MÄ TADË jëmëjt të nyaxy, milˈamë Jyobaa tyestiigëty të yajtuunkmoˈoytyë parë tyundët mëjjäˈäy ets pyudëjkëbë mëjjäˈäy. Pën mijts niduˈuk duˈun të myajtuunkmoˈoy, seguurë ko jantsy jotkujk mnayjyawëty.

Per waˈan wanaty xyjëjptsëˈëk xyjëjpjawë ets kyaj wyiˈixëty. Jason, tuˈugë mixy diˈib tuump mëjjäˈäy, jyënaˈany: “Kots nyajtuunkmooy, duˈunëts nwinmääy ko tsipëts nmëmadäˈägët”. Moisés mëdë Jeremías nanduˈun nyayjyäˈäwëdë ko kyaj tmëmadäˈägäˈändë ja tuunk diˈibë Jyobaa tuknipëjkëdë (Éx. 4:10; Jer. 1:6). Pën duˈun mnayjyawëty, ¿ti mbäät xytyuny parë kyaj duˈun mnekynyayjawëdët ets niˈigyë mwimbajtˈadëˈëtsët? Min nˈokˈijxëm ja Timoteo yˈijxpajtën (Apos. 16:1-3).

Waˈanë netyë Timoteo jyëmëjt naa 20 ko Pablo wyoowë parë tjamyëdatët mä yˈëwaˈkxy kyäjpxwaˈkxy. Waˈan tjëjptsëˈkë ets ojts tsyiptakxëty ttunët diˈib yajtuknipëjk mä ja tuˈukmujkën (1 Tim. 4:11, 12; 2 Tim. 1:1, 2, 7). Per ko nyajxy mäjk jëmëjt, ta Pablo tˈanmääy ja Dios mëduumbëty diˈib Filipos: “Ko Dios jyënäˈänët, ngaxaambyëts tsojkë Timotee [...]. Pes kyajëts pën nmëdaty ja wiinkpë diˈibëts mëët tyiˈigyë ja nˈää njotëts” (Filip. 2:19, 20).

¿Ti pudëjkë Timoteo parë jantsy oy tyuuny mëjjäˈäy? ¿Wiˈix mbäät xypyanëjkxë yˈijxpajtën? Min nˈokˈijxëm tëdujk pëky.

1. Myëmääy myëdäj ja myëguˈuktëjk. Pablo yˈanmääy ja Dios mëduumbëty diˈib Filipos ko Timoteo nimääy nidäjëdëp (Filip. 2:20). Timoteo jantsy naytyukjotmaytyuunëbë nety ja myëguˈuktëjk. Pyudëkëyaambyë nety parë niˈigyë tmëwingondëdë Jyobaa ets tyukmëdunaampy oytyim tiijëty.

William, diˈib kujk tyuny mëjjäˈäy 20 jëmëjt naxy, duˈun tmoˈoyë käjpxwijënë pënaty të yajtuunkmoˈoytyë: “Tsoktë mmëguˈuktëjk. Ix tun tijaty yajtëgoyˈäjttëp ets kyaj jeˈeyë xytyukniwitsët o xyˈixët tijaty yajtuunäämp mä ja tuˈukmujkën”. Këdii duˈun mˈadëˈëtsy extëm ja tsyofeer diˈib kyaj jyotmaytyunyëty dyajpëdëˈëgëdë jäˈäy nëgokë tsojk jyaˈty mä nyijkxy.

2. Pyëjtak jawyiin ja Diosë tyuunk. Timoteo kyaj duˈun wyinmääy extëm ja myëguˈuktëjk, pesë apostëlë Pablo jyënany: “Nidëgekyë [...] yëˈë jeˈeyë wyinmäˈänyˈajtypy diˈibë këˈëm tyukˈoyˈatëp es kyaj tkäjxwäˈxäˈäny ja Jesukristë yˈëxpëjkën” (Filip. 2:21). Pablo jamë tyäˈädë neky tjääy Roma ets pyëjkë kuentë ko ja Dios mëduumbëty diˈib jam tsënääytyëp, jeˈeyë nety tmëmay tmëdäjtë tijaty këˈëm tyukˈoyˈattëp. Mbäät njënäˈänëm ko jeˈeyë nety yajkajpxyˈamondë mä Diosë tyuunk. Perë Timoteo kyaj duˈun yˈadëtsy. Ko tˈijxy ko mbäät niˈigyë dyajmëjwindëkë Diosë tyuunk, ta nanduˈun wyinmääy extëm ja kugajpxy Isaías, diˈib jënan: “¡Tyamëts ëjts! Kajxkëts” (Is. 6:8).

¿Wiˈix mbäät kijpxënbyaaty xytyuny ja Diosë tyuunk mët tijaty mnikëjxmˈäjtypy? Tim jawyiin, ix tijaty jëjpˈam yajpëjtäˈägäämp. Pablo nyigäjpx ets yajxon nˈijxëm “tijaty diˈib mas jëjpˈam” (Filip. 1:10, TNM). Pëjtäˈäk jëjpˈam diˈibë Dios jënäämp ko jëjpˈam. Myëmajtsk, jëjpkudijë tijaty mbëjkxëbë tiempë etsë mjot mmëjääw. Pablo duˈun tˈanmääy ja Timoteo: “Mastuˈut ja ënäˈktëjkëtyë wyinmäˈäny. Panëjx tuˈugë jikyˈäjtën extëm diˈibë Dios tsyejpy, diˈibë mëbëjkën mëëtpë, tsojkën mëëtpë, tiˈigyëˈäjtën mëëtpë” (2 Tim. 2:22).

3. Mëk tmëduunyë Jyobaa. Pablo duˈun ttukjamyejtsy ja Dios mëduumbëty  diˈib Filipos: “Miitsëty byeen yajxon xynyijawëdë ko extëm tuˈugë uˈunk ënäˈk tpudëkë ja tyeety, dëˈënëts ja Timotee të xypyudëkë kots ngäjxwaˈxy ja oybyë ayuk” (Filip. 2:22). Timoteo kyaj nety nyuuxëty, mëk tyuuny mëdë Pablo ets pääty niˈigyë nyaymyaaybyëjkëdë.

Taaˈäjtp jantsy mayë tuunk mä Diosë kyäjpn, diˈib jotkujk myajnayjawëyanëp ets mdukmëwingonanëbë mmëguˈuktëjk. Pääty, pëjtäˈägë mwinmäˈäny parë duˈunyëm xytyunët “waanë niˈigyë ja Nintsënˈäjtëmë tyuunk” (1 Kor. 15:58).

4. Kyuytyuun diˈib yajtukniˈˈijxë. Pablo duˈunë tˈanmääy ja Timoteo: “Mij mbadiimpy yajxon ja nˈëxpëjkënëts, extëmts njikyˈaty, extëmëts të nduknibëjtäägë, extëmëtsë nmëbëjkën, extëmëts nmaˈxtiky, extëmëtsë ntsojkën, extëmëts tii nyajkexy nyajnaxy” (2 Tim. 3:10). Komë Timoteo pyaduun tijaty yajtukniˈˈijxë, ta niˈigyë yajtuunkmooy (1 Kor. 4:17).

¿Jaa tuˈugë mëjjäˈäy diˈib jeky kujk tyuny diˈib mˈamdoobyë ëwij käjpxwijën? Pën kyaj, ¿tiko tuˈuk xykyaˈixy? Tom, diˈib jeky kujk tyuunë mëjjäˈäy, jyënaˈany: “Tuˈugë nmëguˈukˈäjtëm diˈibë nety jeky kujk tyuunë mëjjäˈäy, xypyudëjkëts ets yëˈëts tijaty xytyukniˈˈijxë. Nˈamdoobyëts ijtyë käjpxwijën ets xëmëts nguytyuuny. Tyäˈädë yëˈëts diˈib xypyudëjkë parëts mas seguurë nnayjyäˈäwë”.

5. Duˈunyëm ttuundaky. Pablo yˈanmääy ja Timoteo ets duˈunyëm ttuundäˈägët parë “amumduˈukjot” tmëdunët ja Dios (1 Tim. 4:7). Duˈun extëm tuˈugë jäˈäy diˈib tyunaambyë kompetensyë, tam pën tukniˈˈijxëp, per nan tsojkëp këˈëm ttuundäˈägët. Pablo tˈanmääy ja Timoteo: “Tukwingugäjxëdë es käjxwäˈx ja Diosë jyaaybyajtën, es xyaˈëxpëktë” (1 Tim. 4:13, 14). Nanduˈun tˈanmääy: “Pawinmay tukëˈëyë tyäˈädë, pëjtäˈäk jamë mjot mwinmäˈäny parë niˈamukë jäˈäy tˈixtët wiˈix mwimbety” (1 Tim. 4:15, TNM).

Nanduˈun mijts, tsojkëp niˈigyë mwimbajtˈadëˈëtsët. Këdii yëˈëyë xytyukjotkujkˈaty nuˈun tijaty xynyijawë, ëxpëjkˈadëˈëts wiˈix tyamë Diosë kyäjpn tijaty ttuny. Naygyuentˈatëdë ets këdii këˈëm mnaytyukˈijxpetyëty. Kyaj mwinmayët ko mbäät xyyaˈoyë oytyim diˈibëtyë jotmay mët ko jeky kujk mduunë ets kyaj xyjuudëdë tiempë parë tijaty xypyayoˈoyët. Naygyuentˈatëdë ets kuentˈat ja mˈëxpëjkën, extëm ttuuny ja Timoteo (1 Tim. 4:16).

6. Tyukˈijxpajtë Jyobaa myëjääw. Ko Pablo tnimaytyaky ja tuunk diˈibë netyë Timoteo të yajmoˈoy, ta tˈanmääy: “Mët ja espiritë santë pyudëjkën [...] kuentˈat diˈibë Dios të [mduknipëkyëty]” (2 Tim. 1:14). Parë tkuentˈatët ja Diosë tyuunk, Timoteo tsojkëbë nety nyaytyuktuˈumoˈoyëdët ja Diosë myëjääw.

Donald, diˈib jantsy jeky kujk tyuunë mëjjäˈäy, jyënaˈany: “Pënaty të yajtuunkmoˈoytyë, tsojkëp dyajtsobäättët ets tkuentˈattët ko oy yˈity mëdë Dios. Net niˈigyë tpëktët ja jot mëjääw. Pën yˈamdoowdëp ja Diosë myëjääw ets yajnigëxëˈktëp ja jäˈäyˈäjtën diˈib yajkypy, ta nëjkx ttukˈoyˈattë ja myëguˈuktëjk” (Sal. 84:7; 1 Peed. 4:11).

Jantsy oy kyëxëˈëky ko nimayë nmëguˈukˈäjtëm diˈib näämnëm të yajtuunkmoˈoytyë, yajtunëdë Jyobaa extëm mijts. Jason diˈib të yˈokˈyajmaytyakpë, jyënaˈany: “Nuˈunëts kujk nduny mëjjäˈäy mëjwiin kajaats të njaty ets tyam mas seguurëts nnayjyawëty. Njantsy tyukxondakypyëtsë tyäˈädë tuunk ets nyajtsobatypyëts mëjwiin kajaa”.

Ets mijts, ¿mnasˈixëyaampy parë Jyobaa myajtuunˈadëˈëtsëdët? Pëjtäˈägë mwinmäˈäny parë xypyanëjkxëdë Timoteo yˈijxpajtën. Duˈuntsoo nëjkx ttukˈoyˈattë ja mmëguˈuktëjk.