MÄ BIIBLYË yajmaytyaˈaky ko ijty tuˈugë jäˈäy pyëkäˈäny, ja yetyëjk tsojkëbë nety tkujuyët ja toxytyëjk. Extëm nˈokpëjktakëm, mbäädë nety dyaktë meeny, jëyujk animal o jam ti dyaktët mëdiˈibë tsobatp mëjwiin kajaa. Ets näˈäty jeˈeyë ijty ja toxytyëjk yajniduny, duˈun extëmë Jacob tniduunyë Raquel. Jacob kyajpxyˈäjt mët ja myëˈt ko tnidunäˈänyë Raquel jëxtujk jëmëjt (Gén. 29:17, 18, 20). ¿Tiko ijty duˈunë jäˈäy tmëdattë kostumbrë?

Carol Meyers mëdiˈibë yˈëxpëjkpëtsëëmbyë Biiblyë jyënaˈany: “Ko ijty duˈun ja toxytyëjk yajkujuy, yëˈë duˈun parë waanë yajpudëkë ja fyamilyë mët ko kyaj nety jam yˈokˈyajpäädanë parë tyunët, ets mas niˈigyë pën ja familyë kamduump ujtstuundëp ijty”. Ja tuk pëky tiko ijty yajkujuy ja toxytyëjk, yëˈë parë oy yˈittët ja familyë ets ko tpäättët ja amay jotmay, mbäädë nety nyaybyudëkëdë nixim niyam. Nanduˈunë nety nyigëxëˈëky ko ja toxytyëjk të nyaynyiˈatsoowënë ets ko kyaj ja tyääk tyeety yˈokkuentëˈatanënë, yëˈë duˈun ja myëmëjjäˈäy.

Per ko ijty yajkujuy ja toxytyëjk, kyaj yëˈë tˈandijy ko mbäädën yajjuy yajtooky extëmë jäˈäy tijaty ttook dyaktë. Tuˈugë liibrë mëdiˈibë xyëwˈäjtypy Instituciones del Antiguo Testamento, jyënaˈany: “Kuanë ko ijty yajkujuy ja kiixy nuˈun ja fyamilyë tˈamdoy, pes duˈunë nety nyigëxëˈëky ko ja kiixy të yajkujuy. Per kyaj yëˈë tˈandijy ko ja kiixy tëdën jyantsy yajtooky, yëˈë duˈun ko wanaty jyëmbity tijaty ja uˈunktääk uˈunkteety të ttuny”. *

Tyam, ta näägë lugäär mä duˈunë jäˈäy tˈakmëdattë kostumbrë ets ja toxytyëjk yajkujuy. Pën ja tääk teety mëdiˈibë Dios mëduundëp kyaj nëgoo ti mëjwiin kajaa ttimyˈamdowdë, ta jäˈäy tpëktëdë kuentë ko jyaygyujkëdëp wiˈix ja myëguˈuk yaˈix yajpäättë (Filip. 4:5, TNM; 1 Kor. 10:32, 33). Ets duˈun dyajnigëxëˈëktë ko kyaj myeenyˈookˈattë (2 Tim. 3:2). Ko ja tääk teety kyaj tˈamdowdë tijaty mëjwiin kajaa, mbäädë net ja mixy kyaj dyajˈyon dyajwootsy parë pyëktët, mët ko tˈëxtäˈäy ja meeny mëdiˈibë të yaˈˈamdoy. Ets pën prekursoor, kyaj tiko net tmastuˈudët ja prekursoorˈäjtk parë nëjkx tˈëxtäˈäy ja meeny sentääbë mëdiˈibë yaˈˈamdoop.

Mä näägë lugäär, taaˈäjtpë ley mä yajnigajpxy naa nuˈunën mbäät ja toxytyëjk yajkujuy. Ja tääk teety mëdiˈibë Dios mëduundëp myëmëdoowdëp extëm jyënaˈany ja ley. Ets duˈun ttundë mët ko duˈunë Dios tniˈanaˈamë, “nidëgekyë xymyëmëdowdët ja justisëtëjkëty es pënëty yajkutujktëp”, myëmëdoowdëp ja ley mëdiˈibë kyaj tkajpxykyutëjy ja Diosë yˈanaˈamën (Rom. 13:1; Apos. 5:29).