1. ¿Wiˈix mä primer siiglë yajtuunyë Diosë tyuunk?

 KO JYOBAA ti tuunk ttuknipëky ja yˈuˈunk yˈënäˈk, tsyojkypy ets ttundët tukniwits tuknimäˈkxë (1 Kor. 14:33). Extëm nˈokpëjktakëm, Jyobaa tsyojkypy ets ja oybyë ayuk yajkäjpxwäˈkxët abëtsëmy nyaxwinyëdë (Mat. 24:14).Yëˈë të ttuknipëkyë Jesus parë tnikëjxmˈatëdë yäˈädë tuunk etsë Jesus duˈunën ja ttuny. Mä primer siiglë, yëˈë tyuknipëjk tuk grupë ja mëjjäˈäytyëjkëty parë tnëˈëmoˈoy ttumoˈoytyë ja myëguˈuktëjk ets tnijawëdët wiˈix tijaty ttundët (Apos. 15:2; 16:4). Mä tuˈuk tuˈugë kongregasionk, ojts yajwinˈixy pën mbäät tyuny mëjjäˈäy, yëˈë nyëˈëmooy tyuˈumooy ja myëguˈuktëjk ets ttukˈawäˈänë wiˈix tijaty yajtunäˈäny (Apos. 14:23). Ko ja Diosmëduumbëty ttuundë extëm yajnëˈëmooy yajtuˈumooytyë, ta ojts myëjwiin kyajaajëdë ja “myëbëjkën es bom bom [myëbëjktë] waanë may ja jäˈäyëty” (Apos. 16:5).

2. ¿Wiˈixë Jyobaa tnëˈëmooy ttuˈumooyë nyax kyäjpn mä jëmëjt 1919?

² Tyam, nanduˈunyëmë Jyobaa xynyëˈëmoˈoy xytyuˈumoˈoyëm mä nyax kyäjpn. Extëm nˈokpëjktakëm, mä jëmëjt 1919 Jesus yëˈë tyuknipëjk tuk grupë nmëguˈukˈäjtëm mëdiˈibë nëjkxandëp tsäjpotm parë tˈixtët wiˈix yaˈëwaˈkxy yajkäjpxwaˈkxy ja Diosë yˈayuk ets xymyoˈoyëm tijaty nyajtëgoyˈäjtëm (Luk. 12:42). a Etsë Jyobaa täjën tkunuˈkxy yäˈädë tuunk (Is. 60:22; 65:​13, 14).

3, 4. 1) Oknimaytyäˈäk mët tuˈugë ijxpajtën wiˈix ndukˈoyˈäjtëm ko tukniwits tuknimäˈkxë tijaty yajtuny. 2) ¿Ti nimaytyäˈägäˈänëm mä yäˈädë artikulo?

³ Koxyëbë Diosë nyax kyäjpn tukniwits tuknimäˈkxë tijaty  tkatuny, tsipxyëp nduˈunëm ja tuunk mëdiˈibë Jesus ojts xytyuknipëjkëm (Mat. 28:​19, 20). Extëm nˈokpëjktakëm të yajtukniwitsë mäjaty mbäät ngäjpxwäˈkxëm, per koxyëp duˈun kyayajtuny, oyxyëp myääjëty ngäjpxwäˈkxkojëm. Mbäät naa tim jamyëm nˈëwäˈkx ngäjpxwäˈkxëm ets kyaj wiinktsow nekynyëjkxëm. ¿Jadaa ja tuk pëky wiˈix ndukˈoyˈäjtëm ko duˈun tukniwits tuknimäˈkxë tijaty yajtuny?

⁴ Tyam duˈun tijaty yajtukniwitsë mä Diosë nyax kyäjpn extëmë Jesus ttuuny ko myiiny Naxwiiny. Mä yäˈädë artikulo, yëˈë nˈixäˈänëm wiˈixë Jesus ojts tnastunë ets wiˈix tyamë Diosë nyax kyäjpn nanduˈun ttuny. Nimaytyäˈägäˈänëm nanduˈun ti mbäät nduˈunëm parë nyajnigëxëˈkëm ko ndukjotkujkˈäjtëmë Diosë kyäjpn.

DUˈUN TYAMË DIOSË NYAX KYÄJPN TIJATY TTUNY EXTËM TTUUNYË JESUS

5. ¿Wiˈix tyamë Diosë kyäjpn ttuny mëdiˈibë Jesus ojts tnastunë? (Fwank 8:28).

⁵ Jesus yëˈë tukniˈˈijxë Tyeety parë tnijäˈäwë wiˈix tijaty ttunët ets kyäjpx myaytyäˈägët. Nanduˈun tyamë Diosë nyax kyäjpn dyajtunyë Biiblyë parë xynyëˈëmoˈoy xytyuˈumoˈoyëm ets xyˈëwij xykyäjpxwijëm (käjpxë Fwank 8:28; 2 Tim. 3:​16, 17). Ets janääm jatsojk xytyukjamyajtsëm parë ngäjpxëmë Biiblyë ets nguytyuˈunëm. ¿Wiˈix ndukˈoyˈäjtëm ko duˈun nduˈunëm?

6. ¿Wiˈix tuk pëky ndukˈoyˈäjtëm ko ëxpëjkëmë Biiblyë?

⁶ Mëjwiin kajaa xypyudëjkëm ko nyajtuˈunëmë ëxpëjkpajn parë njaygyujkëmë Biiblyë. Extëm nˈokpëjktakëm, mbäät nˈijxkijpxyëm mëdë Biiblyë extëm tyamë Jyobaa xynyëˈëmoˈoy xytyuˈumoˈoyëm. Ets ko nˈijxëm ko duˈun xytyuˈumoˈoyëm extëmë Biiblyë jyënaˈany, ta mas niˈigyë ndukjotkujkˈäjtëm (Rom. 12:2).

7. ¿Ti Jesus ëwäˈkx kyäjpxwäˈkx ets wiˈix nanduˈun tyamë Diosë nyax kyäjpn ttuny?

⁷ Jesus kyäjpxwäˈkx “ja oybyë ayuk diˈibë nyigajxypy ja Diosë kyutujkën” (Luk. 4:​43, 44). Ets ojts ttuknipëky ja yˈëxpëjkpëtëjk parë nanduˈun ttundët (Luk. 9:​1, 2; 10:​8, 9). Ninuˈun tyam ndukˈijtëmë Diosë nyax kyäjpn nanduˈun nˈëwäˈkx ngäjpxwäˈkxëm ja oybyë ayuk oy mä ntsënäˈäyëm ets oy ti tuunk nikëjxmˈäjtëm mä Diosë nyax kyäjpn.

8. ¿Ti tuunk tyam nduˈunëm?

⁸ Nitii duˈun kyaˈoyëty extëm ko jäˈäy ndukmëtmaytyakëm ja oybyë ääw ayuk. Per kyaj mbäät niˈamukë jäˈäy yˈëwäˈkx kyäjpxwäˈkxtë. Extëm nˈokpëjktakëm, ko Jesus jyukyˈaty yä Naxwiiny kyaj tˈaˈijxë parë ja demonyëtëjk nyimaytyäˈägëdët (Luk. 4:41). Parë mbäät tuˈugë jäˈäy yˈëwaˈkxy kyäjpxwaˈkxy, tsojkëp duˈun jyukyˈatët extëmë Biiblyë jyënaˈany. ¿Wiˈix mbäät nyajnigëxëˈkëm ko nyajtsobatëmë yäˈädë tuunk? Ko xëmë nˈëwäˈkx ngäjpxwäˈkxëm. Duˈun extëmë Jesus ttuuny, ëtsäjtëm nanduˈun nnipëm ja tëyˈäjtën mä jäˈäyë jyot kyorasoon ets nyajxoˈkëm (Mat. 13:​3, 23; 1 Kor. 3:6).

9. ¿Ti Diosë kyäjpn tyuumpy parë jäˈäy tnijawëdët ti Dios txëwˈaty?

⁹ Jesus ojts tnigajpxy tnimaytyaˈagyë Diosë xyëëw. Pes duˈunë Tyeety tmënuˈkxtaky: “Tëjëts nduknijawë mxëëw” (Juan 17:​26, TNM). Diosë nyax kyäjpn, nanduˈun tpanëjkxë Jesusë yˈijxpajtën parë jäˈäy ttuknijawëdë Diosë xyëëw. Ets yëˈë yajtuumbyë Traducción del Nuevo Mundo mëdiˈibë të yajkäjpxnaxy naa 270 ayuk, ta mëdiˈibë kaˈpxy ets ta mëdiˈibë jeˈeyë tuk pëky. Mä Traducción del Nuevo Mundo, të jatëgok yajkujayë Diosë xyëëw extëmë nety myiny ko yajjäˈäyë Biiblyë. Mä foyetë  Naybyudëkë parë nˈëxpëjkëmë Diosë yˈAyuk, jap tnigajpxy ko Diosë xyëëw ja myiny mä Escrituras griegas cristianas naa 237 ok.

10. ¿Ti xytyukˈijxëm extëm jyënaˈany tuˈugë toxytyëjk?

¹⁰ Duˈun extëmë Jesus ojts jäˈäy ttuknijawë tidënë Dios txëwˈaty, nanduˈunën ëtsäjtëm tyam nduˈunëm. Jap Myanmar tuˈugë toxytyëjk mëdiˈibë jyëmëjt 67 ojts yajtukˈawanë ko Dios txëwˈaty Jyobaa, ojts jyotˈamutskë ets axtë yax. Duˈun jyënany: “Nuˈunëts kujk njukyˈaty tyamnëmëts nijawë tidënë Dios txëwˈaty. [ . . . ] Kyajtsë nety nnijawë”. Yäˈädë yëˈë xytyukˈijxëm ko mbäädë jäˈäy dyajtëgatsyë jyukyˈäjtën ko tnijawëdë tidënë Dios txëwˈaty.

NˈOKˈYAJNIGËXËˈKËM KO NDUKJOTKUJKˈÄJTËMË DIOSË KYÄJPN

11. Pënaty tuundëp mëjjäˈäy, ¿wiˈix mbäät dyajnigëxëˈëktë ko tyukjotkujkˈäjttëbë Diosë nyax kyäjpn? (Ix nanduˈunë dibujë).

¹¹ ¿Wiˈix mbäät dyajnigëxëˈëktë pënaty tuundëp mëjjäˈäy ko tyukjotkujkˈäjttëbë Diosë nyax kyäjpn? Ko yajxon tkäjpxtët ja neky mëdiˈibë yajtuknigajxtëp etsë net ttundët extëm jap yaˈˈanëëmëdë. Extëm nˈokpëjktakëm, wiˈix dyajnaxtëdë reunyonk, wiˈix jap nyuˈkxtäˈäktët ets wiˈix tˈijxˈit tkuentëˈattët ja myëguˈuktëjk. Ko ja mëjjäˈäytyëjkëty duˈun ttundë extëm ja Diosë nyax kyäjpn nyëˈëmoˈoy tyuˈumoˈoyëdë, ta ja nmëguˈukˈäjtëm tjawëdë ko Jyobaa tsojkëdëp ets ijxˈit kuentëˈäjtëdëp.

12. 1) ¿Tiko jyëjpˈamëty nmëmëdoˈowëm pënaty xynyëˈëmoˈoy xytyuˈumoˈoyëm? (Ebreeʉsʉty 13:​7, 17). 2) ¿Tiko yˈoyëty yëˈëyë nˈijxëm tijaty oy tyuundëp pënaty xynyëˈëmoˈoy xytyuˈumoˈoyëm?

¹² Ko xynyëˈëmoˈoy xytyuˈumoˈoyëm pënaty tuundëp mëjjäˈäy, oy ko nmëmëdoˈowëm xondaˈakyˈääw xondaˈakyjyot. Duˈunë nety nbudëjkëm parë ttundët tijaty nyikëjxmˈäjttëp, pesë Biiblyë jyënaˈany ko nmëmëdoˈowëm ets nˈëygyupëjk ngajpxykyupëjkëm pënaty xynyëˈëmoˈoy xytyuˈumoˈoyëm (käjpxë Ebreeʉsʉty 13:​7, 17). Tsiptakp duˈun nduˈunëm, yëˈë ko pënaty tuundëp mëjjäˈäy pokyjyaˈay nanduˈun yajpäättë. Per ko yëˈëyë nˈijxëm mäjaty tyëgoytyë ets kyaj nˈijxëm tijaty oy tyuundëp, duˈunë nety nˈadëtsëm extëmë jäˈäy mëdiˈibë xymyëtsipˈäjtëm. ¿Tiko duˈun njënäˈänëm? Yëˈko kyaj mbäät nekytyukjotkujkˈäjtëmë Diosë nyax kyäjpn ko yëˈëyë nˈijxëm mäjaty tyëgoytyë pënaty tuundëp mëjjäˈäy. Per ¿tijaty mbäät nduˈunëm parë kyaj nnaytyukwinˈëˈënëm pënaty xymyëtsipˈäjtëm?

KYAJ NASˈIJXËM ETS PËN XYAˈˈAMAJTSK XYAJJOTMAJTSKËM

13. ¿Wiˈix tnimaytyäˈäktë Diosë kyäjpn pënaty xymyëtsipˈäjtëm?

¹³ Pënaty xymyëtsipˈäjtëm duˈun jyënäˈändë ko Diosë nyax kyäjpn nëgoo oynyatiijëty dyajkuboktë. Extëm nˈokpëjktakëm, mä Biiblyë jyënaˈany ko nyaˈijtëm ja niniˈkx këbäjk wäˈäts, jot wyinmäˈäny wäˈäts ets ko duˈun mbäät nmëduˈunëmë Dios extëm yëˈë ttsoky. Nanduˈun tnigajpxy ko yaˈëxkaxëp mä tuˈukmujkëm ja Diosmëduumbë mëdiˈibë axëëgë jyukyˈäjtën yajnëjkxypy pën kyaj jyodëmbity (1 Kor. 5:​11-13; 6:​9, 10). Ko duˈun nbaduˈunëm extëmë Biiblyë tniˈanaˈamë, ta pënaty myëtsipˈäjttëbë Diosë kyäjpn jyënäˈändë ko ëtsäjtëm wäˈäts jäˈäy ndimynyayajnäjxëm ets ko kyaj ntsojkëmë nmëguˈukˈäjtëm.

14. ¿Pënën nyigëbäjkˈäjtypy ko tyamë Diosë nyax kyäjpn yajniwäämbety?

¹⁴ Nˈokjamyajtsëm pën ëgäˈäny ojts tnibëdëˈëky Diosë nyax kyäjpn. Satanás “yëˈë  yajtsondak ja andakën” ets yëˈëdën nyigëbäjkˈäjtypy ko yajniwäämbetyë Diosë nyax kyäjpn (Fwank 8:44; Gén. 3:​1-5). Kyaj mëjˈixy mëjmëdoy njäˈäwëm ko Satanás dyajtunyë naxwinyëdë jäˈäy parë tniwäämbety Diosë kyäjpn. Pes të duˈun tˈoktuumbë mä primer siiglë.

15. Pënatyë nety nyiwintsënˈäjttëbë relijyonk, ¿wiˈixë ttundë ja Jesus mët ja yˈëxpëjkpëty?

¹⁵ Jesus wäˈäts jäˈäy jyukyˈajty ets tyuunë miläägrë, perë Satanás yajtuunë jäˈäy parë ttukniwäämbejtyë Jesus. Extëm pënatyë nety nyiwintsënˈäjttëbë relijyonk, ojts ja jäˈäy tˈanëëmëdë ko Jesus “myëdäjtypy ja mëjkuˈugopk” päätyë tˈëxkexy ja kaˈoybyëtëjk (Mar. 3:22). Ets ko ja Jesus ojts yajmäjtsnë, yˈanmääytyë ja jäˈäy parë yajtuknikäjpxpatëdë oˈkën (Mat. 27:20). Ok, ko ja Jesusë yˈëxpëjkpëty ojts tyëkëdë ëwäˈkx käjpxwäˈkxp, ta nanduˈun ja myëtsipëty tyukjotˈambëjkëdë ets myëtsiptsoˈonëdë (Apos. 14:​2, 19). Mä Diˈib Xytyukˈawäˈänëm 1 äämbë disiembrë 1998, duˈun jap ojts tnimaytyaˈaky ko ja myëtsipëty kyaj yëˈëyë wiink tˈijxtë ko yˈëwäˈkx kyäjpxwäˈkxtë, nan niwäämbajtëdë ets ja nax käjpn tyuknibëdëˈkëdë.

16. ¿Ti mbäät nduˈunëm ko nmëdoyˈäjtëm yajniwäämbety Diosë kyäjpn?

¹⁶ Satanás duˈunyëm yˈandaˈaky axtë tyambäät, pes yëˈë “diˈibë wyinˈiˈimpy nidëgekyë ja naxwinyëdë jäˈäy” (Diˈibʉ Jat. 12:9). Pääty ko nmëdoˈowëm ko axëëk yajnimaytyaˈagyë Diosë nyax kyäjpn o pënaty xynyëˈëmoˈoy xytyuˈumoˈoyëm, nˈokjamyajtsëm ko Jesus mët ja yˈëxpëjkpëty nanduˈunën jyäjttë. Ets duˈun extëmë Biiblyë ojts tnaskäjpxë, taajën tyamë jäˈäy tnibëdëˈëktë Jyobaa tyestiigëty ets tniwäämbattë (Mat. 5:​11, 12). Ëtsäjtëm nnijäˈäwëm  pënën tyam yajtuunëdëbë yäˈädë jäˈäy, pääty kyaj nmëbëkäˈänëm wiˈix jyënäˈändë. ¿Ti mbäät nduˈunëm parë nnaygyuentëˈäjtëm?

17. ¿Ti mbäät nduˈunëm ko yajnimaytyäˈägët mëdiˈibë kyaj tyëyˈäjtënëty? (2 Timotee 1:13; ixë rekuäädrë mä jyënaˈany: “ ¿Ti mbäät xytyuny ko myajtukmëtmaytyäˈägët mëdiˈibë kyaj tyëyˈäjtënëty?”).

¹⁷ Nˈokjëjpkudijëm mä yajmaytyaˈaky mëdiˈibë kyaj tyëyˈäjtënëty. Apostëlë Pablo yajxon ojts tnigajpxy ti mbäät nduˈunëm ko yajmaytyäˈägët mëdiˈibë kyaj tyëyˈäjtënëty. Mä 1 Timotee 1:3 etsë 4 duˈun jyënany: “Kyaj yajkupëkët ja ëxpëjkën diˈibë kyaj tyëyˈäjtënëty”. Ets ja Timoteo duˈun tˈanmääy: “[Këdii] xytyunyë kuentë lyokë winmäˈänyëty es diˈibë jeky myaytyaktëp nanëgoobë” (1 Tim. 4:7). Näägë ënäˈkuˈunk kyonëˈktëp tijaty naxkëjxy ets nyaytyukˈagonëdë, per tuˈugë jäˈäy mëdiˈibë mëjjäˈäy mëˈˈënäˈknë nyijäˈäwëp ko kyaj mbäät duˈun yˈadëˈëtsy, pes nyijäˈäwëp ko mbäät yˈaxëktunyëty. Nanduˈunën jyaty mët ja tukniˈˈijxënë mëdiˈibë kyaj tyëyˈäjtënëty, kyaj nmëbëjkëm, yëˈëyë ngupëjkëm “ja ëxpëjkënë oybyë” o mëdiˈibë tëyˈäjtën (käjpxë 2 Timotee 1:13).

18. ¿Wiˈix mbäät nyajnigëxëˈkëm ko ndukjotkujkˈäjtëmë Diosë nyax kyäjpn?

¹⁸ Tyam jeˈeyë tëgëk pëky të nˈijxëm wiˈixë Diosë nyax kyäjpn tpanëjkxë Jesusë yˈijxpajtën. Per ko mijts xyˈakˈëxpëkëdë Biiblyë ta niˈigyë xyˈaknijawëyaˈany. Duˈunyëm pudëkëdë ja mmëguˈuktëjk parë ttukjotkujkˈattëdë Diosë nyax kyäjpn ets nanduˈunyëmë Jyobaa mmëduunˈadëˈëts, këdii xynyasˈixë parë pën mdukmëjagamgaˈagëdët ja Diosë nyax kyäjpn (Sal. 37:28). Mëjwiin kajaa nyajtsobatëm ko duˈunë Jyobaa nmëduˈunëm amumduˈukjot mä ja nyax kyäjpn mä jyapˈatyë tsojkën etsë tuˈugyëˈat.