MÄ NETYË Jesus kyapatëkënëm tsäjpotm, ta tˈanmääy ja yˈëxpëjkpëty ets kyäjpxwäˈkxtët mä “tëgekyë naxwinyëdë” (Apostʉlʉty 1:8). ¿Wiˈixë nety mbäät kyäjpxwäˈkxtë abëtsemy nyaxwinyëdë?

Martin Goodman, diˈib tuump profesoor mä tuˈugë unibersidad diˈib wäˈkpëtsëëmp, jyënaˈany ko ja Jesusë yˈëxpëjkpëty, diˈib jukyˈäjttë mä ojts yˈaneˈemy ja romanë jäˈäyëty, tëgatsy ijty mët ja wiinkpë relijyonk axtë mët ja judiyëtëjk. ¿Wiˈix? Ko niˈamukë yˈëwäˈkx kyäjpxwäˈkxtë oytyim määjëty. Duˈun extëmë Jesus ttuuny, nanduˈun ttuundë pënaty jantsy panëjkxëdë, oytyim määjëty ojts tkäjpxwäˈkxtë “ja oybyë ayuk diˈibë nyigajxypy ja Diosë kyutujkën” ets yˈëxtääytyë jäˈäy diˈib nyijawëyandë ja tëyˈäjtën (Lukʉs 4:43). Päätyë Biiblyë jyënaˈany ko mä tadë tiempë jamˈäjtë apostëlëty, diˈib ayukwimbëtsëëmp “pënaty yajkajxtëp”, extëm yëˈëjëty yajkajxtë käjpxwäˈkxpë (Markʉs 3:14). Jesus tyukˈanaˈam ja yˈëxpëjkpëty: “Nëjx yaˈëxpëktë jäˈäyëty mä tëgekyë naxwinyëdë esëts ëj njäˈäyˈattët” (Matewʉ 28:18-20).

Tyam kyaj yä Naxwiiny nyekyyajpäättë ja nimäjmajtskpë Jesusë yˈapostëlë, per nimayë Dios mëduumbë panëjkxëdëp ja yˈijxpajtën. Ko yajwowdë mä tyëgoyˈatyë käjpxwäˈkxpë, duˈun yˈatsowdë: “¡Tyamëts ëjts! Kajxkëts” (Isaías 6:8). Të nimay nyëjkxtë wiink paˈis, extëm diˈib milˈam të yˈotstë mä Eskuelë diˈib Galaad. Nan taa diˈib të tsyënääytyëgatstë wiink käjpn, ets taa nimay diˈib të tjattë wiink ayuk ets tyundë mä tuˈugë tuˈukmujkën o mä tuˈugë grupë. Näägë tyäˈädë nmëguˈukˈäjtëm të tsyiptakxëdë, per niˈamukë të tijaty tmastuˈuttë mët ko ttsoktë Jyobaa etsë jäˈäy.  Kontiempë ojts ttukniwinmayëdë parë nyëjkxäˈändë mä tyëgoyˈatyë käjpxwäˈkxpë, dyajtuundë tiempë, myeeny syentääbë etsë jyot myëjää (Lukʉs 14:28-30). Niˈamukë mëjwiin kajaa tyundë.

Kyaj niˈamukë mbäät njäjtëmë wiink ayuk o nëjkxëm mä tyëgoyˈatyë käjpxwäˈkxpë. Per mbäät niˈamukë nduˈunëm extëmë misioneerë mä ja tuˈukmujkën mä nˈyoˈoyëm. ¿Wiˈix mbäät duˈun nduˈunëm? Min nˈokˈijxëm.

Pënaty tim jawyiin pyanëjkxtë Jesus kyaj niˈamukë tyuundë misioneerë, tam diˈib käjpxwäˈkxtë jamyë mä ja nyax kyäjpn, per jyantsy tyukxondaktë tyäˈädë tuunk. Duˈun ttuundë extëmë Pablo tˈanmääyë Timoteo: “Ijtp xykyäjxwäˈxët ja oybyë ayuk [...]. Kuytyun yajxon mët ja mduunk extëm ja Diosë myëduumbë” (2 Timotee 4:5). Nan oy ko ëtsäjtëm nbaduˈunëmë tyäˈädë käjpxwijën. Niˈamukë mbäät nmëmëdoˈowëm ko Jesus ojts xytyukˈanaˈamëm ets ngäjpxwäˈkxëm ja oybyë ayuk etsë jäˈäy pyanëjkxëdët. Parë nduˈunëm extëmë misioneerë, taa kanäk pëky diˈib mbäät nduˈunëm mä nduˈukmujkëm.

Ko tuˈugë misioneerë jyaˈty wiink paˈis, tsojkëp tˈijxwëˈëmët wiˈix jamë jäˈäy dyajnaxtë jyukyˈäjtën. Waˈan ëtsäjtëm kyaj mbäät nëjkxëm wiink lugäär. Per ¿mbäät nˈijxwëˈëmëm extëm tyam nyaˈˈanmäˈäyëm wixaty mbäät ngäjpxwäˈkxëm? Extëm nˈokpëjtakëm, mä jëmëjt 1940 ja ogäˈän yaˈˈanmääytyë nmëguˈukˈäjtëm ets kyäjpxwäˈkxtët nëˈääy tuˈääy, tëgok mä tuˈukpë sëmään. Ets ëtsäjtëm, ¿të njäjtëm nmëtmaytyakëmë jäˈäy nëˈääy tuˈääy? ¿Të ogäˈän nˈijxmäjtsëm ngäjpxwäˈkxëm, extëm mä yajnaskëyë meesë o karruˈunk?

Pën nwinmäˈäyëm ko oybyëtsëmäämp, ta ndukxondakëm ko nëjkxëm käjpxwäˈkxpë. Nmëguˈukˈäjtëm diˈib jyäjttëbë wiink ayuk o diˈib nëjkxtëp wiink lugäär, mëjwiin kajaa tpudëkëdë ja nmëguˈukˈäjtëm, extëm dyajnëjkxtë jëjpˈamˈäjtën mä kyäjpxwäˈkxtë. Ets nimayë misioneerë nyikëjxmˈäjttëp ja tuˈukmujkën mientrës pënaty jam tsënääytyëp tjattë wiˈix tijaty yajtuny. Pën mijts yetyëjk ets të mnëbajnë, ¿mˈaˈijxëp mdunët extëm diˈib pyudëjkëbë mëjjäˈäy o mëjjäˈäy? (1 Timotee 3:1).

Per ta kanäk pëky wiˈix mbäät nbudëjkëmë nmëguˈukˈäjtëm diˈib mëët nduˈukmujkëm. Duˈunë mëjjäˈäy mutskjäˈäy, yetyëjk toxytyëjk, niˈamukë mbäät nbudëjkëm ets nmëjämoˈoyëmë nmëguˈukˈäjtëm (Kolosʉ 4:11).

Parë nbudëjkëmë nmëguˈukˈäjtëm, tsojkëp jawyiin yajxon nˈixyˈäjtëm. Ko nëjkxëm reunyonk, tsojkëp nˈëxtäˈäyëmë winmäˈäny wiˈix mbäät nbudëjkëm (Ebreeʉsʉty 10:24). Perë tyäˈädë kyaj yëˈë tˈandijy nduktëjkëm ja jyukyˈäjtën. Yëˈë duˈun ko njaygyujkëm wiˈix nyayjawëty ets ti naybyudëkë yajtëgoyˈajtypy. Waˈan dyajtëgoyˈaty jam ti ndukpudëjkëm o njotkujkmoˈoyëm mëdë Diosë yˈAyuk. Per ta jotmay diˈib kyaj ëtsäjtëm xypyatëm nyaˈoˈoyëm, yëˈëyë patëdëp ja mëjjäˈäytyëjk o diˈib pyudëjkëbë mëjjäˈäy (Galasyʉ 6:1). Per mbäät niˈamukë nbudëjkëmë nmëguˈukˈäjtëm diˈib të myëjjäˈäyëndë o familyë diˈib yajnäjxtëbë amay jotmay.

Duˈun yajpudëjkë Salvatore, tuˈugë nmëguˈukˈäjtëm diˈib mëjwiin kajaa yajjotmaybyatë meeny sentääbë, axtë ojts ttooky ja nyegosyë, tyëjk ets tijaty myëdäjtypy. Jyantsy myëmääy jyantsy myëdäjë fyamilyë. Per ta tuˈugë familyë tnijäˈäwë ti jotmay pyatypyë Salvatore, ta tpudëjkëdë waanë meeny ets nan ojts tˈëxtääyëdë tyuunk ja Salvatore mët ja kyudëjk. Tyäˈädë familyë nan ojts tsuu tsuu tninëjkxtë ja Salvatore mëdë fyamilyë parë mëët kyäjpx myaytyaktë ets tmëjämooytyë. Jantsy oy nyaymyaaybyëjkëdë ets tyam jyamyajtstëp wiˈix tuˈugyë dyajnäjxtë tyäˈädë amay jotmay.

Pënaty jyantsy pyanëjkxtëbë Jesus xëmë listë yajpäättë parë kyäjpxwäˈkxäˈändë oytyim määjëty. Tsojkëp nbanëjkxëmë Jesusë yˈijxpajtën ets ndukmëtmaytyakëm niˈamukë jäˈäy tijaty kunuˈkxënë Dios wyandakypy. Kyaj niˈamukë nmadakëm parë nëjkxëm mä tyëgoyˈatyë käjpxwäˈkxpë. Per niˈamukë mbäät nduˈunëmë mëjää parë nbudëjkëmë nmëguˈukˈäjtëm diˈib mëët nˈyoˈoyëm mä tuˈukmujkën (Galasyʉ 6:10). Pën nduˈunëm duˈun, ta mas jotkujk nyajpäädäˈänëm ets nëjkxëp nˈyäjkˈadëtsëm ja “tëëm mä tukëˈëyë oybyë tuunk” (Colosenses 1:10, TNM; Apostʉlʉty 20:35).