MËBËJKËN, mbäät xymyoˈoyëm mëjwiin kajaa mëjääw. Extëm nˈokpëjtakëm, oyë Satanás xyjyayaˈoogäˈänëm Dios windum, kyaj xyyaˈoˈkëm, pes mëdë mëbëjkën nyaˈˈadujkëm “ja jëëndiˈpxn diˈibë ja kaˈoybyë nyasmäjtsëp” mä ëtsäjtëm (Éfes. 6:16). Mëbëjkën, nan mbäät xypyudëjkëm parë nwinguwäˈkëmë amay jotmayë mëjwiin kajaabë diˈib duˈun extëmë tun kopk. Jesus tˈanmääy ja yˈëxpëjkpëty: “Kooxyëp xymyëdattë ja mëbëjkën, oy dëˈënën jeˈeyë extëmë mortas päjk, mˈanmaapxyëp miitsëty tyäˈädë kopk: Jëgaˈak yää es nëjx wiinktsoo, es jëgakpxyëp” (Mat. 17:20). Mëbëjkën, mbäät xypyudëjkëm parë oy nˈijtëm mëdë Dios, pääty oy ko nnijäˈäwëm: ¿Ti yˈandijpy mëbëjkën? ¿Wiˈix mbäädë jot korasoon nmëdäjtëm parë nyajnigëxëˈkëmë mëbëjkën? ¿Wiˈix mbäät mas niˈigyë nyajkëktëjkëm? Ets ¿tidaa ko mbäät nmëbëjkëmë Dios? (Rom. 4:3).

Mëbëjkën, kyaj yëˈë jeˈeyë tˈandijy njënäˈänëm ko tëyˈäjtën tijatyë Biiblyë tukniˈˈijxëp, pes axtë Mëjkuˈudëjk myëbëjktëp “ko jyamëty ja Dios, es axtë tsëyëëytyëp mët ja tsëˈëgë” (Sant. 2:19). Pääty, ¿tidën yˈandijpy mëbëjkën?

Ko Biiblyë tkäjpxwäˈätsy tidën yˈandijpy mëbëjkën, majtsk pëky tnimaytyaˈaky. Myëduk pëky, jyënaˈany ko “mëbëjkën yëˈë diˈib seguurë xyyaˈijtëm mä diˈib nˈawijx njëjpˈijxëm” (Heb. 11:1a, TNM). Pën nmëdäjtëmë mëbëjkën, ta nˈijtëm seguurë ko tukëˈëyë diˈibë Jyobaa nyigajpxy tëyˈäjtën ets ko kyuytyunaampy. Extëm nˈokpëjtakëm, Jyobaa duˈun tˈanmääy ja israelitëty: “Tsip ets yˈatëkoyëty ja käjpxytyuˈunën mëtiˈipës të ntunyën mëët ja xëënyˈäjtën ets ja kootsäjtën, jëtuˈun ijxtëm yajˈëwxityën jënaˈa xyiinyë ets kyootsën. Timjëtuˈun yajˈëwxity jënaˈa tyunyë jyatyëtyë ja käjpxytyuˈunën mëtiˈipës ntuunën mëët ja ntuunpës David” (Jer. 33:20, 21, TY). ¿Këdii seguurë mˈity ko Xëëw pyëtsëmäˈäny ets ko tyëkëyaˈany, ets ko duˈunyëm jyaˈˈatäˈänyë xëënyˈat etsë kootsˈat? Pën mijts mˈijtp seguurë ko Xëëw pyëtsëmäˈäny ets yˈanäˈäny tuk xëëw, ¿tiko net mˈamajtsk mjotmajtskët ko Dios tkakuytyunët tukëˈëyë diˈib të twandaˈaky? (Is. 55:10, 11; Mat. 5:18).

Myëmajtsk pëky, mëbëjkën yëˈë yˈandijpy “mä nyigëxëˈëky diˈib xytyukmëbëjkëm ko jantsy tëyˈäjtën diˈib kyaj nˈijxëm” (Heb. 11:1b TNM). Min nˈokˈijxëm tuˈugë ijxpajtën. Tuˈugë mixyuˈunk xyyajtëˈëwëm tiko nnijäˈäwëm ko jantsy taaˈäjtpë poj. Oy ninäˈänëm ngaˈijxëm wiˈixën yˈixëtyë poj, mbäät ndukjaygyujkëm ko jantsy taaˈäjtp mët ko yajmëdoop yˈamuˈuy ets dyajˈyuˈkxyë ääts ujts. Ja mixyuˈunk, mbäädë net tmëbëky oy tkaˈixy mët ko duˈun të yajtukmëtmaytyaˈaky. Nanduˈun jyaty mëdë mëbëjkën, nigëxëˈkp yajxon (Rom. 1:20).

Parë nmëdäjtëmë mëbëjkën, tsojkëp nˈijxëm tiko nmëbëjkëm. Pääty, tsojkëp jawyiin njaygyujkëm “diˈibë dëˈën tëyˈäjtën” (1 Tim. 2:4). Per kyaj jeˈeyë tsyokyëty nnijäˈäwëm ja tëyˈäjtën, pesë apostëlë Pablo tkujäˈäyë ets “mëdë njotˈäjt nwinmäˈänyˈäjtëm nmëbëjkëm” (Rom. 10:10). Per nan jëjpˈam nyajtsobatëm ja tëyˈäjtën, net nyajnigëxëˈkëm ja mëbëjkën, o ja tuk  pëky njënäˈänëm, ndukjukyˈäjtëm ja tëyˈäjtën (Sant. 2:20). Ko tuˈugë jäˈäy tkayajtsobääty ja tëyˈäjtën, mbäät tjëjpkudijë ko jyayajtukˈixy tiko tmëbëkët mët ko kyaj dyajtëgatsäˈäny tijaty myëbëjkypy o mët ko ttunäˈäny ti yëˈë tyim tsojkypy (2 Peed. 3:3, 4; Juud. 18). Pääty ja jäˈäy diˈib jukyˈäjttë tëëyëp, kyaj niˈamukë tpëjtaktë mëbëjkën oy tjaˈijxtë ja miläägrë (Núm. 14:11; Fwank 12:37). Pën ntsojkëm ja tëyˈäjtën ets nˈaxëkˈijxëm ja naywyinˈëënë, ta Diosë myëjääw xypyudëkëyäˈänëm parë nmëdäjtëmë mëbëjkën (Gál. 5:22, TNM; 2 Tes. 2:10, 11).

Niduˈugë Dios mëduumbë diˈib mëkë mëbëjkën yaˈijxë, yëˈë rey David (Eb. 11:32, 33). Per kyaj niˈamukë fyamilyë duˈun dyajnigëxëˈktë ja myëbëjkën. Extëm nˈokpëjtakëm, ja yˈajtsy Eliab, kyaj dyaˈijxë mëbëjkën ko ojts yˈooyëty ets yˈanmääyë ko kyajxyëp tiko nety jap të kyëdaˈaky mä ja Goliat tnëxiˈiky ttukxiˈiky ja Diosë kyäjpn (1 Sam. 17:26-28). Nipën tkamëmaxuˈunkˈatë mëbëjkën ets ni kyatukninaxyëtyë tyääk teety. Pääty ko David tmëdäjtyë mëbëjkën, yëˈë duˈun ko nyaymyaayë mëdë Jyobaa.

Mä Salmo 27, japë David tnimaytyaky ti pudëjkë parë mëkë mëbëjkën tmëdäjty (bersikulo 1). Pyawinmääy wiˈixë nety të jyukyˈaty ets wiˈixë nety të jyat të kyëbattë pënaty mëtsipˈäjtëdëp (bersikulo 2 etsë 3). Mëjwiin kajaa dyajtsobatyë Jyobaa tyëjk (bersikulo 4) ets jap tˈawdäjty mët ja israelitëty (bersikulo 6). Yˈëxtääy mëktaˈaky parë Jyobaa nyëˈëmoˈoy tyuˈumoˈoyëdët ko tmënuˈkxtaky (bersikulo 7 etsë 8). Ets nan tsyojk parë Jyobaa tyukniˈˈixëdët ja nyëˈë tyuˈu (bersikulo 11). David pyëjkë kuentë ko jëjpˈamë nety tmëdatëdë mëbëjkën, pääty nyayajtëëwë ko wiˈixxyëp yajpaty koxyëp tkamëdäjtyë mëbëjkën (bersikulo 13).

Mbäät nmëdäjtëmë mëbëjkën extëmë David, pën jäˈäyˈäjtëm extëm yëˈë ets pën nmëdäjtëm ja kostumbrë extëm yajmaytyaˈaky mä Salmo 27. Ko nnijäˈäwëm ja tëyˈäjtën, ta nmëdäjtëm ja mëbëjkën, pääty pën niˈigyë nˈëxpëjkëmë Diosë yˈAyuk ets ja ëxpëjkpajn, ta kyaj xytsyiptäˈägäˈänxëm nyajnigëxëˈkëmë mëbëjkën, diˈib yajkypyë Diosë myëjääw (Sal. 1:2, 3). Ko njuˈtëmë tiempë parë nbawinmäˈäyëm diˈib nˈëxpëjkëm, ta mas niˈigyë nmëjjawëyäˈänëmë Jyobaa, ets ko mas niˈigyë nmëjjäˈäwëm, ta nyajnigëxëˈkëm ja mëbëjkën. ¿Wiˈix? Ko nˈawdäjtëm mä nduˈukmujkëm ets ko ndukmëtmaytyakëmë jäˈäy tijaty nˈawijx njëjpˈijxëm (Eb. 10:23-25). Nan nyajnigëxëˈkëmë mëbëjkën, ko duˈunyëm nnuˈkxtakëm ets ko kyaj nˈëxtëkëwäˈkëm (Luk. 18:1-8). Pääty, nˈokmënuˈkxtakëmë Jyobaa janääm jatsojk ets nˈokˈijtëm seguurë ko xymyëmäˈäy xymyëdäjëm (1 Tes. 5:17; 1 Peed. 5:7). Ko nmëdäjtëmë mëbëjkën, ta nduˈunëm diˈib oy, ets ko nduˈunëm diˈib oy, ta niˈigyë kyëktëkë ja mëbëjkën (Sant. 2:22).

Jakumbomë netyë Jesus yˈooganë ko tˈanmääy ja yˈëxpëjkpëty: “Mëpëktë ja Tios Teety ets [...] ëjts näyjyëtuˈun” (Juan 14:1, TY). Tsojkëp nmëbëjkëmë Jesus, kyaj yëˈëyëtyë Jyobaa. ¿Wiˈix? Min nˈokˈijxëm tëgëk pëky wiˈix mbäät nduˈunëm.

Tuk pëky, nˈokˈijxëm niduˈuk niduˈuk extëm tuˈugë regalë diˈibë Jyobaa të xymyoˈoyëm ko Jesus ojts xykyuˈoˈkëm. Apostëlë Pablo jyënany: “Ja juukyajtën mëtiˈipës ja nniniˈkx tyukˈoyˈäjtypyën, pääty jyuukyˈäty jäˈäs ko nmëpëky ja Tios ja yˈUˈunk, mëtiˈipës të xytsyokyën etsëts të xykyuˈooktë” (Gál. 2:20, TY). Ndukˈoyˈäjtëm ko nmëbëjkëmë Jesus, pes mët yëˈëgyëjxm yajmeˈkxyë poky kaytyey, nyaˈˈawäˈänëm ja jukyˈäjtën winë xëëbë ets ko duˈunë Jyobaa xytyukˈijxëm ko mëjwiin kajaa xytsyojkëm (Rom. 8:32, 38, 39; Éfes. 1:7). Pën njantsy myëbëjkëm ko Jesus ojts xykyuˈoˈkëm, ta kyaj ti xynyekyˈatsijpëm mä jot winmäˈäny ets wäˈäts nnayjyäˈäwëm Dios windum (2 Tes. 2:16, 17).

Myëmajtsk pëky, mbäät nmëwingoˈonëmë Jyobaa ko nmënuˈkxtakëm mët yëˈëgyëjxm ko Jesus ojts xykyuˈoˈkëm. Mbäät nmënuˈkxtakëmë Jyobaa “mët ko nnijäˈäm ko yëˈë xymyoˈoyäˈänëm ja paˈˈayoˈon, es myayˈäjtëngyëjxm xypyudëkëyäˈänëm mä ëtsäjtëm xytyëgoyˈäjtxëm” (Eb. 4:15, 16; 10:19-22). Ko nnuˈkxtakëm, nan xypyudëjkëm parë winmäˈäny nbëjtakëm ets niwiˈixtsoo ngapokytyuˈunëm (Luk. 22:40).

Myëdëgëk pëky, nmëmëdoˈowëmë Jesus. Apostëlë Juan tkujäˈäyë: “Ja diˈib myëbëjkypy ja Diosë yˈUˈunk, myëdäjtypy ja jukyˈäjtënë winë xëëbë; per diˈib kyaj tmëmëdoy ja Diosë yˈUˈunk, kyaj tˈixäˈäny ja jukyˈäjtën, yëˈëyë ja Diosë tsyip yˈakë ijtp mä tyäˈädë jäˈäy” (Juan 3:36, TNM). Apostëlë Juan yëˈë yä myaytyak wiˈix tyëgatsyëty ko jäˈäy tmëdatyë mëbëjkën ets ko tkamëmëdoyë Jesus. Pääty ko nmëbëjkëm, nmëmëdoˈowëmë nety. Ets ¿ti yˈandijpy nmëmëdoˈowëm “ja Kristë yˈanaˈamën”? Yëˈë yˈandijpy tukëˈëyë diˈib tukniˈˈijxë ets diˈib ojts tniˈanaˈamë. Nan nmëmëdoˈowëm ko nbanëjkxëm wiˈix xynyëˈëmoˈoy xytyuˈumoˈoyëm ja tuumbë diˈib kuwijy (Mat. 24:45). Pën nduˈunëm ti Jesus xytyukˈanaˈamëm, ta nëjkx nmëmadakëm ja amay jotmay diˈib duˈun ta mëk poj tuujën (Mat. 7:24, 25).

Tëgok, duˈunë Jesus yˈanmääyë tuˈugë yetyëjk: “¡Nmëbejkypyëts! ¡Pudëjkëgëts esëts nˈakmëbëkët niˈigyë!” (Mar. 9:24). Tyäˈädë yetyëjk myëdäjtypyë nety waanë mëbëjkën, per yajnigëxëˈkë yujyˈat tudaˈakyˈat ets jënan ko yˈakˈyajtëgoyˈajtypy. Niˈamukë ëtsäjtëm, nbatëmë amay jotmay mä nyajtëgoyˈäjtëm mas niˈigyë mëbëjkën, päätyën tsyokyëty ets desde tyam niˈigyë nyajkëktëjkëm. Extëm të nˈijxëm, tsojkëp ngäjpxëmë Diosë yˈAyuk ets nbawinmäˈäyëm, ko duˈun nduˈunëm, ta mas niˈigyë nmëjjawëyäˈänëmë Jyobaa. Ja mëbëjkën nan mas niˈigyë kyëktëkëyaˈany ko tuˈugyë nˈawdäjtëmë Jyobaa mëdë nmëguˈukˈäjtëm, ko nigäjpx nimaytyakëm tijaty nˈawijx njëjpˈijxëm ets ko xëmë nnuˈkxtakëm. Pën nyajkëktëjkëm duˈunë mëbëjkën, ta nëjkx nˈaxäjëm mëjwiin kajaa kunuˈkxën, ko nnayaˈijtëm mä Diosë tsyojkën (Juud. 20, 21).