Ja nmëguˈukˈäjtëm mbäät wyinmaytyë ko ja mëdiˈibë të pyëjktëgatsy tëdën jyëjpkëxy ja tsyënäˈäy jyukyˈäjtën, ets ko yëˈë tsobatp ja mëdiˈibë tyam mëët të pyeky. Parë njaygyujkëm tiko duˈun njënäˈänëm. Min nˈoknimaytyakëm wiˈixë Jesus jyënany, näˈä mbäät jeˈeyë tuˈugë jäˈäy yaˈˈajääywyaˈkxy ets jatëgok pyeky.

Jesus tuk pëky jeˈeyë ojts tnigajpxy tiko mbäädë jäˈäy yaˈˈajääywyaˈkxy. Duˈun jyënany: “Oytyim pënëty mëdiˈibë yaˈˈajääywyäˈkxp mëdë kyudëjk, ets kyaj mët ko të myëˈinduny, pokytyuumbë nety mëdë wiinkpë ko pyëjktëgatsët” (Mat. 19:9, TNM). ¿Ti xytyukniˈˈijxëm extëmë Jesus jyënany? Myëduˈuk, yëˈko jaayë Biiblyë dyajnigutukë yaˈˈajääywyäˈkxët tuˈugë jäˈäy ko tsyëënët mëdë wiink yetyëjk o toxytyëjk. Ets myëmajtsk, mëˈinduumbë nety ko yaˈˈajääywyäˈkxët extëm kyaj Biiblyë dyajnigutukë ets ko pyëjktëgatsët.

Ko Jesus jyënaˈany yaˈˈajääywyäˈkxëdë jäˈäy ko tsyëënët mëdë wiinkpë, ¿yëˈëdaa yˈandijaampy ko awäˈätstum wyeˈemy parë pyëjktëgatsët? Mbäät kyaj yëˈë ttimyˈandijy. Ko tuˈugë yetyëjk o tyoxytyëjk tsyëënë mëdë wiinkpë, ja mëdiˈibë të yajmëdëgoy, yëˈë net wyinmayëp pën myaˈkxaampy ja jyamyëët o kyaj. Pën kyaj tmaˈkxäˈäny etsë net yaˈˈajääywyäˈkxtë, awäˈätstum wyëˈëmdë parë pyëjktëgatstët, per jaanëm ko nety ja nyeky të yajmoˈoytyë mä të yaˈˈajääywyäˈkxtë.

Per ta ja tuk pëky, mbäät ja mëdiˈibë kyaj të tyuundëgoy, jyënaˈany ko pyokymyaˈkxaampy ja jyamyëët ets ko duˈunyëm mëët tsyëënëyaˈany. Per pën këˈëm winmäˈäny yaˈˈajääywyaˈkxy ja mëdiˈibë të pyokytyuny, oy të jyayaˈˈanëëmë ko yajpokymyaˈkxp, Biiblyë kyaj dyajnigutukë parë pyëjktëgatsët. Ets pën yëˈë tyimˈyajtunaampy ja wyinmäˈäny ets pyëjktëgatsy oyë Biiblyë tkayajnigutukë, ta jatëgok pyokytyuny. Ko duˈun tyun jyatëdët, tsojkëp nidëgëëgë mëjjäˈäytyëjk tyuˈukmuktët parë tpayeˈeytyëtyë yäˈädë jotmay (1 Kor. 5:1, 2; 6:9, 10).

Ko tuˈugë jäˈäy yaˈˈajääywyaˈkxy oy duˈun ja Biiblyë tkayajnigutukë etsë net pyëjktëgatsy, ¿wiˈixëdaa tˈixtë ja nmëguˈukˈäjtëm? Extëmë Biiblyë jyënaˈany, ¿duˈunyëmëdaa tsyobääty ja tsyënäˈäy jyukyˈäjtën mët jyamyëët mëdiˈibë jawyiin pyëjk? ¿Mbäädëdaa yˈakjënäˈäny ja mëdiˈibë kyaj të tyuundëgoy ko pyokymyeˈkxypy ja myëmëjjäˈäy o ja kyudëjk? ¿Mbäädëdaa nwinmäˈäyëm ko ja näämbëk mëˈinduundëp ko duˈun të yˈadëˈëtstë?

Tëëyëp duˈunë nety yajjaygyukëdë ko tuˈugë jäˈäy pyëjktëgatsy duˈunyëm myëˈinduny, per net pën ja myëmëjjäˈäy o ja kyudëjk tam yˈakjukyˈaty, pën kyaj pyëjktëgatsy ets pën kyaj tyuundëgoy mëdë wiink yetyëjk o wiink toxytyëjk. Per ko Jesus ojts tmaytyaˈaky ko tuˈugë jäˈäy yaˈˈajääywyaˈkxy ets pyëjktëgatsy, kyaj ojts tmaytyaˈaky ja mëdiˈibë kyaj tii të ttuundëgoy. Yëˈëyë ojts tmaytyaˈaky ko pën tuˈugë jäˈäy yaˈˈajääywyäˈkxp extëm kyaj dyajnigutukë Biiblyë etsë net pyëjktëgatsy, mëˈinduumbë nety. Ko duˈunë jäˈäy yˈadëˈëtsy, jabäädën dyajjëjpkëxy ja tsyënäˈäy jyukyˈäjtën mët ja tim jawyiimbë mëdiˈibë pyëjk.

Ko tuˈugë jäˈäy yaˈˈajääywyaˈkxy ets pyeky mëdë wiinkpë, ja mëdiˈibë kyaj tii të ttuundëgoy kyaj  mbäät nyekyjënaˈany ko duˈunyëm mëët tsyëënëyaˈany ets kyaj mbäät yëˈë tnekymyëmay tnekymyëdäjy pën mbäät mëët yˈaktsëënë. Ets ja nmëguˈukˈäjtëm kyaj mbäät tnekyˈixtë ja näämbëkëty ko duˈunyëm myëˈindundë. *

Extëm të nˈijxëm mä yäˈädë artikulo ko tuˈugë jäˈäy pyokytyuny mëdë wiink yetyëjk o wiink toxytyëjk, ta jyëjpkëxy ja tsyënäˈäy jyukyˈäjtën ko yaˈˈajääywyäˈkxtë. Per ¿ets pën kyaj të tmëttsëënë ja wiink yetyëjk o ja wiink toxytyëjk ets yaˈˈajääywyaˈkxy? ¿O pën kyajnëmë nety pyokytyuny ko ojts yaˈˈajääywyaˈkxy, jaanëm ko tyuundëgooy ets pyëjktëgäjtsy, oy ja jyamyëët jyaˈˈanmääyë ko pokymyaˈkxëp? Ko duˈun yaˈˈajääywyaˈkxy ets pyëjktëgatsy, duˈunxyëp extëm të myëˈinduny, jabäädën jyëjpkëxy ja tsyënäˈäy jyukyˈäjtën, pes ko pyëjktëgatsy extëmë gobiernë dyajnigutukë yëˈëdën mëdiˈibë tsobatp. Mä rebistë Diˈib Xytyukˈawäˈänëm 15 äämbë febreerë 1980, pajina 30, tnimaytyaky ko tuˈugë jäˈäy pyëjktëgatsy, kyaj mbäät tnekynyijëmbity ja kyudëjk o ja myëmëjjäˈäy mëdiˈibë mëët të kyasäädëˈaty, pes të jyëjpkëxy ja tsyënäˈäy jyukyˈäjtën mët ko të yaˈˈajääywyaˈkxy ko të tsyëënë mëdë wiink yetyëjk o wiink toxytyëjk ets të pyëjktëgatsy.

Extëm tyam yajjaygyukë yäˈädë tëyˈäjtën, kyaj yëˈë tˈandijy parë net nwinmäˈäyëm ko kyaj yajmëjˈixy ja tsënäˈäy jukyˈäjtën o ko kyaj pyokyëty ko jäˈäy tmëttsëënë wiink yetyëjk o wiink toxytyëjk. Ko tuˈugë jäˈäy yaˈˈajääywyaˈkxy extëm kyaj dyajnigutukë Biiblyë ets tpëkyë wiinkpë, tsojkëp nidëgëëgë mëjjäˈäytyëjk tyuˈukmuktët parë tpayeˈeytyëty mët ko tëdën tmëbokytyuny ja kyudëjk o ja myëmëjjäˈäy. (Ets pën yëˈë pyejkypy ja toxytyëjk mëdiˈibë nanduˈun Diosmëduump, tsojkëp jatëgok tyuˈukmuktët nidëgëëgë mëjjäˈäytyëjk parë yajpayeˈeyëty ja toxytyëjk mët ko yëˈë të nanduˈun tyuundëgoy). Ja näämbëkëty kyaj yaˈixäˈändë extëmë mëˈinduumbë, per jëmëjtˈamë tiempë nyaxäˈäny parë mbäät ja yetyëjk yajtuunkmoˈoy mä ja kongregasionk. Tsojkëp jawyiin ja xyëëw dyajwäˈätsët mä wiˈix axëëgë jäˈäy të dyajwinmaytyë mä tijaty të ttuny. Oy ko nanduˈun yaˈixët wiˈix yaˈixy yajpääty ja mëdiˈibë kyudëjkˈäjt, mëdiˈibën të twinˈëëny të twinxäjy. Ets pën jamë uˈunk ënäˈkë mutskatypyë mëdiˈibë të ttukmënikaagë (Mal. 2:14-16).

Extëm të nˈijxëm, axëëk wyimbëtsëmy ko jäˈäy yaˈˈajääywyaˈkxy ets pyëjktëgatsy extëm kyaj dyajnigutukë Biiblyë, pääty niˈamukë Dios mëduumbëty oy ko tmëjˈixtëdë pëjk ukën extëmë Jyobaa (Ecl. 5:4, 5; Eb. 13:4).