ËXPËJKËN 1
Yajnijawë diˈibë nety ijtp ayuˈutsyë
¿Të näˈä pën mdukmëtmaytyaˈagyëty diˈib kyaj pën tnijawë?... * Biiblyë myaytyakypy diˈib ijty kyaj yajnijawë ets jam tsyoony mä Dios. Nipën ijty tkanijawë, axtë anklëstëjk jyanijawëyandë nanduˈun. Ets mijts, ¿nan mnijawëyaampy?...
Wiˈix mˈokwinmay, ¿tidaa anklëstëjk nyijawëyandë?
Tëëyëp, ojtsë Dios dyajkojy ja tim jawyiimbë yetyëjk ets ja toxytyëjk. ¿Mnijäˈäwëp ti txëˈäjttë?... Adán mëdë Eva. Jamë Dios pyëjtakëdë ets tsyëënëdët mä tuˈugë lugäärë tsujpë, diˈib xëˈäjt Edén. Jyobaa yëˈë nety tsyejpy ets mëdë yˈuˈunk yˈënäˈk dyajjëmbittët tukëˈëyë Naxwinyëdë jantsy tsuj. Ets niˈamukë jyukyˈattët winë xëë winë tiempë mä ja lugäärë tsujpë. Per kyaj duˈun jyajty. ¿Mnijäˈäwëp tiko?
Yëˈko Adán mëdë Eva kyaj tmëmëdoodë Dios, ets pääty tyam kyaj njukyˈäjtëm mä tuˈugë lugäärë tsujpë. Perë Dios ojts jyënaˈany ko jäˈtäämp tuˈugë xëë mä tukëˈëyë Naxwinyëdë jyëmbitäˈäny jantsy tsuj mä niˈamukë jäˈäy jyukyˈattët winë xëë winë tiempë ets agujk jotkujk. Per ¿wiˈixë nety ttunäˈäny? Jeky ja tiempë nyajxy ets kyaj pën tnijäˈäwë. ¡Ayuˈutsyë yˈijty!
Per ko Jesus myiiny yä Naxwiiny, ta niˈigyë jäˈäy ttuknijäˈäwë diˈibë nety ijtp ayuˈutsyë. Yëˈë tyukmëtmaytyak ja Diosë yˈAnaˈam Kyutujkën. Ko nmënuˈkxtakëmë Dios, ta nˈanmäˈäyëm: Yajminë mˈanaˈam mgutujkën. ¿Tiko? Yëˈko tyäˈädë Anaˈamën, yëˈë yajjëmbitaambyë Naxwinyëdë jantsy tsuj.
¿Mjukyˈatäämp mä tadë lugäärë tsujpë?... Per jamyats ko mä ja lugäärë tsujpë yëˈëyë jam jukyˈatandëp pënaty myëmëdoodëbë Jyobaa. Biiblyë myaytyakypy nimayë yetyëjk toxytyëjk diˈib myëmëdoodë Jyobaa Dios. ¿Mnijawëyaampy pënaty?... Mä tyäˈädë foyetë nnijawëyäˈänëm pënaty yajmaytyakp ets wiˈix mbäät nbanëjkxëmë yˈijxpajtën.
KÄJPX MÄ MBIIBLYË:
^ parr. 3 Mä tyäˈädë maytyaˈaky ets diˈib ak miimp, myëmiimpy tëgëëgë puntë (...) ko jyëjpkëxy näägë yajtëˈëwën. Ko nety xykyäjpxtäˈäy, ta waanë mˈawixët parë ja mˈuˈunk tˈatsoojëmbitët.
