¿Mbäät xyˈatsoowëmbityë tyäˈädë yajtëˈëwën diˈib të myiny mä Diˈib Xytyukˈawäˈänëm 2019?

¿Ti yˈandijpy ko duˈunë Dios të twandaˈaky: “Oy diˈibë tujn pujxn myajtuknibëdëˈëgët kyaj myadäˈägäˈäny”? (Is. 54:17).

Mbäät nˈijtëm seguurë ko Dios yëˈë xykyuwäˈänäˈänëm oy ti xytyimtuknibëdëˈkëmë axëkjäˈäytyëjk (Is. 25:4, 5). Yëˈë nmëtsipˈäjtëm ninäˈä winë xëëw xykyayaˈˈayowäˈänëm (w19.01, pajina 6, 7).

¿Wiˈixë Dios dyajnigëxëˈkyë tyëyˈäjtën mä ja jäˈäyëty diˈib Canaán ets mä ja israelitëty diˈib kyaj myëmëdoowëdë?

Jyobaa tyukkumëdoow pënaty axëëk jabyëk ijt tsënääytyë ets pënaty axëëk tyuundë ja toxytyëjk jäˈäy ets ja ënäˈkuˈunk. Per kyunuˈkx pënaty mëmëdoowëdë ets pënaty kyaj ttuundë axëëk ja jyiiky myëguˈuk (w19.02, pajina 22, 23).

¿Ti ndunäˈänëm ko tuˈugë jäˈäy diˈib kyaj Tyestiigëty tyëkët nuˈkxtakpë?

Mbäät amonyë nwëˈëmëm ets nyaˈijxëmë mayˈäjt wintsëˈkën. Per kyaj nëjkx njënäˈänëm “amenk” ets nan kyaj nëjkx nnaygyëˈëmëmäjtsëm. Mbäät këˈëm jodoty winmäˈänyoty nnuˈkxtakëm (w19.03, pajina 31).

¿Nuˈunën kyuboky ko jäˈäy tˈaguanëˈatyë ënäˈkuˈunk?

Ko ënäˈkuˈunk yaˈˈaguanëˈaty, yëˈë tuˈugë mëj poky, pes yajmëbokytyuump ja diˈib të yaˈˈaguanëˈaty, ja Diosë kyäjpn, ja kuduunk justisë, perë Jyobaa yëˈë diˈib mas niˈigyë yajmëbokytyuump. Pën mä ja lugäär yajnigutujkëbë ley parë yajniˈëënët ja diˈib të tˈaguanëˈatyë ënäˈkuˈunk, tsojkëp ja mëjjäˈäytyëjk tmëmëdowdët (w19.05, pajina 9, 10).

¿Wiˈix mbäät nyajtëgäjtsëm ja jot winmäˈäny?

Tsojkëp nduˈunëmë tyäˈädë tëgëk pëkypyë: nmënuˈkxtakëmë Jyobaa, nbawinmäˈäyëm wiˈix nyaˈijx nyajpatëm jodoty ets nwinˈijxëmë oybyë mëtnaymyaayëbë (w19.06, pajina 11).

¿Ti mbäät tyam nduˈunëm parë nnayjyëjpˈijxëm ko nety nyajnibëdëˈkëm?

Tsojkëp tyam nyajkëktëjkëm ja naymyayë mëdë Jyobaa, nmëbëjkëm ko xytsyojkëm ets ko ninäˈä xykyamastuˈudäˈänëm, ngäjpxëm bom bomë Biiblyë ets xëmë nnuˈkxtakëm. Nan tsojkëp nmëbëjkëm ko adëwäämp ja kunuˈkxën diˈib yajminaambyë Diosë yˈAnaˈam Kyutujkën, njäjtëm agëbajkyë tekstë diˈib njantsy yˈoymyëdoˈowëm etsë ëy mä yajkuyˈëy yajkuyyaˈaxyë Jyobaa (w19.07, pajina 2-4).

¿Ti mbäät nduˈunëm parë nbudëjkëm ja jiiky mëguˈuk ets tpäättët ja nitsokën?

Jëjpˈam ets njaygyujkëm wiˈix nyayjyawëdë, nmoˈoyëmë oybyë ijxpajtën, nmëmaˈkxtujkëm ets nˈijtëm oyjyaˈay (w19.08, pajina 15-17).

Extëm twandaˈagyë Matewʉ 11:28, ¿wiˈixë Jesus xymyoˈoyëmë ja poˈkxtakn o ja nikˈäjt xeemyˈäjtën?

Ko jantsy oy jyaˈayˈattë pënaty xynyëˈëmoˈoy xytyuˈumoˈoyëm, ko nmëdäjtëm ja mas oybyë mëtnaymyaayëbë ets ko nduˈunëm ja mas oybyë tuunk (w19.09, pajina 23).

¿Wiˈixë Dios xymyoˈoyëm duˈun ja tsojkën ets ja jot mëjääw parë ti nduˈunëm? (Filip. 2:13, TNM).

Ko ngäjpxëmë Biiblyë ets nbawinmäˈäyëm, ta Dios xymyoˈoyëm ja tsojkën parë nduˈunëm ti yëˈë tsyojkypy ets ja jot mëjääw parë net nduˈunëm. Ets mët yëˈëgyëjxm ja yˈespiritë santë, mbäät dyajmëjwiin dyajkajaajë ja wijyˈäjtën diˈib nmëdäjtëm (w19.10, pajina 21).

¿Tijaty yajtunäämp mä ngawinˈijxëm ti ndunäˈänëm?

Mëgoxk pëky: nˈamdoˈowëmë wijyˈäjtënë Dios, nbayoˈoyëm këkpäät, nˈijxëm tiko duˈun ndunäˈänëm, nyajwingëdakëm tijaty ndunäˈänëm ets nˈijxëm tijaty extëm yˈixëty (w19.11, pajina 27-29).

Ko Satanás tˈanmääyë Eva ko kyaj yˈoogäˈäny, ¿jamdaa tsyonëˈky tsyondaky ko tyamë jäˈäy tmëbëktë ko anmë kyaj yˈooky?

Kyaj jyawë. Satanás kyaj tˈanmääyë Eva ko yëˈëyë ogäämp ja nyiniˈkx ets ko ja yˈanmë wiinktsoo nëjkx jyukyˈatäˈäny. Yˈanmääyë duˈun ko niwiˈixtsoo kyaˈoogäˈäny. Tyäˈädë tukniˈˈijxën diˈib kyaj tyëyˈäjtënëty ja jyëjptëgooytyaay ko myiiny ja Ayoˈonduu. Ets waˈan ja tsyondaˈaky mä netyë Dios tkayaˈˈayoˈoywyaˈkxtäˈäynyëmë jäˈäy diˈibë nety jam yajpëdëˈktëp ja mëj potsy Babel (w19.12, pajina 15).