ARTIKULO MËDIˈIBË YAˈËXPËJKP 23
ËY 28 Wiˈix mbäät nnaymyaˈayëm mëdë Jyobaa
Jantsy jotkujk nnayjyäˈäwëm ko Jyobaa xyajjäjtakëm
“Yëˈëjëty yajpäädandëp mätsë nwitëjk ets ëjts xyDiosˈatandëp” (EZEQ. 37:27).
TI YAJNIMAYTYÄˈÄGÄÄMP
Yäˈädë artikulo xypyudëkëyäˈänëm parë nyajtsobatëm ko Jyobaa të xywyoˈowëm mä wyitëjk ets wiˈix xyˈijxˈijt xykyuentëˈäjtëm ko jap nyajpatëm.
1, 2. ¿Mä Jyobaa të xywyoˈowëm?
KO PËN myajtëwëdët: “¿Wiˈix mijts xyˈixyë Jyobaa?”. Mbäät mˈatsoy: “Pes ëjts duˈunëts njawë extëmtsë nDeety, extëmtsë nDios o extëmëts tuˈugë nmëtnaymyaayëbë”. ¿Per mjënäˈänëp ko Jyobaa myajjäjtakëp mä wyitëjk?
2 Ko oy nˈijtëm mëdë Jyobaa duˈun ja rey David ojts tˈijxkijpxyë extëm ko njäjtakëm mä tyëjk. Ja David duˈun dyajtëëy: “Jyobaa, ¿pën mbäät jyäjtaˈaky mä mwitëjk? ¿Pën mbäät yˈokˈyajpääty mä ja mgopkë wäˈätspë?” (Sal. 15:1). Extëmë yäˈädë tekstë jyënaˈany, yëˈë xytyukˈijxëm ko mbäät njäjtakëm mä Jyobaa wyitëjk, jaˈa njënäˈänëm, ko mbäät mëët oy nˈijtëm. Jantsy oy, ¿këdii?
JYOBAA XYAJJÄTÄˈÄGÄˈÄNËM
3. ¿Pën tim jawyiinë Jyobaa yajjäjtak mä tyëjk, ets wiˈix nimajtsk nyayjyäˈäwëdë?
3 Jyobaa naytyuˈugë nety yajpääty jam tsäjpotm, per ta ojts dyajkojy ja tyuˈukˈUˈunk mëdiˈibë tim jawyiin ojts dyajjäjtaˈaky ets jantsy jotkujk nyayjyäˈäwë. Biiblyë jyënaˈany ko ja yˈUˈunk mëdiˈibë nety të dyajjäjtaˈaky nan jotkujk nyayjyäˈäwë (Prov. 8:30).
4. ¿Pënatyë Jyobaa yˈakwoow mä tyëjk?
4 Ok, ta Jyobaa ojts dyajkojˈyë anklëstëjk ets duˈunxyëp extëm dyajjäjtaky mä tyëjk. Biiblyë jyënaˈany “ko yëˈë ja Diosë yˈuˈungëty” ets jantsy agujk jotkujk nyayjyäˈäwëdë ko yajpattë mëdë Jyobaa (Job 38:7; Dan. 7:10). Jyobaa yëˈëyë nety të dyajjäjtaˈaky mä tyëjk ja anklëstëjk ets ja yˈUˈunk. Per ok, ta ojts dyajkojˈyë naxwinyëdë jäˈäy ets ta nääk dyajjäjtaky, extëmë Enoc, Noé, Abrahán etsë Job. Yëˈëjëty oy mëët yˈijttë Dios o nëˈëyeˈey tuˈuyeˈeytyë mëët (Gén. 5:24; 6:9; Job 29:4; Is. 41:8).
5. ¿Ti xytyukniˈˈijxëm extëm jyënaˈany mä Ezequiel 37:26, 27?
5 Nuˈun nyajxy kanäk mëgoˈpx jëmëjt, duˈunyëmë Jyobaa ojts twoy twitsyë jäˈäyëty parë dyajjäjtäˈägäˈäny. Extëm nˈokpëjktakëm mä Ezequiel 37:26, 27 (käjpxë) duˈun ojts yajnaskäjpxë ko Jyobaa tsyojkypy myëwingonëdët pënaty mëduunëp. Ojts twandaˈaky “ko tkajpxyˈatäˈändë parë yˈittët tuˈugyë”. Ets ja nety yˈadëwäˈäny ko yajpäättët tuˈugyë mä Jyobaa tyëjk pënaty nëjkxandëp tsäjpotm mët pënaty jukyˈatandëp yä naxwiiny (Fwank 10:16). Ets taajën tyam yˈadëy yäˈädë tekstë.
JYOBAA YËˈË XYKYUENTËˈÄJTËM OY MÄ NYAJPATËM
6. ¿Näˈä ndëjkëm mä ja Jyobaa wyitëjk ets mä yajpääty?
6 Ko ijty tëëyëp ja jäˈäy tkojtë wyitëjk, kuwanëdëp ko yˈany o ko tyuˈuy pyoy ets nan poˈkxtëp jap. Ets ko ijty jap pën jyäjtaˈaky, ijtp seguurë ko tsuj yajxon yaˈˈagëˈëjëyaˈany yaˈˈaxäjëyaˈany. Ëtsäjtëm ja ojts ndëjkëm mä Jyobaa “wyitëjk” ko ojts ndukwandakëmë jukyˈäjtën (Sal. 61:4). Jap nˈaxäjëm ja käˈäy ukën mëdiˈibë Jyobaa yajkypy ets nnayˈijx nnaybyatëm mëdë nmëguˈukˈäjtëm mëdiˈibë nanduˈunë Jyobaa të wyowëdë. Per ¿mä yajpäätyë yäˈädë Jyobaa wyitëjk? Mä tyimyyajpäättë ja yˈuˈunk yˈënäˈk mëdiˈibë mëmëdoowëdëp. Ets duˈunën të tˈixtë nmëguˈukˈäjtëm mëdiˈibë të nyëjkxtë asambleeˈäjtpë wiink paˈis ets të tˈixyˈattë ja myëguˈuktëjk mëdiˈibë nanduˈun të jyäjtäˈäktë mä Jyobaa tyëjk (Diˈibʉ Jat. 21:3).
7. ¿Tiko njënäˈänëm ko ja Diosmëduumbë mëdiˈibë të yˈooktë duˈunyëm jyäjtäˈäktë mä Jyobaa wyitëjk? (Ix nanduˈunë dibujë).
7 Ets ja Diosmëduumbëty mëdiˈibë të yˈoˈknëdë, ¿duˈunyëm yˈakˈyajpäättë mä ja Jyobaa wyitëjk? Duˈunyëm. Jaˈko mä Biiblyë jyënaˈany ko pënaty të yˈooktë, juuky yˈittë mä Jyobaa wyinmäˈäny. Jesus ojts jyënaˈany: ‘Yëˈëbäät ja Moisés tnijäˈäwë ko yëˈë oˈkpë jyukypyëkäˈändë ko ojts tˈixy ja sarsë kepy tyoy. Mä yˈënaˈanyën ko [ . . . ] yëˈë Abrahán, Isaac etsë Jacob yëˈë Dios. Yëˈë Dios käˈäp yëˈëty tniDyiosˈaty yëˈë oˈkpë, yëˈë nyiDiosˈäjtypy yëˈë juukypyë’ (Luc. 20:37, 38, TY).
Ja Diosmëduumbë mëdiˈibë të yˈoˈknëdë duˈunyëm yajpäättë mä Dios të yajjäjtäˈägëdë. (Ixë parrafo 7)
¿WIˈIX NDUKˈOYˈÄJTËM ETS TI NET MBÄÄT NDU’UNËM?
8. ¿Wiˈix ndukˈoyˈäjtëm ko Jyobaa xyajjäjtakëm?
8 Duˈun extëm tuˈugë witëjk xykyuwäˈänëm ko yˈany, tyuˈuy ets mbäät jap nboˈkxëm. Nanduˈunën ko Jyobaa xyajjäjtakëm mä tyëjk xymyoˈoyëm ja jotkujkˈäjtën ets xykyuwäˈänëm parë kyaj Satanás xyajtëgoˈoyëm. Ko kyaj Jyobaa nmëjagamgakëm, ta kyaj Satanás xytyuˈunëm extëm yëˈë ttimtsoky (Sal. 31:23; 1 Fwank 3:8). Ets mä ja jembyë jukyˈäjtën duˈunyëmë Jyobaa xykyuwäˈänäˈänëm parë kyaj nmëjagamgakëm ets parë kyaj nˈoˈk ndëgoˈoyëm (Diˈibʉ Jat. 21:4).
9. ¿Wiˈix mbäät jyaˈayˈattë pënaty Jyobaa yajjäjtakëp?
9 ¡Nitii duˈun kyaˈoyëty extëm ko Jyobaa xyajjäjtakëm mä tyëjk ets mbäät winë xëëw mëët nnaymyaˈayëm! Per ¿wiˈix mbäät njäˈäyˈäjtëm parë xëmë nyajpatëm mä ja wyitëjk? Parë njaygyujkëm min nˈokˈijxëm tuˈugë ijxpajtën: Ko pën xyajjäjtakëm mä tyëjk, ntsojkëm ets xyˈanmäˈäyëm ti mbäät nduˈunëm. Extëm pën jam ti yajtukpudëkëyaˈany, ta nduˈungojëm. Nanduˈun jyaty ko Jyobaa xyajjäjtakëm mä tyëjk, nnijawëyäˈänëm ti mbäät nduˈunëm parë duˈunyëm jap nyajpatëm. Ets ko mëk ntsojkëm, pääty ndunäˈänëm mëdiˈibë yëˈë jotkujk yajnayjyawëdëp (Kol. 1:10). Jyobaa yëˈë mëët nnaymyaˈayëm, per oy ko njamyajtsëm ko yëˈë nanduˈun nDiosˈäjtëm ets nDeetyˈäjtëm, pääty jëjpˈam ets nmayˈäjt nwintsëˈkëm (Sal. 25:14). Oy ko xëmë njamyajtsëm pënën yëˈë, pes ko ntsëˈkëmë Jyobaa, ta kyaj nduˈunëm mëdiˈibë axëëk yajnayjyawëdëp ets nnëˈëyeˈey nduˈuyeˈeyëm “yujy tudaˈaky” mët yëˈë (Miq. 6:8).
JYOBAA NIˈAMUKË TTSOJKTÄÄY JA ISRAELITËTY
10, 11. ¿Wiˈix nnijäˈäwëm ko Jyobaa niˈamukë ttsojktäˈäy pënaty mëduunëp?
10 Jyobaa niˈamukë ttsojktäˈäy pënaty yajjäjtakypy (Rom. 2:11). Extëm nˈokpëjktakëm, niˈamukë ja israelitëty ojts tˈijxˈity tkuentëˈaty ko tsyënääyëdijttë mä ja lugäärë äänëˈëk tëëtsëˈëkpë.
11 Ko ja israelitëty yˈawäˈätspëtsëëmdë mä nety jap yajtuumbëˈat yajmosëˈattë Egipto, ta Jyobaa ojts twinˈixy pënaty tunëp saserdotë mä ja tabernakulo. Ets yëˈë tyuknipëjk ja Leví tyëëm yˈääts parë jap tyundët. ¿Per niˈigyëdaa ojts tˈijxˈity tkuentëˈaty pënaty jap tuundë o pënaty wingon tsënääytyë? Kyaj, pesë Jyobaa niˈamukë tkuentëˈäjtääy ja israelitëty.
12. Ko ja israelitëty yajpattë mä ja lugäärë äänëˈëk tëëtsëˈëkpë, ¿wiˈixë Jyobaa dyaˈijxë ko niˈamukë ttsojktääy? (Éxodo 40:38) (Ix nanduˈunë dibujë).
12 Ja israelitëty mbäädë nety niˈamukë tmëwingondë Jyobaa, oy ti tuunk tnikëjxmˈattët ets oy wingon o jagam tsyëënëdët mä ja tabernakulo. Extëm nˈokpëjktakëm, niˈamukë tˈijxtë ja yoots mëdiˈibë pëdëˈk xëëny mä ja witëjk ets ja jënˈyaˈank mëdiˈibë pëdëˈk koots (käjpxë Éxodo 40:38). Ets ko ijty ja yoots yeˈeytsyoˈonë niˈamukë tˈixtë, ta dyajmujktäˈäytyë tijaty myëdäjttëp, dyajpëdëˈëktë ja wyitëjk ets ta tsyoˈondäˈäytyë (Núm. 9:15-23). Ets niˈamukë nanduˈun ijty tmëdowdë ko yajtukxuˈuxy jantsy mëk majtsk ja trompetë mëdiˈibë tukˈawäˈänëdëp ko të ja tiempë tpääty parë tsyoˈondäˈäytyët (Núm. 10:2). Pääty kyaj mbäät njënäˈänëm ko ja israelitë mëdiˈibë ijty wingon tsënaapy mä ja Diosë wyitëjk, niˈigyë wingon yˈity mëdë Jyobaa. Niˈamukë ja israelitëty mbäädë nety oy yˈittë mëdë Jyobaa, yˈijxˈit kyuentëˈatëdët ets nyëˈëmoˈoy tyuˈumoˈoyëdë. Nanduˈun tyamë Jyobaa ttuny mët ëtsäjtëm, oy mä ntsënäˈäyëm, yëˈë niˈamukë xytsyojkëm, xyˈijxˈijt xykyuentëˈäjtëm ets xynyëˈëmoˈoy xytyuˈumoˈoyëm.
Ko ja tabernakulo yajpaty itkujky mä nety ja israelitëty të nyaynyikojëdë, yëˈë yaˈijxë ko niˈamukë netyë Dios tsyojktäˈäyëdë. (Ixë parrafo 12).
JYOBAA XYTYUKˈIJXËM TYAM KO NIˈAMUKË XYTSYOJKTÄˈÄYËM
13. ¿Wiˈixë Jyobaa dyaˈixëty ko niˈamukë ttsojktäˈäy pënaty mëduunëp?
13 Näägë nmëguˈukˈäjtëm wingon tsyëënëdë mäjaty yajpäätyë Betel, ets taa mëdiˈibë jap tuundëp. Wiˈixëm ja tuunk mëdiˈibë të yajtuknipëktë ets tyuunmuktë mët pënaty ijxtëp wiˈix nyëˈëyeˈey tyuˈuyeˈey ja Diosë tyuunk. Ets ta nanduˈun pënaty tuundëp sirkuitë ets pënaty aduˈuk ja xyëëw tiempë yajtundëp mä Diosë tyuunk. Per ja nimaybyë nmëguˈukˈäjtëm kyaj duˈun tyundë. Pën mijts kyaj duˈun mduny, mbäät mˈity seguurë ko Jyobaa mtsojkëp, myajjäjtakëp mä tyëjk ets mˈijxˈijt mguentëˈäjtëp (1 Peed. 5:7). Jyobaa mmoˈoyanëp ja kääy ukën mëdiˈibë myajtëgoyˈajtypy, mˈijxˈitan mguentëˈatanëp ets mnëˈëmoˈoyan mduˈumoˈoyanëp extëm ttuny mët niˈamukë ja yˈuˈunk yˈënäˈk.
14. ¿Wiˈix ja tuk pëkyë Jyobaa dyaˈixyëty ko niˈamukë jäˈäy dyajjäjtäˈägäˈäny?
14 Ja tuk pëky wiˈixë Jyobaa dyaˈixyëty ko yajjäjtäˈägaampy niˈamukë jäˈäy, yëˈë ko të yajkäjpxnaxyë Biiblyë parë niˈamukë jäˈäy tjaygyukët. Pes ja yajjääy tëgëk ayuk: ebreo, arameo ets grieegë. ¿Per niˈigyëdaa tmëwingondë Jyobaa pënaty kyäjpxtëbë Biiblyë mä yäˈädë ayuk? Kyaj (Mat. 11:25).
15. Nigäjpx ja tuk peky wiˈixë Jyobaa niˈamukë xytsyojktäˈäyëm. (Ix nanduˈunë dibujë).
15 Jyobaa kyaj yëˈëyë tkupëkyë ëxpëkyjyaˈay o pënaty jyaygyujkëdëp ja ayuk extëmë Biiblyë yajjääy. Kyaj yëˈëyë tmoˈoyaˈany wijyˈäjtënë pënaty ëxpëkyëty, myoˈoyaambyë wijyˈäjtënë oyë jäˈäy të yˈëxpëky o të kyaˈëxpëky. Pesë Biiblyë mëdiˈibë yëˈë yˈayukˈäjtypy të yajkäjpxnaxy kanäk ayuk. Pääty niˈamukë jäˈäy mëdiˈibë tsënääytyëp abëtsëmy nyaxwinyëdë, mbäät nyaytyukpudëkëdë Biiblyë ets tnijawëdët wiˈix mbäädë Jyobaa tmëwingondë (2 Tim. 3:16, 17).
Biiblyë kanäk ayuk të yajkäjpxnaxy ets yëˈë xytyukˈijxëm ko Jyobaa niˈamukë jäˈäy ttsojktäˈäy. (Ixë parrafo 15).
NˈOKˈIJTËM XËMË MÄ JYOBAA TË XYAJJÄJTAKËM
16. Extëm jyënaˈanyë Apostʉlʉty 10:34, 35, ¿pënaty Jyobaa yajjäjtakypy?
16 Nitii duˈun kyaˈoyëty extëm ko Jyobaa xyajjäjtakëm. Pes jantsy oyjyaˈay, mëk xytsyojkëm ets tsuj yajxon xyˈagëˈë xyˈaxäjëm. Yëˈë kyupëjktaapy niˈamukë jäˈäy, oy mä tsyoondët, yetyëjk tyoxytyëjkëty, myëjjäˈäy myutskjäˈäyëty, oy wiˈixëm yˈixˈattë ets oy yˈëxpëkyˈat o kyaˈëxpëkyˈattë. Mëdiˈibë jeˈeyë xyˈamdoˈowëm yëˈë ets nwingutsëˈkëm ja yˈanaˈamën (käjpxë Apostʉlʉty 10:34, 35).
17. ¿Ti yajnimaytyäˈägäämp mä ja tuˈukpë artikulo?
17 Mä Salmo 15:1 duˈun japë David dyajtëëy: “Jyobaa, ¿pën mbäät jyäjtaky mä mwitëjk? ¿Pën mbäät yˈokˈyajpääty mä ja mgopkë wäˈätspë?”. Ta tˈatsoowëmbijty extëmë Jyobaa wyinmäˈänymyooyë. Mä ja tukpë artikulo yëˈë nnijawëyäˈänëm ti mbäät nduˈunëm parë duˈunyëmë Jyobaa xyajjäjtakëm mä ja wyitëjk.
ËY 32 ¡Puwäˈägë Dios Jyobaa!
