Mëdiˈibë nääk të nyayajtëwëdë
¿Wiˈix mbäät njaygyujkëmë Salmo 12:7?
Mä kapitulo 12 bersikulo 1 axtë 4, yëˈë tim jawyiinë David myaytyakypy ko kyaj nyekyjaˈˈatyë mëdiˈibë ‘mëdëy winë kyäjpxtëbën’ (Salmo 12:1-4, TY). Ta net mä bersikulo 5 etsë 7 jyënany:
‘Yëˈë Wintsën jëduˈun të yˈënaˈany:
Yëˈë ëyoobëjäˈäytyëjk [ . . . ] oˈktëybyë jyattën kyëbattën,
Mëdiˈibë jëëytyëp yaxtëbën. Yëˈëjëts yam nbudëkëjandëp’.
‘Wintsën, mijts xykyuentëˈatandëp;
xëmëts xykyuwäˈänäˈändë mä taabë ëxëkjäˈäytyëjkën’.
Mä bersikulo 5 jyënany ko Dios pyudëkëyaampy ‘yëˈë ëyoobëjäˈäytyëjk’.
Ets niˈamukë Diosmëduumbë ngupëjkëm ko tëyˈäjtën extëm jyënanyë bersikulo 6 ko ‘mëdiˈibë yëˈë Wintsën wyinwäˈänëbën o ja yˈayuk wäˈäts yëˈë; jëduˈun yëˈë tyiˈkxy ta yëˈë poop pujxnën [ . . . ] mëdiˈibë të wyindooywyaˈatsyën’ (Sal. 18:30; 119:140).
Per mä näägë Biiblyë, Salmo 12:7 duˈun të yajkäjpxnaxy: “Mijts mguentëˈataampy”. Pääty näägë jäˈäy jyënäˈändë ko yëˈë ja yajmaytyakp wiˈixë Dios të tkuwäˈänyë Biiblyë mët ko mä bersikulo 6 yëˈë myaytyakypyë Diosë yˈayuk. Ets jantsy tëyˈäjtënë ko Dios të tkuwäˈänyë Biiblyë oyë jäˈäy të tjayajkuboktë ets të tjayajkutëgoyäˈändë, per kyaj yëˈë ja yajmaytyäˈägäˈäny (Is. 40:8; 1 Peed. 1:25).
Perë Jyobaa kyuwaampy nanduˈunë jäˈäy extëm jyënany mä bersikulo 5 ets duˈunyëm tpudëkëyaˈany ets dyaˈˈawäˈätspëtsëmäˈäny pënaty ayoowdëp (Job 36:15; Sal. 6:4; 31:1, 2; 54:7; 145:20).
Pääty extëm jyënany mä bersikulo 7, ¿pënënë Jyobaa kyuwaampy: ja jäˈäyëty o ja yˈAyuk?
Ko yajxon ngäjpxëmë yäˈädë Salmo, ta njaygyujkëm ko yëˈë yajmaytyakpë jäˈäyëty.
Mä Salmo 12:1 japë David tmaytyaky ja Diosmëduumbëty mëdiˈibë të wyinˈëën wyinxäjëdë axëkjäˈäytyëjk. Ets mä bersikulo 3, ta net yajmaytyaˈaky ko Jyobaa tyukumëdowaampy ja pënaty axëëk ja yaˈan yajtuundëp. Yäˈädë Salmo yëˈë xytyukˈijxëm ko mbäät nˈijtëm seguurë ko Jyobaa nyitsiptunaampy pënaty mëduunëp mët ko wäˈäts ja yˈAyuk.
Pääty, ¿pënën yajkuwäˈänäämp extëm jyënaˈany mä bersikulo 7? Yëˈë pënaty yajtuundëp axëëk.
Per ¿tiko net mä näägë Biiblyë të yajkäjpxnaxyë yäˈädë bersikulo “mijts mguwäˈänaampy?”. Yëˈko duˈun ojts yajkäjpxnaxyë yäˈädë tekstë mä nääk ja nekyxyaatsy. Per mä Septuaginta yäˈädë tekstë duˈun jyënany: “Xykyuentëˈatandëbëts” ets “xykyuwäˈänandëbëts”, yäˈädë yëˈë xytyukˈijxëm ko pënatyën yajkuwäˈänandëp, yëˈë ja Diosmëduumbëty mëdiˈibë yaˈˈaxëktuundëp (Sal. 12:7, 8). Tuˈugë Biiblyë mëdiˈibë yajkäjpxnäjx arameo, yäˈädë bersikulo duˈun jyënany: “Jyobaa, mijts mguwäˈänaampy ja oyjyaˈaytyëjk, mguentëˈataampy winë xëëw winë tiempë mä ja axëkjäˈäytyëjk”. Yäˈädë yëˈë ja tuk pëky xytyukˈijxëm ko Salmo 12:7 kyaj yëˈë tmaytyäˈägäˈäny ko Dios tkuwäˈäny ja yˈAyuk.
Yäˈädë Salmo xyajnayjyäˈäwëm seguurë ko Dios xynyitsiptunäˈänëm.
