Mä ayuk ebreo mbäät kyaj jeˈeyë tuk pëky yajjaygyukë. Min nˈokˈijxëm majtsk pëky diˈib mbäät xypyudëjkëm parë yajxon njaygyujkëm.

1. Ko ngäjpxtäˈäyëm wiˈix jyënaˈanyë Salmo 144. Yëˈë kunuˈkxën diˈib yajmaytyakp mä bersikulo 12 axtë 14, yëˈë yˈaxäjëbë oyjyaˈay, diˈib yˈamdoowdëbë Dios parë yaˈˈawäˈätspëtsëmëdët mä axëkjäˈäytyëjk extëm jyënaˈany mä bersikulo 11. Nanduˈun yajjaygyukë mä bersikulo 15, ko majtskˈok dyajtunyë tyäˈädë ayuk “jotkujk”, nan yëˈë yajmaytyakpë tyäˈädë jäˈäyëty ko jyënaˈany: “¡Jotkujk ja käjpn diˈib Diosˈäjtypyë Jyobaa!”.

2. Tuˈugyëp mëdë wiingatypyë tekstë mä tmaytyaˈaky ko Dios kyunuˈkxaampy pënaty mëduunëp. Salmo 144 yëˈë xytyukˈijxëm ko David myëbëjkypyë nety ko Dios kyunuˈkxaampy ets yajjotkujkˈataampy ja kyäjpn ko dyaˈˈawäˈätspëtsëmët mä ja myëtsipëty (Lev. 26:9, 10; Deut. 7:13; Sal. 128:1-6). Ets mä Deuteronomio 28:4 jyënaˈany: “Kënuˈkxy yˈitëty yëˈë mˈuˈunk mˈënäˈk, yëˈë mgam mduˈu ets yëˈë mjëyujk mtsäjpkää, mtsäjppäx mkubixyny”. Ets duˈunën tyuun jyäjtë, pes mä Salomón ojts yˈaneˈemy, ja yˈuˈungë David, ojts ja nax käjpn yˈagujkˈaty jyotkujkˈaty ets myëkjäˈäyˈäjttë extëm ninäˈänëm duˈun kyaˈittë. Ets kanäk pëky ja kunuˈkxën diˈib jamˈäjt, yëˈë yaˈijxë ko nanduˈun jyaˈˈatäˈäny mä Jesukristë yˈanaˈamäˈäny (1 Rey. 4:20, 21; Sal. 72:1-20).

3. Mbäädë net njënäˈänëm ko Salmo 144, yëˈë xytyukˈijxëm yajxon diˈib jeky kujk tˈawijxnëdë Dios mëduumbë: ko Dios dyajkutëgooytyaˈayëdë axëkjäˈäytyëjk ets dyajminët ja agujkˈäjt jotkujkˈäjtën winë xëëw winë tiempë parë oyjyaˈayëty (Sal. 37:10, 11).