1, 2. Ko netyë Jesus të nyëjkxnë tsäjpotm, ¿tidaa ja apostëlëty nayajtëëwëdë?

JA APOSTËLËTËJK jamë nety yajpäättë mä ja Olivos kopk mëdë Jesus diˈibë nety yaˈëxpëjkëdëp ets mëët nyaymyayëdë. Ko ajotkumonë tˈijxtë wanaty wanaty tsyäjpety, ta myiiny tuˈugë yoots diˈib yajnitujkë (Apostʉlʉty 1:9, 10). Naa majtsk jëmëjtënë nety të jyëdittë mëdë Jesus, të tyukniˈˈixëdë tijaty, të myëjääwmoˈoyëdë ets të nyëˈëmoˈoy tyuˈumoˈoyëdë. Per ko Jesus ojts tsyäjpajnë, ¿wiˈixë net ojts wyëˈëmnëdë?

² Mä netyë Jesus kyanëjkxynyëm tsäjpotm, duˈun tˈanmääy ja yˈëxpëjkpëty: “Miits xypyëjtäˈäktët ja tëyˈäjtën ëjtskyëjxm Jerusalén, nëˈënë Judeeë nyax, Samaaryë nyax es tëgekyë naxwinyëdë” (Apostʉlʉty 1:8). ¿Wiˈixë nety mbäät ttundë tyäˈädë tuunk? Të netyë Jesus tyukwandäˈägëdë ko yëˈë pudëkëyanëdëbë Diosë myëjääw (Apostʉlʉty 1:5). Per ¿pënë nety tuˈumoˈoyanëdëp ets pënë nety tyukniwitsëyaampy wiˈix kyäjpxwäˈkxtët abëtsemy nyaxwinyëdë? Ja apostëlëty nyijäˈäwëdëbë nety ko Jyobaa yëˈë yajtuunë yetyëjkëty parë ojts ttuˈumoˈoy ja israelitëty.  Pääty, waˈan nyayajtëëwëdë: “¿Pëndaa Jyobaa wyinˈixaampy parë ttuˈumoˈoyëdë kyäjpn?”.

3. 1) Ko netyë Jesus të pyatëjkënë tsäjpotm, ¿ti net tyuundë ja yˈëxpëjkpëty? 2) ¿Tijaty yaˈˈatsoowëmbitäämp mä tyäˈädë artikulo?

³ Ko waanë yˈijty mä netyë Jesus të pyatëkë tsäjpotm, ta ja yˈëxpëjkpëty ojts tpayoˈoytyë mä Diosë jyaaybyajtën ets tˈamdoowdë nyaybyudëkë parë twinˈijxtë pën wyingudëgatsˈatëbë Judas Iscariote, ets yëˈë wyinˈijxtë Matías. Duˈun ojts kyaˈpxy nimäjmajtskë apostëlëty (Apostʉlʉty 1:15-26). Parë Jyobaa jëjpˈamë nety duˈun yajtunët ets nanduˈun parë ja apostëlëtëjk. Pes ja Jesusë yˈëxpëjkpëty pyëjktë kuentë ko jëjpˈamë nety yajpäättët nimäjmajtskë apostëlë. * Jesus të nety twinˈixy ja yˈapostëlëty ets të nety ttukniˈˈixëdë parë ttundët tuˈugë tuungë jëjpˈambë mä Diosë kyäjpn. ¿Ti tuungë nety tyunandëp? ¿Wiˈix pyudëjkëdë Jyobaa mëdë Jesus parë duˈun ttuundë? ¿Ja tyam tuk grupë jäˈäy diˈib nanduˈun tyuundëbë duˈumbë tuunk? ¿Ets wiˈix mbäät njamyajtsëm pënaty tyuˈumooytyëbë Diosë kyäjpn, ets mas niˈigyë ja tuumbë diˈib kuwijy? (Matewʉ 24:45; Ebreeʉsʉty 13:7). Min nˈokˈijxëm.

4. ¿Ti tuunk nyikëjxmˈäjttë ja apostëlëty ets ja mëjjäˈäytyëjk?

⁴ Mä ja Pentekostes xëëw mä jëmëjt 33, ja ogäˈän ja apostëlëty ttuˈumooytyë Diosë kyäjpn. Biiblyë jyënaˈany: “Ta yëˈë Peedrë mët ja myëˈapostëlëty tyënääyëˈktë”, ets ttukniˈˈijxëdë mayjyaˈay ja tëyˈäjtën diˈib mbäät yajnitsoˈogëdë (Apostʉlʉty 2:14, 15). Mayë tyäˈädë jäˈäyëty ojts tmëbëktë Jesus. Ets ok, ta tjotmooytyë “tëgekyë diˈibë ja apostëlëty tukˈëxpëjkëdëp” (Apostʉlʉty 2:42). Ja apostëlëtëjk yëˈë ijty nyikëjxmˈäjttëp wiˈix tyuny ja meeny sentääbë mä ja tuˈukmujkën (Apostʉlʉty 4:34, 35). Nan yëˈë nyikëjxmˈäjttë tyukniˈˈixëdët ja tëyˈäjtën mä Diosë kyäjpn ets tninuˈkxtäägëdët. Pes duˈun jyënandë: “Ëëtsëty, apostëlëty, nyajnejxypyëts ja Diosë yˈëxpëjkën esë käjxtakën” (Apostʉlʉty 6:4). Ja apostëlëtëjk nan yëˈë wyinˈijxtë pënaty nëjkx kyäjpxwäˈkxtë mä tyëgoyˈatyë naybyudëkë (Apostʉlʉty 8:14, 15). Ok, ta nanduˈun pyudëjkëdë mëjjäˈäytyëjk parë tkuentˈäjttë mäjaty jyamˈäjtyë tuˈukmujkën. Ets yëˈë diˈib wyoowˈyoˈoytyë ja Diosë kyäjpn, duˈun ja apostëlëtëjk ets ja mëjjäˈäytyëjk (Apostʉlʉty 15:2).

5. Mä primer siiglë, ¿wiˈix pyudëjkëdë espiritë santë pënaty wyoowˈyoˈoytyë Diosë kyäjpn? (Ixë dibujë mä tsyondaˈaky).

⁵ Ja Dios mëduumbëty diˈib mä primer siiglë, ijttë seguurë ko Jyobaa yëˈë yajtuumbyë Jesus parë tnëˈëmoˈoy tuˈumoˈoy pënaty wyoowˈyoˈoytyë ja Diosë kyäjpn. ¿Tiko yˈijttë seguurë? Tuk pëky, yëˈko pudëjkëdë espiritë santë (Fwank 16:13). Niˈamukë ja Dios mëduumbëty ojts tˈaxäjëdë espiritë santë, per yëˈëyë ja apostëlëty ets ja mëjjäˈäytyëjk diˈib Jerusalén pudëjkëdë parë ttuˈumooytyë ja Diosë kyäjpn. Extëm nˈokpëjtakëm, mä jëmëjt 49, ojts pyudëkëdë espiritë santë parë tˈyajwingëdaktë wiˈix yˈoyët ja jotmay ko yajtsuktë ja yetyëjk. Mäjaty ja tuˈukmujkën ojts tmëmëdowdë ja neky diˈib kyajxtë pënaty wyoowˈyoˈoytyë ja Diosë kyäjpn, ta ojts “myëjwiinëdë myëbëjkën es bom bom tmëbëjktë waanë may ja jäˈäyëty” (Apostʉlʉty 16:4, 5). Extëm tˈyajwingëdaktë tyäˈädë  jotmay, yëˈë xytyukˈijxëm ko pënaty wyoowˈyoˈoytyë ja Diosë kyäjpn myëdäjttëbë nety ja Diosë myëjääw etsë oybyë jäˈäyˈäjtën extëmë tsojkën etsë mëbëjkën (Apostʉlʉty 15:11, 25-29; Galasyʉ 5:22, 23).

6. 1) ¿Wiˈix pyudëjkëdë anklës pënaty wyoowˈyoˈoytyë Diosë kyäjpn? 2) ¿Wiˈix tyuˈumooyëdë Diosë yˈAyuk?

⁶ Myëmajtsk pëky, yëˈko pyudëjkëdë anklës pënaty wyoowˈyoˈoytyë ja Diosë kyäjpn. Extëm nˈokpëjtakëm, Cornelio ojts yˈanëˈëmxëtyë anklës parë nëjkx tˈëxtäˈäyë apostëlë Pedro, perë Cornelio kyaj nety yˈisraelitëty ets nan kyaj nety tsyukyëty. Ets ko Pedro tyukmëtmaytyakë tëyˈäjtën, ta ja Cornelio mëdë fyamilyë ojts tˈaxäjëdë espiritë santë, oyë nety ja yetyëjkëty të kyayajtsuktë. Cornelio yëˈë tim jawyiin tëjkë Dios mëduumbë diˈib kyaj yˈisraelitëty ets kyaj tsyukyëty. Ko ja apostëlëtëjk ets ja Dios mëduumbëty tnijäˈäwëdë, ta tkupëjktë wiˈix ja Dios tˈyajnigutukë ets ojts tˈaxäjëdë mä ja tuˈukmujkën pënaty kyaj yˈisraelitëty ets kyaj të yajtsuktë (Apostʉlʉty 11:13-18). Tyäˈädë yëˈë xytyukˈijxëm ko ja anklëstëjk yëˈë nety yajmëjwindëjkëdëp mä yajkäjpxwaˈkxyë oybyë ayuk, diˈib nyikëjxmˈäjttë pënaty ojts twoowˈyoˈoytyë ja Diosë kyäjpn (Apostʉlʉty 5:19, 20). Ets myëdëgëk pëky, yëˈko tyuˈumooyëdë Diosë yˈAyuk. Tyäˈädë nmëguˈukˈäjtëm xëmë nyaytyuktuˈumooyëdë Diosë yˈAyuk mä wiˈix tyukniˈˈixëdët ets wiˈix ttuˈumoˈoytyët ja Diosë kyäjpn (Apostʉlʉty 1:20-22; 15:15-20).

7. ¿Tiko mbäät njënäˈänëm ko Jesus yëˈë nety tyuˈumoopy ja Dios mëduumbëty mä primer siiglë?

⁷ Pënaty wyoowˈyoˈoytyë ja Diosë kyäjpn myëdäjttë kutujkën, per jyaygyujkëdë ko yëˈë Wyintsënˈäjttëbë Jesukristë. ¿Wiˈix nnijäˈäwëm? Apostëlë Pablo jyënany ko Kristë yëˈë myooyë madakën näägë jäˈäy ets “yˈapostëlëˈattët”. Nan ojts jyënaˈany ko Kristë yëˈë diˈib ijtp extëmë këbäjk o diˈib nyiwintsënˈäjtypy ja tuˈukmujkën (Éfesʉ 4:11, 15). Dios nan tsyojk ets yajxëëwmoˈoytyët “kristianë” pënaty myëbëjktëp ja Kristë, ets kyaj yajxëëwmoˈoyët extëm niduˈuk ja apostëlë txëwˈaty (Apostʉlʉty 11:26). Pablo nan yˈijx ko jëjpˈam tpanëjkxët extëm ja apostëlëtëjk ets ja mëjjäˈäytyëjk tyukniˈˈixëdë mët ko yëˈë tyukwäˈkpajttëp ja Diosë jyaaybyajtën. Pablo nanduˈun jyënany: “Ntsejpyëts es xyjaygyukëdët ko yëˈë Jesukristë yëˈë dëˈën nyigëbäjkˈäjtypy niduˈuk niduˈugë yetyëjk”. Ko duˈun jyënany, nan yëˈë nety yˈandijpy niduˈuk niduˈuk diˈib wyoowˈyoˈoytyëbë Diosë kyäjpn. Ta net yˈakjënany ko Dios yëˈë nyigëbäjkˈäjtypy ja Jesukristë (1 Korintʉ 11:2, 3). Yajxon nyigëxëˈky ko Jyobaa yëˈë nety të ttuknipëkyë yˈUˈunk, Jesukristë, parë ttuˈumoˈoyët mäjaty tyuˈukmuktë ja nmëguˈukˈäjtëm.

8, 9. ¿Ti tuungë jëjpˈambë tyuun ja nmëguˈukˈäjtëm Russell?

⁸ Naa ja mä jëmëjt 1870, Charles Taze Russell mët niganäägë myëtnaymyaayëbë yajxon tpayoˈoytsyondaktë wiˈix mbäädë Dios yaˈˈawdaty extëmë Biiblyë tyukniˈˈixë. Ets pyudëkëyandëbë netyë jäˈäy parë nanduˈun ttundët, axtë diˈib wiink ayuk käjpxtëp. Pääty mä jëmëjt 1884 tˈrejistraräjttë gobiernë windum tuˈugë organisasion diˈib tyukxëwˈäjttë Zion’s Watch Tower Tract Society. Etsë nmëguˈukˈäjtëm Russell, yëˈë diˈib nyiwintsënˈäjt. * Ko tˈëxpëjky yajxonë Biiblyë, ta kyaj tsyëˈkë tnimaytyäˈägët ko kyaj yajpääty mä Biiblyë tijatyë jäˈäy yajtukniˈˈijxëdëp tsäjptëgoty, extëmë Trinidad ets ko anmë kyaj yˈooky. Ja nmëguˈukˈäjtëm  Russell nan yajxon tjaygyujkë ko kyaj pën tˈixäˈäny ko nety ja Kristë jyëmbity ets ko “ja tiempë diˈibë Dios të tpëjtaˈaky” ja jyëjpkëxäˈäny 1914 (Lukʉs 21:24). Russell yajtuunë jyot myëjääw, tiempë etsë myeeny syentääbë parë jäˈäy ttukniˈˈijxë tyäˈädë tëyˈäjtën. Seguurë ko yëˈë Jyobaa yajtuunë mëdë Jesus parë ttuˈumoˈoyët ja Diosë kyäjpn mä tadë tiempë.

⁹ Ja nmëguˈukˈäjtëm Russell kyaj tkupëjky ets pën mëj yaˈitëdët. Mä jëmëjt 1896, tkujäˈäyë ko yëˈë ets pënaty yajnëjkxtëbë jëjpˈamˈäjtën kyaj nety ttsoktë ets pën myëjkuˈëw myëjkugäjpxëdët o myoˈoyëdët tuˈugë xyëëw diˈib mëj yajnäjxëdëp o yajxëëwmoˈoytyët pënaty mëët tyuˈukmuktë extëm yëˈë txëwˈaty. Ok, ta ja nmëguˈukˈäjtëm Russell jyënany: “Tyäˈädë tuunk kyaj yëˈë tjaˈajëtyë naxwinyëdë jäˈäy”.

10. 1) ¿Näˈä Jesus ttuunkmooy ja tuumbë diˈib kuwijy? 2) Oknimaytyäˈäk wiˈix ojts yajnigajpxy ko Diˈib wyoowˈyoˈoytyëbë Jyobaa tyestiigëty kyaj yëˈë tˈandijy pënaty nyikëjxmˈäjttëbë Sociedad Watch Tower.

¹⁰ Mä jëmëjt 1919, ja Jesus ttuunkmooy ja tuumbë diˈib kuwijy, tyëgëk jëmëjtëbë nety të yˈoˈknë nmëguˈukˈäjtëm Russell. ¿Tiko ttuunkmooy? Parë “bom bom dyajkayët” pënaty pyanëjkxtëbë Jesus (Matewʉ 24:45). Tuk grupë tyäˈädë nmëguˈukˈäjtëm diˈib nëjkxtëp tsäjpotm, jap yajpattë Brooklyn (Nueva York) ets tˈyajkääy tˈyaˈuktë ja Jesus yˈëxpëjkpëty. Tyäˈädë ayuk “Diˈib wyoowˈyoˈoytyëbë Jyobaa tyestiigëty”, ja ogäˈän pyëtsëëmy 1940 mä ëxpëjkpajn. Mä tadë tiempë, tuˈugyë nety yaˈixyˈattë Diˈib wyoowˈyoˈoytyëbë Jyobaa tyestiigëty mët pënaty nyikëjxmˈäjttëbë organisasion Watch Tower Bible and Tract Society. Per mä jëmëjt 1971, ta ojts yajnigajpxy yajxon ko Diˈib wyoowˈyoˈoytyëbë Jyobaa tyestiigëty kyaj tyuˈugyëty mët pënaty nyikëjxmˈäjttëbë Sociedad Watch Tower, mët ko yëˈëyë yˈijxtëp tijaty jotmay oyëyäämp extëmë ley tˈyajnigutukë. Desde jaa, mbäädë nety tyundë nmëguˈukˈäjtëm diˈib nëjkxandëp tsäjpotm mä Diˈib wyoowˈyoˈoytyëbë Jyobaa tyestiigëty diˈib kyaj tnikëjxmˈattë Sociedad Watch Tower. Ets tyää näämnëm, yëˈë tuundëbë nmëguˈukˈäjtëm diˈib jukyˈatandëp yä Naxwiiny parë tnikëjxmˈattëdë Sociedad Watch Tower. Duˈuntsoo, Diˈib wyoowˈyoˈoytyëbë Jyobaa tyestiigëty mbäät aduˈuk tnëˈëmoˈoy ttuˈumoˈoytyë Diosë kyäjpn ets tˈyajpëtsëmdë ëxpëjkpajn (Fwank 10:16; Apostʉlʉty 6:4). Mä Diˈib Xytyukˈawäˈänëm 1 äämbë julië 2013, ojts tnimaytyaˈaky ko pënaty yajtijtëp tuumbë diˈib kuwijy, nan yëˈë yajtijp Diˈib wyoowˈyoˈoytyëbë Jyobaa tyestiigëty, tuk grupë nmëguˈukˈäjtëm diˈib nëjkxandëp tsäjpotm.

11. Ja Diˈib wyoowˈyoˈoytyëbë Jyobaa tyestiigëty, ¿wiˈix tˈyajwingëdäˈäktë tijaty tyunandëp?

¹¹ Ko tyuˈukmuktë sëmään sëmään Diˈib wyoowˈyoˈoytyëbë Jyobaa tyestiigëty, yajtuˈugyëdëp ja yˈääw yˈayuk ko tijaty ttunäˈändë. Ko janäämëty tyuˈukmuktë, yëˈë pudëjkëdëp parë nyayˈëw nyaygyäjpxëdë tsuj yajxon ets nyayaˈitëdë tuˈugyë (Proverbios 20:18). Nituˈuk mas mëj kyanayjawëty mä myëguˈuktëjk. Pääty yajtëgäjtstëp tuˈuk tuˈugë jëmëjt pën yajtsondäˈägëbë reunyonk diˈib myëdäjttëp sëmään sëmään (1 Peedrʉ 5:1). Ets nanduˈunën tyundë mä ja tëdujkpë komitee. Diˈib wyoowˈyoˈoytyëbë Jyobaa tyestiigëty nituˈuk kyanayjawëdë ko yëˈë nyiwintsënˈäjtypy ja myëguˈuktëjk. Niduˈuk niduˈugë tyäˈädë nmëguˈukˈäjtëm nanduˈun nyaxtë extëm “ja poˈoduumbëty” (ixë rekuäädrë “¿Ti yˈandijpy?”). Ets niduˈuk niduˈuk nan yˈaxäjëdëp ja käˈäy ukën o ja ëxpëjkpajn ets tpanëjkxtë extëm tyuˈumoˈoyëdë ja tuumbë diˈib kuwijy.

12. ¿Tijaty yaˈˈatsoowëmbitäämp?

¹² Diˈib wyoowˈyoˈoytyëbë Jyobaa tyestiigëty, kyaj myëgäjpxëdë Dios parë tijaty tyuknijawëdë ets nan kyaj wyäˈätsjäˈäyˈattë. Pääty, extëm näˈäty xytyuˈumoˈoyëm o extëm näˈäty tnimaytyäˈäktë tijaty tukniˈˈijxëbë Biiblyë, mbäät kyaj dyuˈunˈaty. Extëm mä foyetë Naybyudëkë parë tijaty tpayoˈoytyëdë Jyobaa tyestiigëty, tap tuk pëky myiny mä jyënaˈany “Yajkäjpxˈoyë tijaty nmëbëjkëm”, mä myiny tuˈugë listë tijaty të yajkäjpxˈoyë. Jesus ojts jyënaˈany ko tsuj yajxon xyyajkayäˈän xyyaˈuugäˈänëm ja tuumbë diˈib kuwijy. Per ¿pën yajtijp ja tuumbë diˈib kuwijy? (Matewʉ 24:45). ¿Tiko mbäät nˈijtëm seguurë ko Diˈib wyoowˈyoˈoytyëbë Jyobaa tyestiigëty nan yëˈë yajtijp ja tuumbë diˈib kuwijy? Min nˈokˈijxëm wiˈix të tˈaxäjëdë tëgëk pëkyë naybyudëkë extëm diˈib yajmooytyë pënaty wyoowˈyoˈoytyë Diosë kyäjpn mä primer siiglë.

13. ¿Wiˈixë espiritë santë të pyudëkëdë Diˈib wyoowˈyoˈoytyëbë Jyobaa tyestiigëty?

¹³ Diˈib wyoowˈyoˈoytyëbë Jyobaa tyestiigëty,  yëˈë pudëjkëdëbë espiritë santë. Yëˈë pudëjkëdëp parë yajxon tjaygyukëdët tijaty tukniˈˈijxëbë Biiblyë diˈibë nety kyaj tjaygyukëdë. Extëm nˈokpëjtakëm, tijaty të yajkäjpxˈoyë diˈib miimp mä foyetë Naybyudëkë nituˈugë naxwinyëdë jäˈäy mbäät këˈëm tkajaygyukë ets tkanimaytyaˈaky “ja këkpë nimëjääbë wyinmäˈäny ja Dios” (käjpxë 1 Korintʉ 2:10). Diˈib wyoowˈyoˈoytyëbë Jyobaa tyestiigëty nanduˈun jyënäˈändë extëm jyënanyë apostëlë Pablo: “Tëgekyë diˈibë Dios të xytyuknijäˈäm mët yëˈëgyëjxm ja Espiritë Santë, jaˈa ko yëˈë Espiritë Santë tyukˈijxëp tëgekyë, es axtë ja këkpë nimëjääbë wyinmäˈäny ja Dios” (1 Korintʉ 2:13). Nuˈun nyajxy kanäk mëgoˈpx jëmëjt, yëˈë relijyonk diˈib kyaj tyëyˈäjtënëty yˈanaˈamdë jäˈäy ets kyaj yajxon tnëˈëmooy ttuˈumooytyë. Per ¿tiko niˈigyë yajxon të yajjaygyukë Biiblyë desde 1919? Yëˈko Jyobaa tˈyakyë naybyudëkë mët yëˈëgyëjxmë yˈespiritë santë.

14. Extëm jyënaˈanyë Diˈibʉ Jatanʉp 14:6, 7, ¿wiˈix tyamë anklës tpudëkë Diˈib wyoowˈyoˈoytyëbë Jyobaa tyestiigëty ets pënaty käjpxwäˈkxtëp?

¹⁴ Diˈib wyoowˈyoˈoytyëbë Jyobaa tyestiigëty, yëˈë pudëjkëdëbë anklës. Kajaa tnikëjxmˈattë tuunk parë ttukniwitsëdë wiˈix yˈëwäˈkx kyäjpxwäˈkxtët tuktujk miyonk naxyë nmëguˈukˈäjtëm diˈib yajpattëp abëtsemy nyaxwinyëdë. ¿Tiko niˈigyë tyäˈädë tuunk myëjwindëkë? Tuk pëky, yëˈko anklëstëjk tˈyaktë naybyudëkë (käjpxë Diˈibʉ Jatanʉp 14:6, 7). Të kanäkˈok yajpudëkëdë nmëguˈukˈäjtëm diˈib käjpxwäˈkxtëp parë tpäättë jäˈäy diˈib tam ttimˈamdoowdäˈäyë Diosë nyaybyudëkë. * Nan niˈigyë myëjwindëkë Diosë tyuunk mä mëkë nmëguˈukˈäjtëm yajtukmëtsipˈattë tëyˈäjtën. Tyäˈädë nan yëˈë xytyukˈijxëm ko kyajxyëp duˈun yajtuny koxyëbë anklëstëjk xykyapudëjkëm.

15. Nimaytyäˈäk mët tuˈugë ijxpajn wiˈix kyaj tyuknaxëty Diˈib wyoowˈyoˈoytyëbë Jyobaa tyestiigëty mët pënaty nyiwintsënˈäjttëbë relijyonk diˈib kristianë.

¹⁵ Diˈib wyoowˈyoˈoytyëbë Jyobaa tyestiigëty, yëˈë tuˈumooyëdëbë Diosë yˈAyuk (käjpxë Fwank 17:17). Extëm nˈokpëjtakëm, mä Diˈib Xytyukˈawäˈänëm 15 äämbë oktuubrë diˈib pëtsëëm 1973, tˈyajtëëy: “¿Mbäät nyëbattë jäˈäy diˈib duˈunyëm juˈkp?”. Ta yaˈˈatsoowëmbijty ko kyaj, ets yëˈë tyukwäˈkpajt extëmë Biiblyë jyënaˈany. Mä tyäˈädë rebistë ojts kanääk tnigajpxyë tekstë parë tnimaytyaky tiko mbäät yaˈëxkexyë jäˈäy mä Diosë kyäjpn pën kyaj tmastuˈuty ja juˈuky (1 Korintʉ 5:7; 2 Korintʉ 7:1). Mä tyäˈädë rebistë yajnimaytyaky ko tyäˈädë anaˈamën kyaj myiny mä naxwinyëdë jäˈäy, “Diosën duˈun nyiˈanaˈamëp mä yˈAyuk diˈib të tˈyajjäˈäyëty”. Ëtsäjtëm jeˈeyë nrelijyonkˈäjtëm diˈib tsyojkënyëˈajtypy tpadunäˈäny extëmë Diosë yˈAyuk tˈyajnigutukë. Ets yajpaduumbë duˈun, oy nääk tsyiptakxëdë. Tyää näämnëm duˈun tuˈugë liibrë jyënany diˈib nyimaytyakypyë relijyonk jap Estados Unidos: “Pënaty nyiwintsënˈäjttëbë relijyonk diˈib kristianë xëmë tˈaˈijxëtyaˈaytyë tijaty tukniˈˈijxëdëp parë twijtsˈoyëdë extëm mbäät ja jyaˈay tˈoymyëdowdë ets tkupëktë oytyim pënëty”. Per Diˈib wyoowˈyoˈoytyëbë Jyobaa tyestiigëty kyaj yëˈë ttundë ti ja mayjyaˈay tsyojkypy, yëˈë naytyuktuˈumooyëdëp wiˈix jyënaˈany ja Diosë yˈAyuk. Duˈun nyigëxëˈëky ko Jyobaa yëˈë diˈib tyuˈumoopy ja kyäjpn.

16. ¿Ti mbäät tuk pëky nduˈunëm parë nyaˈijxëm ko njamyajtsëm Diˈib wyoowˈyoˈoytyëbë Jyobaa tyestiigëty?

¹⁶ (Käjpxë Ebreeʉsʉty 13:7). Biiblyë xyˈanmäˈäyëm ko tsojkëp njamyajtsëm pënatyë  “Diosë yˈayuk” xytyukˈëxpëjkëm, tyäˈädë yëˈë yˈandijpy pënaty xywyoowˈyoˈoyëm. Tuk pëky wiˈix mbäät njamyajtsëm, ja ko ninuˈkxtakëm Diˈib wyoowˈyoˈoytyëbë Jyobaa tyestiigëty (Éfesʉ 6:18). Yëˈëjëty jantsy kajaa tnikëjxmˈattë tuunk, extëm tˈyajpëtsëmdë ëxpëjkpajn, ttukniwitsëdë wiˈix ngäjpxwäˈkxëm abëtsemy nyaxwinyëdë ets tˈixtë wiˈix tyunët ja meeny sentääbë diˈib yˈaxäjëbë Diosë kyäjpn. Seguurë ko tyäˈädë nmëguˈukˈäjtëm yajtëgoyˈäjttëp parë xëmë ninuˈkxtakëm.

17. ¿Wiˈix nbudëjkëm Diˈib wyoowˈyoˈoytyëbë Jyobaa tyestiigëty?

¹⁷ Nan njamyajtsëmë nety Diˈib wyoowˈyoˈoytyëbë Jyobaa tyestiigëty ko nbanëjkxëm extëm xynyëˈëmoˈoy xytyuˈumoˈoyëm mët yëˈëgyëjxmë ëxpëjkpajn, reunyonk etsë asamblee. Tyäˈädë nmëguˈukˈäjtëm nan yëˈë yˈijxtëp pënaty tundëp sirkuitë, etsë sirkuitë yëˈë net yˈijxypy pënaty tundëp mëjjäˈäy. Pënaty tuundëp sirkuitë ets mëjjäˈäy, yaˈijxëdëp ko jyamyajtstëp Diˈib wyoowˈyoˈoytyëbë Jyobaa tyestiigëty ko yajxon tpanëjkxtë extëm nyëˈëmoˈoy tyuˈumoˈoyëdë. Ets niˈamukë ëtsäjtëm, nyaˈijxëm ko nwintsëˈkëmë Jesus, diˈib nWintsënˈäjtëm, ko nmëmëdoˈowëm pënaty tyam yajtuumpy (Ebreeʉsʉty 13:17).

18. ¿Tiko mbäät nˈëwäˈkx ngäjpxwäˈkxëm nuˈun nmadakëm?

¹⁸ Ja tuk pëky wiˈix mbäät njamyajtsëm Diˈib wyoowˈyoˈoytyëbë Jyobaa tyestiigëty, ja ko nˈëwäˈkx ngäjpxwäˈkxëm nuˈun nmadakëm. Ebreeʉsʉty 13:7 xyˈanmäˈäyëm ets niˈˈijxtutëmë myëbëjkënë pënaty yajnëjkxtëbë jëjpˈamˈäjtën. Diˈib wyoowˈyoˈoytyëbë Jyobaa tyestiigëty, mëjwiin kajaa tˈyajnigëxëˈëktë myëbëjkën ko ttukxondäˈäktë mä yˈëwäˈkx kyäjpxwäˈkxtë ets tˈyajmëjwindëkëdë Diosë tyuunk. ¿Nbudëjkëm mä tyäˈädë tuungë jëjpˈambë? Pën nduˈunëm duˈun, ta agujk jotkujk nnayjawëyäˈänëm ko netyë Jesus xyˈanmäˈäyëm: “Tëyˈäjtën nˈanëëmëdë ko mä dëˈën xytyuundë mët oytyim diˈibëty nmëguˈugëts, mduundë mët ëj nandëˈën” (Matewʉ 25:34-40).

19. ¿Tiko të nduknibëjtakëm ko yëˈë nbanëjkxäˈänëmë Jesus diˈib nWintsënˈäjtëm?

¹⁹ Ko Jesus jyëmbijty tsäjpotm, kyaj duˈunyë ojts tnikeˈeky ja yˈëxpëjkpëty (Matewʉ 28:20). Yëˈë nyijäˈäwë ko mientrës yˈijty yä Naxwiiny, yëˈë pudëjkë espiritë santë, anklës etsë Diosë yˈAyuk parë ojts ttuˈumoˈoy ja yˈëxpëjkpëty. Ets tyamë Jesus, nanduˈun tpudëkë ja tuumbë diˈib kuwijy. Diˈib wyoowˈyoˈoytyëbë Jyobaa tyestiigëty pyanëjkxtëp “ja Borreeguˈunk oytyim määty nyejxy” (Diˈibʉ Jatanʉp 14:4). Pääty ko nbanëjkxëm extëm xytyuˈumoˈoyëm Diˈib wyoowˈyoˈoytyëbë Jyobaa tyestiigëty, yëˈë nety nbanëjkxëmë Jesus, diˈib nWintsënˈäjtëm, diˈib tim tsojk xywyoownëjkxäˈänëm “mä myuxy ja nëë diˈibë yajkypy ja jikyˈäjtën” ets njukyˈatäˈänëm winë xëëw (Diˈibʉ Jatanʉp 7:14-17). Nituˈugë naxwinyëdë jäˈäy tkamëdatyë madakën parë duˈun xytyukwandakëm.