1, 2. ¿Ti tuun jäjttë mä Pentekostes xëëw mä jëmëjt 33 diˈibë nety kyaj pën duˈun ttimˈawixy?

DOMINGË jopy, tyuˈukmujktë 120 ja Jesusë yˈëxpëjkpëty mä ja myëmajtsk nikëˈëybyë tëjk jam Jerusalén, yëˈë nety të tpääty ja Pentekostes xëëw mä jëmëjt 33 (Apos. 1:13-15; 2:1). Ëxëˈëy maxtejkyëbë netyë Jesus të tˈanëëmë ja yˈëxpëjkpëty ko kyaj tsyoondët Jerusalén mët ko tamë nety ti tˈaxäjëyäˈändë (Apos. 1:4, 5). ¿Ti net tuun jäjtë?

² “Tiˈin tmëdoodë nyojktaˈaky tsäjpotm es tyukwantsëtyaay ja tëjk extëm tuˈugë mëk poj”. Ta net ja Jesusë yˈëxpëjkpëty “oj tˈijxpäättë extëmë jënyaˈank” kyëbäjkëjxyëty ets ta “ja espiritë santë myooyëdë ja myëkˈäjtën nidëgekyë ni nëˈënë nety japëty” (Apos. 2:2-4). Duˈunënë Jyobaa ttuknigejxyë yˈespiritë santë ja Jesusë yˈëxpëjkpëty extëmë nety kyaj pën duˈun ttimˈawixy ttimjëjpˈixy (Apos. 1:8). Ets yëˈë diˈib tim jawyiin yajwinˈijxtë mëdë espiritë santë * parë yˈanaˈamdët mëdë Jesus jam tsäjpotm.

3. ¿Tiko yˈijttë seguurë ja Dios mëduumbëty ko të nety yajwinˈixtë mëdë espiritë santë?

³ Koxyëp mijts niduˈuk ja Jesusë yˈëxpëjkpë diˈib jam yajpat mä tadë xëëw, ninäˈäxyëp xykyajäˈäytyëgooy ti tuun jäjtë. Koxyëp  kyëxëˈky ja jënˈyaˈank mä tuˈuk tuˈugë këbäjk ets koxyëp mijts mdëjkë käjpxpë kanäk ayuk (Apos. 2:5-12). Seguurëxyëp mˈijty ko Diosë nety të mwinˈixyëty mëdë yˈespiritë santë. Per ¿akduˈundaa Dios twinˈixy pënaty nëjkxandëp tsäjpotm? Kyaj. ¿Wiˈix nnijäˈäwëm? ¿Ets näˈäjën yajwinˈixtë? Min nˈokˈijxëm.

4. Ja tiempë mä jyukyˈäjttë ja Jesusë yˈëxpëjkpëty, ¿aktuˈugyëdaa yajwinˈijxtë parë nyëjkxtët tsäjpotm? Oknimaytyäˈäk.

⁴ Min jawyiin nˈoknimaytyakëm näˈäjën yajwinˈixy tuˈugë Dios mëduumbë mëdë espiritë santë. Mä Pentekostes xëëw mä jëmëjt 33, ja yajwinˈijxtë Jesusë yˈëxpëjkpëty naa 120 mëdë espiritë santë, per kyaj yëˈëyë duˈun tyukkëdakëdë ja Diosë myëjääw. Nan ja mä tadë xëëw, nyëbajttë naa nidëgëk milënë jäˈäy ets tyukkëdakëdë Diosë myëjääw extëmë netyë Jesus të twandaˈaky. Tyäˈädë Dios mëduumbëty ja yajwinˈijxtë ko nyëbajttë (Apos. 2:37, 38, 41). Per ko nyajxyë tiempë, kyaj niˈamukë Dios mëduumbë yajwinˈijxtë mä nyëbajttë, extëm ja diˈib Samaria ja yajwinˈijxtë ko nyajxy waanë ja tiempë mä nety të nyëbattë (Apos. 8:14-17). Ets tim tëgatsy extëm yajwinˈijxy ja Cornelio mët niˈamukë ja jäˈäy diˈibë nety yajpattëp mä tyëjk, pes yëˈëjëty ja tyukkëdakëdë Diosë myëjääw mä kyajnëm nyëbattë (Apos. 10:44-48).

5. Extëm jyënaˈanyë 2 Korintʉ 1:21, 22, ¿wiˈixën tuˈugë Dios mëduumbë yajwinˈixy?

⁵ Minë net tyam nˈoknimaytyakëm wiˈixën tuˈugë Diosë mëduumbë yajwinˈixy mëdë espiritë santë. Pënaty të yajwinˈixtë jyukyˈattët tsäjpotm, waˈan nääk tsyiptakxëdë tim ogäˈän tkupëktët ko yëˈë Jyobaa të wyinˈixëdë etsë net nyayajtëwëdë tiko. Ets ta netë wiinkpë diˈib kyaj duˈun nyayjyawëdë. Per oy wiˈix nyayjyawëdët, min nˈokˈijxëm wiˈixë apostëlë Pablo tnimaytyaˈaky yajwinˈixtë niˈamukë tyäˈädë Dios mëduumbëty, yëˈë jyënaˈany: “Xymyëpëjktë, jëtuˈun ojts miitsëty mwëˈëmtë tä tii yajtsaˈayën * mëët ja Tios ja jyot myëjaaw ets yëˈë mjäˈäˈataˈanëtë. Yaˈatë Kënuˈkxymyëkajtën yëˈë yajnikëxëˈkypy ko xypyaatˈajtëmë ja kumaˈayën mëtiˈipë  ja Tios yakäämpyën” (Efes. 1:13, 14, TY). Ets duˈunë duˈun, Jyobaa yëˈë yajtuumbyë yˈespiritë santë parë dyajnayjyawëty seguurë pënaty të twinˈixy. Päätyë espiritë santë yëˈë tuump “extëmë ijxwëˈëmën” parë mbäät yˈittë seguurë ko jamën jyukyˈatäˈändë tsäjpotm winë xëëw winë tiempë ets kyaj yääjëty Naxwiiny (käjpxë 2 Korintʉ 1:21, 22).

6. ¿Ti tsojkëp ttunët ja diˈib të yajwinˈixy parë nyëjkxët tsäjpotm?

⁶ Pën tuˈugë Dios mëduumbë të yajwinˈixy mëdë espiritë santë, ¿yëˈë tyäˈädë yˈandijpy ko seguurë nyëjkxäˈäny tsäjpotm? Kyaj. Jeˈeyë të yajwinˈixy parë nyëjkxët. Per tsojkëp tjamyatsëdë tyäˈädë käjpxwijën: “Mëguˈugitëty, niˈigyë mnaybyëjtäˈägëdë mëk es xyaˈixëdët mä yëˈë mjikyˈäjtën ko tyëyˈäjtënëty ko Dios mwinˈijxëdë es mwoojëdë. Pën mduundëbë dëˈën, ninäˈä mgatuˈudëgoytyët” (2 Peed. 1:10). Extëm nˈijxëm, oyë nety tuˈugë Dios mëduumbë të jyayajwinˈixy ets të jyayajwoy parë nyëjkxët tsäjpotm, net nyëjkxäˈäny, pën kyaj tmëdëgoyë Jyobaa (Filip. 3:12-14; Eb. 3:1; Diˈibʉ Jat. 2:10).

7. ¿Wiˈix tnijawëdë pënaty të yajwinˈixtë ko jam nyëjkxäˈändë tsäjpotm?

⁷ Per ¿wiˈix tuˈugë nmëguˈukˈäjtëm tnijawë ko të Dios wyinˈixyëty? Mbäät nnijäˈäwëm ko nˈijxëm wiˈixë Pablo tˈanmääy ja myëguˈuktëjk diˈib Roma, diˈibë netyë Dios të “wyinˈixëdë es dyajnëjxtët tuˈugë jikyˈäjtën wäˈätspë” (Rom. 1:7). Tˈanmääy: “Miitsëty kyaj të xyˈaxäjëdë mëjääw diˈibë mduumbëˈatëdëp ets mˈatsëˈëgëdëp, yëˈë duˈun të xyˈaxäjëdë ja mëjääw diˈib mˈuˈunkniwanëdëp, mëjääw diˈib xyyajjënäˈänëm: ¡Abba, Tatë! Tyäˈädë mëjääw yëˈë diˈib xytyuknijäˈäwëm ko yëˈë Dios xyˈuˈunkˈäjtëm” (Rom. 8:15, 16, TNM). Extëm nˈijxëm, Dios tuknijäˈäwëdëp yajxon mët yëˈëgyëjxmë yˈespiritë santë ko të yajwinˈixtë parë nyëjkxtët tsäjpotm (1 Tes. 2:12).

8. Extëm jyënaˈanyë 1 Fwank 2:20, 27, ¿wiˈix nnijäˈäwëm ko kyaj dyajtëgoyˈattë ets pën yˈanëˈëmxëdët ko të Dios wyinˈixëdë parë nyëjkxtët tsäjpotm?

⁸ Ja Dios mëduumbë diˈib të yajwowdë parë jyukyˈattët tsäjpotm, yëˈë Jyobaa pudëjkëdëp parë amumduˈukjot tmëbëktët ko të jyantsy yajwinˈixtë (käjpxë 1 Fwank 2:20, 27). Tyäˈädë nmëguˈukˈäjtëm nan yajtëgoyˈäjttëp etsë Jyobaa yaˈëxpëkëdët mä tuˈukmujkën extëm niˈamukë ëtsäjtëm. Per kyaj dyajtëgoyˈattë ets pën yˈanëˈëmxëdët ko të Dios wyinˈixëdë parë nyëjkxtët tsäjpotm. Parë kyaj yˈamajtsk jyotmajtskëdët, Jyobaa yëˈë yajtuumbyë myëjääw, diˈib niˈigyë mëkˈäjtën myëdäjtypy parë tyukˈixëdë ko të jyantsy yajwowdë.

9. Extëmë jyënaˈanyë Éfesʉ 1:18, ¿wiˈix tyëgatstë tuˈugë Dios mëduumbë diˈibë Jyobaa të wyinˈixyëty parë nyëjkxët tsäjpotm?

⁹ Waˈan nimayë Dios mëduumbë tsyiptakxëdë tjaygyukëdët wiˈix nyayjyawëty tuˈugë nmëguˈukˈäjtëm diˈibë Jyobaa të wyinˈixyëty parë nyëjkxët tsäjpotm. ¿Tiko? Yëˈko tyäˈädë Dios mëduumbëty kyaj yëˈë të yajwinˈixtë. Ets yëˈko Dios ojts dyajkojˈyë jäˈäy parë jyukyˈatët winë xëëw winë tiempë yä Naxwiiny ets kyaj jyamëty tsäjpotm (Gén. 1:28; Sal. 37:29). Perë Jyobaa të twinˈixy näägë naxwinyëdë jäˈäy parë nyëjkxtët tsäjpotm. Pääty ko yajwinˈixtë mëdë espiritë santë, ta tyëgatstë ja jyot wyinmäˈäny ets diˈibë nety yˈawijx jyëjpˈijxtëp, ets jamë net jyukyˈatanëdë tsäjpotm (käjpxë Éfesʉ 1:18).

10. ¿Ti yˈandijpy ko jatëgok myin jyäˈttë jemy? (Ix nanduˈunë notë).

¹⁰ Ko tuˈugë Dios mëduumbë yajwinˈixy mëdë espiritë santë, duˈunxyëp extëm jatëgok myiny jyaˈty jemy. * Jesus nan yëˈë yajjaygyukëyan ko tsip ndukmëtmaytyakëm pënaty kyaj të yajwinˈixtë jyukyˈattët tsäjpotm wiˈixën nyayjyawëdë  pënaty miin jäjttëp jatëgok jemy o diˈibë të myin të jyäˈttë mët yëˈëgyëjxmë “espiritë santë” (Fwank 3:3-8).

11. ¿Wiˈix tyëgatsy ja wyinmäˈäny tuˈugë Dios mëduumbë diˈib të yajwinˈixy parë jyukyˈatët tsäjpotm?

¹¹ ¿Wiˈix tyëgatsy ja wyinmäˈäny tuˈugë Dios mëduumbë diˈib të yajwinˈixy parë jyukyˈatët tsäjpotm? Yëˈë myëjjäˈäw kyunuˈkxyjyäˈäwëbë nety jyukyˈatäˈäny winë xëëw winë tiempë yä Naxwiiny. Jyantsy yˈawijxy jyantsy jyëjpˈijxypyë nety jyäˈtët ja tiempë mä Jyobaa dyajjëjptëgoyaˈany tukëˈëyë axëkˈäjtën ets dyajjëmbitäˈänyë tyäˈädë Naxwinyëdë jantsy tsuj. Nan waˈanë nety nyaybyawinmayëty tˈagëˈëjëyaˈany tˈaxäjëyaˈany ja jyiiky myëguˈuk o ja myëtnaymyaayëbë diˈib të yˈoˈknëdë. Per ko ojts yajwinˈixy parë nyëjkxët tsäjpotm, ta tyëgäjtsy extëmë nety wyinmay. ¿Tiko? Kyaj yëˈëjëty mët ko kyaj tˈoktsojkënyëˈäjnë jyukyˈatäˈäny yä Naxwiiny. Nan kyaj mët ko tpäätyë amay jotmay ets nan kyaj mët ko wyinmay ko tsipkaˈaxäämp jyukyˈatët winë xëëw winë tiempë yä Naxwiiny. Diˈibën jeˈeyë të tyuny të jyatyëty mëdë tyäˈädë Dios mëduumbë, yëˈë ko Jyobaa të yajtëgäjtsxëty extëmë nety wyinmay mët yëˈëgyëjxmë yˈespiritë santë ets të tyëgatsy ja jukyˈäjtën diˈibë nety yˈawijxy jyëjpˈijxypy.

12. Extëm jyënaˈanyë 1 Peedrʉ 1:3, 4, ¿wiˈix nyayjyawëty ja Dios mëduumbë diˈib të yajwinˈixy ko tpawinmay ja jukyˈäjtën diˈib yˈawijxy jyëjpˈijxypy?

¹² Ja Dios mëduumbë diˈib të yajwinˈixy nyëjkxäˈäny tsäjpotm waˈan nyayjyawëty ko kyaj ninuˈun kyapääty kyanitëkëty, per ijtp seguurë ko Jyobaa yëˈë diˈib të wyinˈixyëty. Ko tpawinmay ja jukyˈäjtën diˈib yˈawijxy jyëjpˈijxypy, agujk jotkujk jyantsy nyayjyawëty ets myëjjäˈäw kyunuˈkxyjyäˈäwëp (käjpxë 1 Peedrʉ 1:3, 4).

13. ¿Wiˈix tˈixtë ja jukyˈäjtën diˈib yä Naxwiiny pënaty të yajwinˈixtë nyëjkxäˈändë tsäjpotm?

¹³ ¿Yëˈëdaa tyäˈädë yˈandijpy ko pënaty të yajwinˈixtë tsyojknëdëp parë jyëjpkëxëdë jyukyˈäjtën yä Naxwiiny? Apostëlë Pablo yëˈë yˈatsoowëmbijtypyë tyäˈädë yajtëˈëwën. Ko nety të tˈijxkijpxyë ja nyiniˈkx kyëbäjk pënaty nëjkxandëp tsäjpotm mët tuˈugë wittëjk, ta jyënany: “Diˈib yajpatëm mä tyäˈädë wittëjk mëkxaj okxajëm, nmëjeˈemtsyˈoˈkëm mët ko kyaj nnaytyukniwijtstuˈudäˈänëm, diˈibë duˈun ntsojkëm, yëˈë nbëjtäˈägäˈänëmë wiinkpë parë ja jukyˈäjtënë winë xëëbë dyajnitëgatsët ja niniˈkx diˈib oˈkp” (2 Cor. 5:4, TNM). Perë tyäˈädë kyaj yëˈë tˈandijy ko ja Dios mëduumbëty diˈib të yajwinˈixtë kyaj yˈokjukyˈatanëdë yä Naxwiiny ets ko tsyojknëdëp parë kyugëxët. Niˈigyë ttukxondäˈäktë tyäˈädë jukyˈäjtën ets myëdunandëbë Jyobaa tuˈuk tuˈugë xëëw mëdë jyiiky myëguˈuk etsë myëtnaymyaayëbëty. Per mä duˈun tyun myëdowdë, xëmë tjamyatstë ja jukyˈäjtën diˈib yˈawijx jyëjpˈijxtëp (1 Kor. 15:53; 2 Peed. 1:4; 1 Fwank 3:2, 3; Diˈibʉ Jat. 20:6).

14. ¿Tijaty kyaj dyajnigëxëˈëky ko tuˈugë Dios mëduumbë të yajwinˈixy mëdë espiritë santë parë nyëjkxët tsäjpotm?

¹⁴ Waˈan mnayajtëyëty pën të Dios mwinˈixyëty mëdë yˈespiritë santë parë mnëjkxët tsäjpotm. Pën duˈun mwinmay, jëjpˈam ets xypyawinmayëdë tyäˈädë yajtëˈëwën: ¿Mjantsy tyunaambyë Diosë tyuunk?, ¿Mjantsy tyukxondakypy mˈëwäˈkxäˈäny mgäjpxwäˈkxäˈäny? ¿Mjantsy yˈëxpëkaambyë Biiblyë ets mnijawëyaampy “ja këkpë nimëjääbë wyinmäˈäny ja Dios”? ¿Mˈijxypy ko të Jyobaa mgunuˈkxyëty mä mˈëwaˈkxy mgäjpxwaˈkxy? ¿Mjäˈäwëp ko mnikëjxmˈäjtypy xypyudëkët ja mëguˈuktëjk parë mas oy yˈitët mëdë Jyobaa? ¿Të yajxon xytyimˈixy wixatyë Jyobaa të mbudëkëty mä mjukyˈäjtën? (1 Kor. 2:10). Pën mgupëjktaapy extëm yä të dyajtëy, ¿yëˈëdaa yˈandijpy ko jam mnëjkxäˈäny tsäjpotm? Kyaj. ¿Tiko? Yëˈko mbäät niˈamukë Dios mëduumbë duˈun nyayjyawëdë extëm mijts, oy nyëjkxäˈändë tsäjpotm ets oy kyaj. Etsë Jyobaa mbäät niˈamukë xypyudëjkëm mët yëˈëgyëjxmë espiritë santë, oy mä nˈawijx njëjpˈijxëm ja jukyˈäjtën. Pën mijts mˈamajtsk mjotmajtskëp pën të myajwinˈixy parë mjukyˈatët tsäjpotm, yëˈë yˈandijpy ko kyaj të  myajwinˈixy. Pes pënaty të yajwowdë, kyaj nyayajtëwëdë pën jantsy tëdën yajwinˈixtë; ¡ijttëbën seguurë ko jantsy tëdën yajwowdë!

15. ¿Wiˈix nnijäˈäwëm ko kyaj niˈamukë nyëjkxäˈändë tsäjpotm oy të jyayajtuknigaxtë Diosë myëjääw?

¹⁵ Mä Biiblyë yajnimaytyakp niganäägë Dios mëduumbë diˈib yˈaxäjëdë Diosë myëjääw, per kyaj nety tˈawix tjëjpˈixtë nyëjkxäˈändë tsäjpotm. Extëm nˈokpëjtakëm, David ojts nyëˈëmoˈoy tyuˈumoˈoyëtyë Diosë myëjääw (1 Sam. 16:13). Ja Diosë myëjääw yëˈë pudëjkë parë tjaygyujkë këkpäät wiˈixë Jyobaa jyaˈayˈaty ets nan yëˈë tuˈumoˈoyë parë tkujäˈäyë ääw ayuk diˈib yajpatp mä Salmos (Mar. 12:36). Perë apostëlë Pedro jyënany ko “Dabit kyaj tsyäjpejty” (Apos. 2:34). Juan Yajnëbajtpë nan yˈaxäjë “ja espiritë santë” (Luk. 1:13-16). Jesus këˈëm jyënany: “Nipën jëtuˈun kyamëjjëty ijxtëm yë Juan Yajnëëpajtpën”. Per nyimaytyak ko kyaj nyëjkxäˈäny tsäjpotm parë jam yˈanaˈamët (Mat. 11:10, 11, TY). Jyobaa yëˈë yajtuunë yˈespiritë santë parë tyäˈädë yetyëjkëty tmëdäjttë mëkˈäjtën ets ttuundë tijaty mëjwiin kajaa, per kyaj dyajtuuny parë twinˈijxy ets nyëjkxtët tsäjpotm. ¿Yëˈë tyäˈädë yˈandijpy ko kyaj nëgoo tyim mëdoowdë extëm pënaty të yajwinˈixtë parë nëjkx yˈanaˈamdë tsäjpotm? Kyaj. Pesë Jyobaa yajjukypyëkanëdëp ko netyë tyäˈädë Naxwinyëdë të jyëmbity jantsy tsuj (Fwank 5:28, 29; Apos. 24:15).

16. ¿Mä tˈawix tjëjpˈixtë jukyˈäjtën ja tëgoy mayjyaˈay diˈib tyam Dios mëduundëp?

¹⁶ Ja tëgoy mayjyaˈay diˈib tyam Dios mëduundëp, kyaj tˈawix tjëjpˈixtë jyukyˈatäˈändë jam tsäjpotm. Duˈun extëmë Abrahán, Sara, David, Juan Yajnëbajtpë etsë wiinkpë yetyëjk toxytyëjk diˈib yajmaytyaktëp mä Biiblyë, yä jyukyˈatäˈändë Naxwiiny mä nety të tyëkë tuumbë ja Diosë yˈAnaˈam Kyutujkën (Eb. 11:10).

17. ¿Tijaty yaˈˈatsoowëmbitäämp mä jatuˈukpë artikulo?

¹⁷ Kom taanëm yˈakjukyˈattë ja Dios mëduumbëty diˈib nëjkxandëp tsäjpotm. Päätyë net tijaty nnayajtëˈëwëm (Diˈibʉ Jat. 12:17). Extëm nˈokpëjtakëm, ¿wiˈix mbäät këˈëm nyayˈixëdë pënaty nëjkxandëp tsäjpotm? ¿Wiˈix mbäät nˈijxëm ja nmëguˈukˈäjtëm diˈib tim ogäˈän kyaapy ja tsäjpkaaky ets yˈukypy ja binë mä yajjamyetsyë Jesusë yˈoˈkën xëëw? Ets ¿mbäädëdaa nmëmäˈäy nmëdäjëm ko tuˈuk tuˈugë jëmëjt niˈigyë nyimayëdë diˈib jënandëp ko nyëjkxäˈändë tsäjpotm? Tyäˈädë yaˈˈatsoowëmbitäˈäny mä jatuˈukpë artikulo.