1, 2. 1) ¿Wiˈix näägë jäˈäy wyinmaytyë mä ja madakënë diˈib nmëdäjtëm parë këˈëm nwinˈijxëm ti ndunäˈänëm? 2) ¿Wiˈixë Biiblyë jyënaˈany mä tyäˈädë madakën diˈib nmëdäjtëm? 3) ¿Tijaty yaˈˈatsoowëmbitäämp mä tyäˈädë artikulo?

TUˈUGË toxytyëjk duˈun tˈanmääyë myëtnaymyaayëbë ko nety kyaj tnijawë ti tyunëp: “Anmaagyëts tijëts ndunëp, këdiijëts xyajwinmay. Pes duˈun kyaj tsyiptaˈaky”. Tyäˈädë toxytyëjk jeˈeyë ttsejky yaˈˈanëëmët ti mbäät ttuny en lugäär dyajtunët ja madakën diˈibë Dios të myoˈoyëty: twinˈixët këˈëm ti tyunaampy. Ets ëtsäjtëm, ¿nwinˈixäˈänëm këˈëm ti ndunäˈänëm, o ntsojkëm etsë wiink jäˈäy xyˈanmäˈäyëm ti mbäät nduˈunëm? ¿Wiˈix nˈijxëm ja madakën diˈib nmëdäjtëm parë këˈëm nwinˈijxëm ti ndunäˈänëm?

² Wiˈixëmë jäˈäy wyinmaytyë mä tyäˈädë madakënë diˈib nmëdäjtëm. Nääk jyënäˈändë ko kyaj nmëdäjtëmë madakën parë këˈëm nwinˈijxëm ti ndunäˈänëm, mët ko Dios të ttukniwijtsënë wiˈix pën jyukyˈatäˈäny. Etsë wiinkpë jyënäˈändë ko mbäät këˈëm nwinˈijxëm ti ndunäˈänëm, per net pën nmëdäjtëm ja awäˈätstumˈäjtën parë nduˈunëm ti ndimtsojkëm. Perë Biiblyë jyënaˈany  ko Jyobaa ojts xyajkojëm mët ja madakënë parë këˈëm nwinˈijxëm ti ndunäˈänëm (käjpxë Josué 24:15). * Biiblyë nan yˈatsoowëmbijtypyë tyäˈädë yajtëˈëwën: ¿Yaˈˈawijtsp ja madakën diˈib nmëdäjtëm parë këˈëm nwinˈijxëm ti ndunäˈänëm? ¿Wiˈix mbäät nyajtuˈunëmë tyäˈädë madakën? ¿Wiˈix nyajnigëxëˈkëm ko njantsy tsyojkëmë Jyobaa mä nwinˈijxëm tijaty ndunäˈänëm? ¿Wiˈix nyajnigëxëˈkëm ko nwintsëˈkëm tijaty tyunandëbë nmëguˈukˈäjtëm? Yëˈë yaˈˈatsoowëmbitäämp mä tyäˈädë artikulo.

3. ¿Wiˈixë Jyobaa dyajtuny ja awäˈätstumˈäjtën diˈib myëdäjtypy parë ttunët ti tyim tunaampy?

³ Yëˈëyë Jyobaa diˈib yajpatp awäˈätstum parë ttunët ti tyim tunaampy, per mbäät xytyukniˈˈijxëm mëjwiin kajaa wiˈix dyajtunyë tyäˈädë madakën. Extëm nˈokpëjtakëm, Jyobaa yajtuunë tyäˈädë madakën parë twinˈijxy ja israelitëty ko tkäjpnˈatäˈäny (Deuteronomio 7:6-8). Ets pääty twinˈijxy parë yˈadëwët diˈibë nety të ttukwandaˈaky ja myëtnaymyaayëbë Abrahán (Génesis 22:15-18). Jyobaa nan xëmë dyajtunyë tyäˈädë madakën mëdë tsojkën etsë tëyˈäjtën, extëm dyajnigëxëˈky mä tjëjwijtsëmbijty ja israelitëty diˈib kyaj myëmëdoowë. Per ko jyodëmbijttë amumduˈukjot, ta tsyojkëdë Jyobaa ets pyaˈˈayoowëdë. Jyobaa jyënany: “Nyaˈˈagëdäˈägaambyëts pënatyëts të xymyëdëgoytyë. Ntsokandëbëts mët ko duˈunëts ntsojkënyëˈaty” (Oseas 14:4). Extëm nˈijxëm, Jyobaa yajtuumpy ja madakën diˈib myëdäjtypy parë tpudëkë wiinkpë. ¡Jantsy oyë ijxpajtën xymyoˈoyëm!

4, 5. 1) ¿Pën tim jawyiin yajtukumääy ja madakën parë këˈëm twinˈixët ti tyunaampy? 2) ¿Ti diˈib mbäät niˈamukë nnayajtëˈëwëm?

⁴ Jyobaa këˈëm ttukniwinmäˈäyë ko dyajkojäˈänyë anklëstëjk etsë naxwinyëdë jäˈäy, ets tmooy ja madakën parë këˈëm twinˈixtët ti tyunandëp. Jyobaa yëˈë tim jawyiin yajkojë Jesus ets duˈun ojts dyajkojy extëm yëˈë. Yëˈë diˈib tim jawyiin yajtukumääyë tyäˈädë madakën parë këˈëm twinˈixët ti tyunaampy (Kolosʉ 1:15). ¿Wiˈixë Jesus dyajtuunyë tyäˈädë madakën? Ko nety kyaminyëm yä Naxwiiny, yëˈë ojts twinˈixy ko kyaj tmastuˈudäˈänyë Dios ets ko kyaj tpuwäˈägëyaˈanyë Satanás mä tnibëdëˈëgyë Dios. Ets ko jyukyˈajty yä Naxwiiny, ojts tjëjpkudijë tijatyë Satanás jatukˈyajtëgoyanë (Matewʉ 4:10). Ja ux mä nety yajmatsanë, ta tmënuˈkxtakyë Tyeety ko yëˈë tyunanëbë tsyojkën. Tˈanmääy: “Tatë, pën mtsejpy, yajjëgaˈagë tyäˈädë basë. Per kyaj xytyunët extëmëts ëj ntseky, tun extëm mij xytsyeky” (Lukʉs 22:42). Ëtsäjtëm nan të nyajmoˈoyëm ja madakën parë këˈëm nwinˈijxëm ti ndunäˈänëm. ¿Mbäät nbanëjkxëmë Jesusë yˈijxpajtën parë nmëjkumäˈäyëmë Jyobaa ets nduˈunëm ti yëˈë tsyejpy?

⁵ Mbäät, pes nanduˈunë Dios ojts xyajkojëm extëm yëˈë (Génesis 1:26). Per ëtsäjtëm kyaj nyajpatëm awäˈätstum parë nduˈunëm ti ndimtunäˈänëm extëmë Jyobaa. Biiblyë nyimaytyakypy ko Jyobaa të tˈawitsy nuˈun mbäät nmëdäjtëm ja awäˈätstumˈäjtën ets tsojkëp nwintsëˈkëm. Extëm nˈokpëjtakëm, yëˈë toxytyëjk kasäädë tsojkëp tmëjˈixtët ja kutujkën diˈib myëdäjtypyë myëmëjjäˈäy, etsë uˈunk ënäˈk tsojkëp tmëmëdowdëdë  tyääk tyeety (Éfesʉ 5:22; 6:1). Pääty, oy ko niˈamukë nnayajtëˈëwëm: “¿Nwintsëˈkëbëts nuˈunëts ja Dios të xymyoˈoy ja madakën parëts nˈitët awäˈätstum?”. Pën nwintsëˈkëm, ta nëjkx nbatëmë jukyˈäjtënë winë xëëwbë.

6. ¿Tiko jyëjpˈamëty ets yaˈˈawitsët ja awäˈätstumˈäjtën diˈib nmëdäjtëm? Nimaytyäˈäk mët tuˈugë ijxpajtën.

⁶ Ja madakën diˈib nmëdäjtëm parë këˈëm nwinˈijxëm ti ndunäˈänëm, të yaˈˈawitsy. ¿Tiko net njënäˈänëm ko jantsy awäˈätstum nyajpatëm? Yëˈko ndukˈoyˈäjtëm ko ti yaˈˈawitsy. Nˈokpëjtakëm tuˈugë ijxpajtën. Nˈokwinmäˈäyëm ko nnëjkxëm karroty mä tuˈugë siudad, per mä ja karreteerë nimää tkanigajpxy wiˈixë jäˈäy dyajˈyoˈoytyët ja kyarrë, oymyääjëty dyajnëjkxtë ets wiˈixëm dyajpëyëˈëktë. ¿Seguurëdaa nnayjäˈäwëm nduˈuyoˈoyëm mä duˈumbë karreteerë? Kyaj. Tyäˈädë ijxpajtën yëˈë xytyukˈijxëm ko tsojkëp yajpëjtäˈägëdë anaˈamën parë seguurë nnayjäˈäwëm ets awäˈätstum. Min nˈokˈijxëm tuˈuk majtskë ijxpajtën mä Biiblyë, diˈib xytyukˈijxëm ko extëmë Jyobaa të tˈawitsy ja awäˈätstumˈäjtën o të tpëjtaˈaky ja anaˈamën, yëˈë parë ndukˈoyˈäjtëm.

7. 1) Nigäjpx tuk pëky wiˈix tëgatsyë Adán ojts kyojy mët ja jëyujk animal. 2) ¿Wiˈixë Adán oy dyajtuuny ja madakën diˈib yajmooy?

⁷ Ja tim jawyiimbë naxwinyëdë jäˈäy diˈibë Jyobaa yajkoj, yëˈë Adán ets myooy ja madakën parë këˈëm twinˈixët ti tyunaampy, duˈun extëmë nety të dyajkojˈyë anklës. Per ko Jyobaa ojts dyajkojˈyë jëyujk animal, kyaj tmooyë tyäˈädë madakën. Adán oy dyajtuunyë tyäˈädë madakën ko tkupëjky ja tuunk diˈib yajtuknipëjk: txëëmooytyaˈayët ja jëyujk animal. Biiblyë jyënaˈany ko Dios ojts dyajnëjkxy ja jëyujk animal mä Adán parë tˈix ttunët ets tsuj yajxon txëëmooytyaˈayët. Jyobaa nituˈuk ja xëëw tkayajtëgatsy diˈibë Adán wyinˈijx, pesë Biiblyë jyënaˈany ko “wiˈix ojts ja Adán txëëwmoˈoyën ja jëyujk duˈun duˈun ojts tmëwëˈëmdë ja xyëëwëty” (Génesis 2:19, Mʉgoxpʉ ja̱ noky mʉdiˈibʉ jyaayʉn Moisés [MNM]).

8. ¿Wiˈixë Adán kyaj oy dyajtuuny ja madakën parë këˈëm twinˈixët ti tyunaampy, ets wiˈixë net nguˈayoˈowëm?

⁸ Jyobaa nan ojts ttuknipëkyë Adán parë dyajjëmbitëdë Naxwinyëdë jantsy tsuj. Duˈun tˈanmääy: “Mëëtˈattë ënet mˈuˈunk mˈënäˈkëty yajwinduktë yëˈë naxwinyëdë ets xyˈënaˈamdëty. Mijts mˈënaˈamdäˈä yëˈë nëëyujk ets yëˈë joon jëyujk ets tukëˈëyë jëyujk mëdiˈibë myox tyukyoˈoybyën” (Génesis 1:28, MNM). Perë Adán kyaj twintsëˈkë nuˈunë Jyobaa tˈawijtsy ja awäˈätstumˈäjtën diˈib mooyë, pes ojts tjeˈxy ja ujtstëëm diˈib yajkubojk. Kanäk mil jëmëjt kujkë naxwinyëdë jäˈäy tkuˈayowëdë mët ko Adán oy tkayajtuuny ja madakën parë këˈëm twinˈixët ti tyunaampy (Romanʉs 5:12). Pën nyaˈijtëm winmäˈänyoty wiˈix mëjwiin kajaa nguˈayoˈowëm extëmë Adán yˈadëtsy, yëˈë xypyudëkëyäˈänëm parë yajxon nwinˈijxëm ti ndunäˈänëm ets kyaj ninäjxëm nuˈunë Jyobaa të tˈawitsy ja awäˈätstumˈäjtën diˈib nmëdäjtëm.

9. ¿Ti Jyobaa tyukwinˈijx ja israelitëty, ets ti wyandaktë?

⁹ Niˈamukë të xynyinäjxëmë poky ets ja oˈkën mët ko Adán etsë Eva pyokytyuundë. Jeˈeyë ko duˈunyëm nmëdäjtëm ja madakën parë këˈëm nwinˈijxëm ti ndunäˈänëm. Ets duˈun njënäˈänëm ko nˈijxëm ja israelitëtyë yˈijxpajtën. Yëˈëjëty ojtsë Jyobaa tyukwinˈixëdë pën tsyojktëp ets aduˈuk kyäjpnˈatëdët  o pën kyaj (Éxodo 19:3-6). Ta tkupëjktë ets twandaktë ko myëmëdowandëbë Jyobaa yˈanaˈamën. Duˈun twandaktë: “Oy ëëtsëty duˈun ndundëty, duˈun ta ja Dios të tniˈënaˈamën” (Éxodo 19:8, MNM). Per jotmaymyëët njënäˈänëm ko ok, kyaj tnekykyuytyuundë extëm twandaktë. ¿Ti diˈib xytyukniˈˈijxëm? Ko pën nnayaˈijtëm wingon mä Jyobaa ets nmëmëdoˈowëmë yˈanaˈamën, ta nyaˈijxëm ko nmëjjäˈäwëm ja madakën parë këˈëm nwinˈijxëm ti ndunäˈänëm (1 Korintʉ 10:11).

10. Mä Ebreeʉsʉty kapitulo 11, ¿pënatyë yˈijxpajtën yajmaytyakp diˈib xytyukˈijxëm ko mbäät nyajtuˈunëm ja madakën diˈib nmëdäjtëm parë nduˈunëm ti Dios tsyejpy? (Ixë dibujë mä tsyondaˈaky).

¹⁰ Mä Ebreeʉsʉty kapitulo 11 jaa jap yajmaytyaˈaky 16 yetyëjk toxytyëjk diˈib wyintsëˈkëdë tijatyë Jyobaa yˈawijts. Ko duˈun ttuundë, mëjwiin kajaa ttukˈoyˈäjttë ets yˈawijx jyëjpˈijxtëp ja kunuˈkxën diˈib miin këdakp. Extëm ja Noé, myëdäjt mëjwiin kajaa mëbëjkën ets yëˈë wyinˈijx tmëmëdowäˈänyë Dios parë ojts tkojy ja arkë ets dyajnitsoky ja fyamilyë mët ja tyëëm yˈääts diˈibë nety minäämp (Ebreeʉsʉty 11:7). Abrahán mëdë Sara, myëmëdoowdë Dios amumduˈukjot ets ojts nyëjkxtë mä ja nax diˈib tukwandakëdë. Mbäätxyëp jatëgok jyajjëmbijttë Ur, per jamë jyot wyinmäˈäny tpëjtaktë mä diˈibë Dios tukwandakëdë. Biiblyë jyënaˈany ko tyuundë mëjääw parë tˈaxäjëyandë “ja waanë oybyë käjpn” (Ebreeʉsʉty 11:8, 9, 13, 15, 16). Moisés ojts tjëjpkudijë ja jukyˈäjt madakën diˈib Egipto ets “waanë niˈigyë ttsejky es axëëk yajtunët mët ja Diosë jyaˈayëty, es këdiinëmxyëp ko tuk tsojk pekyoty xyondäˈägët” (Ebreeʉsʉty 11:24-26). Nˈokpanëjkxëmë tyäˈädë Dios mëduumbëtyë yˈijxpajtën ets nˈokˈyajtuˈunëm ja madakën diˈib nmëdäjtëm parë nduˈunëm ti Dios tsyejpy.

11. 1) ¿Wiˈix ndukˈoyˈatäˈänëm pën oy nyajtuˈunëm ja madakën diˈib nmëdäjtëm parë këˈëm nwinˈijxëm ti ndunäˈänëm? 2) ¿Ti diˈib mbudëjkëp parë oy xyajtunyë tyäˈädë madakën?

¹¹ Waˈan mas oy njäˈäwëm ko wiink jäˈäy xyˈanmäˈäyëm ti mbäät nduˈunëm. Per ko yëˈë nduˈunëm, kyaj nety nyajnigëxëˈkëm ti diˈib ndunäˈänëm extëm yaˈˈanmääytyë ja israelitëty (käjpxë Deuteronomio 30:19, 20, MNM). * Mä bersikulo 19 jyënaˈany ko Dios kanäk pëky ttukwinˈijxy ja israelitëty ti diˈib tyunandëp. Ets mä bersikulo 20 jyënaˈany ko mbäädë nety twinˈixtë diˈib yajnigëxëˈëgëp ko tsyojktëbë Jyobaa. Nanduˈun ëtsäjtëm, nmëdäjtëm ja madakëm parë nwinˈijxëm pën yëˈë nmëdunäˈänëmë Jyobaa. Pën yëˈë nwinˈijxëm, ta nëjkx nyajtuˈunëm tyäˈädë madakën parë nmëjkumäˈäyëmë Jyobaa ets ndukˈijxëm ko mëk ntsojkëm.

12. ¿Wiˈix kyaj nyajtunäˈänëm ja madakën diˈibë Jyobaa të xymyoˈoyëm?

¹² Nˈokpëjtakëm ko tuˈugë mmëtnaymyaayëbë xynyamoˈoy tuˈugë regalë diˈib jantsy tsooxë. ¿Wiˈixëdaa mnayjawëdët ko tˈëxkäˈätsët o ko kyaj oy dyajtunët? Seguurë ko axëëk mnayjawëyaˈanyëty. Jyobaa yëˈë të xynyamoˈoyëm ja madakën parë këˈëm nwinˈijxëm ti ndunäˈänëm, ets seguurë ko mëk tjawë ko näägë jäˈäy twinˈixtë diˈib kyaj yˈoyëty ets dyaˈˈayowdë wiinkpë. Biiblyë jyënaˈany ko  mä ja tiempë jyëjpkëxanë nitii jäˈäy tkamëjjawëyäˈändë (2 Timotee 3:1, 2). Per ëtsäjtëm kyaj duˈun nyajtunäˈänëmë tyäˈädë madakën, niˈigyë nmëjjawëyäˈänëm ko të nyajmoˈoyëm. ¿Wiˈix nyajnigëxëˈëgäˈänëm ko nmëjjäˈäwëm ja awäˈätstumˈäjtën diˈibë Jyobaa të xymyoˈoyëm parë këˈëm nwinˈijxëm ti ndunäˈänëm? ¿Ets wiˈix mbäät oy nyajtuˈunëmë tyäˈädë regalë?

13. ¿Wiˈix mbäädë Dios mëduumbë oy dyajtundë ja awäˈätstumˈäjtën diˈib të yajmoˈoytyë?

¹³ Niˈamukë nyajpatëm awäˈätstum parë nwinˈijxëm pënaty mëët nnaymyayäˈänëm, wiˈix nnayxyoxäˈänëm o nnayˈoytyunäˈänëm ets tijaty ndukxondäˈägäˈänëm ko nmëdäjtëmë tiempë. Per tsojkëp nnaygyuentˈäjtëm ets kyaj nyajtuˈunëmë tyäˈädë awäˈätstumˈäjtën parë nduˈunëm tijatyë Dios kyaj ttukjotkëdaˈaky o nˈadëtsëm extëmë naxwinyëdë jäˈäy yˈadëˈëtstë (käjpxë 1 Peedrʉ 2:16). En lugäär axëëk nyajtuˈunëm, niˈigyë oy nyajtunäˈänëm parë “jäˈäyëty tmëjˈix tmëjjawët ja Dios” (1 Korintʉ 10:31; Galasyʉ 5:13).

14. ¿Tiko tsyekyëty ndukˈijxpajtëmë Jyobaa ko nyajtuˈunëm ja awäˈätstumˈäjtën diˈib nmëdäjtëm?

¹⁴ Jyobaa xyˈanmäˈäyëm: “Ëjts, Jyobaa, ëjtsën mijts xyDiosˈäjtp, ja diˈib mdukniˈˈijxëp parë këˈëm xytyukˈoyˈatët, ja diˈib mduˈumooyëp wiˈix mbäät mnëˈëyoˈoy mduˈuyoˈoy” (Isaías 48:17). Pën ndukˈijxpajtëmë Jyobaa, ta nëjkx nmëmëdoˈowëm ja anaˈamën diˈib të tpëjtaˈaky ets nwinˈijxëm diˈib oy. Nan nëjkxëp nˈijtëm yujy tudaˈaky ets nˈëxkäjpëm “ko naxwinyëdë jäˈäy kyaj pyaaty nyitëkëtyë nyëˈë tyuˈu. Kyaj yëˈë pyaatyëtyë naxwinyëdë jäˈäy [...] këˈëm nyaynyëˈëmoˈoy nyaytyuˈumoˈoyëdët” (Jeremías 10:23). Adán ets ja israelitëty diˈib kyaj myëdoowdë,  kyaj twintsëˈkëdë nuˈunë Jyobaa tˈawijtsy ja awäˈätstumˈäjtën diˈibë nety myëdäjttëp, niˈigyë dyajtuundë kyëˈëm winmäˈäny. Kyaj yˈoyëty duˈun nˈadëtsëm. Nˈoktukˈijxpajtëmë Jyobaa amumduˈukjot ets kyaj këˈëm winmäˈäny nyajtuˈunëm (Proverbios 3:5).

15. ¿Ti xytyukniˈˈijxëm extëm jyënaˈanyë Romanʉs 14:12?

¹⁵ Nan tsojkëp nwintsëˈkëm ja madakën diˈib myëdäjttëbë nmëguˈukˈäjtëm parë twinˈixtët ti tyunandëp. ¿Tiko? Yëˈko niˈamukë nmëdäjtëmë tyäˈädë madakën. Pääty kyaj wyiˈixëty ko kyatuˈugyët tijaty ndunäˈänëm, oy jyaajëty mä wiˈix nDiosmëduˈunëm o mä wiˈix njukyˈäjtëm. Nˈokjamyajtsëmë tyäˈädë käjpxwijën diˈib yajpatp mä Romanʉs 14:12 (käjpx). Tyäˈädë yëˈë xytyukniˈˈijxëm ko niduˈuk niduˈugë Dios mëduumbë këˈëm tnikëjxmˈaty ets twinˈixët ti tyunaampy. Pën njaygyujkëm ko dyuˈunëty, ta nëjkx nwintsëˈkëm tijaty tyunandëp ja nmëguˈukˈäjtëm.

16, 17. 1) Ja Dios mëduumbëty diˈib Corinto myëdäjttëbë nety ja madakën parë këˈëm twinˈixtët ti tyunandëp, ¿per tiko ojts jyotmaygyojy? 2) ¿Wiˈixë Pablo tpudëjkë tyäˈädë Dios mëduumbëty? 3) ¿Ti diˈib xytyukniˈˈijxëm?

¹⁶ Mä Biiblyë miimp tuˈugë ijxpajtën diˈib xytyukˈijxëm ko jëjpˈam ets nwintsëˈkëm ja madakën diˈib myëdäjttëbë nmëguˈukˈäjtëm parë këˈëm twinˈixtët ti tyunandëp. Ja Dios mëduumbëty diˈib Corinto kyaj nety tuknax wyinmaytyë pën mbäät ttsuˈutstë ja tsuˈutsy diˈibë awinax të yajtukwintsëˈëgë ets yajtooky määyoty. Nääk kyaj nety wiˈix nyayjawëdë ko ttsuˈutstë ja tsuˈutsy, pes nyijäˈäwëdëbë nety ko awinax nitii mëkˈäjtënë tkamëdaty. Per ja Dios mëduumbëty diˈibë nety të tˈawdattë awinax, duˈun wyinmääytyë ko pën tsyuˈtstëp ja tsuˈutsy, yëˈë nety yˈawdäjttëbë awinax (1 Korintʉ 8:4, 7). Mëjwiin kajaa netyë tyäˈädë jotmay, pes mbäädë nety yajnaywyäˈkxëdë. ¿Ti tyuunë Pablo parë dyaˈoˈoyë tyäˈädë jotmay?

¹⁷ Tim jawyiin, ojts ttukjaygyukëdë ko kyaj yëˈëjëty ja käˈäy ukën diˈib pudëkëyanëdëp parë oy yˈittët mëdë Dios (1 Korintʉ 8:8). Ta net tˈanmääy ko oy tjamëdattë ja madakën parë këˈëm twinˈixtët ti tyunandëp, tsojkëp nyaygyuentˈatëdët parë kyaj axëëk dyajnayjawëdët ja myëguˈuk diˈib kyaj myëkëty ja myëbëjkën (1 Korintʉ 8:9). Ets ok, ta tˈanmääytyë pënaty axëëk nayjäˈäwëdëp ko kyaj tniˈoo tniyääxëdët pënaty tsyuˈtstëp ja tsuˈutsy (1 Korintʉ 10:25, 29, 30). Extëm nˈijxëm, ko dyajtsiptaktë, mbäädë nety kyaj oy nyekyˈittë mëdë Dios, tsojkëbë nety niduˈuk niduˈuk twinˈixtët ti tyunandëp. Nanduˈun ëtsäjtëm, tsojkëp nwingutsëˈkëm ti tyunandëbë nmëguˈukˈäjtëm oy kyamëjwiin kyakajaajëty (1 Korintʉ 10:32, 33).

18. ¿Wiˈix mbäät nyaˈijxëm ko nmëjjäˈäwëm ja madakën parë këˈëm nwinˈijxëm ti ndunäˈänëm?

¹⁸ Jyobaa të xymyoˈoyëm tuˈugë regalë: ja madakën parë këˈëm nwinˈijxëm ti ndunäˈänëm, diˈibë xyajnayjäˈäwëm jotkujk ets awäˈätstum (2 Corintios 3:17, TNM). Nyajtsobatëm ko Jyobaa të xymyoˈoyëmë tyäˈädë regalë, pes duˈuntsoo mbäät ndukˈijxëm nuˈunën ntsojkëm mä nwinˈijxëm ti ndunäˈänëm. Nˈokwinˈijxëm tijatyë Jyobaa yajmëjpëtsëmëdëp ets nˈokwintsëˈkëm ja madakën diˈib myëdäjttëbë nmëguˈukˈäjtëm ko këˈëm twinˈixtë ti tyunandëp. Duˈuntsoo nëjkx nyajnigëxëˈkëm ko nyajtsobatëmë tyäˈädë regalë diˈibë Jyobaa të xymyoˈoyëm.