Koxyëp dyuˈunëty, ¿tixyëbë tyäˈädë yˈandijpy? Nˈokˈijxëm tuˈugë ijxpajtën. Ko tuˈugë nmëguˈukˈäjtëm nyayaˈoˈkë yˈuˈunk, mëk tjantsy jyäˈäwë, ta nyayajtëëwë pënë Jyobaa nyijäˈäwëp ko duˈun jyatäˈäny ets ko pën mbäät tmëmadäˈäktë. Jotmaymyëët njënäˈänëm ko mä tyäˈädë tiempë nimayë nmëguˈukˈäjtëm twinguwäˈägëdë ayoˈon jotmay. Per ¿oyëdaa ko nwinmäˈäyëm ko Jyobaa nyijäˈäwëp tijaty xyjatäˈänëm?

Min yajxon nˈokˈijxëm wiˈix jyënaˈanyë 1 Korintʉ 10:13 parë nbëjkëmë kuentë ko Biiblyë kyaj tyukniˈˈixë ko Jyobaa jawyiin tˈixy nuˈunën nmëmadakëm ja jotmay, etsë net xytyuknigajxëm diˈib mbäät nmëmadakëm. Nˈokˈijxëm taxk pëky tiko duˈun njënäˈänëm.

Myëduˈuk, Jyobaa të xymyoˈoyëmë madakën parë këˈëm nwinˈijxëm ti ndunäˈänëm. Tsyojkypy ets këˈëm nwinˈijxëm ti ndunäˈänëm (Deuteronomio 30:19, 20; Josué 24:15). Pën yëˈë nwinˈijxëm diˈib tyukjotkëdakypy, ta mbäät nˈijtëm seguurë ko yëˈë xytyuˈumoˈoyäˈänëm (Proverbios 16:9). Per pën yëˈë nwinˈijxëm diˈib kyaj yˈoyëty, ta kuanë nguˈayowëyäˈänëm (Galasyʉ 6:7). Koxyëbë Jyobaa yëˈë twinˈixy tijaty jotmay nmëmadäˈägäˈänëm, ¿këdii xypyëjkëmxyëp ja madakën diˈib nmëdäjtëm parë këˈëm nwinˈijxëm ti ndunäˈänëm?

Myëmajtsk, Jyobaa kyaj xykyuwäˈänëm ko tyuny jyatyëty “diˈib kyaj nˈawijx njëjpˈijxëm” (Eclesiastés 9:11). Extëm nˈokpëjtakëm, mbäät pën yˈayoˈonbääty mëjwiin kajaa mët ko yajpääty mä tyunäˈänyëtyë ayoˈon jotmay. Jesus ojts tmaytyaˈaky ko 18 jäˈäy yˈayoˈonbattë ets yˈoˈktë mët ko nyijijtpajtëdë tuˈugë potsy, ets yajxon tˈyajjaygyujkë ko kyaj yëˈë Dios tnikëjxmˈäjty ko yˈoˈktë tyäˈädë jäˈäyëty (Lukʉs 13:1-5). Pääty tsip nwinmäˈäyëm ko Dios nyijäˈäwëp kontiempë pënaty jukyˈatëp o pënaty oogëp ko ajotkumonë tyuny jyatyëtyë ayoˈon.

Myëdëgëëk, tsojkëp niduˈuk niduˈuk nyajnigëxëˈkëm pën kyaj nmastuˈudäˈänëmë Dios. Satanás jyënany ko päätyë Jyobaa nmëduˈunëm mët ko tijaty xymyoˈoyëm ets ko nmastuˈudäˈänëmë pën nbatëmë ayoˈon jotmay (Job 1:9-11; 2:4; Diˈibʉ Jatanʉp 12:10). Mbäätxyëp tyëyˈäjtëndëkë extëmë Satanás jyënany koxyëbë Jyobaa xykyuwäˈänëm mä näägë ayoˈon jotmay.

Myëmäjtaxk, Jyobaa kyaj kontiempë tnijawëyaˈany ti xyjatäˈänëm. Yëˈë mbäätxyëp tjanijawë ti tunan jatanëp koxyëp tˈoknijawëyaˈany (Isaías 46:10). Perë Biiblyë jyënaˈany ko taaˈäjtpë jotmay diˈibë Jyobaa kyaj ttimnijawëyaˈany kontiempë (Génesis 18:20, 21; 22:12). ¿Tiko? Yëˈko xytsyojkëm, tëyˈäjtën myëët tijaty ttuny ets twintsëˈëgë ja madakën diˈib nmëdäjtëm parë këˈëm nwinˈijxëm ti ndunäˈänëm (Deuteronomio 32:4; 2 Corintios 3:17, TNM).

Pääty, ¿ti Pablo myaytyäˈägan ko jyënany: “[Dios] kyaj mnaˈixëdët es mbekytyundët pën kyaj mbäät xymyëmadäˈäktë”? Yëˈë yˈandij wiˈixë Jyobaa xypyudëjkëm mä meerë nyajnäjxëmë amay jotmay, kyaj yëˈëjëty ti tyuumpy mä xykyatukjäjtëmnëm ja jotmay. * Pën ndukˈijxpajtëmë Jyobaa, yëˈë xypyudëkëyäˈänëm parë nmëmadakëm oytyim diˈibëtyë ayoˈon jotmay (Salmo 55:22). Min nˈokˈijxëm majtsk pëky tidaa ko Pablo jyënany ko Dios kyaj xynyaˈixäˈänëm ko nbatëmë ayoˈon jotmay diˈib kyaj mbäät nˈokmëmadakënë.

Myëduk, yëˈë ko oytyim diˈibëtyë jotmay diˈib nwinguwäˈkëm “tiˈigyë yëˈë extëm diˈibë kyuˈijx kyubatëdëp nidëgekyë jäˈäyëty”. Tyäˈädë yëˈë yˈandijpy ko amay jotmay diˈib nbatëm, yëˈë diˈib tyam jaˈäjtp mä Satanás yˈaneˈemy. Mbäät niˈamukë nyajnäjxëmë ayoˈon jotmay, per pën ndukˈijxpajtëmë Jyobaa, mbäät nmëmadaktäˈäyëm ets ninäˈä  ngamastutëm (1 Peedrʉ 5:8, 9). Pablo yëˈë jawyiin myaytyak kanäägë jotmay diˈib pyattë ja israelitëty, taanëm ojts tnigajpxy diˈib yajpatp mä 1 Korintʉ 10:13 (1 Korintʉ 10:6-11). Ja israelitëty diˈib tyukˈijxpajttë Jyobaa ojts tmëmadäˈäktë ja amay jotmay diˈib wyinguwäˈkëdë, per diˈib kyaj ttukˈijxpajttë, kyaj tmëmëdoowdë ets myastuttë.

Myëmajtsk, yëˈë ko Pablo jyënany: “Dios yëˈë mbudëkëdëp miitsëty”. Ko nbawinmäˈäyëm wiˈixë Jyobaa tkuentˈäjtyë kyäjpn, ta nˈijxëm ko kyaj tmastuˈuty pënaty tsojkëdëp ets paduunëdëp ja yˈanaˈamën (Deuteronomio 7:9). Nan xëmë tkuytyuny tijaty wyandakypy (Josué 23:14). Pääty mbäät nˈijtëm seguurë ko oy ti jotmay nbatëm, Jyobaa kyuytyunaambyë tyäˈädë majtskpë wyandakën: 1) kyaj tnasˈixëyaˈany ets kyaj nˈokmëmadakënët tuˈugë jotmay diˈib mëjwiin kajaa ets 2) yëˈë xyaˈˈawäˈätspëtsëmäˈänëm.

¿Wiˈixë Dios tˈyaˈˈawäˈätspëtsëmy pënaty mëbëjkëp? Tëyˈäjtën ko yëˈë mbäät tˈyajjëgeˈeky ja njotmayˈäjtëm. Perë Pablo jyënany: “Dios myaˈˈawatsxëdët es myajnaxëdët wiinktsow”. ¿Tiko duˈun ttuny? Parë mbäät nmëmadakëm ja jotmay. Tyäˈädë yëˈë xytyukniˈˈijxëm ko Jyobaa ja xyyajnäjxëm “wiinktsoo” ko xymyëjääwmoˈoyëm parë kyaj nmastutëm. Nˈokˈijxëm kanäk pëky wiˈix yëˈë xymyëjääwmoˈoyëm.

• Jyobaa “xyajjotkujkˈäjtëm mä tëgekyë nˈayoˈonˈäjtëm”, o ja tuk pëky njënäˈänëm ko amay jotmay nbatëm (2 Korintʉ 1:3, 4). Yëˈë mbäät xymyoˈoyëm ja nikˈäjt xeemyˈäjtën mä jot korasoon ets mä jot winmäˈäny, mët yëˈëgyëjxmë Biiblyë, myëjääw ets tijaty xymyoˈoyëm ja tuumbë diˈib kuwijy (Matewʉ 24:45; Fwank 14:16; Romanʉs 15:4).

• Jyobaa mbäät xytyuˈumoˈoyëm mët yëˈëgyëjxmë myëjääw (Fwank 14:26). Jyobaa mbäät tˈyajtunyë myëjääw parë xytyukjamyajtsëm tijaty të nˈëxpëjkëm mä Biiblyë, diˈib xypyudëkëyäˈänëm parë nduˈunëm diˈib oybyëtsëmëp.

• Jyobaa mbäät tˈyajtunyë anklëstëjk parë xypyudëjkëm (Ebreeʉsʉty 1:14).

• Jyobaa mbäät tˈyajtunyë nmëguˈukˈäjtëm parë xypyudëjkëm. Yëˈëjëty mbäät xymyëjääwmoˈoyëm mëdë yˈääw yˈayuk ets ko tijaty xytyukmëduˈunëm (Kolosʉ 4:11).

Extëm të yajnimaytyaˈaky, ¿wiˈixë net mbäät njaygyujkëm extëmë Pablo jyënany mä 1 Korintʉ 10:13? Ko Jyobaa kyaj yëˈë twinˈixy ti jotmay nbäädäˈänëm. Nan të nnijäˈäwëm ko pën nmëbëjkëm, nëjkxëp nmëmadakëm oytyim diˈibëtyë jotmay. Jyobaa xëmë xyyajnaxäˈänëm “wiinktsoo” parë mbäät nmëmadakëm.