1, 2. 1) ¿Tijaty yˈandijpy ja regalë diˈibë Dios të xymyoˈoyëm? 2) ¿Tijaty yaˈˈatsoowëmbitäämp mä tyäˈädë artikulo?

JYOBAA mëjwiin kajaa xytsyojkëm, pääty tkejxyë yˈUˈunk yä Naxwiiny parë ojts xykyuˈoˈkëm (Fwank 3:16; 1 Fwank 4:9, 10). Mëjwiin kajaa tsyobäätyë tyäˈädë regalë diˈibë Dios të xymyoˈoyëm. Päätyë apostëlë Pablo jyënany: “Mëj näynyamoˈojë ets kaˈap yajpaaty ja aaw ayuk wiˈix yajnimëtyaˈakëtyën” (2 Corintios 9:15, TY). ¿Ti Pablo myaytyäˈägany ko duˈun jyënany?

² Pablo nyijäˈäwëbë nety ko tukëˈëyë tijatyë Dios të twandaˈaky mbäät yˈadëy mët ko Jesus ojts xykyuˈoˈkëm (käjpxë 2 Korintʉ 1:20). Ko jyënaˈany: “Mëj näynyamoˈojë ets kaˈap yajpaaty ja aaw ayuk wiˈix yajnimëtyaˈakëtyën”, yëˈë yˈandijpy ko Jesus nyayäjkë extëmë wintsëˈkën ets wixatyë Dios dyaˈixyëty ko xytsyojkëm ets tukëˈëyë ja oyˈäjtën diˈib xymyoˈoyëm. Kyaj yajpäätyë ää ayuk parë nimaytyakëm wiˈix yˈoyëtyë tyäˈädë regalë diˈibë Dios të xymyoˈoyëm. ¿Wiˈixxyëp mbäät njäˈäwëm? ¿Ets tixyëp mbäät  nduˈunëm mä wyingony ja Jesusë yˈoˈkën xëë? Mä tyäˈädë jëmëjt ja yajjamyatsäˈäny mierkëlës 23 äämbë marsë.

3, 4. 1) ¿Wiˈix nnayjäˈäwëm ko pën xymyoˈoyëmë regalë? 2) ¿Wiˈix mbäät tuˈugë regalë dyajtëgatsyë jukyˈäjtën?

³ Jantsy jotkujk nnayjäˈäwëm oy diˈibë regalë nyajmoˈoyëm. Per ta näägë regalë diˈib niˈigyë tsobatp ets axtë mbäät dyajtëgatsyë jukyˈäjtën. Nˈokpëjtakëm tuˈugë ijxpajtën. Okwinmay ko të mëjwiin kajaa mduundëgoy ets të myajtuknikäjpxpajnë oˈkën. Per ta ajotkumonë tuˈugë jäˈäy diˈib kyaj xyˈixyˈaty jyënaˈany ko mguˈoogëyanëp. ¿Wiˈix mnayjawëdët?

⁴ Waˈan xyajtëgatsäˈänët ja mjukyˈäjtën. Ets niˈigyë xytsyokäˈänët ja mëguˈuktëjk, mˈoyjyaˈaytyäˈägët mëët ets xypyokymyaˈkxëdë net pënaty axëëk të mdunyëty. Seguurë ko nuˈun ja mxëë mjukyˈäjtën, myajnigëxëˈëgaampy ko mëjjäˈäwëp ti ja jäˈäy mdukmëduunë diˈib kyaj xyˈixyˈaty.

5. ¿Tiko mbäät njënäˈänëm ko Dios të xymyoˈoyëm tuˈugë regalë diˈib mëjwiin kajaa?

⁵ Niˈigyë myëjwiin kyajaajëty diˈibë Dios të xynyamoˈoyëm ko ja yˈuˈunk ojts xykyuˈoˈkëm ets kyaj dyuˈunëty ja ijxpajtën diˈib të yajmaytyaˈaky (1 Peedrʉ 3:18). Kom ak pokyjyaˈay nyajpatëm, ta niˈamukë ojts nyajtuknikäjpxpajtëm ja oˈkën (Romanʉs 5:12). Per mët ko Dios mëk xytsyojkëm, ta tkejxyë yˈUˈunk yä Naxwiiny parë ojts xykyuˈoˈkëm (Ebreeʉsʉty 2:9). Ja tuk pëky wiˈix ndukˈoyˈatäˈänëm ko Jesus ojts xykyuˈoˈkëm, yëˈko kyaj yˈokˈitanë ja oˈk tëgoˈoyën (Isaías 25:7, 8; 1 Korintʉ 15:22, 26). Niˈamukë pënaty pyëjtaktëbë mëbëjkën mä Jesus, jukyˈatandëp winë xëë agujk jotkujk, taa diˈib jukyˈatandëp tsäjpotm ets taa diˈib yä Naxwiiny (Romanʉs 6:23; Diˈibʉ Jatanʉp 5:9, 10).

6. 1) ¿Tijaty oyˈäjtënë mˈawixy mjëjpˈijxypy? 2) ¿Wiˈix mbäät nyajnigëxëˈkëm ko nmëjjäˈäwëm extëmë Dios xytsyojkëm?

⁶ ¿Tijaty yˈandijpy ja regalë diˈibë Dios të xymyoˈoyëm? Nan yëˈë yˈandijpy ko jyëmbitäˈänyë tyäˈädë Naxwinyëdë jantsy tsuj, yˈagëdäˈägäˈändë päˈäm jäˈäy ets jyukypyëkäˈändë oˈkpë (Isaías 33:24; 35:5, 6; Fwank 5:28, 29). Pääty mëk ntsojkëmë Jyobaa etsë Jesus ko xymyoˈoyäˈänëmë tyäˈädë oybyë regalë. ¿Wiˈix mbäät nyajnigëxëˈkëm ko nmëjjäˈäwëm? Tuk pëky, ko nbanëjkxëmë Jesusë yˈijxpajtën, majtsk pëky, ko ntsojkëm ja nmëguˈukˈäjtëm ets tëgëk pëky, ko nbokymyaˈkxëm amumduˈukjot.

7, 8. 1) Pën njäˈäwëm wiˈixë Jesus të xytsyojkëm, ¿ti net ndunäˈänëm? 2) ¿Wiˈix mbäät nyajnigëxëˈkëm ko nmëjjäˈäwëm ko Jesus të xytsyojkëm?

⁷ Min nˈokˈijxëmë myëduk pëkypyë, ko njukyˈäjtëm extëmë Jesus ttseky. Apostëlë Pablo jyënany: “Jesukristë tsyojkën xytyukmëdijëpts” (käjpxë 2 Korintʉ 5:14, 15). Yëˈë nyijäˈäwëbë nety ko pën njäˈäwëm wiˈixë Jesus të xytsyojkëm, ta niˈigyë ntsokäˈänëm ets nyajmëjpëtsëmäˈänëm. Ko yajxon njaygyujkëm ti Jyobaa të xytyukmëduˈunëm, ta nˈijxëm pën duˈun njukyˈäjtëm extëm mbäädë Jesus myëjpëtsëmy. ¿Wiˈix mbäät nduˈunëm?

⁸ Tsojkëp nbanëjkxëmë Jesusë yˈijxpajtën jantsy oyˈixyë (1 Pedro 2:21, TNM; 1 Fwank 2:6). Ko nmëmëdoˈowëmë Dios etsë Jesukristë, ta nyajnigëxëˈkëm ko ntsojkëm. Jesus jyënany: “Pën nyijäˈäp es tpaduny yëˈë nˈanaˈamënëts, yaˈijxëp kots xytsyeky. Esë nDeetyëts tsojkëp diˈibëts ëj xytsyojkp, es ëjts nandëˈën ntsokëpts, es ndukˈixëpts yëˈë” (Fwank 14:21; 1 Fwank 5:3).

9. ¿Ti jotmay niˈamukë nwinguwäˈkëm?

 ⁹ Oyxyëp ko nwinmäˈäyëm wiˈix nyajtunäˈänëmë jukyˈäjtën mä xëë poˈo kyëdaˈaky mä yajjamyatsäˈänyë Jesusë yˈoˈkën xëë (ixë rekuäädrë “¿Ti yˈandijpy?”). Nˈoknayajtëˈëwëm: “¿Wixatyëts tyam nbanëjkxë Jesusë yˈijxpajtën? ¿Jamëts muum xyˈaktëgoyˈäjtxë nnayaˈoyëdët?”. Jëjpˈam ets duˈun nnayajtëˈëwëm, mët ko mä tyäˈädë tiempë xytyuktunäˈänëmë naxwinyëdë jäˈäy tijaty yëˈë tyuundëp (Romanʉs 12:2). Ets pën kyaj nnaygyuentˈäjtëm, mbäät ogäˈän nduuntsondakëm tijaty tyuundëbë wijyjyaˈay, pënaty mëjpëtsëëmdëp ets pënaty mëj ijttëp mä jäˈäy yˈëyëˈëk kyuyattë (Kolosʉ 2:8; 1 Fwank 2:15-17). ¿Wiˈix mbäät njëjpkudijëm?

10. 1) ¿Tijaty mbäät nnayajtëˈëwëm mä xëë poˈo kyëdaˈaky mä yajjamyatsäˈänyë Jesusë yˈoˈkën xëë? 2) ¿Mäjatyëdaa mbäät nnayajtëgäjtsëm? (Ixë dibujë mä tsyondaˈaky).

¹⁰ Mä xëë poˈo kyëdaˈaky mä yajjamyatsäˈänyë Jesusë yˈoˈkën xëë, oyxyëp ko nˈijxëm wiˈix yajpääty ja wit xox, ti ëy ti yaˈaxy nmëdoowˈijtëm, ti pelikula nˈijxëm, tijaty nmëdäjtëm mä selulaar, mä komputadoorë o mä tabletë. Nˈoknayajtëˈëwëm: “¿Nmëtsoytyunëbëtsë Jesus kojëts xyˈixët wiˈixëts të nnayxyoxyëty?” (käjpxë 1 Timotee 2:9, 10). “Extëmëts nnayxyoxyëty, ¿nyaˈijxëbëts ko yëˈëjëts nbanëjkxëbë Jesusë yˈijxpajtën? ¿Yˈoyˈixëbëdaa Jesus ja pelikula diˈibëts nˈijxypy ets ja ëy yaˈaxy diˈibëts nmëdoowˈijtypy? ¿Ndukˈanuˈkxëbëtsë Jesus yëˈë ndelefënëts o ndabletëts? ¿Ndukˈixëbëtsë Jesus tijaty bideojueegëts nmëdäjtypy ets ndukmëtmaytyäˈägëbëts tikots yëˈë nˈoyˈixy?”. Pën ntsojkëmë Jyobaa, jëjpˈam nyajjëgaktäˈäyëm tijaty kyaj mbäät tuˈugë Dios mëduumbë tmëdaty, oy tsooxë të njajuˈuyëm (Apostʉlʉty 19:19, 20). Ko ojts nnaywyandakëm mä Jyobaa, ta ojts nˈanmäˈäyëm ko njukyˈatäˈänëm extëm mbäädë Jesus myëjpëtsëmy. Pääty nitiixyëp mbäät ngamëdäjtëm diˈib xyajtuˈudujkëm parë kyaj nbanëjkxëmë Jesusë yˈijxpajtën (Matewʉ 5:29, 30; Filipʉs 4:8).

11. 1) ¿Tijaty mbäät nˈaktuˈunëm pën ntsojkëmë Jyobaa mëdë Jesus? 2) ¿Ti mbäät ndukmëduˈunëmë nmëguˈukˈäjtëm?

¹¹ ¿Ti mbäät nˈaktuˈunëm pën ntsojkëmë Jyobaa mëdë Jesus? Ko ndukxondakëm mä ngäjpxwäˈkxëm ets mä jäˈäy nyaˈëxpëjkëm (Matewʉ 28:19, 20; Lukʉs 4:43). Pääty, mä wyingonyë Jesusë yˈoˈkën xëë, ¿tiko ngatukniwijtsëm parë nduˈunëm prekursoor ausilyaar? Mbäät ngëyäjkëm 30 oorë o 50 oorë. Tuˈugë nmëguˈukˈäjtëm diˈib jyëmëjt 84 ets të kyuˈoˈknë, duˈunë nety wyinmay ko kyaj mbäät tyuny prekursoor ausilyaar mët ko të myëjjäˈäyënë ets yuumëët päˈämmëët yajpääty. Per ta ja prekursoorëty diˈib wingon tsënääytyëp pyudëjkëdë parë twinˈixët mä diˈibë territooryë mbäät kyäjpxwaˈkxy ets yˈanmääyëdë ko yajnëjkxäˈänëdë karroty. Ko duˈun yajpudëjkë, ta ojts kyäjpxwaˈkxy 30 oorë mä tuˈukpë poˈo. ¿Mbäät nanduˈun nbudëjkëm tuˈugë nmëguˈukˈäjtëm parë tyunët prekursoor marsë o abril? Kyaj niˈamukë mbäät nduˈunëm prekursoor, per mbäät nyajtuˈunëmë tiempë etsë jot mëjää parë niˈigyë nmëduˈunëmë Jyobaa. Pën nduˈunëm duˈun, ta nyajnigëxëˈkëm ko nmëjjäˈäwëm ko Jesus xytsyojkëm, extëm ttuunyë Pablo. ¿Tijaty mbäät nˈaktuˈunëm parë nyajnigëxëˈkëm ko nmëjjäˈäwëm ko Dios xytsyojkëm?

12. Pën ntsojkëm ets Dios xytsyojkëm, ¿ti mbäät nduˈunëm?

¹² Myëmajtsk pëky wiˈix mbäät nyaˈijxëm ko nmëjjäˈäwëm ko Jyobaa xytsyojkëm, yëˈë  ko ntsojkëm ja nmëguˈukˈäjtëm. Apostëlë Juan tkujäˈäyë: “Mët ko dëˈën ja Dios të xytsyojkëm, nandëˈën nnaytsyojkëm nixim niyam” (1 Fwank 4:7-11). Pën ntsojkëm etsë Dios xytsyojkëm, jëjpˈam ets nanduˈun ntsojkëmë nmëguˈukˈäjtëm (1 Fwank 3:16). ¿Wiˈix mbäät nyajnigëxëˈkëm?

13. ¿Ti oybyë ijxpajtënë Jesus ojts xymyoˈoyëm?

¹³ Jesus ojts tpëjtaˈagyë ijxpajtën wiˈix mbäät ntsojkëmë nmëguˈukˈäjtëm. Ko jyukyˈajty yä Naxwiiny, pyudëjkë jäˈäy diˈib niˈigyë yajtëgoyˈäjt. Yaˈˈagëdakë päˈäm jäˈäy, tekymyäˈät, wiints, nat etsë uum (Matewʉ 11:4, 5). Yëˈë kyaj duˈun jyaˈayˈajty extëm pënaty nyiwintsënˈäjttë relijyonk, pes tyukniˈˈixëyan pënaty yˈixyˈatandëbë Dios (Fwank 7:49). Tsyojkë jäˈäy diˈib yujy tudaˈaky ets tyuunë mëjää parë tpudëjkë (Matewʉ 20:28).

14. ¿Ti mbäät nduˈunëm parë nyaˈijxëm ko ntsojkëmë nmëguˈukˈäjtëm?

¹⁴ Mä xëë poˈo kyëdaˈaky mä yajjamyatsäˈäny ja Jesusë yˈoˈkën xëë, oyxyëp ko nwinmäˈäyëm wiˈix mbäät nbudëjkëmë nmëguˈukˈäjtëm extëm pënaty të myëjjäˈäyëndë. ¿Tiko nëjkx ngakuˈijxëmë duˈumbë nmëguˈukˈäjtëm? Mbäät nmënëjkxëmë käˈäy ukën, ndukpudëjkëm ti mä jyëën tyëjk, nwoownëjkxëm mä reunyonk o käjpxwäˈkxpë (käjpxë Lukʉs 14:12-14). Ko Dios xytsyojkëm, yëˈë diˈib mbäät xypyudëjkëm parë nˈëxtäˈäyëmë winmäˈäny wiˈix mbäät nyajnigëxëˈkëm ko ntsojkëmë nmëguˈukˈäjtëm.

15. ¿Ti tsojkëp tkupëktët niˈamukë Adángë tyëëm yˈääts?

¹⁵ Myëdëgëëk pëky wiˈix mbäät nyaˈijxëm ko nmëjjäˈäwëm ko Jyobaa xytsyojkëm, yëˈë ko amumduˈukjot nbokymyaˈkxëmë nmëguˈukˈäjtëm. Niˈamukë të xynyinäjxëm ja poky ets ja oˈkën diˈibë Adán ojts xytyukmëwëˈëmëm, pääty nipën mbäät kyajënäˈäny: “Kyajts nyajtëgoyˈatyë Jesus xykyuˈoogët”. Pes axtë mas oybyë Dios mëduumbë dyajtëgoyˈaty yajjuuybyëtsëmët. Niduˈuk niduˈuk mëjwiin kajaa nmënuˈkxyˈäjtëmë Jyobaa, per yëˈë të xynyimaˈkxëm. ¿Tiko jyëjpˈamëty ngupëjkëm? Min nˈokˈijxëm wiˈixë Jesus tˈatsoowëmbity mä tuˈugë ijxpajtën diˈib pyëjtak.

16, 17. 1) ¿Ti Jesus tukniˈˈixëyan ko tmaytyaky ja rey mët ja tyuumbë diˈib nyimaˈkx ja nyuˈkxy? 2) ¿Ti net mbäät nduˈunëm extëm të nˈijxëmë tyäˈädë ijxpajtën?

¹⁶ Jesus ta tmaytyaky tuˈugë mëduumbë diˈibë nety ja rey myënuˈkxyˈajtypy 60 miyongë platë meeny, per ta ja rey ojts nyimeˈkxyëty ets kyaj tyukëbajtë. Ok, ta tyäˈädë mëduumbë tpaty ja myënuˈkxy, diˈib kamëgëbajtëp jeˈeyë 100 platë meeny. Koxyëbë tyäˈädë mëduumbë tmëjjäˈäwë ko ja rey nyimaˈkxë, nan ojtsxyëp tnimeˈkxy ja myëguˈuk. Pääty ko ja rey tnijäˈäwë wiˈix të yˈadëˈëtsy, ta jyantsy jyotˈambëjky. Ta tmëjwooy ets tˈanmääy: “Ëj tëts mij nmeˈxy tëgekyë yëˈë mniˈxy mët ko të xymyënuˈxtaˈagyëts. Mij nan mbäätxyëp të xymyëmaˈxtiky ja mmëmëduumbë, extëmëts  ëj mij të nbaˈˈayoy” (Matewʉ 18:23-35). ¿Ti diˈibë Jesus tukniˈˈixëyan mëdë tyäˈädë ijxpajtën? Ko duˈun extëm ja rey ojts ja tyuumbë tnimaˈkxë ja nyuˈkxy, nanduˈunë Jyobaa mëjwiin kajaa të tnimeˈkxy ja nbokyˈäjtëm. Pääty, ¿tixyëbë net mbäät nduˈunëm?

¹⁷ Mientrës njëjpˈijxëm mä yajjamyatsäˈänyë Jesusë yˈoˈkën xëë, nˈoknayajtëˈëwëm: “¿Tëjëts axëëk xyajnayjawëty tuˈugë nmëguˈukˈäjtëm? ¿Xytsyiptakxëbëts nbokymyaˈkxët?”. Pën duˈun, nˈokpanëjkxëmë yˈijxpajtënë Jyobaa diˈib listë ijtp parë xypyokymyaˈkxäˈänëm (Salmo 86:5; Nehemías 9:17). Pën nmëjjäˈäwëm ko Jyobaa xypyokymyaˈkxëm, ta nbokymyaˈkxëm amumduˈukjot ja nmëguˈukˈäjtëm. Pes kyaj mbäädë Jyobaa xytsyojkëm ets xypyokymyaˈkxëm, pën kyaj nbokymyaˈkxëm ja nmëguˈukˈäjtëm (Matewʉ 6:14, 15). Ko nbokymyaˈkxëm ja nmëguˈukˈäjtëm, kyaj mbäät dyajtëgatsy diˈib të tyuny të jyatyëty, per mbäät xypyudëjkëm parë njukyˈäjtëm agujk jotkujk.

18. ¿Ti pudëjkë Lily parë tmëmadaky extëmë nety jyaˈayˈaty ja Carol?

¹⁸ Tsiptakp näˈäty duˈunyë nyajnäjxëm mäjaty tyëgoytyë nmëguˈukˈäjtëm (käjpxë Éfesʉ 4:32). Min nˈokˈijxëm wiˈix jyajtyë Lily. ^[1] Yëˈë ojts nyayˈawanëty parë tpudëkëyaˈanyë Carol, tuˈugë nmëguˈukˈäjtëm diˈib të kyuˈoˈknë. Yëˈë mumaty myënëjkxypy, tpudëkë parë tijaty nëjkx tjuuyë, ets jam tijaty tˈaktukpudëkë. Per oy duˈunë Lily tjapudëjkë Carol, xëmë yˈabejty kyutujky. Näˈäty, ojts tsyiptakxëty parë mëët oy nyaymyënëjkxëdët, per tyuunë mëjää parë kyaj yëˈëyë tˈixët mäjaty tyëgoy. Ko duˈunë Lily ttuuny, yëˈë pudëjkë parë kanäk jëmëjt tkuentˈäjtyë Carol axtë ko pyäˈämbejty ets yˈoˈky. Lily jyënaˈany: “Nˈixaambyëtsë Carol ko ja oˈkpë jyukypyëktët parëts nˈixyˈatäˈäny ko nety yajpatnë wäˈätsjäˈäy”. Ëtsäjtëm nan mbäät duˈunyë nyajnäjxëm mäjaty tyëgoytyë nmëguˈukˈäjtëm pën nmëjjäˈäwëm ko Jyobaa xytsyojkëm. Nan yëˈë xypyudëkëyäˈänëm parë nˈawijxëm njëjpˈijxëm ets jyäˈtët ja xëë ko nety nyajpatëm wäˈätsjäˈäy ets kyaj nekytyëgoˈoyëm.

19. ¿Ti mbäät nduˈunëm pën nmëjjäˈäwëm ti Dios të xytyukmëduˈunëm?

¹⁹ Mëjwiin kajaa tsyobääty ja regalë diˈibë Jyobaa të xynyamoˈoyëm. Pääty mä xëë poˈo kyëdaˈaky mä yajjamyatsäˈänyë Jesusë yˈoˈkën xëë, nˈokjuˈtëmë tiempë parë nwinmäˈäyëm tijatyë Jyobaa mëdë Jesus të xytyukmëduˈunëm ets nˈokˈyaˈijxëm tuˈuk tuˈugë xëë ko nmëjjäˈäwëm. Nˈokpanëjkxëmë Jesusë yˈijxpajtën, nˈoktsojkëmë nmëguˈukˈäjtëm ets nˈokpokymyaˈkxëm amumduˈukjot.