1. ¿Ti tsyojkypyë Jyobaa ets ttundëdë naxwinyëdë jäˈäy?

 JYOBAA duˈun ojts dyajkojˈyë naxwinyëdë jäˈäy parë këˈëm twinˈixtët ti tyunaampy. Tuˈuk tuˈugë xëëw nwinˈijxëm ti ndunäˈänëm, per mëdiˈibë mas jëjpˈam mbäät nwinˈijxëm, yëˈë ko nmëduˈunëmë Jyobaa ets nyajpatëm mä nyax kyäjpn. Jyobaa tsyojkypy ets niˈamukë naxwinyëdë jäˈäy myëdunëdët. ¿Tiko? Yëˈko tsyojkypyë naxwinyëdë jäˈäy, tyukmëtsojkypyë oyˈäjtën, tsyojkypy parë oy mëët yˈitët ets jyukyˈatët xëmëkyëjxm (Deut. 30:​19, 20; Gal. 6:​7, 8).

2. ¿Ti tsyojkypyë Jyobaa ets ttunët ja mëdiˈibë të pyokytyuny mëjwiin kajaa? (1 Fwank 2:1).

² Jyobaa kyaj pën ttukˈatsipˈaty parë myëdunëdët, mëdiˈibën yëˈë tsyojkypy, yëˈë ets këˈëm nwinˈijxëm ti ndunäˈänëm. Ets ¿wiˈix yajtuny ko tuˈugë Diosmëduumbë pyokytyuny mëjwiin kajaa? Pën kyaj jyodëmbity, kuanë ko yajjuudët mä Diosë kyäjpn (1 Kor. 5:13). Perë Jyobaa tsyojkypy ets jatëgok nyijëmbitëdët. Pes päätyë yˈUˈunk tkejxy parë yajpokymyaˈkxtët pënaty pokytyuundëp mëjwiin kajaa, per net pën jodëmbijttëp (käjpxë 1 Fwank 2:1). Jyobaa nëgooyë xytsyojkënë, pääty tpudëkë ets tˈanëëmë ja mëdiˈibë të pyokytyuny mëjwiin kajaa ets jyodëmbitët (Zac. 1:3; Rom. 2:4; Sant. 4:8).

3. ¿Ti nimaytyäˈägäˈänëm mä yäˈädë artikulo?

³ Jyobaa xytyukˈawäˈänëm wiˈix tˈixy ja poky kaytyey ets wiˈix tˈixy ja mëdiˈibë pokytyuundëp mëjwiin kajaa, ets tsyojkypy parë ëtsäjtëm nanduˈun nˈijxëm. Pääty mä yäˈädë artikulo yëˈë nimaytyäˈägäˈänëm, wiˈix yˈoˈoyë ja jotmay ko tuˈugë Diosmëduumbë pyokytyuuny mëjwiin kajaa jam Corinto, wiˈixë apostëlë  Pablo ojts tˈanëëmë ja Diosmëduumbëty ko tnijäˈäwë ko të jyodëmbity ja pokyjyaˈay. Ets wiˈixë Jyobaa tˈixy pënaty pokytyuundëp mëjwiin kajaa.

¿WIˈIX YˈOˈOYË JA JOTMAY KO TUˈUK JA DIOSMËDUUMBË PYOKYTYUUNY JAM CORINTO?

4. ¿Ti jotmay jamˈäjt mä ja tuˈukmujkën jam Corinto? (1 Korintʉ 5:​1, 2).

⁴ (Käjpxë 1 Korintʉ 5:​1, 2). Mä netyë apostëlë Pablo myëdëgëkˈok yˈëwaˈkxy kyäjpxwaˈkxy jagambäät, ta tnijäˈäwë ko mä ja tuˈukmujkën mëdiˈibë nety näämnëm të nyaxkëdaˈaky jam Corinto, tamˈäjtpë nety tuˈugë Diosmëduumbë mëdiˈibë mëjwiin kajaa pokytyuump, yëˈë nety myëtˈijt myëttsënäänyëp ja kyudääk. Pablo duˈun tnimaytyaky ja jotmay: “Tyäˈädë dëˈëmbë dëˈën jantsy mëj poky, es ni jeˈeyë kyayajpääty tadë dëˈëmbë mä yëˈë diˈibë kyaj tˈawdattë Dios”. Waˈan ja Diosmëduumbëty wyinmääytyë ko kyaj wyiˈixëty ets pääty tnaˈijxtë, ets ko Diosteety paˈˈayoop ets jyaygyujkëp ko naxwinyëdë jäˈäy pokyjyaˈay yajpäättë. Perë Jyobaa kyaj tnasˈixë ets yajpäädët mä ja nyax kyäjpn ja jäˈäy mëdiˈibë mëjwiin kajaa pokytyuump. Ko yäˈädë Diosmëduumbë kyaj ojts tˈoktsoytyuˈunjäˈäwënë ja pyoky kyaytyey, seguurë ko axëëk ojts yajnimaytyaˈaky ja tuˈukmujkën. Ets axtë mbäädë nety ja myëguˈuktëjk ttukninäjxnëdë ja axëëkpë jot winmäˈäny. Ko duˈunë Pablo tnijäˈäwë, ¿wiˈix tˈanmääy ja Diosmëduumbëty mëdiˈibë Corinto?

5. ¿Wiˈixë Pablo tnijäˈäyë ja Diosmëduumbëty mëdiˈibë Corinto, ets ti myaytyäˈägan? (1 Korintʉ 5:13; ix nanduˈunë dibujë).

⁵ (Käjpxë 1 Korintʉ 5:13). Jyobaa yëˈë yajtuunë apostëlë Pablo parë tnijäˈäyë ja Diosmëduumbëty mëdiˈibë Corinto, ets tˈanmääytyë ko pën kyaj jyodëmbity ja jäˈäy mëdiˈibë mëjwiin kajaa të pyokytyuny, yajjuudëp mä Diosë kyäjpn. Per ¿ti nety mbäät ttundë ja Diosmëduumbëty? Pablo anmääyëdë ko kyaj mëët tuˈugyë yˈokyajpatnëdët ets nijeˈeyë mëët kyakääymyuk kyaˈukmuktët (1 Kor. 5:11). Ko mëdë jäˈäy ngäˈäy nˈukëm seguurë ko mëët ngäjpx nmaytyakëm. Pääty mëdiˈibë Pablo ojts tmaytyäˈägäˈänyën, yëˈë ko kyaj nety mbäät oy mëët yˈokˈijnëdë ja jäˈäy mëdiˈibë të yajjuuty. Duˈunë nety mbäät yajkuwäˈändë ja Diosmëduumbëty këdiibë nyinaxëdët ja jot winmäˈänyë axëëkpë (1 Kor. 5:​5-7). Ko kyaj mëët nyekytyuˈukmuktët, pudëkëyanëbë nety nanduˈun ja jäˈäy mëdiˈibë mëjwiin kajaa të pyokytyuny parë tˈixët nuˈunënë Jyobaa të tmëdëgoy, ttsoytyuˈunjawët ja pyoky kyaytyey ets jatëgok ja yˈääw jyot jyënäˈänët parë jyodëmbitët.

6. ¿Ti tyuundë ja Diosmëduumbëty ko ja apostëlë Pablo ojts nyijayëdë, ets ti tyuun ja pokyjyaˈay?

 ⁶ Ko ja apostëlë Pablo tnijäˈäyë ja Diosmëduumbëty mëdiˈibë Corinto, myëmääy myëdäj wiˈixëdaa tˈokˈixäˈän tˈokmëdowäˈändë. Per ko waanë tiempë nyajxy, ta Tito tyukˈawäˈänë ko yˈoymyëdoowdë ja ëwij käjpxwijën ets ko tamë nety tkuytyundë (2 Kor. 7:​6, 7). Mä nety näämnëmë Pablo të tnijayë ja tuˈukmujkën, ta yäˈädë yetyëjk jyodëmbijty, yajtëgäjts ja jyukyˈäjtën ets kyuytyuuntsoˈondak ja Diosteety ja yˈanaˈam tyëyˈäjtën (2 Kor. 7:​8-11). ¿Wiˈix jatëgokë apostëlë Pablo tˈanmääy ja Diosmëduumbëty?

¿WIˈIXË NETY MBÄÄT JA DIOSMËDUUMBËTY TˈIXTË JA JÄˈÄY MËDIˈIBË JODËMBIJT?

7. Ko ja jäˈäy yajjuˈty mä ja Diosë kyäjpn, ¿wiˈix pyudëjkë? (2 Korintʉ 2:​5-8).

⁷ (Käjpxë 2 Korintʉ 2:​5-8). Pablo duˈun jyënany: “Kyajts niˈigyë nnakytyëytyunäˈäny. Të byeen yajtukkumëdoonë mët ko nidëgekyë miitsëty të xyˈëxtijtë mä mnaymyukëdë”. Extëm nˈijxëm, ko yäˈädë jäˈäy yajjuˈty mä ja  Diosë kyäjpn pudëjkë parë jatëgok jyodëmbijty (Eb. 12:11).

8. ¿Wiˈix okë Pablo tˈanmääy ja Diosmëduumbëty?

⁸ Kom të nety ja pokyjyaˈay jyodëmbity, Pablo ta tˈanmääy ja mëjjäˈäytyëjkëty: “Diˈibë mbatëdëp es xytyundët, jaˈa es xymyaˈkxtët es xyajjotkujkëdët”. Ets duˈun tˈakˈanëmääytyë: Tukˈixtë “jatëgokë mtsojkën diˈibë mmëdäjttëp mët yëˈë”. Extëm nˈijxëm, Pablo kyaj jeˈeyë ttsojky etsë yäˈädë nmëguˈukˈäjtëm yajkupëkët mä ja tuˈukmujkën, tsojkëbë nety ttukˈixtët mët ja tyuˈun kyäjpxënëty ko të tjantsy pyokymyaˈkxtë ets ko tsyojktëp. Ko duˈun ttundët, ta ja mëdiˈibë të jyodëmbity tˈixët ko agujk jotkujk nyayjyawëdë ja myëguˈuktëjk.

9. ¿Waˈandaa näägë nmëguˈukˈäjtëm ojts tsyiptakxëdë tpokymyaˈkxtët ja jäˈäy mëdiˈibë nety të jyodëmbity?

⁹ ¿Waˈandaa nääk ja Diosmëduumbëty ojts tsyiptakxëdë jatëgok tkupëktët ko jyëmbijty ja mëdiˈibë nety të pyokytyuny mëjwiin kajaa? Biiblyë kyaj yajxon ttimynyigajpxy. Per mëdiˈibë tyuunë yäˈädë jäˈäy, waˈan ja Diosmëduumbëty jyotˈambëjktë ko dyajnibaxëtëjkë ja tuˈukmujkën, ets waˈan jyamˈäjty ja mëdiˈibë tyimëdëgooy ets axëëk tjantsy yajnayjyäˈäwë. Pääty nääk ja Diosmëduumbëty kyaj tˈoyˈijxtë ko yäˈädë jäˈäy mëdiˈibë nety të pyokytyuny mëjwiin kajaa ojts jatëgok yaˈˈaxäjë ets yaˈoyjyäˈäwë. Myentrës yëˈëjëty tamë nety tjatuumbëdë mëjääw parë tmëmëdowdë Jyobaa yˈanaˈamën (ijxkijpxyë mëdë Lukʉs 15:​28-30). Per ¿tiko nety jyëjpˈamëty ets ja Diosmëduumbëty ttukˈixtët ko jyantsy tsyojktëp ja jäˈäy mëdiˈibë nety të jyëmbity mä Diosë kyäjpn?

10, 11. ¿Tixyëp tuun jäjtë koxyëp ja mëjjäˈäytyëjk ojts tkapokymyaˈkxtë ja jäˈäy mëdiˈibë nety të jyodëmbity?

¹⁰ Koxyëp ja mëjjäˈäytyëjk tkakupëjktë ja jäˈäy mëdiˈibë jodëmbijt ets koxyëp ja kongregasionk kyatukˈijxë ko tsojkëp, ¿tixyëp ojts tyuny jyatyëty? Mbäätxyëp ja jäˈäy yëˈëyë ojts ja pyoky tmëmoon tmëdujknë ets wyinmääynyë ko tëjënë Jyobaa tkanijëmbity ets ko tëjën jatëgok mëët tuˈugyë kyanekyyajpääty ja myëguˈuktëjk. Ets waˈanxyëp kyaj ojts tˈoktuunë ja mëjääw parë jatëgok tnijëmbitëdë Jyobaa.

¹¹ Koxyëp ja nmëguˈukˈäjtëm ojts tkapokymyaˈkxtë ja jäˈäy mëdiˈibë nety të jyodëmbity, kyaj nety oy yˈitäˈändë mëdë Jyobaa. ¿Tiko duˈun njënäˈänëm? Yëˈko kyaj nety jam tnekyˈyajnigëxëˈëktë wiˈixë Jyobaa jyaˈayˈaty mëdiˈibë pyokymyeˈkxypy pënaty ajëmbijt jodëmbijttëp. Pes yëˈë nety yajnigëxëˈknëdëp ja Satanásë jyaˈayˈäjtën mëdiˈibë ninuˈunën kyapaˈˈayoy, ets yëˈëxyëp yajtuunëëdë parë yäˈädë jäˈäy jatëgok yˈëxtëkëwäˈägët ets kyaj tnekymyëdunëdë Jyobaa (2 Kor. 2:​10, 11; Éfes. 4:27).

12. ¿Wiˈixë nety mbäät ja Diosmëduumbëty mëdiˈibë Corinto tpanëjkxëdë Jyobaa yˈijxpajtën?

¹² ¿Wiˈixë nety mbäät ja Diosmëduumbëty mëdiˈibë Corinto tpanëjkxëdë Jyobaa yˈijxpajtën ets kyaj yëˈëjëtyë Satanás? Ko tpokymyaˈkxtët ja pokyjyaˈay mëdiˈibë jodëmbijt, duˈun extëm ttunyë Jyobaa. Min nˈokˈijxëm wiˈix näägë Diosmëduumbëty mëdiˈibë jyaaytyë Biiblyë tnimaytyaktë Jyobaa. Ja rey David duˈun jyënany: “Mijts Jyobaa, mˈoyjyaˈay ets mbokymyaˈkxäämp” (Sal. 86:5). Miqueas duˈun tkujäˈäyë: ‘Käˈäp mä Dios wiinkpë jëduˈun ta mijtsën, jaˈko mijts mbokymyeˈkxypy yëˈë pokyjyaˈay’ (Miq. 7:​18, TY). Etsë Isaías duˈun tkujäˈäyë: “Waˈanë axëkjäˈäy tmastuˈutyë nyëˈë tyuˈu, etsë axëkjäˈäy yëˈë jyot wyinmäˈäny; waˈan tnijëmbityë Jyobaa, mëdiˈibë paˈˈayowanëp, yëˈë nDiosˈäjtëm, mët ko yëˈë pokymyaˈkxäämp mëjwiin kajaa” (Is. 55:7).

13. ¿Tiko jatëgok yajkupëjky ja jäˈäy mëdiˈibë nety të jyodëmbity? (ixë rekuäädrë “ ¿Näˈä jatëgok jyëmbijty ja yetyëjk mëdiˈibë pokytyuun?”).

 ¹³ Ja Diosmëduumbëty mëdiˈibë Corinto tsojkëbë nety yajxon tˈagëˈë tˈaxäjëdët ets ttukˈixtët ja pokyjyaˈay mëdiˈibë të jyodëmbity ko tsyojktëp, duˈunë nety tniˈˈijxtutëdë Jyobaa jyaˈayˈäjtën. Apostëlë Pablo ojts jyënaˈany ko pën ja Diosmëduumbëty pyokymyaˈkxtëp ja jäˈäy mëdiˈibë nety të yˈajëmbity të jyodëmbity, duˈunë nety dyajnigëxëˈëktë ko mëdoowdëp (2 Kor. 2:9). Ets oyë nety waanë tiempë të nyaxy mä yäˈädë jäˈäy të yajjuuty mä ja Diosë kyäjpn, per ko yajjëwijtsëmbijty pudëjkë parë yˈajëmbijty jodëmbijty. Pääty ja mëjjäˈäytyëjkëty kyaj nety mbäät nëgoo jekyë tiempë dyajnaxtë parë jatëgok tkupëktët mä ja tuˈukmujkën.

¿TI XYTYUKNIˈˈIJXËM KO JYOBAA WINË TPAYEˈEY TËYˈÄJTËN MYËËT ETS KO XYPYAˈˈAYOˈOWËM?

14, 15. ¿Ti xytyukniˈˈijxëm mëdiˈibë tuun jäjtë jam Corinto? (2 Peedrʉ 3:9; ix nanduˈunë dibujë).

¹⁴ Jyobaa pääty dyajkujäˈäyë mä Biiblyë parë xytyuknijäˈäwëm wiˈix dyaˈoˈoyë ja amay jotmay mëdiˈibë jamˈäjt Corinto ets parë tijaty “xytyukˈijx xytyuknijäˈäwëmëty” (Rom. 15:​4, TY). Yäˈädë yëˈë xytyukniˈˈijxëm ko Jyobaa kyaj tnasˈixë ets tuˈugë jäˈäy yajpäädët mä nyax kyäjpnën mëdiˈibë të pyokytyunyën mëjwiin kajaa ets kyaj jyodëmbity. Nääk jyënäˈändë  ko Jyobaa paˈˈayoop ets nyasˈijxëp ets tuˈugë pokyjyaˈay mëdiˈibë kyaj jyodëmbity duˈunyëm yajpäädët mä ja nyax kyäjpn, per kyaj jyëduˈunëty. Tëyˈäjtën ko jantsy paˈˈayoop nasˈayoˈowëp per kyaj yëˈë tˈandijy ets ja jäˈäy ttunët ti yëˈë tyim tunaampy, pesë Jyobaa kyaj dyajtëgatsyë yˈanaˈamën (Juud. 4). Ko Jyobaa tnaˈixët ja mëdiˈibë të pyokytyunyën mëjwiin kajaa parë duˈunyëm yajpäädët mä ja nyax kyäjpn, kyaj nety dyaˈixyëty ja paˈˈayoˈow nasˈayoˈowën. Pesë yäˈädë pokyjyaˈay mbäädë nety dyajmäˈäty ja myëguˈuktëjk (Prov. 13:20; 1 Kor. 15:33).

¹⁵ Yäˈädë yëˈë nanduˈun xytyukniˈˈijxëm ko Jyobaa kyaj ttsoky ets nituˈugë naxwinyëdë jäˈäy kyutëgoyët, mëdiˈibën tsyojkypy yëˈë ets yˈajëmbit jyodëmbittët parë nyitsoˈoktët. Pyaˈˈayoopy nyasˈayoˈowëp pënaty yajtëgäjtstëbë jyukyˈäjtën ets tyuundëbë mëjääw parë jatëgok oy mëët yˈittët (Ezeq. 33:11; käjpxë 2 Peedrʉ 3:9). Pääty ko yäˈädë Diosmëduumbë mëdiˈibë Corinto yˈajëmbijty jyodëmbijty ets tmastuty ja axëëkpë jyukyˈäjtën, ta Jyobaa mëët yëˈëgyëjxmë apostëlë Pablo tˈanmääy ja Diosmëduumbëty parë tpokymyaˈkxtët.

16. Ko xynyijawë wiˈixë Jyobaa dyaˈoˈoyë ja jotmay mëdiˈibë jamˈäjt Corinto, ¿wiˈix myajnayjyawëty?

¹⁶ Extëm yä të niˈëxpëjkëm mëdiˈibë ojts tyuny jyatyëty Corinto, yëˈë xytyukniˈˈijxëm nuˈunënë Jyobaa xytsyojkëm ets ko mëdëy winë ttuny (Sal. 33:5). Ko nnijäˈäwëm wiˈixënë Jyobaa jantsy oy jyaˈayˈaty, ¿këdii xypyudëjkëm parë niˈigyë nyajmëjpëtsëˈëmëm tuˈuk tuˈugë xëëw? Niˈamukë ak pokyjyaˈay nyajpatëm, pääty ntsojkëm etsë Jyobaa xypyokymyaˈkxëm. Nguˈëˈëw ngukäjpxëm ko ojts xyjyuuybyëtsëˈëmëm, pes duˈuntsoow yajmeˈkxy ja nbokyˈäjt ngaytyeyˈäjtëm. Xyjyotkujkmoˈoyëm ko nnijäˈäwëm nuˈunënë Jyobaa xytsyojkëm ets ko xytyukmëtsojkëmë oyˈäjtën.

17. ¿Ti nnimaytyäˈägäˈänëm mä jatuˈukpë artikulo?

¹⁷ Ko tyam tuˈugë Diosmëduumbë pyokytyuny mëjwiin kajaa, ¿wiˈix mbäät ja mëjjäˈäytyëjk jyaˈayˈattë extëmë Jyobaa ets tpudëkëdët ja jäˈäy parë jyodëmbitët? Ets ¿ti ëtsäjtëm mbäät nduˈunëm ko ja mëjjäˈäytyëjk tjuuttët tuˈugë jäˈäy mëdiˈibë kyaj të jyodëmbity o ko jatëgok tkupëktët mä nduˈukmujkëm? Yëˈë nëjkx nimaytyäˈägäˈänëm mä jatuˈukpë artikulo.