APOSTËLË Pablo taxtujk pëky ojts tnigajpxyë oybyë jäˈäyˈäjtën diˈib yajkypyë Diosë myëjääw (Gál. 5:22, 23, TNM). Tyäˈädë taxtujk pëkypyë, yëˈë ja “tëëm diˈib yajkypyë Diosë myëjääw”, diˈib nanduˈun yajnigëxëˈkypy “ja jikyˈäjtënë jembyë” * (Kol. 3:10). Duˈun extëm tuˈugë ujts kepy tˈyakyë tyëëm ko yajxon yajkuentˈaty, nanduˈun tuˈugë jäˈäy tˈyajnigëxëˈëgyë tyäˈädë tëëm diˈib yajkypyë Diosë myëjääw ko tnasˈixë ets tyuˈumoˈoyëdët mä jyukyˈäjtën (Sal. 1:1-3).

Ja tim jawyiimbë oybyë jäˈäyˈäjtën diˈibë Pablo myaytyak, yëˈë tsojkën. ¿Nuˈunën jyëjpˈamëty nyajnigëxëˈkëm? Pablo jyënany: “Pën kyajts nmëdaty ja tsojkën [...] ni tiixyëpts ëj ngatsooty” (1 Kor. 13:2). Per ¿tidën yˈandijpy tsojkën, wiˈix mbäät nyajmëjwindëjkëm ets wiˈix nyajnigëxëˈkëm tuˈuk tuˈugë xëëw?

Tsip nimaytyakëm tidën yˈandijpy tsojkën, perë Biiblyë nyimaytyakypy wiˈix mbäät nyajnigëxëˈkëm. Extëm nˈokpëjtakëm, jyënaˈany ko ja “diˈibë myëdäjtypy ja tsojkën, myëdäjtypy ja maˈxtujkën es oyjyaˈayˈaty”, yëˈëyë “tyukxondakypy ja tëyˈäjtën”, duˈunyëm “myëbeky”, duˈunyëm “jyëjpˈixy” ets duˈunyëm “myëmaˈxtiky”. Nan ajiiky amëguˈuk, myëmääy myëdajpyë wiink jäˈäy ets kyaj myastuˈuty. Per ja jäˈäy diˈib kyaj tmëdatyë tsojkën, nyaywyinaxëjäˈäwëp tijaty, mëj këjxm nyayjawëty, yajtëgoobyë mayˈäjt wintsëˈkën, jeˈeyë këˈëm nyaymyëmay nyaymyëdäjˈyëty, pyëjkëˈkypyë akë ets kyaj pyokymyeˈkxy. En lugäär nyaˈijxëmë jäˈäyˈäjtën diˈib kyaj yˈoyëty, yëˈë nyajnigëxëˈëgäˈänëmë tsojkën diˈib “tyukˈoyˈatëp” ja nmëguˈukˈäjtëm (1 Kor. 13:4-8).

“Dios yëˈë dëˈën ja tsojkën” (1 Fwank 4:8). Duˈun tˈyajnigëxëˈëky mä tukëˈëyë tijaty të tˈyajkojy ets tijaty tyuumpy. Ets mä mëjwiin kajaa tˈyaˈijxë tsyojkën, jaˈko tkejxyë Jesus yä Naxwiiny parë yˈayowët ets xykyuˈoˈkëm. Apostëlë Juan duˈun tkujäˈäyë: “Dios xytyukˈijxëm ja tsyojkën ëtsäjtëm ko tkejxy ja tyuˈukˈUˈunk yä naxwiiny es nmëdäjtëm ja njikyˈäjtënˈäjtëm mët yëˈëgyëjxmë yˈUˈunk. Kyaj yˈëtsäjtëmëty jawyiin ntsojkëm ja Dios, jawyiinˈäjtp yëˈë oj xytsyojkëm es xytyukˈijxëm mët ko xytyuknigajxëm ja yˈUˈunk es xyajpojpënitëgoˈoyëm” (1 Fwank 4:9, 10). Mët ko Dios ojts xytsyojkëm, ta mbäät nyajpokymyaˈkxëm ets nˈawijx njëjpˈijxëm ja jukyˈäjtënë winë xëëwbë.

Jesus yajnigëxëˈk ko tsyojkypyë naxwinyëdë jäˈäy ko tkupëjky myinët yä naxwiiny ets ttunët ti Dios tsyojkypy. Pablo duˈun tnimaytyaky: “Xyajwatsëm ja Dios mët ko Jesukristë ttuuny diˈibë Dios tsyejpy ko ttukwintsëˈkë nyiniˈx tëgok jeˈeyë mët winë xëë winë tiempë” (Eb. 10:9, 10). Tyäˈädë  tsojkën, yëˈë diˈib niˈigyë mëjwiin kajaa diˈib mbäädë naxwinyëdë jäˈäy tˈyajnigëxëˈëky, extëmë Jesus jyënany: “Diˈibë kyuˈoogëp ja myëtnaymyaayëbëty, yëˈë dëˈën yaˈijxëp ko myëjëty ja tsojkën tmëdaty” (Fwank 15:13). ¿Mbäät nanduˈun ëtsäjtëm nyaˈijxëmë tsojkën extëmë Jyobaa etsë Jesus, oy pokyjyaˈay nyajpatëm? Mbäät, min nˈokˈijxëm.

Pablo xyˈanmäˈäyëm: “Jikyˈattë extëm yëˈë ttseky. Naytsyokëdë nixim niyam, dëˈën extëm ja Kristë oj xytsyojkëm es nyayyäjkë ëtsäjtëmgyëjxm” (Éfes. 5:1, 2). Ko jyënaˈany “naytsyokëdë nixim niyam”, yëˈë yˈandijpy ko xëmë nyajnigëxëˈkëm ja tsojkën. Kyaj jeˈeyë tsyokyëty njënäˈänëm ko nmëdäjtëmë tsojkën, jëjpˈam ets nyajnigëxëˈkëm mä tijaty nduˈunëm. Juan jyënany: “Kyaj nnaytsyojkëm jeˈeyë wingëˈëy agëˈëy, nnaytsyojkëm extëm mbäät yaˈixy diˈibë nduˈunëm mët ja tëyˈäjtën” (1 Fwank 3:18). Extëm nˈokpëjtakëm, ko ntsojkëmë Jyobaa etsë jäˈäy, ta nimaytyakëm ja “oybyë ayuk diˈibë nyimaytyakypy ja tsäjpotmëdë kutujkën” (Mat. 24:14; Luk. 10:27). Nan nyajnigëxëˈkëmë tsojkën ko nmaˈkxtujkëm, ko nˈoyjyaˈaytyakëm ets ko nbokymyaˈkxëm. Päätyë Biiblyë xytyukˈanaˈamëm: “Naybyojkpëmaˈxëdë nixim niyam, dëˈën extëm ja Dios oj mbojpëmaˈxëdë miits mët yëˈëgyëjxm ja Kristë” (Éfes. 4:32).

Ko ngäjpxwijëmë wiinkpë o njëjwijtsëmbijtëm, kyaj yëˈë tˈandijy ko kyaj ntsojkëm. Extëm nˈokpëjtakëm, ta näägë tääk teety diˈib tyuundëp ti ja yˈuˈunk tyimˈamdoowdëp nëgooko yaxˈamony. Per nan ta diˈib jyantsy tsyojkypyë yˈuˈunk ets yˈijxypy näˈä mbäät mëk tyanë. Nanduˈun jyaty mëdë Jyobaa, oy yëˈëjëty tuˈugë Dios diˈib tsojkp, “jyëjwijtsëmbijtypy diˈibë yëˈë tsyejpy” (Eb. 12:6). Pääty ko pën njëjwijtsëmbijtëm, yëˈë yˈandijpy ko ntsojkëm (Prov. 3:11, 12). Per nˈokjamyajtsëm ko niˈamukë pokyjyaˈay nyajpatëm ets ko näˈäty kyaj nyaˈijxëmë tsojkën. Pääty niˈamukë mbäät nbëjkëmë kuentë mä xytyëgoyˈäjtxëm nyajnigëxëˈkëm ja tsojkën. Min nˈokˈijxëm tëgëk pëky.

Myëduˈuk. Nˈokˈamdoˈowëmë Dios parë xymyoˈoyëmë espiritë santë. Jesus jyënany: “Ja mDeetyë tsäjpotmëdë [tyuknigaxëp] yëˈë espiritë santë diˈibë amdoojëdëp” (Luk. 11:13). Pën nˈamdoˈowëmë espiritë santë ets nduˈunëmë mëjääw parë njukyˈäjtën extëm xytyuˈumoˈoyëm, nëjkxëp niˈigyë nyajnigëxëˈkëmë tsojkën (Gal. 5:16). Extëm nˈokpëjtakëm, yëˈë mëjjäˈäytyëjk diˈib mä tuˈukmujkën mbäät tˈamdowdë espiritë santë parë tˈyaktëdë ëwij käjpxwijën mëdë tsojkën. Nanduˈunë tääk teety, mbäät tˈamdowdë espiritë santë parë tjëjwijtsëmbittëdë yˈuˈunk yˈënäˈk mëdë tsojkën ets kyaj mëdë awäˈänˈat.

Myëmajtsk. Nˈokpawinmäˈäyëm wiˈixë Jesus tˈyajnigëxëˈkyë tsojkën axtë mä axëëk yajtuuny (1 Peed. 2:21, 23). Mbäät xypyudëjkëmë yˈijxpajtën ko pën axëëk xyyajnayjäˈäwëm o ko kyayajtunëdë ndëyˈäjtënˈäjtëm. Ko duˈumbë jotmay nbatëm oy ko nnayajtëˈëwëm: “¿Tixyëbë Jesus tyuun?”. Leigh, duˈun nyayajtëëwë parë jawyiin twinmääy mä tijaty tkatunyëm. Yëˈë jyënaˈany: “Mëkëts njäˈäwë ko tëgok ja kiixy diˈibëtsë nety mëët nduny, ttuknigejxyë korree wiinkpëtsë nmëguˈuktëjk mäts axëëk xynyimaytyaky ets wiˈixëts nduny nmëdoy. Per tats nnayajtëëwë: ¿Tixyëbë Jesus tyuun? Kots duˈun nwinmääy, tats njënany ko kyajts nmëjpëjtäˈägäˈänyë tyäˈädë jotmay ets waˈan duˈunyë tnaxy. Ok, tats nnijäˈäwë ko ja kiixy, të nety mëkë yuu päˈäm tˈyajnaxy ets myëmääy myëdajpyë nety. Tats njaygyujkë ko kyajts duˈun xynyimaytyaky mët kots axëëk xyyajwëˈëmäˈäny. Kots nbawinmääy wiˈixë Jesus tˈyaˈijxë tsojkën axtë mä yaˈˈaxëktuuny, yëˈëts xypyudëjkë parëts tijaty nanduˈun ndunët ets ndukˈixëdëts ja nmëguˈuk ko ntsojkypyëts”. Pën nbanëjkxëm ja Jesusë yˈijxpajtën, ta xëmë nyajnigëxëˈëgäˈänëm ko ntsojkëmë nmëguˈukˈäjtëm.

Myëdëgëëk. Tsojkëp nnayojxëm parë nbudëjkëmë wiinkpë. Ko nyajnigëxëˈkëmë duˈumbë tsojkën, yëˈë yajtukˈijxwëˈëmëm ko jantsy Dios mëduˈunëm (Fwank 13:34, 35). Biiblyë duˈun xyˈanmäˈäyëm:  “[Mmëdattë] ja mjot mwinmäˈäny extëm tmëdäjty ja Nintsënˈäjtëm Jesukristë”. Ko Jesus kyëdaky yä Naxwiiny, myastutääy tukëˈëyë tijatyë nety myëdäjtypyë tsäjpotm, ets axtë ojts xykyuˈoˈkëm (Filip. 2:5-8). Pën nyaˈijxëmë tsojkën extëmë Jesus ets nnayojxëm, ta nmëdatäˈänëm ja jot winmäˈäny extëm yëˈë ets jayëjp nmëmäˈäy nmëdäjëm ja nmëguˈukˈäjtëm ets ok ëtsäjtëm. ¿Wiˈix ndukˈoyˈäjtëm ko nyajmëjwindëjkëmë tsojkën?

Kanäk pëky ndukˈoyˈäjtëm ko nyajnigëxëˈkëmë tsojkën. Min jeˈeyë nˈokˈijxëm majtsk pëky.

• NMËDÄJTËMË NMËGUˈUKˈÄJTËM ABËTSEMY NYAXWYINYËDË. Kom nnaytsyojkëm nixim niyam, nnijäˈäwëm ko tsuj yajxon xyˈaxäjëyäˈänëmë nmëguˈukˈäjtëm oytyim määjëty. Nmëjjäˈäw ngunuˈkxyjäˈäwëm ko xytsyojkëmë nmëguˈukˈäjtëm abëtsemy nyaxwinyëdë (1 Peed. 5:9). Duˈumbë tsojkën japyë yajpääty mä Diosë kyäjpn.

• TUˈUGYË NYAJPATËM: Mbäät tuˈugyë nyajpatëm ko nnaymyëmaˈkxtujkëm nixim niyam mëdë tsojkën (Éfes. 4:2, 3). Niˈamukë nˈijxëm wiˈix tuˈugyë nyajpatëm mä reunyonk ets mä asamblee. Nimää kyajaˈˈatyë duˈumbë tuˈugyëˈäjtën, pes tyamë naxwinyëdë jäˈäy të nyaywyäˈkxëdë (Sal. 119:165; Is. 54:13). Ko nduˈunëmë mëjääw parë oy nˈijtëm mëdë nmëguˈukˈäjtëm, ta nyajnigëxëˈkëm ko mëk ntsojkëm ets nan jotkujk nyajnayjäˈäwëmë nDeetyˈäjtëmë Jyobaa (Sal. 133:1-3; Mat. 5:9).

Pablo jyënany: “Yëˈëkyëjxm ja jaˈay tuˈukyë yˈitë ko nyäytsyokëtë” (Col. 3:14, Tios yˈaaw yˈayuk). ¿Wiˈix xypyudëjkëmë tsojkën parë tuˈugyë nˈijtëm? Pablo nyimaytyak mä primera a los Corintios kapitulo 13. Jyënany ko ja diˈibë myëdäjtypyë tsojkën, yëˈë yˈëxtaapy ti wiinkpë tyukˈoyˈatëp (1 Kor. 10:24; 13:5). Ets kom nan maˈkxtujkp, oyjyaˈay ets ajiiky amëguˈuk, ta tuˈugyë yˈittë mä fyamilyë ets agujk jotkujk, ets mä tuˈukmujkën japˈäjtpë tuˈugyëˈäjtën.

Ta kanäk pëky wiˈix mbäät nyajnigëxëˈkëm ko ntsojkëmë nmëguˈukˈäjtëm, per ko ntsojkëmë Dios yëˈë diˈib mas niˈigyë oy. Ko nmëdäjtëmë tsojkën, ta tuˈugyë ets agujk jotkujk nmëduˈunëmë Jyobaa oy mä ntsoˈonëm, oy wiink ayuk ngäjpxëm ets oy wiˈix nˈixˈäjtëm (Sof. 3:9). Nˈoktuˈunëmë mëjääw parë tuˈuk tuˈugë xëëw nyajnigëxëˈkëmë tsojkën diˈib tuk pëky yajkypyë Diosë myëjääw.