Jantsy jotkujk nnayjäˈäwëm ko nduˈunëm mëdë Jyobaa
“Extëm ëtsäjtëm nmëduˈunëm ja Dios [o nduˈunmujkëm mëët, TNM], nˈamdoo nbëjktsoodëp es këdiibë nanëgoobë xykyupëktët ja Diosë myayˈäjtën” (2 KORINTɄ 6:1).
1. Jyobaa mbäät tijaty ttuundäˈäy, ¿per ti nyasˈijxëp parë nduˈunëm?
JYOBAA yëˈë ojts dyajkojy tukëˈëyë tijaty jaˈäjtp. Nipën duˈun kyawijˈyëty ets kyakumëjääwëty extëm yëˈë. Job jyaygyujkë ko dyuˈunëty, pääty tˈanmääy: “Tyamnëmtsë net nnijawë ko mijts mbäät xytyuundäˈäy tukëˈëyë ets tijaty mdukniwinmäˈäyëp mbäät xytyuny” (Job 42:2). Jyobaa kyaj dyajtëgoyˈaty ets pën pyudëkëdët, per kom mëk xytsyojkëm, ta tnasˈixë ets mëët nduˈunëm.
2. ¿Ti tuungë jëjpˈambë yajmooyë Jesus?
2 Dios yëˈë tim jawyiin yajkojë yˈUˈunk, Jesus. Ok, ta tmooy tuˈugë tuungë mas jëjpˈambë: pyudëkëdët mä tukëˈëyë tijaty yajkoj (Fwank 1:1-3, 18). Apostëlë Pablo jyënany ko mët yëˈëgyëjxmë Jesus, Dios ojts dyajkojy “tëgekyë diˈibë jam tsäjpotm es yä naxwiiny. Yëˈë mëët yajkoj diˈibë yaˈijxp es diˈibë kyaj yaˈixy [...]. Kristë mëët es Kristë yˈoyˈäjtëngyëjxm tëgekyë yajkoj” (Kolosʉ 1:15-17). Extëm nˈijxëm, Jyobaa myëjpëjtakë Jesus ko ttuunkmooy, ets yajwëˈëm jääybyety parë niˈamukë naxwinyëdë jäˈäy tnijawët.
3. 1) ¿Ti Jyobaa tyuktuunë Adán? 2) ¿Tiko Jyobaa tnasˈijxë parë Adán pyudëkëdët?
3 Jyobaa nan të tnasˈixë etsë naxwinyëdë jäˈäy mëët tyuunmukët. Extëm nˈokpëjtakëm, tyuknipëjkë Adán parë txëëmooytyaˈayët ja jëyujk animal (Génesis 2:19, 20). Seguurë ko Adán jyantsy tyukxondakë tyäˈädë tuunk. Nyiˈˈijx kyuˈijx tuˈuk tuˈuk ja jëyujk animal ets tˈijx tijaty tyuundëp parë ojts txëëmoˈoy. Jyobaa mbäätxyëp ttuunyë tyäˈädë tuunk, pes yëˈë ojts dyajkojy tukëˈëyë jëyujk animal. Per kom mëk ttsejkyë Adán, ta tnasˈijxë parë pyudëkëdët. Nan tyuknipëjk parë tukëˈëyë Naxwinyëdë dyajjëmbitët extëmë lugäärë tsujpë (Génesis 1:27, 28). Per ko tiempë nyajxy, ta Adán tmastutyë Jyobaa ets kyaj mëët nyekytyuuny. ¿Wiˈix wyimbëtsëëmy? Mëjwiin kajaa ojts tkuˈayowë ets nanduˈun niˈamukë ja tyëëm yˈääts (Génesis 3:17-19, 23).
4. ¿Pënaty mëdë Jyobaa të tyundë parë yˈadëwët diˈib tyuknibëjtakëp?
4 Ok, ojtsë Jyobaa tnasˈixë parë wiinkpë jäˈäy pyudëkëdët. Extëm ja Noé, ojts ttukkojy tuˈugë arkë parë jap nyitsoˈogët mëdë fyamilyë ko myinët ja Ayoˈonduu. Nan yajtuunë Moisés parë dyaˈˈawäˈätspëtsëmët ja israelitëty jap Egipto, ets ja Josué parë twoowdëkët ja israelitëty mä ja nax diˈib Dios tukwandakëdë. Nan tyukkojë Salomón ja templë diˈib Jerusalén. Ets wyinˈijx ja María parë yëˈë Jesus ttääkˈatët. Nimayë Dios mëduumbë extëm diˈib yä yajmaytyaktëp, të tyundë mëdë Jyobaa parë yˈadëwët diˈib tyuknibëjtakëp.
5. 1) ¿Ti tuunk mbäät niˈamukë nduˈunëm? 2) ¿Yajtëgoyˈajtypyë Jyobaa ets nbudëjkëm mä tyäˈädë tuunk? (Ixë dibujë mä tsyondaˈaky).
5 Tyam, nan xyˈanmäˈäyëmë Jyobaa ets nduˈunëm nuˈun nmadakëm parë nbudëjkëm ja gyobiernë. Kanäk pëky jyaˈˈaty wiˈix mbäät nbudëjkëm. Ets oy mbäät tuknax ngatuˈunëm, mbäät niˈamukë nimaytyakëmë tyäˈädë Diosë gyobiernë. ¿Yajtëgoyˈajtypyë Jyobaa ets nbudëjkëm mä tyäˈädë tuunk? Kyaj. Pes mbäätxyëp desde tsäjpotm tmëgajpxyë naxwinyëdë jäˈäy. Etsë Jesus jyënany ko axtë mbäätxyëbë tsää dyajkajpxy parë tnimaytyäˈägët ja Rey diˈib anaˈamäämp (Lukʉs 19:37-40). Perë Dios nyasˈijxëp parë mëët nduunmujkëm (1 Corintios 3:9, TNM). Apostëlë Pablo tkujäˈäyë: “Dëˈën extëm ëtsäjtëm nmëduˈunëm ja Dios [o nduˈunmujkëm mëët, TNM] nˈamdoo nbëjktsoodëp es këdiibë nanëgoobë xykyupëktët ja Diosë myayˈäjtën” (2 Korintʉ 6:1). ¡Mëjwiin kajaa nmëjjäˈäwëm ko nduˈunëm mëdë Jyobaa! Min nˈokˈijxëm tuk pëky majtsk pëky tiko jantsy jotkujk nnayjäˈäwëm.
JANTSY JOTKUJK NNAYJÄˈÄWËM KO NDUˈUNËM MËDË JYOBAA
6. ¿Wiˈixë Jesus nyayjäˈäwë ko tyuuny mëdë Tyeety?
6 Dios mëduumbë xëmë ttukxondäˈäktë ko tyundë mëdë Jyobaa. Extëmë Jesus, mä nety kyaminyëm Naxwiiny ojts tyuny mëdë Jyobaa extëm “diˈib nyiwintsënˈäjtypyë tuunk”, o extëm diˈib yajxon jyajtypy ja tyuunk. Yëˈë nyijäˈäwëbë nety ko mëkë Dios tsyekyëty ets jyënany: “Jotkujkëts nnayjäˈäwë wyindum nuˈun ja xëë tiempë” (Proverbios 8:22, 30). Mëjwiin kajaa ojts ttukxondaˈaky ko mëdë Tyeety tyuuny, pes yajkoj tijaty ets nyijäˈäwëbë nety ko tsojkëbë tyeety. ¿Ets ëtsäjtëm? ¿Nan mbäät duˈun nnayjäˈäwëm?
Nitii duˈun jotkujk xykyayajnayjäˈäwëm extëm ko tuˈugë jäˈäy ndukniˈˈijxëm ja tëyˈäjtën (ixë parrafo 7).
7. ¿Tiko nnayjäˈäwëm jotkujk ko ngäjpxwäˈkxëm?
7 Jesus jyënany ko agujk jotkujk nnayjäˈäwëm ko ti nyäjkëm ets nanduˈun ko ti nyajmoˈoyëm (Apostʉlʉty 20:35). Ko ojts nyajtukniˈˈijxëm ja tëyˈäjtën jantsy jotkujk ojts nnayjäˈäwëm. Per nanduˈun nnayjäˈäwëm ko wiinkpë ndukniˈˈijxëm, pes jantsy jotkujk nyayjawëdë ko tjaygyukëdë ja tëyˈäjtënë diˈib miimp mä Biiblyë ets ko ogäˈän tˈixyˈattë Dios. Ko nˈijxëm wiˈixë jäˈäy dyajtëgatstë jyot wyinmäˈäny etsë jyukyˈäjtën, ¿këdii jantsy jotkujk nnayjäˈäwëm? Pääty jëjpˈam ets ngäjpxwäˈkxëm, pes mbäädë jäˈäy nyaymyëˈoybyëkëdë mëdë Dios ets jyukyˈattët winë xëë (2 Korintʉ 5:20). ¿Jaˈäjtpëdaa wiinkpë tuunk diˈib mbäät jantsy jotkujk xyajnayjäˈäwëm?
8. ¿Wiˈix näägë nmëguˈukˈäjtëm nyayjawëdë ko tyundë mëdë Jyobaa?
8 Ja tuk pëky diˈib jotkujk xyajnayjäˈäwëm, yëˈë ko Jyobaa tyukxondakypy ets yajtsobatypy ko nbudëjkëmë jäˈäy parë yˈixyˈatëdët (käjpxë 1 Korintʉ 15:58). Marco, tuˈugë Testiigë diˈib Italia, jyënaˈany: “Kyajts nbäätyë ää ayuk parëts nimaytyäˈägët wiˈixëts jantsy jotkujk nnayjawëty kojëts nmoˈoyë Jyobaa diˈibëts mas oy nmëdäjtypy, ets kyajts yëˈë nmëduny tuˈugë jäˈäy diˈib jyaˈaytyëgoyëp tijatyëts ndukmëduumpy”. Franco, jatuˈugë Testiigë diˈib Italia, jyënaˈany: “Tuˈuk tuˈugë xëë, Jyobaa yëˈë yajtuumbyë Biiblyë, ëxpëjkpajn etsë tuˈukmujkën parë xytyukjamyajtsëm ko mëk xytsyojkëm. Oy nwinmäˈäyëm ko waanë nduˈunëm, yëˈë mëjwiin kajaa dyajtsobääty. Pääty, jantsy jotkujkëts nnayjawëty kojëts nduny mëdë Jyobaa ets kyajts nanëgoobë njukyˈaty”.
KO NDUˈUNËM MËDË JYOBAA, TA NIˈIGYË NMËWINGOˈONËM ETS NANDUˈUN JA NMËGUˈUKˈÄJTËM
9. 1) ¿Wiˈixë netyë Jyobaa yˈity mëdë Jesus? 2) ¿Tiko netyë Jyobaa mëdë Jesus nyayaˈitëdë tuˈugyë?
9 Ko nduˈunëm mët tuˈugë jäˈäy diˈib mëk ntsojkëm, ta niˈigyë nmëwingoˈonëm. Niˈigyë yajxon nˈixyˈäjtëm, extëm wiˈix tijaty ttuny ets wiˈix tmëdatyë oybyë jäˈäyˈäjtën. Ta nnijäˈäwëm tijaty tyuknibëjtakëp etsë net nˈijxëm wiˈix tkuytyuny. Mä Jesus kyaminyëm yä Naxwiiny, jeky tyuuny mëdë Jyobaa, waˈan nyajxy kanäk miyonk jëmëjt. Nuˈunë tyäˈädë tiempë nyajxy, niˈigyë nyaymyaaybyëjkëdë ets nitii nety mbäät kyayajnaywyäˈkxëdë. Päätyë Jesus jyënany: “Dios Teety es ëj, tiˈigyë jeˈeyë ëëtsëty” (Fwank 10:30). Seguurë ko jantsy tuˈugyë nety nyayaˈitëdë mët ko tyuunmujktë.
Ko ngäjpxwäˈkxëm niˈigyë ja mëbëjkën kyëktëkë mët ko xytyukjamyajtsëm tijatyë Jyobaa wyandakypy ets tijaty xytyukˈanaˈamëm
10. ¿Tiko niˈigyë nmëwingoˈonëmë Jyobaa etsë nmëguˈukˈäjtëm ko nnëjkxëm käjpxwäˈkxpë?
10 Jesus ojts tˈanëëmë Tyeety parë ja yˈëxpëjkpëty yajkuentˈatët. ¿Tiko? Yëˈë jyënany: “Es tiˈigyë yˈittët ja wyinmäˈänyëty, extëm ëtsäjtëm nˈijtëm tiˈigyë” (Fwank 17:11). Ko njukyˈäjtëm extëmë Jyobaa dyajnigutukë mä Biiblyë ets ko xëmë nëjkxëm käjpxwäˈkxpë, ta mas oy njaygyujkëm wiˈix yëˈë jyaˈayˈaty. Nan njaygyujkëm tiko yˈoyëty ets yëˈë ndukˈijxpajtëm ets nbanëjkxëm wiˈix xytyuˈumoˈoyëm. Ets ko niˈigyë nmëwingoˈonëmë Jyobaa, ta nanduˈun xymyëwingoˈonëm (käjpxë Santya̱ˈa̱gʉ 4:8). Nan nmëwingoˈonëm nmëguˈukˈäjtëm mët ko yajnäjxtëbë amay jotmay extëm ëtsäjtëm, nan xondaktëp extëm ëtsäjtëm ets nan tuˈugyëp ja winmäˈäny mä tijaty nduknibëjtakëm. Tuˈugyë nduˈunëm, tuˈugyë nxondakëm ets tuˈugyë nmadakëm. Octavia diˈib tsënaapy Gran Bretaña, jyënaˈany: “Kojëts nduunmuky mëdë Jyobaa, tajëts niˈigyë nmëwingony ets nanduˈun ja nmëguˈuktëjkëts”. ¿Tiko? Yëˈko tuˈugyëdëp ja wyinmäˈäny mä tijaty tyuknibëjtakëdëp. ¿Këdii nanduˈun ëtsäjtëm nnayjäˈäwëm?
11. ¿Tiko mä ja jembyë jukyˈäjtën mas tuˈugyë nyajpäädäˈänëm mëdë nmëguˈukˈäjtëm etsë Jyobaa?
11 Seguurë ko tyam ntsojkëmë Jyobaa etsë nmëguˈukˈäjtëm, per mas niˈigyë ntsokäˈänëm mä ja jembyë jukyˈäjtën. Okwinmay tijaty ndunäˈänëm tuˈugyë, extëm nˈagëˈëjëyäˈän nˈaxäjëyäˈänëm pënaty jukypyëjktëp, ndukˈixyˈatäˈänëmë Jyobaa ets nyajjëmbitäˈänëm tukëˈëyë Naxwinyëdë jantsy tsuj. Seguurë ko jantsy jotkujk nëjkx nnayjawëyäˈänëm ko nduˈunëm tuˈugyë mëdë nmëguˈukˈäjtëm ets ko wanaty wanaty njëmbijtënë wäˈätsjäˈäy mä netyë Kristë yˈaneˈemy. Tuˈuk tuˈugë xëë, mas tuˈugyë nyajpäädäˈänëm mëdë nmëguˈukˈäjtëm etsë Jyobaa. Seguurë ko Jyobaa xymyoˈoyäˈänëm tukëˈëyë tijaty ntsojkënyëˈäjtëm (Salmo 145:16).
XYKYUWÄˈÄNËM KO NDUˈUNËM MËDË JYOBAA
12. ¿Tiko xykyuwäˈänëm ko ngäjpxwäˈkxëm?
12 Tyam njukyˈäjtëm mä Satanás yˈaneˈemy ets pokyjyaˈay nyajpatëm. Pën kyaj nnaygyuentˈäjtëm, mbäät ogäˈän nwinmäˈäyëm ets nduˈunëm tijatyë naxwinyëdë jäˈäy tyuundëp. Pääty, jëjpˈam ets nguwäˈänëm ja naymyayë mëdë Jyobaa. Pes extëm tyamë naxwinyëdë jäˈäy wyinmaytyë ets tijaty tyuundëp, duˈun extëmë mëjnëë diˈib mëk woˈomp. Pääty pën kyaj nyajpawoonäˈänëm, jëjpˈam ets nduˈunëmë mëjää. ¿Ti mbäät nduˈunëm parë xëmë oy nˈijtëm mëdë Jyobaa? Ko nˈëwäˈkx ngäjpxwäˈkxëm. Pes ko nimaytyakëmë Dios etsë Biiblyë, ta jot winmäˈäny nbëjtakëm mä diˈibë jëjpˈam ets diˈibë oy. Kyaj yëˈë nwinmäˈäyëm diˈibë ja mëbëjkën yajxaamëp (Filipʉs 4:8). Ko ngäjpxwäˈkxëm, niˈigyë ja mëbëjkën kyëktëkë mët ko xytyukjamyajtsëm tijatyë Jyobaa wyandakypy ets tijaty xytyukˈanaˈamëm. Nan xypyudëjkëm parë nyajnigëxëˈkëmë oybyë jäˈäyˈäjtën diˈib xykyuwäˈänëm parë kyaj xymyëmadakëmë Satanás etsë jyaˈay (käjpxë Éfesʉ 6:14-17).
Ko nbëjtakëmë winmäˈäny mä Jyobaa tyuunk, ta kyaj nmëdäjtëmë tiempë parë yëˈëyë nmëmäˈäy nmëdäjëm ja njotmayˈäjtëm
13. ¿Tiko tuˈugë nmëguˈukˈäjtëm diˈib Australia dyajtsobääty ko nyijkxy käjpxwäˈkxpë?
13 Ko winmäˈäny nbëjtakëm mä ngäjpxwäˈkxëm, nˈëxpëjkëm ets nbudëjkëmë nmëguˈukˈäjtëm, ta kyaj nmëdäjtëmë tiempë parë yëˈëyë nmëmäˈäy nmëdäjëm ja njotmayˈäjtëm. Joel, tuˈugë Testiigë diˈib Australia, mëjwiin kajaa dyajtsobääty ko nyijkxy käjpxwäˈkxpë, pes yëˈë pudëjkëp parë kyaj tjäˈäytyëgoyët ko naxwinyëdë jäˈäy pyattëbë mëjwiimbë jotmay. Nan tukjamyajtsëp wiˈix mëjwiin kajaa pyudëkëtyë Biiblyë kyäjpxwijën. Joel jyënaˈany: “Kojëts nëjkxy käjpxwäˈkxpë, xypyudëjkëbëts parëts nˈitët yujy tudaˈaky ets parëts ndukjotkujkˈatëdë Jyobaa etsëtsë nmëguˈuktëjk”.
14. ¿Wiˈix nnijäˈäwëm ko Jyobaa yëˈë xypyudëjkëm mëdë myëjää?
14 Ko ngäjpxwäˈkxëm, nan yëˈë yaˈijxëp ko Jyobaa xypyudëjkëm mëdë myëjää. Nˈokpëjtakëm tuˈugë ijxpajtën parë njaygyujkëm. Okwinmay ko tuˈugë jäˈäy mduknipëkyëty ets tëjkmdëjkm xyajwäˈkxëdë käˈäy ukën mä mtsëënë. Per kyaj mmëjuyaˈanyëty ets kyaj tpëjtäˈägäˈäny ja gastë. Mayë jäˈäy nan kyaj ttsokäˈändë parë xytyukninëjkxët ja käˈäy ukën ets nääk axtë mˈaxëkˈixanëp. ¿Mˈaktuunˈadëˈëtsëbë tyäˈädë tuunk? Seguurë ko axëëk mnayjawëyaˈanyëty extëm ja jäˈäy mdunyëty ets mëˈanuˈkxëyaampy. Tyam, nanduˈunë jäˈäy ndukninëjkxëmë Diosë yˈayuk. Tuˈuk tuˈugë jëmëjt nyaxy, duˈunyëm ngäjpxwäˈkxˈadëtsëm, nyajtuˈunëmë xëë tiempë, meeny sentääbë etsë jot mëjää, ets nmëmadakëm ko jäˈäy xynyëxik xytyukxikëm ets axtë xyˈaxëkˈijxëm. ¿Këdii yëˈë tyäˈädë xytyukˈijxëm ko Jyobaa yëˈë diˈib xypyudëjkëm mëdë myëjää?
KO NDUˈUNËM MËDË JYOBAA, TA NYAˈIJXËM KO NTSOJKËM ETS NANDUˈUN JA NMËGUˈUKˈÄJTËM
15. ¿Tiko jyëjpˈamëty ngäjpxwäˈkxëm?
15 Jëjpˈam ets ngäjpxwäˈkxëm, mët ko duˈunë nety nbudëjkëmë Dios parë yˈadëwët diˈib të ttuknibëjtäägë. Jyobaa ojts ttuknibëjtäägë parë naxwinyëdë jäˈäy jyukyˈatët winë xëë, ets kyaj dyajtëgäjtsy ko Adán pyokytyuuny (Isaías 55:11). Ets parë ojts xyaˈˈawäˈätspëtsëˈëmëm mä ja poky etsë oˈkën, ta tkejxyë Jesus yä Naxwiiny parë ojts xykyuˈoˈkëm. Per parë ndukˈoyˈäjtëm ets njukyˈäjtëm winë xëë, jëjpˈam ets nmëmëdoˈowëmë Dios. Jesus tyukniˈˈijxë jäˈäy ti Dios tyukjotkëdakypy ets tyukˈanaˈam ja yˈëxpëjkpëty parë nanduˈun ttundët. Pääty ko jäˈäy ndukmëtmaytyakëmë Diosë yˈayuk ets nbudëjkëm parë tmëwingonëdë Jyobaa, ta nbudëjkëm parë yˈawäˈätspëtsëmdët mä ja poky etsë oˈkën.
16. ¿Ti nyajnigëxëˈkëm ko ngäjpxwäˈkxëm?
16 Ko niduˈuk diˈib nyiwintsënˈäjtypyë relijyonk dyajtëëyë Jesus diˈibë anaˈamën mas jëjpˈam, ta tˈatsooy: “Mtsokëp ja mWintsën Dios mët winë mjot, mët winë mˈanmëjäˈän es mët winë mjot mwinmäˈäny. Tyäˈädë dëˈën ja jawyiimbë anaˈamën diˈibë niˈigyë myëjjëty. Ja myëmajtskpë nandëˈën extëmë tyäˈädë: Mtsokëp ja mmëdëjkpäˈä extëm mij këˈëm mnaytsyekyëty” (Matewʉ 22:37-39). Ko ngäjpxwäˈkxëm ets ndukniˈˈijxëmë jäˈäy ti mbäät ttundë parë jyukyˈattët winë xëë, ta nyajnigëxëˈkëm ko nmëmëdoˈowëm ja anaˈamën: ntsojkëmë jäˈäy etsë Jyobaa (käjpxë Apostʉlʉty 10:42). Pesë Jyobaa “tsyejpy es nidëgekyë [nyitsoˈoktët] es nandëˈën tjaygyukëdët diˈibë dën tëyˈäjtën” (1 Timotee 2:4).
17. ¿Wiˈix mijts mnayjawëty ko mduny mëdë Jyobaa?
17 Mëjwiin kajaa nmëjjäˈäwëm ko nduˈunëm mëdë Jyobaa, pes agujk jotkujk nnayjäˈäwëm, oy mëët nˈijtëm, niˈigyë nmëwingoˈonëm ets nanduˈun ja nmëguˈukˈäjtëm. Nan mbäät nyajnigëxëˈkëm ko ntsojkëmë Jyobaa etsë nmëguˈukˈäjtëm. Abëtsemy nyaxwinyëdë jyaˈˈaty miyonkˈamë Dios mëduumbë ets wiˈixëm yaˈix yajpäättë. Per niˈamukë nduˈunëmë mëjää parë ngäjpxwäˈkxëm, duˈunë mëjjäˈäy mutskjäˈäy, oy yˈayow jyotëgoytyë ets oy myëkjäˈäyëty, oy yajpäättë oy mëk o yuumëët päˈämmëët. Nanduˈun njënäˈänëm extëm tuˈugë nmëguˈukˈäjtëm diˈib Francia: “Dios diˈib mas mëj ijtp abëtsemy nyaxwinyëdë, diˈib tukëˈëyë tijaty të dyajkojy, diˈib jotkujk yajpatp, yëˈëjëts xyˈanmaapy: Nëjkx ets mmaytyäˈäk. Nimaytyakëts. Yajpëtsëmë ää ayuk diˈib tsoˈomp mä mjot mgorasoon. Nmoˈoyaambyë jot mëjää, nˈAyukëts ets nbudëkëyaampy mët yëˈëgyëjxmëtsë nˈanklës etsë mmëguˈuktëjk diˈib mëët mgäjpxwaˈkxy. Ndukniˈˈixëyaampy wiˈix xytyunët ets nduˈumoˈoyaampy ko xyajtëgoyˈatët. ¡Nitii duˈun mëj xykyayajnayjäˈäwëm extëm ko Jyobaa tnasˈixë parë mëët nduˈunëm ets yˈadëwët ti yëˈë tsyejpy!”.
