1. ¿Wiˈix näägë nmëguˈukˈäjtëm nyayjyawëdë ko nyëjkxäˈändë ëwäˈkx käjpxwäˈkxpë? (Ix nanduˈunë dibujë).

 NIˈAMUKË ninuˈun nDiosmëduˈunëm pääty nˈëwäˈkx ngäjpxwäˈkxëm mët ko ntsojkëmë Jyobaa Dios ets nduknijawëyäˈänëmë jäˈäy pënën yëˈë. Nimayë nmëguˈukˈäjtëm jotkujk nyayjyawëdë ko yˈëwäˈkx kyäjpxwäˈkxtë, per ta nimay mëdiˈibë kyaj duˈun nyayjyawëdë. ¿Tidaa ko? Yëˈko nääk wintsoytyuˈun jyaˈayˈattë ets ta mëdiˈibë kyaj oy nyayjyawëty ko jäˈäy tninëjkxy. Nääk yëˈë tsyëˈkëdëp ko jamë jäˈäy wixaty yˈanëˈëmxëdët o jyotˈambëkët. Ets ta mëdiˈibë kyaj mëdë jäˈäy nyaygyajpxytsyiigäˈänyëty. Niˈamukë yäˈädë nmëguˈukˈäjtëm tsyojktëbë Jyobaa, per tsiptakxëdëp ttukmëtmaytyäˈäktëdë jäˈäy ja Diosë yˈayuk. Nyijäˈäwëdëp ko jëjpˈamë yäˈädë tuunk, päätyën nyëjkxtë ëwäˈkx käjpxwäˈkxpë ets seguurë ko Jyobaa agujk jotkujk nyayjyawëty.

2. ¿Tiko kyaj mbäät axëëk mnayjyawëty pën kyaj agujk jotkujk mnëjkxy ëwäˈkx käjpxwäˈkxpë?

² ¿Mtsiptakxëp mnëjkxët ëwäˈkx käjpxwäˈkxpë? Pën duˈun, këdii axëëk mnayjyawëty, pes yëˈë myajnigëxëˈkypy ko yujy tudaˈaky mjäˈäyˈaty. Waˈan kyaj tijaty mëdë jäˈäy xyajtsiptäˈägäˈäny ets kyaj nanduˈun mëët mnayˈojäˈänyë. Yëˈë njatukninëjkxëmë oyˈäjtën etsë Jyobaa nyijäˈäwëp wiˈix mnayjyawëty ets yëˈë mbudëkëyanëp (Is. 41:13). Mä yäˈädë artikulo mëgoxk pëky nˈixäˈänëm ti mbäät xypyudëjkëm parë kyaj axëëk nnayjyäˈäwëm ets parë agujk jotkujk nnayjyäˈäwëm ko nëjkxëm käjpxwäˈkxpë.

DIOSË YˈAYUK YËˈË MJOTMËKMOˈOYANËDËP

3. ¿Mä tpëjkyë Jeremíasë jot mëjääw parë ojts yˈëwaˈkxy kyäjpxwaˈkxy?

³ Nuˈun kujkë xëëw tiempë nyaxy, të Diosë yˈAyuk pyudëkëdë ja Diosmëduumbëty mëdiˈibë nanduˈun ojts  tsyiptakxëdë yˈëwäˈkx kyäjpxwäˈkxtët. Extëm ko ja kugajpxy Jeremías kyajxë Jyobaa parë nëjkx kyäjpxwaˈkxy, ojts tsyëˈëgë, duˈun jyënany: ‘Ënetës nˈëtsooy: Wintsën. Ëjts tim ënäˈknëmës, käˈäbës ndukjaty nˈëwëty ngäjpxëty’ (Jer. 1:​6, TY). ¿Ti pudëjkë parë kyaj tsyëˈkë? Yëˈë ja Diosë yˈayuk, pes duˈun jyënany: ‘Ënet jap njodotyës njäˈäwë yëˈë mˈääw mˈayuk tyoybyiky jëënën ets duˈunës ndimyjyäˈäwë tim tsaapy tim noˈkp yowë, tyimtuktëjkëp njäˈäwëtsë nwääy nbäjk. Koos njakumäˈkxëjany, nijënuˈun tkajëgyëpy’ (Jer. 20:​8, 9, TY). Jeremías ojts tsyiptakxëty yˈëwäˈkx kyäjpxwäˈkxët, per yëˈë pudëjkë ja Diosë yˈAyuk parë ttuuny mëdiˈibë nety të yajtuknipëky.

4. ¿Wiˈix xypyudëjkëm ko ngäjpxëmë Biiblyë ets nbawinmäˈäyëm? (Colosenses 1:​9, 10, TNM).

⁴ Ninuˈun tyam nDiosmëduˈunëm, yëˈë nanduˈun xyjyotkujkmoˈoyëmë Diosë yˈAyuk. Ko apostëlë Pablo tnijäˈäyë ja Diosmëduumbëty mëdiˈibë Colosas, ojts tˈanëëmë ko yëˈë pudëkëyanëdëp ja tëyˈäjtën parë nyëˈëyeˈey tyuˈuyeˈeytyët “extëmë Jyobaa tkupëky”, ets duˈunyëm dyaktët “ja tëëm mä tukëˈëyë oybyë tuunk” (käjpxë Colosenses 1:​9, 10, TNM). Tuk pëkyë yäˈädë tuunk mëdiˈibë myaytyak, yëˈë ko nˈëwäˈkx ngäjpxwäˈkxëmë Diosë yˈayuk. Extëm të nˈijxëm, ko ngäjpxë Biiblyë ets nbawinmäˈäyëm xypyudëjkëm parë niˈigyë nmëbëjkëmë Jyobaa ets njaygyujkëm ko jëjpˈam ets nimaytyakëmë yˈAyuk.

5. ¿Ti xypyudëkëyäˈänëm parë niˈigyë njaygyujkëmë Biiblyë?

⁵ Parë xypyudëjkëm ko ngäjpxëmë Biiblyë kyaj jeˈeyë nwingäjpxnäjxkojëm, tsojkëbën nmëmäˈäy nmëdäjëm. Per ¿ti mbäät xytyuny ko tuˈugë tekstë xykyäjpxët ets kyaj xyjyaygyukët? Oy ko xypyayeˈeyëty wiˈix yajnimaytyaˈaky mä foyetë Naybyudëkë parë tijaty tpayoˈoytyëdë Jyobaa tyestiigëty o mä wiinkpë ëxpëjkpajn. Pën mˈakniˈëxpëjkëp niˈigyë Biiblyë ta mas niˈigyë Jyobaa xytyukjotkujkˈatët (1 Tes. 5:21). Ko niˈigyë xymyëbëkët tijaty myaytyakypy, ta niˈigyë jäˈäy xytyukmëtmaytyäˈägäˈäny.

NAYJYËJPˈIXËDË WIˈIX NËJKX MˈËWÄˈKXÄˈÄNY MGÄJPXWÄˈKXÄˈÄNY

6. ¿Tiko yˈoyëty kontiempë nnayjyëjpˈijxëm mä nganëjkxëmnëm ëwäˈkx käjpxwäˈkxpë?

⁶ Pën mnayjyëjpˈijxëp kontiempë mä kyajnëm mnëjkxy käjpxwäˈkxpë, ta kyaj mtsëˈëgëyaˈany ko jäˈäy xymyëtmaytyäˈägët.  Jesus duˈunën kontiempë ttukniˈˈijxë ja yˈëxpëjkpëty wiˈixë jäˈäy tmëtmaytyäˈäktët (Luk. 10:​1-11). Ets ko duˈun tuundë, ta oy wyimbëtsëëmy ets jantsy agujk jotkujk nyayjyäˈäwëdë (Luk. 10:17).

7. ¿Wiˈixën mbäät nnayjyëjpˈijxëm mä nganëjkxëmnëm ëwäˈkx käjpxwäˈkxpë? (Ix nanduˈunë dibujë).

⁷ ¿Wiˈixën mbäät nnayjyëjpˈijxëm kontiempë mä nganëjkxëmnëm ëwäˈkx käjpxwäˈkxpë? Ko nmëmäˈäy nmëdäjëm wiˈix nimaytyäˈägäˈänëm ja Biiblyë këˈëm ääw këˈëm ayuk. Oy ko nanduˈun nwinmäˈäyëm wiˈixë jäˈäy xyˈatsowäˈänëm ets naa wiˈix mbäät nˈanmäˈäyëm. Pën nduˈunëm duˈun, ta nëjkx mët ja jäˈäy oy ngäjpx nmaytyakëm ets nxik nxoˈonëm.

8. ¿Tiko mëët nyaˈijxkijpxyëmë naxpotsytyuˈts?

⁸ Apostëlë Pablo ojts dyajtuny tuˈugë ijxpajtën mëdiˈibë xytyukˈijxëm tidën nikëjxmˈäjtëm mä nˈëwäˈkx ngäjpxwäˈkxëm. Duˈun jyënany: “Mët ko Diosëtsë dëˈën të xytyukmayˈatyëts tadë oyˈäjtën mä nniniˈx, oydyëˈënëty extëmë naxpotsytyuˈtsën” (2 Kor. 4:7). ¿Tidën myaytyäˈägaampy ko jyënaˈany “tadë oyˈäjtën”? Yëˈë ko nˈëwäˈkx ngäjpxwäˈkxëm ja Diosë yˈayuk parë jäˈäy nyitsoˈoktët (2 Kor. 4:1). ¿Ets pënatyën duˈun “extëmë naxpotsytyuˈtsën”? Ëtsäjtëm yajmaytyakëm ninuˈun nˈëwäˈkx ngäjpxwäˈkxëm. Ko apostëlë Pablo jyukyˈajty, jap ijtyë jäˈäy tmëjëdittë mä ja naxpotsytyuˈtsën mëdiˈibë yajtsobattëp, extëmë meeny, jëˈxy pëky o binë. Tyam nanduˈunë Jyobaa xyajtuˈunëm parë nˈëwäˈkx ngäjpxwäˈkxëm ja oybyë ayuk mëdiˈibë tsobatp ets yëˈë Jyobaa xypyudëjkëm parë nduˈunëm ja tyuunk.

AMDOWË JYOBAA JOTMËKˈÄJTËN

9. ¿Ti mbäät nduˈunëm pën yëˈë ntsëˈkëm ko jäˈäy tkamëdoowˈitäˈändë Diosë yˈayuk? (Ix nanduˈunë dibujë).

⁹ Näˈäty yëˈë ntsëˈkëm ko jäˈäy kyaj tmëdoowˈitäˈändë Diosë yˈayuk. ¿Ti mbäät nduˈunëm pën tsëˈkëm? Nˈokmënuˈkxtakëmë Jyobaa parë xymyoˈoyëmë jotmëkˈäjtën ets nnimaytyakëm ja yˈayuk duˈun extëm ttuundë ja apostëlëtëjk. Ko yaˈˈanmääytyë ets kyaj yˈokkäjpxwäˈkxnëdët tuktëjkëdë ja tsëˈëgë, per ta Jyobaa tmënuˈkxtaktë: “Okˈix wiˈix jyotˈambëktë, es meegyëts ja [jotmëkˈäjtën] es këdiibë ëëtsëty ntsëˈëgëdë esëts ngäjxwäˈxtët mijë mˈayuk”. Jyobaa netyë jyotmëkmooyëdë (Apos. 4:​18, 29, 31).

10. ¿Wixatyë Jyobaa xypyudëjkëm parë nduˈunëm ja tuunk mëdiˈibë të xytyuknipëjkëm? (Isaías 43:​10-12).

 ¹⁰ Jyobaa yëˈë të xywyinˈijxëm parë nˈëwäˈkx ngäjpxwäˈkxëm ets yëˈë xypyudëkëyäˈänëm (käjpxë Isaías 43:​10-12). Min nˈokˈijxëm taxk pëky wixaty xypyudëjkëm. Myëduˈuk, Jesus yëˈë xypyudëjkëm mä nˈëwäˈkx ngäjpxwäˈkxëm (Mat. 28:​18-20). Myëmajtsk, Jyobaa yëˈë të ttuknipëkyë anklëstëjk parë xypyudëjkëm (Diˈibʉ Jat. 14:6). Myëdëgëëk, ko Jyobaa yëˈë xytyukpudëjkëmë yˈespiritë santë parë njamyajtsëm tijaty të njäjtëm (Fwank 14:​25, 26). Ets myëmäjtaxk, kyaj naytyuˈuk nyajpatëm, pes yëˈë mëdë nmëguˈukˈäjtëm nëjkxëm käjpxwäˈkxpë. Ko Jyobaa xypyudëjkëm etsë nmëguˈukˈäjtëm, ta amëk jotmëk ngäjpxwäˈkxëm.

IX TIJATYË JÄˈÄY MYËMÄÄPY MYËDAJPY PARË XYJYOTKUJKMOˈOYËT

11. ¿Ti mbäät xytyuny parë jäˈäy xypyäädët ets xytyukmëtmaytyäˈägëdë Diosë yˈayuk? (Ix nanduˈunë dibujë).

¹¹ ¿Axëëk mnayjyawëty ko jäˈäy xykyapääty mä jyëën tyëjk? Pën duˈun, waˈan mnayajtëyëty: “¿Mädaa të nyëjkxtäˈäytyë? ¿Waˈandaa jam tyundë o jyuy kyëbattë?” (Apos. 16:13). Oy ko xyˈëxtäˈäyëdë winmäˈäny parë jäˈäy xymyëtmaytyäˈägët mä xytyimpääty. Tuˈugë nmëguˈukˈäjtëm mëdiˈibë xyëwˈäjtypy Joshua duˈun tnimaytyaˈaky: “Oy wyimbëtsëmy kotsë jäˈäy ndukmëtmaytyaˈagyë Diosë yˈayuk mä jyuy tyooktë o mä karrë tsyoony jyaˈty”. Joshua mëdë kyudëjk, të tˈixtë ko pyattëbë jäˈäy ko tninëjkxtë tsuu ets domingë jënakyxyëëw (Éfes. 5:​15, 16).

12. ¿Wiˈixën mbäät nnijäˈäwëm tijatyë jäˈäy myëmaapy myëdajpy ets tijaty myëbëjkypy?

¹² Pënë jäˈäy kyaj nëgoo tˈoymyëdoyë Diosë yˈayuk, oy ko nˈijxëm tijaty myëmaapy myëdajpy ets tijaty myëbëjkypy. Joshua mëdë kyudëjk yëˈë yajtëëwdëbë jäˈäy mëdiˈibë miimp mä trataadë parë tmëtmaytyaktsoondë. Extëm nˈokpëjktakëm, ko tˈawanëdë ja trataadë ¿Wiˈix xyˈixyë Biiblyë?, ta jäˈäy tˈanëëmëdë ko nääk ta mëdiˈibë jënandëp ko yëˈë Diosë yˈayuk ets ko nääk kyaj tmëbëktë. Ets ta net dyajtëwdë, mijts ¿wiˈix mˈokjënäˈäny?

13. ¿Wiˈixën mbäät agujk jotkujk nnayjyäˈäwëm mä ngäjpxwäˈkxëm oyë jäˈäy tkamëdowäˈändë? (Proverbios 27:11).

 ¹³ Oyë jäˈäy tkamëdoowˈitäˈändë Diosë yˈayuk, ëtsäjtëm nëgooko nnaynyiwatsëm. ¿Tiko duˈun njënäˈänëm? Yëˈko mëdiˈibën tsobatp yëˈë ko jäˈäy nduknijäˈäwëmë Diosë yˈayuk, pes yëˈënë Jyobaa mëdë Jesus të xytyuknipëjkëm ets yëˈë nyajxondakëm (käjpxë Proverbios 27:11; Apos. 10:42). Pääty kyaj mbäät wiˈix nnayjyäˈäwëm ko jäˈäy ngapatëm o ko tkamëdoowˈitäˈändë Diosë yˈayuk.

14. ¿Wiˈix nnayjyäˈäwëm ko tuˈugë nmëguˈukˈäjtëm tpäätyë jäˈäy mëdiˈibë yˈoymyëdoobyë Diosë yˈayuk, ets tiko?

¹⁴ Oy ko nanduˈun ndukxondakëm ko ja nmëguˈukˈäjtëm tpäättë jäˈäy mëdiˈibë myëdoowˈitandëbë Diosë yˈayuk. Mä rebistë Diˈib Xytyukˈawäˈänëm duˈun tˈijxkijpxyë yäˈädë tuunk extëm ko tuˈugë ënäˈkuˈunk tyëgoy, per ta nimayë jäˈäy jyantsy yˈëxtäˈäyëdë axtë jagambäät, ko yajpääty kyaj yëˈëyë xyondaˈaky ja mëdiˈibë të tpääty, niˈamukën ttukxondäˈäktë. Nanduˈunën jyaty mä ngäjpxwäˈkxëm, tsojkëp nyaˈˈabëtsëˈëmëm ja territooryë. Ko tuˈugë nmëguˈukˈäjtëm dyaˈëxpëjktsondaˈagyë jäˈäy ets nyëjkxy reunyonk, niˈamukë ndukxondakëm.

TSOKË JYOBAA ETSË MËGUˈUKTËJK

15. ¿Ti xypyudëkëyäˈänëm parë jotkujk nnayjyäˈäwëm mä ngäjpxwäˈkxëm? (Matewʉ 22:​37-39; ix nanduˈunë dibujë mä rebistë nyiˈak).

¹⁵ Niˈigyë jotkujk nnayjyawëyäˈänëm mä ngäjpxwäˈkxëm pën ntsojkëmë Jyobaa etsë nmëguˈukˈäjtëm (käjpxë Matewʉ 22:​37-39). Jyobaa agujk jotkujk nyayjyawëyaˈanyëty ko xyˈijxëm nˈëwäˈkx ngäjpxwäˈkxëm ets nanduˈunë jäˈäy mëdiˈibë nyaˈëxpëjktsondakëm. Oy ko nanduˈun njamyajtsëm ko pënaty yˈoymyëdoowdëbën ja Diosë yˈayuk nitsoˈogandëp (Fwank 6:40; 1 Tim. 4:16).

16. ¿Wiˈix mbäät duˈunyëm jotkujk nnayjyäˈäwëm mä ngäjpxwäˈkxëm oy nbëjk nˈijxëm? Nimaytyäˈäk tuˈugë eksperiensyë.

¹⁶ Pën mbëjk mˈijxëp ets kyaj mˈoknëjkxnë jënˈayeˈepy tëjkˈayeˈebyë, oy ko xyˈëxtäˈäyëdë winmäˈäny wiˈix mbäät xyajnigëxëˈëky ko mtsojkypyë Jyobaa etsë mëguˈuktëjk. Samuel mëdë Dania duˈunyëm të kyäjpxwäˈkxtë ko të jyaˈˈatyë COVID-19, pes myëtmaytyaktë jäˈäy mä  telefënë, jyaaytyë kartë ets yaˈëxpëjktë mä Zoom. Ets komë Samuel yëˈë nety myëdäjtypyë kanser, nanduˈunë jäˈäy ttukmëtmaytyakyë Diosë yˈayuk ko ojts nyëjkxy mä hospital. Samuel jyënaˈany: “Ko nbatëmë amay jotmay xyajkëjx xyaˈˈanuˈkxëm ets kyaj nˈoktukxondakënë Diosë tyuunk. Päätyën tsyokyëty duˈunyëmë Jyobaa nmëduˈunëm parë agujk jotkujk nnayjyäˈäwëm”. Dania ojts nanduˈun yˈayoˈonbääty ko ojts kyëday, tëgëk poˈo kyoˈknääy ets tëdujk poˈo jyëdijty mä siyë de rueedë. Yëˈë jyënaˈany: “Nˈëxtääyëts ja winmäˈäny wiˈixëts mbäädë jäˈäy nˈoktukmëtmaytyaˈagyë Diosë yˈayuk, extëm ja enfermeerë mëdiˈibëts xynyimiimp ets ja jäˈäy mëdiˈibë tijaty myëmiimpy mätsë ndëjk. Ojtsëts nanduˈun nmëtmaytyaˈaky mä telefënë ja mëdiˈibë nyiwintsënˈäjtypy ja doktoortëjk”. Samuel mëdë Dania kyaj nety mä mbäät nyëjkxtë, per yˈëxtääytyë winmäˈäny wiˈix mbäädë jäˈäy ttukmëtmaytyäˈäktë Diosë yˈayuk ets agujk jotkujk nyayjyäˈäwëdë.

17. ¿Wiˈix xypyudëkëyäˈänëm tijaty të yajnigajpxy mä yäˈädë artikulo?

¹⁷ Mä yäˈädë artikulo të nˈijxëm taxk pëky ti mbäät nduˈunëm parë jotkujk nnayjyäˈäwëm ko ngäjpxwäˈkxëm. Pën nduˈunëm extëm yä të yajnigajpxy, ta kyaj axëëk nekynyayjyawëyäˈänëm, niˈigyë ndukxondäˈägäˈänëm mä nˈëwäˈkx ngäjpxwäˈkxëm. Duˈun extëm ko ndukxondakëm tuˈugë tojkx mëdiˈibë jantsy xuˈkx të yˈoyë mët ko të ja tojkxtsooy kyäˈpxtäˈäy.