ARTIKULO MËDIˈIBË YAˈËXPËJKP 5
Nˈokˈyajtuˈunëm yajxonë tiempë
“Ixtë yajxon ets mjukyˈattët extëmë jäˈäy mëdiˈibë wijy ets kyaj extëm mëdiˈibë kyaj wyijˈyëty. Yajtundë yajxonë mdiempë” (EFES. 5:15, 16, TNM).
ËY 8 Jyobaa yëˈë diˈib nˈaˈoˈkëm
MËDIˈIBË YAJNIMAYTYÄˈÄGÄÄMP *
1. ¿Wiˈix mbäädë tiempë nyajnäjxëm mëdë Jyobaa?
JANTSY oy nnayjyäˈäwëm ko nyajnäjxëmë xëëw tiempë mëdë jäˈäy mëdiˈibë ntsojkëm. Extëm nˈokpëjtakëm, ko kasäädë jäˈäy nimajtsk dyajnaxtë xyëëw tiempë jantsy agujk jotkujk nyayjyawëdë. Etsë ënäˈktëjk, agujk jotkujk nanduˈun nyayjyawëdë ko yajpäättë mëdë myëtnaymyaayëbëty. Niˈamukë agujk jotkujk nnayjyäˈäwëm ko nyajpatëm mët ja nmëguˈukˈäjtëm. Per mëdiˈibë mas jëjpˈam, yëˈë ko tiempë nyajnäjxëm mëdë Jyobaa. ¿Wiˈix mbäät duˈun nduˈunëm? Ko nmënuˈkxtakëm, ngäjpxëmë Biiblyë, nbawinmäˈäyëm tijaty tyuknibëjktakëp ets wiˈixën yëˈë jyaˈayˈaty. ¡Mëjwiin kajaa nyajtsobatëm ko tiempë nyajnäjxëm mëdë Jyobaa! (Sal. 139:17).
2. ¿Tiko xytsyiptakxëm njuˈtëmë tiempë parë nmënuˈkxtakëmë Jyobaa ets nˈëxpëjkëmë Biiblyë?
2 Njamënuˈkxtäˈägäˈänëmë Jyobaa ets njakäjpxäˈänëmë Biiblyë, per xytsyiptakxëm duˈun nduˈunëm. Tsip njuˈtëmë tiempë parë nduˈunëmë Diosë tyuunk mët ko xëmë nmëdäjtëmë tuunk. Mbäädë net nnayjyäˈäwëm ko kyaj tiempë nekymyëdäjtëm parë nmënuˈkxtakëmë Jyobaa, nˈëxpëjkëmë Biiblyë ets parë nbawinmäˈäyëm, mët ko nmëdäjtëmë familyë o wiˈixëm ja tuunk ayoˈon.
3. ¿Mä ja tuk pëky mbäät nnaygyuentëˈäjtëm?
3 Ta tuk pëky mëdiˈibë mbäädë tiempë xypyëjkxëm ets kyaj nbëjkëmë kuentë. Pën kyaj nnaygyuentëˈäjtëm, mbäät jamë xëëw tiempë nyajtuˈunëm mä mëdiˈibë kyaj tyimjëjpˈamëty ets kyaj net ja tiempë nekymyëdäjtëm parë nmëwingoˈonëmë Jyobaa. Extëm nˈokpëjtakëm, kyaj wiˈixëty ko näˈäganäˈäty nboˈkxkojëm o nˈijtkoj nxoˈongojëm tuk ratë. Per pën ndimyˈyaˈoˈktëˈëwëm, mbäädë net kyaj tiempë nekymyëdäjtëm parë nduˈunëmë Diosë tyuunk. Pääty oy ko nnaygyuentëˈäjtëm ets kyaj nnaytyukwinˈëˈënëm ja ixy jawë o ja ëyëˈk kuyäjtk (Prov. 25:27; 1 Tim. 4:8).
4. ¿Ti nˈixäˈänëm mä yäˈädë artikulo?
4 Mä yäˈädë artikulo nˈixäˈänëm ti mbäät nbëjktakëm jëjpˈam mä jukyˈäjtën. Nanduˈun nˈixäˈänëm wiˈix mbäät oy nyajtuˈunëmë tiempë parë nyajpatëm mëdë Jyobaa ets wiˈix ndukˈoyˈatäˈänëm ko duˈun nduˈunëm.
TUN MËDIˈIBË OY ETS IX TI JËJPˈAM MBËJKTÄˈÄGAAMPY MÄ MJUKYˈÄJTËN
5. Extëm jyënaˈanyë Efesios 5:15-17, ¿wiˈix mbäät pyudëkëdë ënäˈktëjk parë tnijawëdët mëdiˈibë tuˈu pyanëjkxtëp?
5 Nˈokwinˈijxëm ja nëˈë tuˈu mëdiˈibë mbäät xyajnëjkxëm mä jukyˈäjtën. Mayë ënäˈktëjk yëˈëdën myëmääy myëdäjtëp. Pes mä yˈeskuelëˈattë, mbäädë myaˈestrëtëjk ets ja jyëëky myëguˈuk mëdiˈibë kyaj yˈëxpëktë yˈanëˈëmxëdë parë niˈigyë yˈakˈëxpëktët mä unibersidad, duˈun tmëdattët oy ja tyuunk ets tpäättëdë myeeny syentääbë. Per ko duˈun ttundët, mbäät net niˈigyë ja xyëëw tiempë pyëjkxëdë. Ets mbäät ja tyääk tyeety o ja nmëguˈukˈäjtëm mëdiˈibë mëët tuˈugyë yˈëxpëktë, yˈanëˈëmxëdë parë niˈigyë xyëëw tiempë dyajtundët mä Diosë tyuunk. ¿Ti pudëkëyanëp ja kiixy o ja mixy mëdiˈibë tsyojkypyë Jyobaa parë ttunët mëdiˈibë oy? Yëˈë ko tkäjpxët ets tpawinmayët extëm jyënaˈanyë Efesios (käjpxë Efesios 5:15-17, TNM). * Ko nety të tkäjpxtäˈäy, ta net nyayajtëwëdët: “¿Titsë Dios xytyukmëtsojkp ndunët? ¿Mëdiˈibëdaa tyukjotkëdäˈägëp? ¿Mëdiˈibë tuˈujëts mbäät nmatsy parëts yajxonë ndiempë nyajtunët?”. Nˈokjamyajtsëm “ko tsiptakp ja xëëw tiempë” ets ko timjëjptëgoyanëbë Satanásë yˈanaˈamdakn. Pääty mas oy ko nyajtuˈunëmë xëëw tiempë mä tijatyë Jyobaa yajnayjyawëdëp jotkujk.
6. ¿Ti María wyinˈijx, ets tiko njënäˈänëm ko yëˈë mëdiˈibë mas oy?
6 Nˈokˈijxëm ti jëjpˈam nbëjktakëm mä jukyˈäjtën. Tsojkëp nˈijxëm wiˈix mbäät yajxonë tiempë nyajtuˈunëm. Näˈäty, njaˈˈaduunmukäˈänëm tijaty ets kyaj wiˈixëty, per tsojkëp nˈijxëm ti mas jëjpˈam ndunäˈänëm. Min nˈokˈijxëm wiˈix jyajtyë María mëdë Marta ko Jesus ojts kyuˈixëdë. Marta jantsy oyjyaˈayë nety ets jantsy agujk jotkujk nyayjyäˈäwëdë ko Jesus ojts kyuˈixëdë mä jyëën tyëjk, päätyë Marta tjantsy nyiˈˈijxë ja käˈäy ukënë. Per ja María, yëˈë pyuwäˈtsë Jesus ets tmëdoowˈijty tijatyë nety tukniˈˈixëyanëdëp. Kyaj wyiˈixëty ti Marta tyuun, perë Jesus jyënany ko María yëˈë nety “të twinˈixy yëˈë oybyë” (Luk. 10:38-42). Ko tiempë nyajxy, waˈanë María tjäˈäytyëgooy ti yaˈoˈoyëdë parë ojts kyay yˈuuktë, per ninäˈä tkajäˈäytyëgooy tijatyë Jesus tukniˈˈijxëdë. María yëˈë jëjpˈam pyëjktak, ko dyajnaxyë xyëëw tiempë mëdë Jesus. Ëtsäjtëm mbäät nanduˈun nduˈunëm ko nyajnäjxëmë xëëw tiempë mëdë Jyobaa. Per ¿wiˈix mbäät yajxon nyajtuˈunëm ja tiempë?
NˈOKˈYAJTUˈUNËM YAJXONË TIEMPË KO NETY NYAJPAJTËM MËDË JYOBAA
7. ¿Tiko jyëjpˈamëty nnuˈkxtakëm, nˈëxpëjkëm ets nbawinmäˈäyëm?
7 Nˈokjamyajtsëm ko nnuˈkxtakëm, nˈëxpëjkëm ets nbawinmäˈäyëm, duˈunën nDiosmëduˈunëm. Ko nnuˈkxtakëm, yëˈë nmëtmaytyakëm ja nDeetyˈäjtëm mëdiˈibë nëgooyë xytsyojkënë (Sal. 5:7). Ko nˈëxpëjkëmë Biiblyë, ta nbäädäˈänëm ja “Diosë yˈëxpëjkën”, pes nipën duˈun kyawijˈyëty extëmë Jyobaa (Prov. 2:1-5). Ko nbawinmäˈäyëm, jaa mä nˈijxëm wiˈixënë Jyobaa jyaˈayˈaty ets nanduˈun nwinmäˈäyëm tijaty të ttuknibëjktäägë parë ëtsäjtëm ets parë niˈamukë naxwinyëdë jäˈäy. Ko duˈun nduˈunëm, yajxonë nety ja tiempë nyajtuˈunëm, pes kyaj nëgoo nmëdäjtëm. Per ¿ti xypyudëkëyäˈänëm parë yajxonë tiempë nyajtuˈunëm?
¿Mbäät xyˈëxtäˈäyë lugäär mä kyaj jyaˈˈatyë naynyaˈamë parë naytyuˈuk mˈëxpëkët? (Ixë parrafo 8 etsë 9).
8. ¿Ti ijxpajtënë Jesus pyëjktak ko ojts nyijkxy mä ja lugäärë äänëˈëk tëëtsëˈëkpë?
8 Oy ko nˈëxtäˈäyëm tuˈugë lugäär mä kyaj nëgoo jyaˈˈatyë naynyaˈamë. Nˈokjamyajtsëm ti Jesus tyuun ko nety dyajtsondäˈägäˈänyë Diosë tyuunk yä Naxwiiny, ojts nyijkxy 40 xyëëw mä lugäärë äänëˈëk tëëtsëˈëkpë (Luk. 4:1, 2). Jam mä nyuˈkxtaky ets tpawinmääy wiˈixë nety ttunanë ja Tyeetyë tyuunk. Ko duˈun ttuuny, yëˈë pudëjkë parë tmëmadaky ja amay jotmay mëdiˈibë tukmiin tukëdakë. ¿Ti xytyukniˈˈijxëmë yˈijxpajtënë Jesus? Pën nimay ndukfamilyëˈäjtëm, tsip näˈäty nbatëmë lugäär mä kyaj jyapˈatyë naynyaˈamë jënoty tëgoty. Pën nbatëmë duˈumbë jotmay, ¿tiko muum wiinktsoo nganëjkxëm? Min nˈokˈijxëm wiˈix ttunyë Julie mëdiˈibë tsënaapy Francia mëdë myëmëjjäˈäy. Yëˈëjëty jap tsyëënëdë mä tuˈugë mutsk kuartuˈunk, ets tsiptakxëp yajpäädët naytyuˈuk mëdë Jyobaa parë tmënuˈkxtäˈägët mä kyaj jyapˈatyë naynyaˈamë. Pääty, ¿ti tyuumpy parë mëdë tiempë dyajnaxyë Jyobaa ets tmënuˈkxtaˈaky? Yëˈë jyënaˈany: “Bom bomëts nëjkxy mä tuˈugë parke ets japëts mä naytyuˈuk nyajpääty. Mbäädëts tsuj yajxon nmëtkajpxy nmëtmaytyaˈagyë Jyobaa etsëts aduˈuk ja njot nwinmäˈäny nbëjktaˈaky”.
9. Oyë Jesus tmëdäjty mayë tyuunk, ¿wiˈix dyajnigëxëˈky ko yajtsobatypyë nety ko nyaymyayëty mëdë Jyobaa?
9 Jesus ninäˈä ojts kyapoˈkxy. Xëmë yajpaty mëdë jäˈäy mëdiˈibë yajtëgoyˈäjttë naybyudëkë oy mää ojts nyijkxy. Biiblyë jyënaˈany ko tëgok, ta “ja kugäjpnëty myiindë tëjkˈagëˈëm mä nety ja Jesus” parë tˈixäˈändë. Jesus xëmë tjuˈtyë tiempë parë dyajkëktëjkë ja nyaymyayë mëdë Jyobaa, oy may ja tyuunk tjamëdäjty. Biiblyë nanduˈun jyënaˈanyë ko “monyëm, määnëmë nety wyingootsëty, ja Jesus pyëdeˈky es oj nyejxy adëkëtuuy” parë nyuˈkxtäˈägäˈäny (Mar. 1:32-35).
10, 11. Extëm jyënaˈanyë Matewʉ 26:40, 41, ¿wiˈixë Jesus tˈanmääyë ja yˈapostëlëtëjk jam Getsemaní, ets ti tuun jäjtë?
10 Ko netyë Jesus dyajjëjpkëjxnë ja Tyeetyë tyuunk yä Naxwiiny, ja ux mä nety yajmatsanë, ta ojts nyijkxy Getsemaní mä tuˈugë lugäärë aduˈuktuuybyë parë jam ja Tyeety tmënuˈkxtäˈägäˈäny ets wyinmayaˈany (Mat. 26:36). Jam mä ja yˈëxpëjkpëty tˈanmääytyë ko jëjpˈam parë nyuˈkxtäˈäktët.
11 Min nˈokˈijxëm ti tuun jäjtë. Ko Jesusë myëtsipëty jyäjttë Getsemaní, waˈan jyäjttë naa tsuˈumgujkmën, të nety jyantsy kyootsënë. Mä netyë Jesus kyanëjkxynyëm nuˈkxtakpë, ta tˈanmääy ja yˈapostëlëtëjk parë nyayaˈitëdët wijy kejy (Mat. 26:37-39). Per ko jyëmbijty, të nety jyantsy myäädëgoytyë. Ta jatëgok tˈanmääy ja yˈapostëlëtëjk: “Wijtë es käjxtäˈäktë” (käjpxë Matewʉ 26:40, 41). Jesus nyijäˈäwëbë nety ko ja yˈapostëlëty të jyantsy yˈanuˈkxëdë ets määy täjtëp. Pääty tpaˈˈayoowdë ets tˈanmääytyë ko ja “niniˈx kyaj oy tmëdanë”. Per ta jatëgok tˈanmääy parë nyuˈkxtäˈäktët, ko jyëmbijty mä myëmajtskˈokpë, duˈunyëm tpäättë, të myanäjxtäˈäytyë (Mat. 26:42-45).
¿Mbäät xymyënuˈkxtaˈagyë Jyobaa mä kyaj nëgoo mˈanuˈkxë? (Ixë parrafo 12).
12. ¿Ti mbäät nduˈunëm pën të njantsy anuˈkxëm o kyaj oy nnayjyäˈäwëm parë nnuˈkxtakëm?
12 Nˈokˈijxëm näˈä mbäädë Jyobaa nmënuˈkxtakëm. Näˈäty, mbäät kyaj oy nnayjyäˈäwëm o të njantsy anuˈkxëm ets kyaj mbäät nekymyënuˈkxtakëmë Jyobaa. Per kyaj miitsëty duˈun mnayjyawëty, nanduˈun nyayjyawëdë näägë nmëguˈukˈäjtëm. ¿Ti mbäät nduˈunëm? Näägë nmëguˈukˈäjtëm mëdiˈibë nety të tˈijxwëˈëmdë nyuˈkxtäˈäktë uxëp, të tˈixtë ko mas oy ko jopyëp tmënuˈkxtäˈäktë Jyobaa, pes wijy kujk yajpäättë. Ta net nääk mëdiˈibë të tpëktë kuentë ko pën unyaaytyëp o koxtënääytyëp, niˈigyë jamë jyot wyinmäˈäny tpëjktäˈäktë mä tmënuˈkxtäˈäktë Jyobaa. ¿Ets ti mbäät nduˈunëm pën jam ti njantsy myëmäˈäy njantsy nmëdäjëm o kyaj oy nnayjyäˈäwëm parë nnuˈkxtakëm? Nˈokˈanmäˈäyëmë Jyobaa wiˈix nnayjyäˈäwëm, pes yëˈë xypyaˈˈayowäˈänëm ets jyaygyukëyaampy wiˈix nnayjyäˈäwëm (Sal. 139:4).
¿Mbäät xytyunyë mëjääw parë kyaj xyˈatsoowëmbitëdë mensaje o korree mä meerë tyunyëtyë reunyonk? (Ixë parrafo 13 etsë 14).
13. ¿Ti mbäät nduˈunëm ko nety nyajnäjxëmë tiempë mëdë Jyobaa?
13 Nˈokpëjktakëm aduˈugë jot winmäˈäny mä jam nˈëxpëjkëm. Ja tuk pëky ti mbäät xypyudëjkëm parë nyajkëktëjkëmë naymyayë mëdë Jyobaa, yëˈë ko nˈëxpëjkëmë yˈAyuk ets nëjkxëm reunyonk. ¿Ti mbäät nduˈunëm parë aduˈugë jot winmäˈäny nbëjktakëm mä nˈëxpëjkëm o nreunyonkˈäjtëm? Oy ko nˈijxëm ti wiinktsoo ja jot winmäˈäny yajnëjkxypy. ¿Waˈandaa ko jyaˈty tuˈugë yamaadë, tuˈugë korree o tuˈugë mensaje mëdiˈibë yajkajxp mä telefënë? ¿O jam ti wiinkpë mëdiˈibë wiinktsoo ja jot winmäˈäny yajnëjkxypy? Tyam mayë jäˈäy dyajtundë selulaar o tabletë. Näägë ëxpëkyjyaˈay jyënäˈändë ko pën tuˈugë jäˈäy jamyë tmëdaty wingonë tyelefënë, mbäät kyaj ja jyot wyinmäˈäny tpëjtaˈaky mä ti jam tyuumpy. Tuˈugë jäˈäy mëdiˈibë të tniˈëxpëkë Psicología, jyënaˈany: “Wiinktsoo ja mjot mwinmäˈäny nyijkxy pën kyaj jam xypyëjktaˈaky mä tijaty mduumpy”. Pën mä kyatsondaˈakynyëmë asamblee yaˈˈanmäˈäyëm parë nyajpiˈtsëm ja selulaar o tabletë parë kyaj nduknaˈamëm ja nmëguˈukˈäjtëm, ¿tiko nanduˈun ngatuˈunëm ko nety nmënuˈkxtäˈägäˈänëmë Jyobaa, nˈëxpëkäˈänëm ets ko nety nyajpatëm reunyonk parë aduˈuk ja jot winmäˈäny nbëjktakëm?
14. Extëm jyënaˈanyë Filipʉs 4:6, 7, ¿wiˈix mbäädë Jyobaa xypyudëjkëm parë jamë jot winmäˈäny nbëjktakëm mä tijaty nduˈunëm?
14 Nˈokmënuˈkxtakëmë Jyobaa parë jot winmäˈäny nbëjktakëm mä tijaty ndunäˈänëm. Pën ëxpëjkëm o yajpatëm reunyonk ets nˈijxëm ko kyaj jamë jot winmäˈäny nbëjktakëm, nˈokmënuˈkxtakëmë Jyobaa parë yëˈë xypyudëjkëm. Pën jam ti nmëmäˈäy nmëdäjëm, mbäädë net kyaj aduˈuk ja jot winmäˈäny nbëjktakëm mä Diosë tyuunk, per jëjpˈam ets duˈun nduˈunëm. Nˈokmënuˈkxtakëmë Jyobaa parë xymyoˈoyëm ja agujkˈäjt jotkujkˈäjtën mëdiˈibë kyuwaampy ja jot korasoon ets ja jot winmäˈäny (käjpxë Filipʉs 4:6, 7).
NDUKˈOYˈÄJTËM KO NYAJNÄJXËMË TIEMPË MËDË JYOBAA
15. ¿Wiˈix ndukˈoyˈäjtëm pën nyajnäjxëmë tiempë mëdë Jyobaa?
15 Mëjwiin kajaa ndukˈoyˈatäˈänëm pën nyajnäjxëmë tiempë mëdë Jyobaa parë ngäjpx nmaytyakëm, nmëdoowˈijtëm wiˈix xyˈanmäˈäyëm ets nwinmäˈäyëm pënën yëˈë. ¿Wiˈix mbäät xypyudëjkëm? Tim jawyiin, nëjkxëp yˈoybyëtsëmy tijaty ndunäˈänëm. Pesë Biiblyë jyënaˈany ko “pën näjx tëjkëp mëdë kuwijypyë nanduˈun jyëmbitäˈäny kuwijy” (Prov. 13:20). Pääty pën niˈigyë mëdë xëëw tiempë nyajnäjxëmë Jyobaa, ja Diosë mas wijypyë, ta nanduˈun njëmbitäˈänëm jantsy wijy. Njaygyukëyäˈänëm mas niˈigyë ti mbäät nduˈunëm parë xytyukjotkëdakëmë Jyobaa ets kyaj ndunäˈänëm mëdiˈibë mbäät yajtsayutyëty ja jyot kyorasoon.
16. ¿Wiˈix xypyudëjkëm parë oyë jäˈäy nyaˈëxpëjkëm ko nyajnäjxëmë tiempë mëdë Jyobaa?
16 Myëmajtsk pëky, yëˈko nëjkxëp mas oyë jäˈäy nyaˈëxpëjkëm. Tuk pëky tiko jäˈäy nyaˈëxpëjkëm, yëˈë parë nbudëjkëm ets niˈigyë Jyobaa tmëwingondët. Ko niˈigyë xëëw tiempë nyajnäjxëm mëdë Jyobaa ets mëët ngäjpx nmaytyakëm, ta niˈigyë ntsokäˈänëm ets niˈigyë nnijawëyäˈänëm wiˈix mbäädë jäˈäy nyaˈëxpëjkëm parë nanduˈun ttsokëdë Jyobaa. Duˈunën ttuunyë Jesus, yajnigëxëˈk ko mëkë nety ttsokyë Tyeety ko ojts tnigajpxy tnimaytyaˈaky, pääty ja yˈëxpëjkpëty mëk nanduˈun ojts ttsoktë Jyobaa (Fwank 17:25, 26).
17. ¿Wiˈix xypyudëjkëm ko nnuˈkxtakëm ets nˈëxpëjkëm parë niˈigyë mëbëjkën kyëktëkët?
17 Myëdëgëk pëky, yëˈko niˈigyë ja mëbëjkënë kyëktëkëyaˈany. Nˈokwinmäˈäyëm ko Jyobaa nmënuˈkxtakëm parë xypyudëjkëm, xyjyotkujkmoˈoyëm ets xynyëˈëmoˈoy xytyuˈumoˈoyëm. Koogoo tˈatsoowëmbity, ta niˈigyë mëbëjkënë kyëktëkë (1 Fwank 5:15). Ja tuk pëky ti mbäät niˈigyë dyajkëktëkë mëbëjkën, yëˈë ko naytyuˈuk nˈëxpëjkëm. Pesë Biiblyë jyënaˈany ko “myëbëjktëp ja jäˈäy ja Dios ko tˈamëdoonaxtë ja ayuk” (Rom. 10:17). Yäˈädë yëˈë xytyukˈijxëm ko kyaj jeˈeyë tsyokyëty tijaty njäjt nnijäˈäwëm parë mëk ja mëbëjkën nmëdäjtëm. ¿Tijaty aktsojkëp nduˈunëm?
18. Okpëjktäˈäk tuˈugë ijxpajtën wiˈix xypyudëjkëm ko nbawinmäˈäyëm tijatyë Jyobaa të ttuny.
18 Tsojkëp nbawinmäˈäyëm tijaty nˈëxpëjkëm. Min nˈokˈijxëm ti tyuun mëdiˈibë jyaayë Salmo 77. Wyinmääy ko kyaj netyë Jyobaa yˈokkupëjkënë mët ja myëguˈuktëjk, nëgooyë ojts tmëmääy tmëdäjnë axtë kyaj ojts yˈokmää yˈokpoˈkxnë (bersikulo 2-8). ¿Ti net tyuun? Ta tˈanmääyë Jyobaa: “Yëˈëts nwinmayaampy tëgokyë tijaty të xytyuny ets nbawinmayaˈanyëts wiˈix tijaty xytyuny” (bersikulo 12). Yëˈë wäˈätsë nety tnijawë tijatyë Diosë nyax kyäjpn tyukmëduun. Per duˈunyëm nyayajtëëwë: “¿Waˈandaa Dios të xyˈijxtëgoˈoy të xyjyaˈaytyëgoˈoyëm, o waˈandaa të xytyukjotˈambëjkëm ets kyaj xynyekypyaˈˈayoˈowëm?” (bersikulo 9). Mëdiˈibë jyaayë yäˈädë Salmo, pyawinmääy tijatyë Jyobaa tyuun ets wiˈix tpaˈˈayooy ja israelitëty (bersikulo 11). ¿Wiˈix wyimbëtsëëmy ko duˈun tpawinmääy? Niˈigyë yˈijty seguurë ko Jyobaa ninäˈä tkamastuˈudäˈänyë nyax kyäjpn (bersikulo 15). Tyam, nanduˈun mbäät xypyudëjkëm ko nwinmäˈäyëm tijatyë Jyobaa të ttukmëdunyë nyax kyäjpn ets tijaty të xytyukmëduˈunëm, mbäät niˈigyë ja mëbëjkënë dyajkëktëkë.
19. ¿Wiˈix ja tuk pëky ndukˈoyˈatäˈänëm ko nyajnäjxëmë tiempë mëdë Jyobaa?
19 Myëmäjtaxk pëky, yëˈko niˈigyë ntsokäˈänëmë Jyobaa ets yëˈë mëdiˈibë mas jëjpˈam. ¿Tiko? Yëˈko tsojkën, niˈigyë xypyudëkëyäˈänëm parë nmëmëdoˈowëmë Jyobaa ets nduˈunëm ti yëˈë tyukjotkëdakypy oy ndimyˈyajnimëjääwdakëm. Ets xypyudëkëyäˈänëm parë nmëmadakëm oytyim ti jotmayëty (Mat. 22:37-39; 1 Kor. 13:4, 7; 1 Fwank 5:3). Nitii duˈun kyaˈoyëty extëm ko nnaymyaˈayëm mëdë nDeetyˈäjtëmë tsäjpotmëdë Jyobaa (Sal. 63:1-8).
20. ¿Ti mdunaampy parë niˈigyë tiempë xyajnaxët mëdë Jyobaa?
20 Nˈokjamyajtsëm ko nnuˈkxtakëm, nˈëxpëjkëm ets nbawinmäˈäyëm, duˈunën ja tuk pëky nDiosˈawdäjtëm. Nˈokpanëjkxëmë Jesusë yˈijxpajtën ets nˈokˈëxtäˈäyëmë lugäär mä kyaj jyaˈˈatyë naynyaˈamë parë nyajnäjxëmë tiempë mëdë Jyobaa. Ets ko nety jam nduˈunëmë Diosë tyuunk, nˈokmënuˈkxtakëm parë xypyudëjkëm ets jam aduˈugë jot winmäˈäny nbëjktakëm mä tijaty nduˈunëm. Pën nyajtuˈunëm yajxonë tiempë, nëjkxëbë Jyobaa xytyukumäˈäyëm ja jukyˈäjtënë mëdiˈibë winë xëëw winë tiempë (Mar. 4:24).
ËY 28 Wiˈix mbäät nnaymyaˈayëm mëdë Jyobaa
^ Jyobaa yëˈë ja mas oybyë mëtnaymyaayëbë. Nyajtsobatëm ko mëët nnaymyaˈayëm ets pääty nˈixyˈatäˈänëm tuˈuk tuˈugë xëëw. Tsojkëbë tiempë parë duˈun nduˈunëm, per tsiptakp mët ko niˈamukë nmëdäjtëmë tuunk ayoˈon. Pääty, ¿wiˈix mbäät njuˈtëm ja tiempë parë niˈigyë nmëwingoˈonëm ja nDeetyˈäjtëmë Jyobaa, ets wiˈix xypyudëkëyäˈänëm ko duˈun nduˈunëm? Mä yäˈädë artikulo nˈixäˈänëm.
^ Efesios 5:15-17, TNM: “Pääty ixtë yajxon ets mjukyˈattët extëmë jäˈäy mëdiˈibë wijy ets kyaj extëm mëdiˈibë kyaj wyijˈyëty. 16 Yajtundë yajxonë mdiempë, mët ko tsiptakp ja xëëw tiempë. 17 Pääty, këdii mnekykyujuundäˈäktë ets jaygyukëdë tidënë Dios tsyojkypy”.