Per näˈätyë Betel mbäät tkaxtë näägë nmëguˈukˈäjtëm parë yeˈeytyëty wiink kongregasionk, extëmë Betel mëdiˈibë Francia kyajxë Nicolas mëdë Céline wiink kongregasionk. Yëˈëjëty duˈun tnimaytyäˈäktë: “Jantsy agujk jotkujkëts ëgäˈäny nnayjyäˈäwëdë, per mon tukëts nnayjyäˈäwëdë kots njamyatstë ja mëdiˈibëts mëët oy nnayjyawëdë, pes mä ja jembyë kongregasionk kyajnëmë nety nëgoo pën nˈixyˈattëts”.  a Pääty pen wiink kongregasionk tyam myeˈeynyë, ¿ti mbudëkëyanëp parë jatëgok xyˈijxwëˈëmët? Pen jam pën jemy jyaˈty mä kongregasionk, ¿wiˈix mbäät nbudëjkëm? Ko mnëjkxët wiink kongregasionk, ¿wiˈix ttukˈoyˈatäˈändë nmëguˈukˈäjtëm, ets wiˈix nanduˈun xytyukˈoyˈatäˈäny?

TAXKË KÄJPXWIJËN MËDIˈIBË MBÄÄT MBUDËKËTY

1. Tukˈijxpatë Jyobaa (Sal. 37:5). Kazumi mëdiˈibë tsënaapy Japón, ja nety kujk yeˈeynyë 20 jëmëjt mä tuˈugë kongregasionk ko ojts ja myëmëjjäˈäy yaˈˈanëëmë mä nety myëdunyën ets wiinktsoow nyëjkxët tuumbë. ¿Ti Kazumi tyuun parë ttukˈijxpejtyë Jyobaa? Yëˈë duˈun tnimaytyaˈaky: “Xytyuktëjkëtsë tsëˈëgë, mon tukëts nnayjyäˈäwë, nmëmääy nmëdäjëts tijaty, per nmënuˈkxtakëtsë Jyobaa ets xëmëts xypyudëjkë”.

¿Ti mbudëkëyanëp parë niˈigyë xytyukˈijxpatëdë Jyobaa? Nmëbëjkënyëˈäjtëm duˈun extëm tuˈugë ujts, parë oy yonët tsojkëp nguentëˈäjtëm ets xëmë nyajxoˈkëm. Nicolas mëdiˈibë të yˈokˈyajmaytyakpë, yëˈë pudëjkë ko tpawinmääy wiˈixë netyë  Jyobaa të tkunuˈkxyë Abrahán, Jesus etsë Pablo ko ojts ttundë mëdiˈibë tsyojkypy, ets ijt seguurë ko yëˈë nety nanduˈunë Jyobaa pudëkëyanëp. Ko xynyiˈëxpëkëtyë Biiblyë kyaj jaayë mbudëkëyaˈanyëty ko nety xypyaatyë amay jotmay, nan mjataambyën tijaty ets mbäät xypyudëkë ja mmëguˈuktëjk mä ja kongregasionk mä jam myeˈeynyë.

2. Kyaj yˈoyëty tijaty xyˈijxkijpxyëty (Ecl. 7:10). Jules mëdiˈibë tsoˈon Benín ets ojts nyëjkxy tsënaabyë Estados Unidos, yˈijx ko tëgatsyë nety japë nmëguˈukˈäjtëmë kostumbrë tmëdattë. Yëˈë duˈun tnimaytyaˈaky: “Nbëjkëtsë kuentë ko ja nmëguˈukˈäjtëm tsyojktëbë nety parëts ndimytyukmëtmaytyaktäˈädëty wiˈixëts të njukyˈaty”. Kom yäˈädë nmëguˈukˈäjtëm kyajë nety duˈun të tˈijxwëˈëmy tëgatsy nyayjyäˈäwë, pääty nyayˈaduˈukpëjktakë. Per ko tiempë nyajxy, ta ojts niˈigyë tˈixyˈäjnë ja nmëguˈukˈäjtëmëty. Yëˈë duˈunë net tnimaytyaˈaky: “Tuˈugyë naxwinyëdë jäˈäyˈäjtëm jeˈeyë ko tëgatsyaty ngäjpx nmaytyakëm, per oy ko nˈijxwëˈëmëm wiˈix ja nmëguˈukˈäjtëm jyaˈayˈattë”. Pääty kyaj yˈoyëty nˈijxkijpxyëm wiˈix jyaˈayˈattë ja nmëguˈukˈäjtëmëty. Tuˈugë prekursoora mëdiˈibë xyëwˈäjtypy Anne-Lise duˈun jyënaˈany: “Kyajts ojts nëjkxy mä wiink kongregasionk parëts nˈixäˈäny pen ak duˈun ja nmëguˈukˈäjtëm jyaˈayˈattë extëm mätsë nety të nˈyeˈey, yëˈë duˈun parëts njatäˈäny tijaty”.

Ja nmëguˈukˈäjtëm mëdiˈibë tuundëp mëjjäˈäy kyaj mbäät tˈijxkijpxtë wiˈix ja nmëguˈukˈäjtëm tijaty ttundë mä ja kongregasionk mä jam yeˈeyanë, waˈan tëgatsy tijaty ttundë per kyaj yëˈë tˈandijy ko kyaj oy ti ttundë. Pen jam ti ttukˈanëëmëyäˈändë ja myëguˈuktëjk oy ko jawyiin tˈixyˈattët (Ecl. 3:​1, 7b). Oy ko ja nmëguˈukˈäjtëm nmoˈoymyëtyë oybyë ijxpajtën ets kyaj yëˈë ja winmäˈäny ndimyyajtunäˈänmëty (2 Kor. 1:24).

3. Tun tijaty mëdë mmëguˈuktëjk (Filip. 1:27). Ko jäˈäy tsyënääytyëgatsy tsojkëbë tiempë etsë jot mëjääw, per oy ko netyë mnëjkxët mä ja kongregasionk mä nety myeˈeyaˈany. Pes pen kyaj mnëjkxy reunyonk wiˈixën ja nmëguˈukˈäjtëm mbudëkëdëty. Min nˈokˈijxëm wiˈix tnimaytyaˈagyë Lucinda, mëdiˈibë tsënääytyëgäjts mëët nimajtskë nyëëx mä tuˈugë käjpn mëdiˈibë Sudáfrica, yëˈë jyënaˈany: “Kots njäjtë mä ja kongregasionk määjëtsë nety nyeˈeyäˈändë netyëts nduundëjkëdë, ojtsëts nëjkxtë ëwäˈkx käjpxwäˈkxpë, komentaräjttëts mä reunyonk ets nan jam ja nmëguˈukˈäjtëm tyuˈukmujktë mätsë ndëjk parë nyëjkxtë käjpxwäˈkxpë”.

Pen netyë mëët ja mmëguˈuktëjk mduundëkë mëdiˈibë yajpattëp mä ja kongregasionk mä jam myeˈeyanë, ta ja mëbëjkën kyëktëkëyaˈany. Anne-Lise mëdiˈibë të yˈokˈyajnimaytyakpë, ojts ja mëjjäˈäytyëjk yˈanëˈëmxëdë parë mëët ja myëguˈuktëjk kyäjpxwäˈkxët, yëˈë duˈun tnimaytyaˈaky: “Nˈijxëts ko oy ko tijaty ndunëtyëts mëdëts ja nmëguˈuktëjk”. Ko mbadëˈëk mjäˈxëˈëgëty mä salonk, mdunëty mä yˈaˈoyë, ta ja nmëguˈukˈäjtëm tˈixäˈändë ko tam xyˈijxwëˈëmnë ets mˈyujnë. Ko duˈun tuˈugyë tijaty xytyundëty mëët ja mmëguˈuktëjk ta niˈigyë xyˈixyˈatäˈäny ets xyjyawëyaˈany extëmë mfamilyë.

 4. Ix pën mëët oy mnayjyawëyaˈanyë (2 Kor. 6:​11-13). Parë xypyäädët pën mëët oy mnayjyawëdëty, juudë tiempë parë mëët ja nmëguˈukˈäjtëm mgäjpx mmaytyäˈägët mä reunyonk ets duˈun xyˈixyˈattët mas niˈigyë. Pen ajëëky amëguˈuk mjäˈäyˈaty, mjamyejtsypy ti ja nmëguˈukˈäjtëm txëwˈattë, ta xypyäädäˈäny pën mbäät oy mëët mnayjyawëty.

Kyaj mbäät jaayë oy mjäˈäyˈaty ko mëët ja mmëguˈuktëjk myajpäädët. Parë xypyäädët pën mbäät mëët oy mnayjyawëty, wow wits ja nmëguˈukˈäjtëm mä mdëjk duˈun extëm ttuunyë Lucinda.

“NAYˈAXÄJËDË NIDUˈUK NIDUˈUK”

Näägë nmëguˈukˈäjtëm tsiptakxëdëp nyëjkxtët reunyonk pen kyaj pën tˈixyˈaty. Pääty, ¿wiˈix mbäät xypyudëkë ja nmëguˈukˈäjtëm mëdiˈibë jemy miindëp? Apostëlë Pablo duˈun jyënany: “Nayˈaxäjëdë niduˈuk niduˈuk extëm [nanduˈun] oj mˈaxäjëdë ja Kristë miitsëty” (Rom. 15:7). Ja mëjjäˈäytyëjkëty oy ko jyaˈayˈattëty ajëëky amëguˈuk mët pënaty jemy miindëp, duˈun extëmë Kristë ttuuny (ixë rekuäädrë “ Ti yajtuump ko pën yeˈeyanë wiink kongregasionk”). Per mbäät niˈamukë ja nmëguˈukˈäjtëm jyaˈayˈattë ajëëky amëguˈuk axtë ja ënäkˈuˈungëty, parë oy dyajnayjyawëdët ja nmëguˈukˈäjtëm mëdiˈibë jap yeˈeyanëdëp mä ja kongregasionk.

Parë oy ja nmëguˈukˈäjtëm nyajnayjyäˈäwëm oy ko nwoˈow nwijtsëm mä njëënˈäjt ndëjkˈäjtëm ets ndukniˈˈijxëmëty tijaty. Extëm nˈokpëjktakëm, tuˈugë nmëguˈukˈäjtëm mëdiˈibë nety jemy jäjtp mä tuˈugë kongregasionk, ojts yajtukniˈˈixë wiˈix jyëditët mä siudad ets mä tmatsët ja kyarrë. Ja nmëguˈukˈäjtëm agujk jotkujk nyayjyäˈäwë ets yëˈë pudëjkë parë ojts yujy.

KO MNËJKXY WIINK KONGREGASIONK MBUJDËJKËP PARË NIˈIGYË DIOS XYMYËDUNËT

Pen mnëjkxäämp wiink kongregasionk, waˈan mtsëˈëgë o waˈan xymyëmay xymyëdäjy. Extëm nˈokpëjktakëm, duˈun extëm tuˈugë joonˈuˈunk tsiptakxëp ëgäˈäny kyaagëˈëgët, per ko yaˈknë ta kyaagëdijnë jagambäät. Nanduˈunën jyaty mä nDiosmëduˈunëm,  mbäät njëjptsëˈk njëjpjäˈäwëm nëjkxëm mä wiinkpë kongregasionk per ko netë tiempë nyäjxnë kyaj nˈokjëjptsëˈk nˈokjëjpjäˈäwënë. Nicolas mëdë Céline duˈun jyënäˈändë: “Ko mnëjkxët mä wiinkpë kongregasionk mjataampy tijaty. Extëm nˈokpëjktakëm, ëëtsëty ojtsëts nˈijxwëˈëmdë wiˈix ja nmëguˈukˈäjtëm jyaˈayˈattë, ets nan nˈakyaˈoˈoyëdëts ja njäˈäyˈäjtënëty”. Jean-Charles mëdiˈibë të yˈokˈyajnimaytyakpë, ko ojts yeˈeytyë mä wiink kongregasionk tyukˈoyˈäjttë mëdë fyamilyë, duˈun jyënaˈany: “Kots ojts nyeˈeynyëdë wiink kongregasionk pudëjkëdëtsë nˈënäˈk. Extëm ko nyajxy naa majtsk tëgëk poˈojën ta ja nnëëxëts ëgäˈäny dyajnäjxnë demostrasyonk ets ja nmäängëts ta ojts nyäjxnë publikadoor”.

Pen mijts kyaj mbäät mnëjkxy mä tyëgoyˈatyë naybyudëkë, ¿ti mbäät xytyuny? Tun extëm yä të yajnigajpxy ets duˈun nëjkx mnayjyawëty extëmxyëp mnëjkxy wiink kongregasionk. Tukˈijxpatë Jyobaa, tun tijaty mëdë nmëguˈukˈäjtëmëty, ëwäˈkx käjpxwäˈkxtë mëët, ix pën mbäät mëët oy mnayjyawëty ets pen jam pën mëët oy mnayjyawëty, ixyˈat mas niˈigyë. Oy ko xypyudëkëty pënaty jemy jäjttëp mä kongregasionk o mëdiˈibë yajtëgoyˈäjttëbë naybyudëkë. Ko duˈun nduˈunëm ta niˈigyë nmëwingoˈonëmë Jyobaa ets duˈun nyigëxëˈëky ko jantsy Diosmëduˈunëm (Fwank 13:35). Pen nduˈunëm duˈun mbäät nˈijtëm seguurë ko Jyobaa agujk jotkujk nyayjyawëyäˈänyë (Eb. 13:16).

Oy nimayë nmëguˈukˈäjtëm të tsyiptakxëdë nyëjkxtët wiink kongregasionk, per të yujnëdë ets agujk jotkujk nyayjyawëdë. Pen mijts wiink kongregasionk myeˈeynyë nan myujäämp ets mˈijxwëˈëmaampy. Anne-Lise duˈun jyënaˈany: “Kots ojts nëjkxy wiink kongregasionk tats ojts mas nimayë nmëguˈukˈäjtëm nˈixyˈaty”. Kazumi të ttimyˈixy ko pen mnëjkxp wiink kongregasionk mbäädë Jyobaa mbudëkëty extëm kyaj xytyimˈëwxity xytyimjëjpˈixy. Etsë Jules duˈun jyënaˈany: “Mä ja kongregasionk mäts tyam nˈyeˈey, tëts japë nmëguˈukˈäjtëm nˈixyˈattë ets oyëts mëët nnayjyawëdë kyajëts mon tuk nˈoknayjyäˈäwënë, xytsyiptäˈägänxëbëts jap ntsoonëty”.