Kots nyaˈkpëtsëëmy, kyajts nëgoo nekytyukxondakyë Diosë tyuunk. Duˈunëtsë nety nwinmay kots ja nmëguˈuktëjk diˈibëts mëët nˈeskuelëˈattë, mbäät ttundë ti tyimtunandëp, per ëjts kyaj nety mbäät duˈun nduny, nmëkjäˈäwëtsë Diosë tyuunk. Nenduˈunëts njäˈäwë ko mëkëtsë ndääk ndeety xyˈaneˈemy ets ko nan tsiptakp nguytyunëdëts tijatyë Biiblyë nyiˈanaˈamëp. Nmëbëjkypyëtsë netyë Jyobaa, per tamëtsë nety kujk nmëjagamgaknëdë.

Nëjkxpëts ijty ëwäˈkx käjpxwäˈkxpë, per jeˈeyë parëts nyajkajpxyˈamony. Ninäˈäts kontiempë ngaˈëxpëjky titsë jäˈäy nëjkx ndukmëtmaytyäˈägäˈäny ets tsipëtsë nety nyajtsondäˈägët ja maytyaˈaky, pääty kyajtsë nety ti nrebisitë ni estuudyë ets kyaj nekytyukxondaˈaky kots nëjkxy ëwäˈkx käjpxwäˈkxpë. Duˈuntsë nety nwinmay: “¿Wiˈixën mbäät tuˈugë jäˈäy tˈoktukxondaˈagyë Diosë tyuunk ko duˈun ttuny sëmään sëmään ets poˈoboˈo?”.

Jatsë nety njëmëjt 17 kots ntsoˈony mätsë ndëjk këˈëmëtsë nety nˈixäˈäny ja njukyˈäjtën, päätyëts  ojts nëjkxy Australia. Xymyëmääy xymyëdäjtëts ja ndääk ndeety, per yëˈëjëty ijttë seguurë ko duˈunyëmëtsë netyë Jyobaa nmëdunäˈäny.

Kots njäjty Australia, tats niˈigyë ojts nmëjagamgaknë Jyobaa. Kyajts xëmë nekynyijkxy reunyonk etsëts naymyaaybyëjkë mëdë ënäˈktëjk diˈib duˈunë xyëëw jyëmëjt extëm ëjts. Mä tuˈukpë semään, tats nˈoknëjkxtë reunyonk ets ja kyumtsëmään, tats nëjkxtë äjts pujtpë ets uk pëjkpë. Tats nbëjkyë kuentë ko nˈaduunmujkypyëtsë nety, pes duˈunts ndukˈitë ja tëyˈäjtën ets nenduˈunëts nduny tijaty ja naxwinyëdë jäˈäy tsyojktëp, per nimätsoowëtsë nety oy nganayjyawëty.

Ko nyajxy naa majtsk jëmëjt, tats nˈixyˈajty tuˈugë nmëguˈukˈäjtëm diˈibëts xytyukˈijx titsë nety nduumpy mätsë njukyˈäjtën. Tuˈugyëtsë nety nˈittë mëët nimëgoxkë toˈoxyˈënäˈk, tats ojts naygyäjpxëdë ko mbäädëts nyajjäjtäˈäktë ja sirkuitë mëdë kyudëjk Tamara. Mientrës ja sirkuitë tijaty ttuny mä ja kongregasionk, ta ja kyudëjk wyeˈemy mët ëëtsëty parëts jap mëët ngäjpx nmaytyäˈäktë etsëts nxiˈik nxondë, yëˈëts diˈibëts njantsy yˈoyˈijx. Per kyajts ndimwinmääy pën duˈunë nety jyaˈayˈaty tuˈugë jäˈäy diˈib jantsy oy Dios mëduump, axiˈik axon ets agujk jotkujk yajpääty.

Tamara, mëkë nety ttsokyë Jyobaa ets jyantsy tyukˈijty jyantsy tyukxoompy ko yˈëwaˈkxy kyäjpxwaˈkxy. Agujk jotkujkë netyë Jyobaa tmëduny amumduˈukjot, per ëjts, kyajtsë nety njotkujkˈaty mët ko kyajts duˈun nDiosmëduny. Mëjwiin kajaajëts xypyudëjkë kots nˈijxy wiˈixë Tamara Diosmëduny agujk jotkujk. Ja yˈijxpajtën, yëˈëts xytyukjamyajts extëm jyënaˈanyë tyäˈädë tekstë: “Mmëdundë Jyobaa mëdë agujkˈäjt jotkujkˈäjtën” (Sal. 100:2). Ets duˈunën ttsokyë Jyobaa nmëduˈunëm niˈamukë.

Nenduˈuntsë nety agujk jotkujk nnayjyawëyaˈanyëty extëmë Tamara, per tsojkëbëtsë nety wanaty nyajtëgatsëdë njukyˈäjtën. Myënëjkxë tiempë parëts duˈun nduuny. Diˈibëts tim jawyiin nduun, yëˈkots kontiempë nˈëxpëjky wiˈixëts nëjkxë jäˈäy nmëtmaytyäˈägäˈäny. Tyäˈädë yëˈëts xypyudëjkë  parë kyajts nëgoo nnekytsyëˈëgët etsëts nnayjyawëdët seguurë kotsë jäˈäy tmëtmaytyäˈägët. Nan tuunëts näˈäganäˈäty prekursoor ausilyaar. Kom xëmëts nyajtuunyë Biiblyë mäts nˈëwaˈkxy ngäjpxwaˈkxy, tats niˈigyë agujk jotkujk nnayjyäˈäwë. Tatsë netë nwinmäˈäny nbëjtaky kots jëjwitsë ndunäˈäny prekursoora ausilyaar.

Naymyaaybyëjkëts mëdë nmëguˈukˈäjtëm diˈib oy Dios mëduundëp ets diˈib tyukxondaktëp ja Diosë tyuunk oy wiˈixëm ja xyëëw jyëmëjt tmëdattë. Kots nˈijxy wiˈix Diosmëdundë, yëˈëts diˈib xypyudëjkë parëts nenduˈun nˈëxpëkët etsëts nˈixët tits diˈib jëjpˈam nbëjtakypy. Mas niˈigyëts ojts ndukxondaknë ja Diosë tyuunk, axtë tuundëjkëts prekursoora regulaar. Jantsy agujk jotkujkëts nnayjyäˈäwë kots jatëgok nyajpaty mëdë nmëguˈukˈäjtëm.

Ko nyajxy tuk jëmëjt, tats nˈixyˈajtyë Alex, diˈib jantsy oyjyaˈay ets mëk ttsokyë Jyobaa. Ja nety tyuny ministerial ets tëdujk jëmëjtë nety kujk pryekursoorˈaty. Nan të nety yˈokˈijtpë Malaui, mä tyëgoyˈatyë käjpxwäˈkxpëty. Jap tˈixyˈajtyë misioneerëty, yëˈë pudëjkëdë parë niˈigyë tmëduunˈadëˈëtsëdë Jyobaa.

Ets 2003, tats nbëjky mëdë Alex, duˈunyëmëts aduˈugë nxëëw ndiempë nyajtundë mä Diosë tyuunk. Kajaajëts tijaty kujk njattë ets mëjwiin kajaatsë Jyobaa xykyunuˈkxtë.

Monyˈijx monyjyäˈäwëdëts kots nyaˈˈanmääytyë 2009 parëts ndunët misioneerë jap Indonesia mä tuˈugë lugäär diˈibë xyëwˈäjtypy Timor Oriental. Agujk jotkujkëts nayjyäˈäwëdë, per nan njëjptsëˈk njëjpjäˈäwëdëts. Ets ko nyajxy mëgoxk poˈo, tatsë net njäjttë mä siudad diˈib xyëwˈäjtypy Dili.

Ojtsëts wanaty xytsyiptakxëdë nˈijxwëˈëmdëdë jäˈäy kyostumbrë, yˈayuk, kyaˈay yˈukën ets wiˈix jyukyˈattë. Kots ijty nëjkxtë ëwäˈkx käjpxwäˈkxpë, xëmëts nbattë jäˈäy diˈib ayoowdëp, diˈib yaˈˈaxëktuundëp  ets diˈib kyaj nëgoo të yˈeskuelëˈattë. Nan nˈixyˈäjtëts nimay diˈibë nety mon tuk yajpattëp mët ko të tkuˈayowëdë ja tsip etsë axëkˈäjtën. *

Mä tyäˈädë lugäär, ¡jyantsy mëdowandëbë Diosë yˈayuk! Tëgok, ojtsëts nbääty tuˈugë kixyuˈunk diˈibë jyëmëjt 13, txëwˈaty María, yëˈë jantsy mon tukë netyë nyayjyawëty. * Të nety näämnëmë tyääk yˈooky ets näˈäganäˈäty tˈixy ja tyeety. María kyaj nety tnijawë ti tyunëp mä jyukyˈäjtën. Tëgok, tats xywyingujëˈëy xywyinguyaxë etsëts xytyukmëtmaytyaky wiˈixë nety nyayjyawëty. Per kyajts njaygyujkëtyaay wiˈix jyënany mët ko kyajnëmtsë nety oy njaty ja yˈayuk. Nmënuˈkxtakëtsë Jyobaa parëts xypyudëkët wiˈixëts mbäät ja kixyuˈunk njotkujkmoˈoy. Tats ojts ndukwingugäjpxë tuˈuk majtsk ja tekstë diˈib mbäät jyotkujkmoˈoyëty. Ko tiempë nyajxy, tats nˈijxy wiˈixë María pyudëjkë Biiblyë ko dyajtëgäjtsyë jyukyˈäjtën ets wiˈix nyayjyäˈäwë agujk jotkujk. Ok, ta nyëbejty, ets tyam jantsy mayë jäˈäy dyaˈëxpëky. Të tpäätyë fyamilyë diˈib mëk tsojkëp mä Dios kyäjpn.

Mëjwiin kajaa Jyobaa tkunuˈkxyë nmëguˈukˈäjtëm diˈib ëwäˈkx käjpxwäˈkxtëp jap Timor Oriental. Nuˈun kujk nyaxy mäjk jëmëjt, nimay kujkë jäˈäy nyëbattë, tam diˈib tuundëp prekursoor, siervo ministerial o mëjjäˈäy. Etsë wiinkpë tyundë mä yaˈëwnaxy yajkäjpxnaxyë ëxpëjkpajn diˈib mä yˈayukëty. Kots ijty nmëdoowˈëwdë reunyonk, nˈixtëts wiˈix xyiˈik xyondë ets wiˈix wyimbajttë mä Diosë kyäjpn. Yëˈëts diˈib agujk jotkujk xyjyantsy yajnayjyäˈäwëdë.

Jap Timor Oriental tim tëgatsy jukyˈäjtën ets kyaj dyuˈunëty Australia. Per nimäänëmtsë nety duˈun nganayjyawëty jotkujk. Kots ijty nduktëkëdë karrë, jantsy ujts myiny mëdë jäˈäy diˈibë ojts të myaayˈixtë, të ojts tjuy tkëbattë jyeˈxy pyeky. Näägë jäˈäy diˈibëts nyaˈëxpëjktëp oywiˈix ja jyëën tyëjk, nëgooyë kyuˈäˈänënë ets myëdäjttëbë tutk këtsey. Per oyëts ojts xytsyiptakxëdë xëmëts nwinmääy: “¡Jantsy oy ko yä nˈëwäˈkx ngäjpxwäˈkxëm!”.

Kots nwinmay wiˈixëts të njukyˈaty, mëjwiin kajaats ngukäjpxëdë ndääk ndeety kots xytyukˈixyˈäjttë Jyobaa etsëts xypyudëjkëdë. Ets oyëts wanaty nˈëxtëkëwaˈky kots nyaˈkpëtsëëmy, nˈijxypyëts wiˈix tyëyˈäjtëndëkë Proverbios 22:6, pes tyamë ndääk ndeetyëts jantsy agujk jotkujk nyayjyawëdë ko tˈixtë wiˈixëts nmëdunyë Jyobaa mëdëtsë nmëmëjjäˈäy. Desde 2016, ndundëts sirkuitë mä it lugäär diˈib nyitënaabyë Betel diˈib Australasia.

¡Tyam nëgooyëts ndukxondaknë Diosë tyuunk! Pääty kyajts njaygyukë tikots nwinmääy ko mëk nDiosmëduˈunëm. Ets tëts nbëkyë kuentë ko diˈib xyjyantsy myoˈoyëmë agujkˈäjt jotkujkˈäjtën, yëˈë ko nmëduˈunëmë Jyobaa amumduˈukjot, oy nuˈun nbatëmë amay jotmay. Ninäˈänëmtsë nety duˈun nganayjyawëty jotkujk, nuˈunëts kujk nDiosmëduny 18 jëmëjt mëdë Alex. Nˈijxypyëts ko tëyˈäjtën extëmë David tˈanmääyë Jyobaa: ‘Waˈan txondäˈäktë, yëˈë jäˈäyëty mëdiˈibë mijts mguwaambyën: Waˈan xëmë tˈëwdë dyaˈaxtë. Mdukxondakëp mëdiˈibë mtsojkëbën mjäˈäwëbën’ (Sal. 5:11, TY).