyëty ets wiˈixë netyë Jyobaa të yˈatsoojëmbijtxëty ja nyuˈkxtakën. Ja Rebeca fyamilyë jantsy jotkujk nyayjäˈäwëdë parë pyëkët mëdë Isaac.
Rebeca ojts tpanëjkxyë Eliezer jam Canaán parë tpëkäˈänyë Isaac
Per ¿waˈandaa Rebeca tpëkanyë Isaac?... Rebeca nyijäˈäwëbë nety ko Jyobaa yëˈë të tkexyë Eliezer. Pääty ko fyamilyë yajtëëwë pën nëjkxäämp Canaán ets tpëkëdë Isaac, ta yˈatsooy: Nëjkxäämbëts. Ta jakumbom tpatsoˈony ja Eliezer. Ko jyäjttë Canaán, ta pyejky mëdë Isaac.
Ko Rebeca tmëmëdooyë Jyobaa, ta kyuentˈäjtë tsuj yajxon. Ets ko kanäk jëmëjt nyajxy, ta mä fyamilyë myaxuˈunkˈäjtyë Jesus. Mijts nan nëjkxëbë Jyobaa mguentˈatyëty pën mˈijtp extëmë Rebeca ets pën mduumpy diˈibë jotkujk yajnayjawëdëp.
