1. ¿Ti ojts yajnigajpxy mä ja reunyonk mëdiˈibë tuunë 2023?

 MÄ JËMËJT 2023 jantsy oy ojts tyunyëtyë reunyonk mëdiˈibë tuunëp winjëmëjt. a Ojts yajkäjpxˈoyë wiˈixë nety tijaty nmëbëjkëm ets wiˈix tyam ngäjpxwäˈkxëm. Extëm nˈokpëjktakëm, ojts yajnigajpxy ko waˈan näägë jäˈäyëty tpuwäˈägëyäˈändë Jyobaa ko tˈixtët wiˈixë nety kyutëgoy ja Mëj Babilonia. Ets ko nobiembrë 2023 ojts yajwijtsˈoyë wiˈix ngëyakäˈänëmë informë. ¿Yëˈëdaa yˈandijpy ko kyaj yˈokjëjpˈamˈäjnë nˈëwäˈkx ngäjpxwäˈkxëm? ¡Kyaj!

2. ¿Tiko jyëjpˈamëty ets tyam niˈigyë nˈëwäˈkx ngäjpxwäˈkxëm? (Markʉs 13:10).

² Tyam niˈigyën jyëjpˈamëty ets nˈëwäˈkx ngäjpxwäˈkxëm. ¿Tiko? Yëˈko jawaanë jeˈeyë tiempë yˈakwëˈëmy. Nˈokjamyajtsëm wiˈixë Jesus ojts tnaskäjpxë ngäjpxwäˈkxäˈänëm mä nety ja tiempë jyëjpkëxanë extëm jyënaˈanyë Markʉs 13:10 (käjpx). Nanaduˈundëkë Jesus jyënany mä Mateo, ko ja oybyë ayuk yajkäjpxwäˈkxäˈäny abëtsëmy nyaxwinyëdë, mä kyaminyëm “ja kutëgoˈoyën” (Mat. 24:​14, TNM). Yäˈädë yëˈë yˈandijpy wiˈix nëjkx kyutëgoyanë mä Satanás yˈaneˈemy. Jyobaa nyijäˈäwënëp ti xëëw ets ti oorë ttunäˈäny mëdiˈibë të ttuknibëjktäägë (Mat. 24:36; 25:13; Apos. 1:7). Ets tuˈuk tuˈugë xëëw nyaxy niˈigyë wyingoonˈadëtsnë ja kutëgoˈoyën (Rom. 13:11). Pääty mä kyaminyëm ja kutëgoˈoyën, oy ko duˈunyëm nˈakˈëwäˈkx nˈakkäjpxwäˈkxëm.

3. ¿Tiko nˈëwäˈkx ngäjpxwäˈkxëm?

³ Waˈanë net nnayajtëˈëwëm. ¿Tiko nˈëwäˈkx ngäjpxwäˈkxëm? Yëˈko ntsojkëmë jäˈäy. Ko nˈëwäˈkx ngäjpxwäˈkxëm yëˈë  nyajnigëxëˈkëm ko nyajtsobatëm ja oybyë ääw ayuk, ko ntsojkëmë jäˈäy, Jyobaa ets ja xyëëw. Min nˈoknimaytyakëm tuˈugaty.

NGÄJPXWÄˈKXËM MËT KO NYAJTSOBATËM JA OYBYË ÄÄW AYUK

4. ¿Ti nduˈunëm ko pën xytyukmëtmaytyakëm mëdiˈibë njantsy yˈoymyëdoˈowëm?

⁴ ¿Wiˈix mnayjyäˈäwë ko myajtukˈawäˈänë ko të myaxuˈunkˈaty ja mëguˈugë yˈuˈunk? ¿O ko jam pën mdukˈawäˈänxëty ko të tpääty ja tyuunk mëdiˈibë nety jeky të ëxtäˈäy? Seguurë ko agujk jotkujk mnayjyäˈäwë ets mjantsy tyukmëtmaytyäˈägan ja mjëëky mëguˈuk o ja mëdiˈibë oy mëët mnayjyawëty. ¿Këdii nanduˈun mnayjyäˈäwë agujk jotkujk ko myajtukˈawäˈänë ja oybyë ääw ayuk mëdiˈibë nyimaytyakypy ja Diosë yˈAnaˈam Kyutujkën?

5. ¿Wiˈix mnayjyäˈäwë ko xyˈëxpëjktsondakyë Biiblyë? (Ix nanduˈunë dibujë).

⁵ Jamyats nanduˈun wiˈix mnayjyäˈäwë agujk jotkujk ko ojts xyˈëxpëjktsondaˈagyë Biiblyë. Extëm ko xynyijäˈäwë ko Jyobaa mtsojkëp, ko tsyojkypy ets myajpäädët mä nyaxy kyäjpn, ko wyandakypy dyajjëjptëgoyaˈany ja amay jotmay mëdiˈibë tyam jaˈäjtp ets ko mä tiempë myiny kyëdaˈaky yajjukypyëkaampy pënaty të yˈooktë (Mar. 10:​29, 30; Fwank 5:​28, 29; Rom. 8:​38, 39; Diˈibʉ Jat. 21:​3, 4). Ko duˈun xynyijäˈäwë mˈajäjt mjotjäjtë (Luk. 24:32). Tijatyë Biiblyë tukniˈˈijxëp mjantsy yˈoymyëdoow ets myajtsobat, pääty jyënany ja mˈääw mjot parë xytyukmëtmaytyäˈägäˈäny ja wiink jäˈäy (ijxkijpxyë mëdë Jeremías 20:9).

6. ¿Ti xytyukniˈˈijxëm extëm yajnimaytyäˈäktë Ernest mëdë Rose?

⁶ Min nˈokˈijxëm wiˈix yajnimaytyaˈagyë nmëguˈukˈäjtëm Ernest. b Yëˈë duˈun tnimaytyaˈaky ko mäjkë netyë jyëmëjt ko ja tyeety yˈoˈky. Yëˈë duˈun nyayajtëëwë: “¿Tsäjpotmëdaa të nyëjkxy? ¿Nëjkxëbëtsëdaa jatëgok näˈä nˈixy? Kojëts nˈijxy  ko ja ënäˈkuˈungëty tam ja tyeety jyukyˈattënëm, nnaywyinaxëjäˈäwëts”. Xëmë ijty nyëjkxy mä ja tyeety nyaxtëjkë ets nyuˈkxtaˈaky: “Diosteety tunë mayˈäjtën, njanijawëyaambyëts määjëts ja ndeety yajpääty”. Naa ja netyë jyëmëjt 27 ko yaˈˈanmääy pën yˈëxpëkaambyë Biiblyë ets yëˈë netyë tkupëjky. Jotkujkmooyë ko tnijäˈäwë ko oˈkpë kyaj ti tjawëdë, ko duˈun yajpäättë extëmxyëp myäˈädë ets ko Biiblyë wyandakypy ko oˈkpë jyukypyëkäˈändë (Ecl. 9:​5, 10; Apos. 24:15). Ko tˈëxpëjkyë Biiblyë, taanëm tnijäˈäwë mëdiˈibë nety myëmaapy myëdajpy ets jantsy agujk jotkujk yajnayjyäˈäwë. Tëjkë ëxpëjkpë mët ja kyudëjk Rose ets yëˈë nan jyantsy yˈoymyëdoow mëdiˈibë nety jyäjttëp, ja nyëbajttë mä jëmëjt 1978. Yëˈëjëty tyukmëtmaytyaktë ja jyëëky myëguˈuk, ja mëdiˈibë mëët oy nyayjyawëdë ets pënaty yˈoymyëdowdëp, tijatyë nety të tjattë. Jaˈa të tpudëkëdë 70 naxyë jäˈäy parë të tyëkëdë Diosmëduumbë.

7. Ko të nnijäˈäwëm wiˈixë Biiblyë jyënaˈany, ¿ti net ndunäˈänëm? (Lukʉs 6:45).

⁷ Kom nˈoymyëdoˈowëm tijaty të njäjtëm mä Biiblyë, ta njantsy nyimaytyäˈägäˈänëm (käjpxë Lukʉs 6:45). Nanduˈun njënäˈänëm extëm jyënandë ja apostëlëtëjkëty: ‘Ëëtsëty käˈäp tjëgyepy amonyë nˈitëtyës ets nganigajpxtëtyës mëdiˈibëts të nˈix të nmëdowdën’ (Hech. 4:​20, TY). Nˈoymyëdoˈowëm tijatyë Biiblyë myaytyakypy, päätyë jäˈäy njantsy tyukmëtmaytyäˈägäˈänëm nuˈun nmadakëm.

NGÄJPXWÄˈKXËM MËT KO NTSOJKËMË JÄˈÄY

8. ¿Tiko jäˈäy ndukmëtmaytyakëmë oybyë ääw ayuk? (Ixë rekuäädrë “ Ko ntsojkëmë jäˈäy: ta nyajtëjkëm ëxpëjkpë”; ix nanduˈunë dibujë).

⁸ Ëtsäjtëm ntsojkëmë jäˈäy duˈun extëmë Jyobaa mëdë Jesus ttsoktë (Prov. 8:31; Fwank 3:16). Nbaˈˈayoˈowëmë jäˈäy mëdiˈibë kyajë Dios tˈixyˈattë ets mëdiˈibë kyaj ti tˈëwxit tjëjpˈixtë (Éfes. 2:12). Ko tyamë jäˈäy tpäättë amay jotmay duˈunxyëp ta nyëëjiˈkxtën, ets ko ndukmëtmaytyakëm ja Diosë yˈAnaˈam Kyutujkën, ta nbudëjkëm. Kom ntsojkëmë jäˈäy ets nbaˈˈayoˈowëm, ta nˈëxtäˈäyëmë winmäˈäny parë ndukmëtmaytyakëm ja Diosë yˈääw yˈayuk. Mëjwiin kajaa tsyobääty ko të tnijawëdë myiny kyëdaˈaky ja oybyë jukyˈäjtën. Mbäät tyam jyukyˈattë agujk jotkujk ets mä tiempë myiny kyëdaˈaky, tpäättët ja jukyˈäjtën mëdiˈibën jantsy jukyˈäjtënˈäjtp, mëdiˈibë itäämp xëmëkyëjxm (1 Tim. 6:19).

9. ¿Ti ndukmëtmaytyakëmë jäˈäyëty ets tiko? (Ezequiel 33:​7, 8).

⁹ Kom ntsojkëmë jäˈäy pääty ndukmëtmaytyakëm ko këxäämp naxäämbë yäˈädë axëëkpë jukyˈäjtën (käjpxë Ezequiel 33:​7, 8). Mon tuk nnayjyäˈäwëm ko ja naxwinyëdë  jäˈäy ets ja njëëkyˈäjt nmëguˈukˈäjtëm duˈun jyukyˈattë extëmxyëp kyaj ti tyunäˈäny jyatäˈänyëty. Biiblyë jyënaˈany ko ‘mëk nëjkx ja ëyoˈon jotmay yaˈixy, mëdiˈibë käˈäp nijënäˈä yajˈixnyëmën majuˈunëm ja naxwinyëdë tsyoˈondaˈagyën ets käˈäp jëduˈun ok yˈëkyaˈixanë’ (Mateo 24:​21, TY). Njatsojkëm ets tnijawëdët ko mä tyuˈuyeˈeyaˈany ja mëj ayoˈon, ja nëjkx kyutëgoytyë tëgokyë ja relijyonk mëdiˈibë kyaj tyëyˈäjtënëty ets ko mä Armajedon jaanëm nëjkx kyexy nyaxy yäˈädë axëëkpë jukyˈäjtën (Diˈibʉ Jat. 16:​14, 16; 17:​16, 17; 19:​11, 19, 20). Nˈamdoow nbëjktsoˈowëmë Jyobaa ets tˈadëk ttuktëkëtyë jäˈäy parë tmëdoowˈittët mëdiˈibë ndukninëjkxëm ets nanduˈun tmëdundëdë Jyobaa. Per ¿wiˈix jyatäˈändë ja jäˈäyëty ets ja njëëkyˈäjt nmëguˈukˈäjtëm mëdiˈibë kyaj tmëdowäˈändë ja Diosë yˈääw yˈayuk?

10. ¿Tiko yˈoyëty duˈunyëmë jäˈäy ndukmëtmaytyakëm ti miimp këdakp?

¹⁰ Duˈun extëm të nˈijxëm mä jatuˈukpë artikulo, waˈan nëjkxë Jyobaa dyajnitsoˈoky pënaty puwäˈkëdëp ko nety tˈijxnëdë kyutëgoy ja Mëj Babilonia. Ko duˈun nnijäˈäwëm, ta nˈijxëm ko jëjpˈam etsë jäˈäy ndukmëtmaytyakëm mëdiˈibë miimp këdakp. ¿Tiko duˈun njënäˈänëm? Yëˈko mëdiˈibë tyamë jäˈäy ndukˈawäˈänëm waˈan yëˈë nëjkx tjamyatstë mä tiempë myiny kyëdaˈaky (ijxkijpxyë mëdë Ezequiel 33:33). Waˈan yëˈë nëjkx pyudëkëdë ets jyënäˈändëtyë yˈääw jyot ko myëdunandëbë Jyobaa määnëmë nety tˈaktiempëty. Duˈun extëm ja pujxndëjkkuentëˈäjtpë mëdiˈibë Filipos, jaanëm jyodëmbijty ko ja naxwinyëdë ojts yuˈkxy. Waˈan nanduˈun nëjkx jaanëm jyodëmbittë ja jäˈäyëty mëdiˈibë tyam kyaj tmëdowäˈändë ja Diosë yˈayuk, ko nëjkx tˈixtë wiˈix kyutëgoy ja Mëj Babilonia (Apos. 16:​25-34).

NGÄJPXWÄˈKXËM MËT KO NTSOJKËMË JYOBAA ETSË XYËËW

11. ¿Wiˈixë Jyobaa nmoˈoyëmë mëjˈäjtën, wintsëˈkën etsë mëkˈäjtën? (Diˈibʉ Jatanʉp 4:11; ix nanduˈunë dibujë).

¹¹ Ja tuk pëky tiko nëgooyë nˈëwäˈkxäˈän ngäjpxwäˈkxäˈänënë, yëˈë ko ntsojkëmë Jyobaa etsë xyëëw. Ko nˈëwäˈkx ngäjpxwäˈkxëm, duˈun ja tuk pëky nˈawdäjtëmë Jyobaa. Ets nnijäˈäwëm ko yëˈëyë pat nitëjkëp tˈaxäjët “ja mëjˈäjtën, wintsëˈkën esë mëkˈäjtën” (käjpxë Diˈibʉ Jatanʉp 4:11). ¿Wiˈixën nmoˈoyëmë mëjˈäjtën etsë wintsëˈkën? Ko jäˈäy ndukmëtmaytyakmëty ko Jyobaa yëˈëjën tijaty yajkojtääy ets ko yëˈëjën xymyoˈoyëmë jukyˈäjtën. ¿Ets wiˈix nmoˈoyëmë mëkˈäjtën? Ko nyajtuˈunëmë jot mëjääw, xëëw  tiempë etsë meeny sentääbë parë nˈëwäˈkx ngäjpxwäˈkxëm nuˈun nmadakëm (Mat. 6:33; Luk. 13:24; Kol. 3:23). Ëtsäjtëm nnimaytyäˈägäˈänëmë Jyobaa mët ko ntsojkëm, per nan nimaytyäˈägäˈänëm wiˈix nyiwijy nyikejˈyë xyëëw. ¿Tiko?

12. Ko nˈëwäˈkx ngäjpxwäˈkxëm, ¿wiˈix nyajwatsëmë Diosë xyëëw?

¹² Ëtsäjtëm ntsojkëm etsë Diosë xyëëw yˈitët wäˈäts (Mat. 4:11). Kom mëk ntsojkëmë Jyobaa, pääty mä nˈëwäˈkx ngäjpxwäˈkxëm ndukmëtmaytyakëm ja jäˈäy ko kyaj tyëyˈäjtënëty extëmë Satanás nyiwäämbetyëty (Gén. 3:​1-5; Job 2:4; Fwank 8:44). Ko nëjkxëm ëwäˈkx käjpxwäˈkxpë, ta ndukmëtmaytyakëmë jäˈäy mëdiˈibë yˈoymyëdoowdëbën ja Diosë yˈääw yˈayuk, pënën Jyobaa ets wiˈixën jyaˈayˈaty. Ntsojkëm ets niˈamukë jäˈäy tnijawëdët ko Jyobaa jyaˈayˈäjtën mëdiˈibë niˈigyë yajnigëxëˈkypy, yëˈë ko xytsyojkëm, perë nan oy yˈaneˈemy. Ets ko ja yˈAnaˈam Kyutujkën tim tsojk dyajjëjptëgoyaˈany ja ayoˈon jotmay mëdiˈibë tyam jaˈäjtp ets ko yëˈë yajminaampy ja agujkˈäjt jotkujkˈäjtën yä naxwiiny (Sal. 37:​10, 11, 29; 1 Fwank 4:8). Ko nˈëwäˈkx ngäjpxwäˈkxëm, ta nyajwatsëmë Diosë xyëëw. Nan agujk jotkujk nnayjyäˈäwëm ko jaa nduˈunëm ja tuunk mëdiˈibë të nyajtuknipëjkëm. ¿Tiko duˈun njënäˈänëm?

13. ¿Tiko agujk jotkujk nnayjyäˈäwëm ko nxëëwˈäjtëm Jyobaa tyestiigëty? (Isaías 43:​10-12).

¹³ Jyobaa yëˈë të xywyinˈijxëm parë xytyestigëˈatäˈänëm (käjpxë Isaías 43:​10-12). Tamë tiempë nyëjkxnë mä ojts duˈun xynyijäˈäyëm pënaty Wyoowˈyoˈoytyëbë Jyobaa tyestiigëty: “Jantsy oy ko nxëëwˈäjtëm Jyobaa tyestiigëty”. c Nˈokpëjktakëm tuˈugë ijxpajtën, koxyëp myajmënëjkxy  mä kuduunk justisyë mët ko të myajniwäämbety ko të ti xytyuundëgoy, tsojkëbë net parë pën mnikäjpxtuˈudëdëty. Seguurë ko yëˈë mwinˈixëp tuˈugë jäˈäy mëdiˈibë mˈixyˈajtypy, mdukjotkujkˈäjtypy ets mëdiˈibë mbuˈëw mbugäjpxëdëp. Jyobaa xyˈixyˈäjtëm nanduˈun ets xytyukjotkujkˈäjtëm, pääty të xywyinˈijxëm parë nidestiigëˈäjtëm ets agujk jotkujk nnayjyäˈäwëm. Nˈëxtäˈäyëmë winmäˈäny parë jäˈäy ndukmëtmaytyakëm pënën Jyobaa ets wiˈix jyaˈayˈaty, ko duˈun nduˈunëm ta jäˈäy tnijawëdë ko kyaj tyëyˈäjtënëty extëmë Satanás nyiwäämbetyë. Duˈunënë Jyobaa nidestiigëˈäjtëm (Sal. 83:18; Rom. 10:​13-15).

DUˈUNYËM NˈËWÄˈKXÄˈÄN NGÄJPXWÄˈKXÄˈÄNËM AXTË KO MYINËT JA KUTËGOˈOYËN

14. ¿Ti nëjkx yˈaktuny yˈakjatyëty?

¹⁴ ¡Njantsy nyijawëyäˈänëm tijaty ak tunan ak jatanëp! Ëtsäjtëm ntsojkënyëˈäjtëm parë jäˈäy tˈakmëwingondëtyë Dios mä kyajnëm tsondaˈaky ja mëj ayoˈon. Per nan xyjyotkujkmoˈoyëm ko nnijäˈäwëm ko waˈan nëjkx näägë jäˈäy tpuwäˈägëdë Jyobaa mä nety tyuˈuyeˈey ja mëj ayoˈon parë nëjkx tuˈugyë mëët nˈawdäjtëm (Apos. 13:48).

15, 16. ¿Ti mëdiˈibë net tyam ndunäˈänëm?

¹⁵ Oy ko duˈunyëm nˈëwäˈkx ngäjpxwäˈkxëm ja oybyë ääw ayuk mëdiˈibë nyimaytyakypy ja Diosë yˈAnaˈam Kyutujkën naxwinyëdë abëtsëmy. Ets nˈaktukˈawäˈänëmë jäˈäy ko tuˈuk tuˈugë xëëw nyaxy, niˈigyë wyingoonë mä Satanás jyëjptëgoyaˈanyë yˈanaˈamdakn. Ko nety duˈun tyuun jyäjtënë, ta jäˈäy tpëkäˈändë kuentë ko mëdiˈibë nety të nˈëwäˈkx të ngäjpxwäˈkxëm, jamën tsyoony mä Jyobaa (Ezeq. 38:23).

¹⁶ Ko duˈun të nnijäˈäwëm, ¿ti mëdiˈibë net ndunäˈänëm? Kom nyajtsobatëm ja oybyë ääw ayuk, ntsojkëmë Jyobaa, ja xyëëw etsë jäˈäyëty. Pääty duˈunyëm nˈëwäˈkxäˈän ngäjpxwäˈkxäˈänëm axtë koonëmë Jyobaa jyënäˈänët: “¡Të jabäät!”.