MÄ JA ley mëdiˈibë yajmooyë Moisés, Jyobaa ojts jap tniˈanaˈamë ko ja israelitëty mbäädë nety dyaktë extëmë wintsëˈkën, ja muuxy o palomë. Ko yajnigajpxy mä ja ley wiˈix mbäät yajˈyakyë wintsëˈkën, xëmë jap yajmaytyaˈagyë yäˈädë majtskpë joon. Pes ja israelitëty mbäädë nety dyaktë tuˈugë muuxy o tuˈugë palomë (Lev. 1:14; 12:8; 14:30). Oy ko duˈunë Jyobaa ojts tniˈanaˈamë, yëˈko kyaj nety mbäät xëmë yajpäätyë muuxy. Min nˈokˈijxëm tiko.

Jam Israel jaayë ijty ja muuxy yajpääty xëgopkoty, per ko myiinë ja xux poˈo naa ja oktuubrë, ta nyëjkxtääynyëdë mä niˈigyë jyokxëty ja it lugäär ets jaanëm jatëgok jyëmbittë Israel ko myiinë ambë (Cant. 2:11, 12; Jer. 8:7). Pääty ko myiinë ja xux poˈo, tsip ja israelitëty tpäättëdë muuxy parë dyaktët extëmë wintsëˈkën.

Jam Israel kyaj nety yˈamääytyaˈagyë palomë, mët ko kyaj wiink lugäär nyëjkxtë. Ets yajˈyujtëp ijty nanduˈunë jyënoty tyëgoty (ijxkijpxyë mëdë Fwank 2:14, 16). Extëm jyënaˈany tuˈugë liibrë, nuˈun tukëˈëyë ja nax käjpn ets ja yˈit lyugäär, “ja jäˈäyëty yajˈyujtëp ijtyë palomë, ets mä ja jyëën tyëjk, nyibojtsëdëp ijty mää yˈittët ja palomë” (ijxkijpxyë mëdë Isaías 60:8).

Yäˈädë yëˈë xytyukˈijxëm ko Jyobaa yëˈë tuˈugë Dios mëdiˈibë oyjyaˈay ets ko kyaj xyˈamdoˈowëm mëdiˈibë kyaj nmëdäjtëm, pes kyupëjk ja palomë mëdiˈibë israelitëty tukwintsëˈkëdë mëdiˈibë nety kyaj yˈamääytyaˈaky mä taabë tiempë.