Winston, oktukmëtmaytyaktëgëts wiˈix xyˈëxtääytsyondakyë Dios.

Japëts nˈyeˈky nbejty Queensland (Australia), ja nfamilyëts kyaj nety ttukˈitëdë nituˈugë relijyonk. Kom kamotyëts ijty ntsëënëdë, kyajts nëgoo mëdë jäˈäy naybyat nayˈijxë, yëˈëyëts mëët nyajpaty ja nfamilyë. Kotsë njëmëjt 12, tats nˈëxtääytsyondakyë Dios. Nmënuˈkxtakëts parëts xytyuknijawëdë tyëyˈäjtën. Ok, tats ojts ntsoˈonë etsëts nbatyë nduunk Adelaida (Australia Meridional). Ets jatsë netyë njëmëjt 21 kots nˈixyˈajtyë Pam, japëtsë nety nbakasyonkˈaty Sydney, tats xytyukmëtmaytyaky tuˈugë relijyonk diˈib naytyijëdëp israelismo británico, diˈib jënandëp ko ja jäˈäyëty diˈib Gran Bretaña jam tsyoˈondë mä ja mäjkpë tyëëm yˈäätsë Israel diˈib yajpat mä ja anaˈamdaknë anikëjxytsyoowbë ets mä jëmëjt 740 mä kyajnëm myinyë Jesus, ja ojts yajmënëjkxtë extëmë tsumyjyaˈay. Kots njëmbijty Adelaida, tats ndukmëtmaytyaky ja diˈibëtsë nety mëët nduny, yëˈë të nety tyëkë ëxpëjkpë mëdë Jyobaa tyestiigëty. Kotsë nety të nmaytyäˈäktë tuk oorë majtsk oorë, tats nbëjkyë kuentë ko yëˈë nety yaˈˈatsoowëmbijtp ja nuˈkxtakën diˈibëts nduun kots nmutskˈäjty. Yëˈëtsë nety jam nnijäˈäwëp ja tëyˈäjtën mä pënëtsën të xyyajkojy ets ja yˈAnaˈam Kyutujkën. ¡Tëtsë nety nbääty ja “perlë” diˈib tsobatp mëjwiin kajaa! (Mat. 13:45, 46).

Pam, mijts nan mˈëxtääytsyondakë Dios mä nety mˈënäˈkˈaty. ¿Wiˈix ojts xypyaaty?

Japëts nˈyeˈky nbejty Coffs Harbour (Nueva Gales del Sur), ja nfamilyëts tyukˈijtëdëbë netyë relijyonk. Ja ndääk ndeetyëts ets ja nanwelë ndatwelëtyëts, yëˈë kyupëjktë tijaty tukniˈˈijxëdëbë israelismo británico. Niˈamukëts nyajtukniˈˈijxëdë, ja nˈutsyëts, ja ntsëˈëjëts etsëts ja nbrimëtëjk ko Dios yëˈëyë kyupëjkypy ja tyëëm yˈäätsë jäˈäy diˈib tsoˈondëp Gran Bretaña. Per kyajts  ndukjotkëdaky tijatyë nety tukniˈˈijxëdëp ets nan kyajts nnayjyäˈäwë wingon mä Dios. Kotsë njëmëjt 14, ojtsëts mä kanäägë relijyonk extëm mä Iglesia anglicana, Bautistë ets mä Adbentistë. Per kyajts xypyudëjkëdë parëts nˈixyˈatëdë Dios.

Ko tiempë nyajxy, tatsë nfamilyë ojts nyëjkxnëdë tsënaabyë Sydney, jamëts nˈixyˈajtyë Winston, yëˈë bakasyonkˈäjtpë nety të jyaˈty. Extëmë Winston të jyënaˈany, kots nimaytyaktë relijyonk, ja mä tˈëxpëjktsondakyë Biiblyë mëdë Jyobaa tyestiigëty. Ets kots ijty xytyuknigexyë neky, mayë tekstë tjantsy kyujayë. Ngupëjkypyëts ko tim ogäˈän, xyjyotmaytyuunëts ets axtë jotˈambëjkëts. Per wanaty wanatyëts nˈijxy ko yëˈë ja tëyˈäjtën.

Mä jëmëjt 1962, tats ojts nëjkxy tsënaabyë Adelaida parëts nyajpäädäˈäny wingon mëdë Winston. Yëˈë të nety tˈanëëmë tuˈugë kasäädë jäˈäy; Thomas mëdë Janice Sloman parëts jam ntsëënët. Yëˈëjëty të nety myisioneerëˈattë Papúa Nueva Guinea, ets jantsy oy jyaˈayˈäjttë mët ëjts. Jatsë nety jeˈeyë njëmëjt 18 kots xypyudëjkëdë parëts mas niˈigyë nˈixyˈatëdë Jyobaa. Tëjkëts nanduˈun ëxpëjkpë ets tim tsojkëts njaygyujkë ko tëtsë nety nbääty ja tëyˈäjtën. Kots nbëjktääy mëdë Winston, tats agujk jotkujk nmëduuntsondaktë Jyobaa. Tëts nyajnaxtë amay jotmay, per extëmëts të njukyˈattë, yëˈëts të xypyudëkëdë parëts mas niˈigyë nyajtsobäättët ja perlë diˈibëts nbattë.

Winston, oktukmëtmaytyaktëgëts wiˈix xyyajtsondaktë Diosë tyuunk.

Kots nbëjktääytyë, Jyobaa yaˈˈawats ja nëˈë tuˈu parëts mas niˈigyë nmëdundët (1 Kor. 16:9). Tyäˈädë tuˈu, yëˈëts xytyukniˈˈijxëdë nmëguˈukˈäjtëm Jack Porter, diˈibë nety tuump sirkuitë ets tkuˈixë ja tuˈukmujkën mätsë nety nˈyoˈoy. ¿Ets mnijäˈäwëdëp? Jack yëˈëts tyam mëët nduny Komitee mä Sukursal diˈib Australasia. Mä tadë tiempë Jack mëdë kyudëjk, Roslyn, xymyëjääwmooytyëts parëts nduundëkëdët prekursoor regulaar, tuˈugë tuunk diˈibëts njantsy tyukxondaktë mëgoxk jëmëjt. Jatsë netyë njëmëjt 29 kots nyaˈˈanmääy parëts ndunët sirkuitë mäjaty it lugäär diˈib yajpatp mejnyˈitkujky Pacífico sur, diˈib nyitënaabyë sukursal diˈib Fiyi. Nguˈijxëdëts ja it lugäär diˈib yajpatp mejnyˈitkujky diˈib Kiribati, Nauru, Niue, Samoa, Samoa Norteamericana, Tokelau, Tonga, Tuvalu ets Vanuatu.

Mä tadë tiempë, näägë jäˈäy diˈibë nety tsënääytyëp mä tyäˈädë it lugäär, tsyëˈkëdëbë Jyobaa tyestiigëty, pääty, tsojkëbëts nety nnaygyuentˈatëdët etsëts nˈix ndundët tijaty (Mat. 10:16). Kyaj nety nëgoo nyimayˈattë ja nmëguˈukˈäjtëm mäjaty ja tuˈukmujkën, ets tam diˈibëts kyaj mbäät xyyajjäjtaktë. Tats ijty nˈamdowdë jäjtakn ja jäˈäy diˈib jam tsënääytyëp, xëmë yˈijttë ajiiky amëguˈuk.

Winston, ¿tiko nëgoo xyˈoktsojkënyëˈäjnë mä yajkäjpxnaxyë ëxpëjkpajn?

Mä tadë tiempë, ja nmëguˈukˈäjtëm diˈib Tonga jeˈeyë nety waanë tmëdattë trataadë, foyetë mä yˈayuk tongano. Ets parë jäˈäy dyaˈëxpëktë, yëˈë nety yajtuundëbë liibrë La verdad que lleva a vida eterna diˈib inglés. Pääty nidëgëëgë nmëguˈukˈäjtëm jyënandë diˈib wanaty jyaygyujkëdëbë inglés ko tkäjpxnaxäˈändë tyäˈädë liibrë mä ayuk tongano, mientrës jyeky taxk sëmään ja Eskuelë parë mëjjäˈäytyëjk. Pam, yëˈë diˈib jyaaynyäjx mä makinë, ets ok, tats ngajxtë mä Betel diˈib Estados Unidos parë dyajpëtsëmdët ja liibrë. Ja ttuunkˈäjttë naa tuktujk sëmäänën. Kyaj nëgoo tyimˈoyëty extëm yajkäjpxnäjxy, per pudëjkëdë jäˈäy diˈib kyäjpxtëbë tongano parë tnijäˈäwëdë tëyˈäjtën. Ëjts mëdë Pam kyajts ngäjpxnaxtë ëxpëjkpajn, per ntsojkënyëˈäjttëbëtsë tyäˈädë tuunk mët kots duˈun nˈijxtë.

Pam, ¿wiˈix tyëgatsyëtyë jukyˈäjtënë Australia mëdë it lugäär diˈib yajpatp mejny itkujky?

Tim tëgatsy. Pes wiˈixëm ja it lugäär, tam mä duˈunyë tsukts pyidijnë, mä jyantsy yˈany, mä pojën tijaty nyijkëˈëky, mä jyamëtyë tsuk, päˈäm ets näˈäty kyajts nëgoo nmëdäjttë käˈäy ukën. Per oy yˈokduˈunëty, ko tsyuˈujënë tats ijty nˈixtë ja mejny desde mä tuˈugë mëëytyëjk patwäˈäts. Ets ko jyantsy pyoˈany, tats nˈixtë wiˈix yˈaˈˈapkë ja  kokë kepy ets wiˈix ja Poˈo kyuˈanë mä ja mejny. Tukëˈëyë tyäˈädë xypyudëjkëdëts parëts nbawinmaytyët, nuˈkxtäˈäktët ets en lugäärëts nwinmaytyët tëgatsyaty, yëˈëts nwinmääytyë diˈib oy.

Njantsy yˈoyˈijxtëbëts ijtyë ënäˈkuˈunk. Ko ijty tˈixtë jäˈtjäˈäy diˈib weerë, nëgooyë tˈixanëdë ets tniˈˈijx tkuˈijxnëdë. Kots tëgok nˈojtstë Niue, ta tuˈugë mixyuˈunk ojts ttoonë ja kyëˈëjë Winston, ets tˈanmääy: “Nˈoyˈijxypyëtsë mnijëmk”. Tyäˈädë mixyuˈunk ninäˈänëmë nety tkaˈixyë këwääy diˈib uˈkxypyënaanë ets pääty kyaj tnijäˈäwë wiˈix ttijjët.

Nbaˈˈayoowdëtsë jäˈäy kots nˈijxtë ko kyaj ti myeeny syentääbëty. Jantsy oy ja it lugäär, per kyaj nëgoo ti ääy tsooy ets nan kyaj nëgoo ti nëë. Per ja nmëguˈukˈäjtëm duˈun ijty kyëxëˈëktë ko kyaj tmëmay tmëdäjtë, pes duˈunën jyukyˈattë. Agujk jotkujk ijty nyayjyawëdë mët ko yajpäättë mëdë fyamilyë, ko tmëdattë tuˈugë lugäär mä tˈawdattë Jyobaa ets ko mbäät tmëjkumaytyë. Kots duˈun nˈijxtë, yëˈëts xypyudëjkëdë parëtsë njot nwinmäˈäny nbëjtaktë mä diˈib jëjpˈam ets parëts adëyë njukyˈäjttë.

Pam, mijts kyaj nety duˈun të xyˈijxwëˈëmy, per ¿wiˈix ijty mnëjkxy nëgoombë ets xyyaˈoyë mgaaky mdojkx?

Nmëjjäˈäwëbëts kotsë ndeety xytyukniˈˈijxë tijatyëts mbäät xytyuˈunxë, extëm nyajmëjjëdëtsë jëën etsëts jam ja kaaky tojkx nyaˈoyët, etsëts njatët nyajtunët diˈibëts yiˈin waanë nmëdäjtypy. Tëgok, kots ojts nëjkxtë Kiribati, japëts ojts nˈittë mä tuˈugë mëëytyëjk diˈib tsäjpkapynynyawëëty, ets ja tëgot yëˈë wyingoˈojëˈäjtypyë coral. Ndäjëts tuˈugë jëndoytyakn ets yëˈëts njäˈäxyˈäjttë kokë ak. Ets kots ijty nëjkxy nëgoombë, tats naywyäätswitsyëty mä ja toxytyëjk të nyaywyääbëdë. Yëˈë ijty yajtuundëp tuˈugë kepy diˈib yeny naa majtsk metrën, ets jam tkëxtsumdë tuˈugë pujxnduˈts, duˈun extëm tuˈugë jäˈäy yˈäjkxmatsy, ta nyaxtë tuˈuk tuˈuk ja toxytyëjk, tkujëduwëdë jap ja pyujxnduˈts ets ta dyaˈutstë. Duˈunëts nˈijxy ko kyaj jyawë tsyipëty, per kots xytyukjäjty, kanäkˈokëts jap ngujëduˈuwë, per kyajts ja nduˈts nyekyˈujtsy, jeˈeyë kyëniinëˈknë. Ko duˈun tˈijxtë, ta niˈamukë tyëjkëdë xikpë, kots xyˈoktukxiktääytyë, tats niduˈuk xytyukniˈˈijxë. Ja jäˈäyëty diˈib tsënääytyëp mä tyäˈädë lugäär xëmëts xypyudëjkëdë ets yˈijttë ajiiky amëguˈuk.

Nimajtsk mjantsy tyukxondaktë Diosë tyuunk mäjatyë tyäˈädë it lugäär. Oktukmëtmaytyaktëgëts ti mas mjamyajtstëp.

Winston: Tam ja kyostumbrë diˈibëts kyaj netyë njaygyujkëdë. Extëm nˈokpëjtakëm, kots ijty xyyajkaytyë ja nmëguˈukˈäjtëm nyaskëˈëyëtyaaytyëp ja kaaky tojkx, per ëëtsëty, kyajtsë nety nnijawëdë ko tsojkëbëts nyajwëˈëmdët parë yëˈëjëty, tats ndojkxtääytyë. Kots nnijäˈäwëdë, tats ojts nyajwëˈëmnëdë ja kaaky tojkx. Per oyëts duˈun nˈadëtstë, ja nmëguˈukˈäjtëm jyaygyujkëdë. Xyjantsy yˈawijx xyjantsy jyëjpˈijxtëbëts ijty mäts nguˈixëdët windëdujk poˈojëty. Mä tadë tiempë, ëëtsëty jeˈeyë ja Testiigëty diˈib mëët tyuˈukmuktë.

Nan oy ja jäˈäy tˈijxtë mäjaty ja nax käjpn kots nguˈijxëdë ja nmëguˈukˈäjtëm. Pes nimay duˈunë nety wyinmaytyë ko yëˈë ja nmëguˈukˈäjtëm të dyajnaxkëdäˈäktë ryelijyonk. Per kots ijty ja jäˈäy xyˈixtë njäˈttë mëdëtsë ngudëjk ets ntsoondëts wiink paˈis, ta tjaygyujkëdë ko yëˈë tuˈugë relijyonk diˈib yajpatp abëtsemy nyaxwinyëdë ets duˈunyë ijty wyëˈëmëdë.

Pam: Diˈibëts mas niˈigyë njamyejtsypy, yëˈë ti tëgok tuun jäjtë Kiribati, mä nety jantsy niwaanë nmëguˈukˈäjtëm. Itinikai Matera yëˈëyë nety naytyuˈuk diˈib tuump mëjjäˈäy, tyäˈädë nmëguˈukˈäjtëm xëmëts oy xyyajnayjyäˈäwëdë. Tëgok, ta tmëmiiny katsyoty tuˈugë këtseytsyää etsëts xyˈanmääytyë: “Tyäˈädë mijts nmoˈoyandëp”. Mä tadë tiempë, tëgokëjxm ijtyë jäˈäy ttukkayë këtseytsyää. Amutskˈäjtëtsë nˈääw njot ko duˈunë tyäˈädë nmëguˈukˈäjtëm yˈoyjyaˈaytyaky.

Pam, ko nyajxyë tiempë, ta yˈoˈky ja uˈunk diˈibë nety mnikëjxmˈäjtypy. ¿Ti mbudëjkë parë xywyinguwäˈkë tyäˈädë jotmay?

Mä jëmëjt 1973, japëtsë nety nˈittë Pacífico sur kots nnijäˈäwë ko uˈunkmëëdëts. Tats  nduknibëjtakëdë njëmbitäˈändë Australia, ets kyum mäjtaxk poˈo, tats ja nˈuˈunguˈunk yˈoˈky. Mëkëts njantsy jyäˈäwëdë mëdë Winston. Ko tiempë nyajxy, kyajts nëgoo nekyjyäˈäwëdë ja jäj jëmuˈumën, per ninäˈä kyajëgaktääy, jaanëm kots ojts ngäjpxtë La Atalaya 15 äämbë abril 2009, mä myiinyë “Preguntas de los lectores” diˈib jënan: “Si una criatura muere en el vientre materno, ¿volverá a la vida en la resurrección?”. Tyäˈädë artikulo jyënany ko ja uˈungë jyukyˈäjtën Jyobaa kyëjoty yˈity ets ko yëˈë xëmë ttuny diˈib oy. Yëˈë yajjëgaˈagaampy tukëˈëyë jäj jëmuˈumën diˈib nbatëm yä naxwiiny, pesë Jyobaa të ttuknipëkyë yˈUˈunk parë dyajkutëgooytyaˈayët “diˈibë ja mëjkuˈugopk tyiimpy” (1 Fwank 3:8). Tyäˈädë artikulo nan mëjwiin kajaajëts xypyudëjkëdë parëts mas niˈigyë nyajtsobäättët ja perlë diˈib nmëdäjtëm extëmë Dios mëduumbë. ¡Pes wiˈixxyëp nyaˈijx nyajpatëm koxyëp ngaˈˈawijx ngajëjpˈijxëm ja jotkujkˈäjtën diˈib yajminaampy ja Diosë yˈAnaˈam Kyutujkën!

Ok, tats jatëgok nduundëjkëdë prekursoor. Ojtsëts nanduˈun waanë ndundë mä Betel diˈib Australia, ets ok, tats jatëgok nyajwoowdë parëts ndundët sirkuitë. Mä jëmëjt 1981, mätsë nety të ndundë taxk jëmëjt Nueva Gales del Sur ets Sydney, tats jatëgok nyajwoowdë mä Betel diˈib Australia, duˈun ijty yajtijy ets axtë tyambäät yapëts ndundë.

Winston, ¿mjënäˈänëp ko tijaty mjäjt mä nax käjpn diˈib yajpatp mejny itkujky diˈib mä Pacífico sur mbudëjkëp mä mduny Komitee diˈib mä Sukursal diˈib Australasia?

Xypyudëjkëbëts mëjwiin kajaa. Australia yëˈë ijty nyikëjxmˈäjtypy parë tˈixët ja Diosë tyuunk jap Samoa ets Samoa Norteamericana. Ok, ta Betel diˈib Nueva Zelanda yaˈˈawijtsmujky mëdë Betel diˈib Australia. Per tyam ja Betel diˈib Australasia, yëˈë diˈib yˈijxypy wiˈix yajtunyë Diosë tyuunk jap Australia, mä yˈit lyugäärë Cook, Niue, Nueva Zelanda, Samoa, Samoa Norteamericana, Timor Oriental, Tokelau etsë Tonga. Jantsy jotkujkëts nnayjyawëty kots të nˈojtsy mä kanäägë tyäˈädë it lugäär kotsë Betel xykyexy parëts nëjkxë diskursë nyajnaxy. Kots të ndundë tuˈugyë mëdë tyäˈädë nmëguˈukˈäjtëm, mëjwiin kajaats xypyudëkë kots tyam nbudëkëdë desde Betel.

Mäts yam nganimaytyaktäˈäynyëm, yëˈëts nigäjpxandëp mëdë Pam ko diˈibëts të nˈixtë, yëˈë ko kyaj yëˈëyëtyë mëjjäˈäy mëˈˈënäˈkpë mbäät tˈëxtäˈäytyë Dios. Nanduˈunë ënäˈktëjk yˈëxtääytyëp ja “perlë” diˈib tsobatp mëjwiin kajaa, oy ja jyiiky myëguˈuk tkatsojkënyëˈattë (2 Rey. 5:2, 3; 2 Crón. 34:1-3). Extëm nˈijxëm, Jyobaa tsyojkypy ets mëj mutsk nyitsoˈoktët.

Kots mëdë Pam nˈëxtääytsyondaktë Dios, naxy 50 jëmëjtëp, kyajts ndimpawinmääytyë axtë mäbäädëts nˈëxtäˈäyäˈändë. Extëm nˈijxëm, Diosë yˈAnaˈam Kyutujkën duˈun extëm tuˈugë perlë diˈib tsobatp mëjwiin kajaa. Ets tëtsë nwinmäˈäny nbëjtäˈäktë kots jamë njot nmëjääw nyajtunäˈändë mäts nˈijxˈit nguentˈattë.