Nmaxuˈunkˈäjtyëts mä jëmëjt 1955 ets nidëgëëgëts ndukaˈaxˈattë, ëjts tim mutsk. Japëts nyeˈky nbejty Finlandia mä tuˈugë lugäär mëdiˈibë xyëwˈäjtypy Vantaa.

Ndäägëts ja nyëbejty mätsë nety ngamaxuˈunkˈatynyëm, per ja ndeetyëts tukmëtsipˈäjtë ko tyëjkë ëxpëjkpë, kyaj tˈaˈijxë parëts ja ndääk xytyukniˈˈixëdëtyës ja Biiblyë etsëts xywyoownëjkxtët reunyonk. Per kojëts ja ndeety tsyoony, tajëts ja ndääk xytyukmëtmaytyakojtë pënën Jyobaa.

Desde mutsknëmëts nwinmäˈäny nbëjktaky nmëdunäˈänyë Jyobaa. Extëm nˈokpëjktakëm, kotsë netyë njëmëjt 7 tajëts ja nmaˈestrë jyantsy yˈawäˈändaky mët ko kyajëts ngayany tuˈugë kaaky mëdiˈibë xyëwˈäjtypy verilättyjä mët ko myëdäjtypyë neˈpyny. Tajëts atsip ja nˈääw ojts xywyoˈonwäˈkxë parëts ngayët, per tats ndukëbojtstuty.

Jats netyë njëmëjt 12 kotsë ndeety yˈoˈky, desde jaa tajëts nyeˈeytsyondaky reunyonk. Ja nmëguˈukˈäjtëmëty naytyukjotmaytyuunëdë mët ëjts ets yëˈëjëts xypyudëjkë parëts niˈigyë Jyobaa nmëwingonët. Ojtsëts ngajpxyë Biiblyë ets ja ëxpëjkpajn, kojëts duˈun nduuny tajëts ja nwinmäˈäny nbëjktaky nmëdunäˈänyë Jyobaa ets jatsë nety njëmëjt 14 kojëts nnëbejty 8 äämbë agostë mä jëmëjt 1969.

 Kojëts ojts nyajkaˈpxy ja nˈeskuelëts, tajëts nduuntsondaky prekursoor regulaar. Ko waanë yˈijty, tajëts ojts nëjkxy ëwäˈkx käjpxwäˈkxpë Pielavesi, tuˈugë käjpn mëdiˈibë japyë wëˈëmp Finlandia.

Japëts nˈixyˈatyë Sirkka, mëdiˈibëts mëët nbëjky, yëˈëts ndukˈoyˈijx ko jyaˈayˈaty yujy tudaˈaky ets ko mëkë Jyobaa ttsoky, yëˈë kyaj nety nëgoo ti tmëdatäˈäny mëjwiin kajaa. Tëjëtsë netyë nwinmäˈäny nbëjktäˈäktë kojëts nmëdunäˈändë Jyobaa oyëts ti tuunk ndimyyajtuknipëktët. Jats nbëjktë 23 äämbë marsë mä jëmëjt 1974, ets kots nbëjktääytyë kyajëts ojts nëjkxtë muum ijx jäˈäwëbë, pes japëts ojts nëjkxtë Karttula mä nety tyëgoyˈatyë ëwäˈkx käjpxwäˈkxpë.

Kots nbëjktë, Jyobaa xytyukˈijxtëts ko xymyoˈoyandëbëtsë nety tijatyëts nyajtëgoyˈäjttëp, per net kots jëjpˈam nbëjktakëdët ja tyuunk (Mat. 6:33). Extëm nˈokpëjktakëm, kojëts ojts nëjkxtë Karttula kyajëts nety ti ja ngarrëty, tim ëgäˈäny bisikletëkëjxyëts njëdijttë. Per kom nëgooyë tyitykyˈäjnë tsipëts nety duˈun njëditët, pes jantsy jagamëtsë nety nˈëwäˈkx ngäjpxwäˈkxtë, pääty tsojkëbëtsë netyë ngarrë njuytyët per kyajëts ti ja nmeenyëty.

Tëgok, ojtsëts ja nmëgaˈax jap xykyuˈixëdë tajëts xynyamooy ja kyarrë. ¡Duˈunëts ja ngarrë nbattë!

Yajxonëtsë Jyobaa xytyukˈijxtë ko yëˈëjëts xymyooytyë tijatyëts nyajtëgoyˈäjttëp mët ko jëjpˈamëtsë tyuunk nbëjktakëdë.

Mä jëmëjt 1978, tamëtsë nety mä yˈëxpëktë prekursoorëty, kots xyˈanmääytyë ja mëdiˈibëts xyaˈëxpëjktëp Raimo Kuokkanen a parëts nyajtuktuktët ja solisitud etsëts nëjkxtët Galaad. Tajëts njäjttsondaktë inglés parëts mbäät nëjkxtë, per kyajëts ojts nˈokˈyajtuktujknëdë, yëˈko mä jëmëjt 1980 tajëts nyajwoowdë Betel jap Finlandia. Kom nmëdunandëbëtsë netyë Jyobaa mäts xytyimˈyajtunäˈändë päätyëts ngupëjktë. Mä taabë tiempë kyaj ijtyë Betelitëty mbäät nyëjkxtë Galaad, per duˈunyëmëts njattë inglés pes mbäädëts nety ok nyajwowdë.

 Ko tiempë nyajxy, ta mëdiˈibë Wyoowˈyoˈoytyëbë Jyobaa tyestiigëty jyënandë ko mbäät ja betelitëty dyajtuktuktë ja syolisitud parë nyëjkxtët Galaad, tajëts netyë nyajtuktujktë. Agujk jotkujkëtsë nety nnayjyawëdë Betel, per kom nan ntsojkënyëˈäjttëbëts nety nëjkxandë wiinktsoow, tajëts nyajtuktujktë nsolisitud ets yajwoowdëts Galaad mä klase 79. Jats nbëtsëëmdë septiembrë 1985 ets japëts nyajkajxtë Colombia.

Kots njäjttë Colombia, tajëts nyajkajxtë Betel. Oyëts nety jap ndundë, per ko ja jëmëjt yˈabejty tats njënany ko oyëts nbëtsëmët parëts nëjkx wiinktsoow nduny. Jaayëts nˈamdooy nbëjktsooy etsëts wiinktsow nyajkaxtët, tajëts nyajkajxtë Neiva.

Duˈunyëmëts njantsy kyäjpxwäˈkxäˈäny. Kots nduuny prekursoor jap Finlandia xëëwˈamëts ijty ndëjkˈayeˈey axtë kootspäät, pes aduˈukˈäjtpnëmtsë nety. Kots näämbëkˈäjttë, duˈunyëmëts ojts nˈëwäˈkx ngäjpxwäˈkxtë mëdë Sirkka. Kojëts ijty nëjkxtë jagam ëwäˈkx käjpxwäˈkxpë japyëts ijty nmäˈädë karroty, tajëts jakumbom jatëgok japyë ntsoondë.

Pääty kots nduundëjkëdë misioneerë, jeˈeyëmëts ndukxondaktë. Mä ja kongregasionk ojts nimayë jäˈäy tyëkëdë ëxpëjkpë ets ja nmëguˈukˈäjtëmëty jantsy oyjyaˈayëty, wingutsëˈkëdëp ets kyuˈëw kyukäjpxëdëp tijaty.

Naa japyë Neiva tap ijty kanäägë käjpn mä kyaj nituˈugë testiigë, tsipëtsë nety jap nëjkxtët mët ko nëgooyë jäˈäy yˈoktsiptuunëdë. Nmëmääy nmëdäjëts wiˈix japë jäˈäy tˈoknijawëdët ja Diosë yˈääw yˈayuk. Päätyëtsë Jyobaa nmënuˈkxtaky parë naa tuˈugënë jäˈäy mëdiˈibë tsoˈondëp mä yäˈädë nax käjpn ets tsyënääynyëdë Neiva tyëkëdët Diosmëduumbë. Ets ko nyëbattët ta jyëmbittët mä nyax kyäjpn ets yëˈë jäˈäy tyuknijawëdëp ja Diosë yˈayuk, perë Jyobaa wäˈätstëmë nety tnijawë ti tyunaampy.

Ko waanë yˈijty, tats tuˈugë jäˈäy nyaˈëxpëjktsondaky mëdiˈibë xyëwˈäjtypy Fernando González, jap tsyëënë mä tuˈugë käjpn mëdiˈibë xyëwˈäjtypy Algeciras mä kyaj nituˈugë Testiigë. Winsëmään ijty myiny tuumbë Neiva ets ja ijty tyuˈuyeˈey naa 15 oorën. Mäts kyajnëm ninëjkxy jawyiinëts ijty niˈëxpëkë mëdiˈibëts mëët njatäˈäny ets yëˈë netyë yeˈeytsyondaky reunyonk. Mä taabë sëmään, ta ëgäˈäny dyajtuˈukmujkyë jäˈäy mä ja kyäjpn parë ttukmëtmaytyaky mëdiˈibë nety jam jyajtypy.

Kyumdëdujk poˈo ta nyëbejtyë Fernando, eneerë mä jëmëjt 1990 ets netyë tyuundëjkë prekursoor regulaar. Kom Testiigë netynyë, ta Betel tkejxyë prekursoor espesialëty mä ja kyäjpn. Ets febreerë mä jëmëjt 1992 ta ojts jap nyaxkëdaky tuˈugë kongregasionk.

Ko Fernando pyejky mëdë Olga kyaj ojts jap wyëˈëmdë Algeciras, jap ojts nyëjkxtë San Vicente del Caguán mä nety kyaj nanduˈun  nituˈugë Testiigë. Ojts jap tpudëkëdë jäˈäy pes naxkëdak tuˈugë kongregasionk. Mä jëmëjt 2002 ta tyuundëjkëdë sirkuitë ets duˈun axtë tyambäät tyundë.

Yäˈädë eksperiensyë yëˈëts xytyukniˈˈijxëp ko jëjpˈam etsë Jyobaa nˈamdoˈowëm tii meerë ntsojkëm. Yëˈë mbäät ttuny mëdiˈibë ëtsäjtëm kyaj mbäät nduˈunëm, mët ko yëˈë nyiwintsënˈäjtypy mä myuky ja pëjktaˈaky (Mat. 9:38).

Mä jëmëjt 1990, tajëts nduundëjkë sirkuitë ets japëts timˈëgäˈäny nyajkajxtë Bogotá, Colombia. Ojtsëts njëjptsëˈëk njëjpjawëdë mët ko kyajëts nëgoo tii njat nnijawëdë. Kyajts nety nanduˈun nˈyujtë siudääjoty. Perë Jyobaa tyuun extëm jyënaˈanyë Filipʉs 2:13: “Diosë dëˈën tyiimpy mä miits mˈää mjotëty, jaˈa mwinmäˈänymyooyëdëp es xytsyoktët ko xytyundët diˈibë yëˈë tsyejpy”.

Ko tiempë nyajxy, tajëts ojts nyajkajxnëdë Medellín. Extëmëts të nˈoknimaytyakpë, jap nëgooyë jäˈäy nyayaˈoˈk nyayajtëgooyëndë ets kyaj yˈoktsëˈkëndë. Tëgok tamtsë netyë jäˈäy nyaˈëxpëky kots nmëdooyë jäˈäy jyantsy nyaytyujëdë, nëgooyëts ojts ntsëˈkënë, janeyuˈutsanëts. Per ja mëdiˈibëts nyaˈëxpëjkypy kyäjpxˈadëts ja parrafo, ninuˈunën kyatsëˈkë. Ko tkäjpxtääy tajëts xyˈanmääy: “Tats jatëgok nminy nëjkxëts ja nˈënäˈkuˈunk nˈokpaawoy”.

Jatëgok tamtsë nety nanduˈun ngäjpxwäˈkxtë, kojëts ja ngudëjk xynyimiiny jantsy jotëgoy të nety ja wyiin jyëjp jyantsy tyëgäjtstäˈäy. Tats xyˈanmääy: “Tëtsë jäˈäy xyjatujy”, tsëˈkëts nanduˈun. Per ok, tats nˈijxtë ko kyajtëmë nety yëˈë ja jäˈäy të tyujäˈänyëty, yëˈëdëmë nety yajtujäämp ja jäˈäy mëdiˈibë jam näjxp.

Ko tiempë nyajxy, tats ojts nˈijxwëˈëmnëdë wiˈixë nety japë jäˈäy jyukyˈattë. Mëjˈixy mëjmëdoyëts nˈijxtë ko duˈun ja nmëguˈukˈäjtëm tmëmadäˈäktë ja amay jotmay. Tats njënandë ko nanduˈunëtsë netyë Jyobaa xypyudëkëyäˈändë. Xëmëts nnaygyuentëˈäjtëdë, nmëmëdoowdëts wiˈixëts xynyëˈëmooy xytyuˈumoˈoytyë ja mëjjäˈäytyëjk ets ndukˈijxpajttëtsë Jyobaa.

Näˈäty nëgoobëts nnayˈatsëˈkëdë. Extëm tëgok, tamtsë nety tuˈugë toxytyëjk nmëtmaytyäˈäktë, kots nmëdooy nyayyäˈäx nyayjyokëdë nimajtskë toxytyëjk. Kyajëts njamëdowany, per ja toxytyëjk mëdiˈibëtsë nety jam nmëtmaytyaktëp xyˈanmääyëts etsëts nˈokˈixët pënën jap nnayˈoojëdëp. ¡Yëˈëdëmë nety jap nimajtskë loorë jyantsy wyinwoˈondëbë jäˈäy!

Mä jëmëjt 1997, tats nyaˈˈanmääy parëts nyaˈëxpëkët mä Escuela de Entrenamiento Ministerial. b Xëmëts njanëjkxany mä duˈumbë eskuelë, per ninäˈäts ngawinmääy kots ëjts nyaˈëxpëkët.

Ok, tuunëts distritë. Per ko yˈadëgooy,  tats jatëgok nduuny sirkuitë ets jats kujk duˈun nduny 30 jëmëjt. Kots duˈun nduny, mëjwiin kajaats ja kunuˈkxën nˈaxäjë, per tam mëdiˈibëts xytsyiptakxëp.

Naa awäˈänëts wanaty, päätyëts kyaj nmëjpëjktaˈaky kots nbäätyë amay jotmay. Näˈäty ëjtsëts ja nwinmäˈäny ndimyyajtunaampy kojëts nyaˈoyëdë ja jotmay mä tuˈukmujkën. Extëm nˈokpëjktakëm, nˈanmaabyëts ijty ja nmëguˈukˈäjtëm parë jyaˈayˈattët ajëëky amëguˈuk ets kyajpxyjyaygyukëdët, per ëjts kyajëtsë nety duˈun njäˈäyˈaty (Rom. 7:​21-23).

Näˈäty wiingëts nnayjyawëty extëmëts njäˈäyˈaty (Rom. 7:24). Tëgok, tatsë Jyobaa nˈanmääy ko kyajëts nˈoktunanë misioneerë ets ko oyëts njëmbijnët Finlandia. Per kots ojts nëjkxy reunyonk, xypyudëjkëts ja diskursë mëdiˈibë näjx parëts duˈunyëm nˈaktuunˈadëˈëtsët etsëts nyaˈoyët ja njäˈäyˈäjtën. Ninäˈäjëts nanduˈun ngajäˈäytyëgoyët wiˈixëtsë Jyobaa tˈatsoowëmbijty ja nnuˈkxtakën. Ets nan nguˈëˈëw ngukäjpxëbëts kots të xypyudëkë parëts nyaˈoyë ja njäˈäyˈäjtën.

Nguˈëˈëw ngukäjpxëdëbëts mëdëtsë ngudëjk kots duˈunë Jyobaa xyajtundë. Ngukäjpxëbëts nanduˈun kots xymyooy ja ngudëjk mëdiˈibëts xytsyojkp ets xypyudëjkëbëts.

Tyamëtsë njëmëjt nbëkanë 70 ets kyajëts mbäät nˈoktuunë sirkuitë. Per kyajts mon tuk nnayjyawëty mët ko ijtpëts seguurë ko Jyobaa yajtsobatypy ko nmëduˈunëm amumduˈukjot ets kyaj yëˈë tˈixy ti tuunk nikëjxmˈäjtëm (Miq. 6:8; Mar. 12:​32-34).

Tëjëts ndukxondaˈagyë Diosë tyuunk. Per päätyëts tijaty të nduny mët kotsë Jyobaa të xypyudëkë, kyaj yëˈëjëty mët kots nguwijˈyëty o kots oy njäˈäyˈaty. Oyëts të xytsyiptakxë tijaty oy ndunët, per yëˈëtsënë Jyobaa të xypyudëkë (2 Kor. 12:9).