YOMARA, Marcelo etsë Hiver nidëgëëk tyukaˈaxˈattë ets jap tsyëënëdë Guatemala. Yomara yëˈë jawyiin tëjkë ëxpëjkpë ets ok ja myëgaˈaxëty, per nidëgëëk kyaj yˈixtë ets kyaj tjattë tkäjpxtëdë braille. Pääty ja nmëguˈukˈäjtëm mëdiˈibë yaˈëxpëjkëdë jeˈeyë nety tyukwingugäjpxëdë ja parrafo etsë tekstë.

Ojts tsyiptakxëdë nyëjkxtët reunyonk, pes mä tyuˈukmuktë ja nmëguˈukˈäjtëm ja yajniyeˈeyë 40 minutë. Xëmë ijty yajninaxtë mët ko kyaj mbäät ak yëˈëyë nyëjkxtë, ets ko yajmoˈoytyë ja yˈasignasyonk ta ja nmëguˈukˈäjtëm tyukˈagäjpxëdë parë dyajnaxtët agëbajky.

Mayë 2019, ta nyaxkëdakyë kongregasionk mä ja kyäjpnëty ets të nety jap jyäˈttë tuˈugë kasäädë jäˈäy mëdiˈibë tuundëp prekursoor regulaar. Yäˈädë kasäädë jäˈäy kyaj nety ttukjattë tkäjpxtëdë braille ets tjäˈäytyët, per pyëjktaktë wyinmäˈäny parë ttukniˈˈixëyäˈändë Yomara, Marcelo etsë Hiver. Pääty ojts tˈanuˈkxtë tuˈuk majtskë liibrë parë tjatäˈändë wiˈix yajkajpxyë braille ets yajjäˈäy.

Ko nyajxy majtsk poˈo tëgëk poˈo, wäˈätsë nety tkäjpxnëdë braille, pääty pojˈam wyimbajttë. Tyam ak prekursoor tyundë etsë Marcelo ministerial. Xëmë yˈëwäˈkx kyäjpxwäˈkxtë sëmään sëmään ets jyantsy tyukxondaktëp. Ko duˈun ja nmëguˈukˈäjtëm tˈixtë, yëˈë pudëjkëdëp parë nanduˈun ttundë.

Yäˈädë nidëgëëkpë nmëguˈukˈäjtëm, kyuˈëˈëw kyukäjpxëdëp ko Jyobaa tyestiigëty të pyudëkëdë ets ko tsyokëdë. Yomara jyënaˈany: “Desde kots nˈijxyˈäjttë Jyobaa tyestiigëty njäˈäwëdëts ko xytsyojktëbëts”. Etsë Marcelo jyënaˈany: “Nimayëtsë nmëtnaymyaayëbë nmëdattë mäts nduˈukmuktë ets tuˈugyëts mëdë nmëguˈukˈäjtëm nmëdundë Dios abëtsëmy nyaxwinyëdë”. Yomara mëdë myëgaˈaxëty, yˈëwxijt jyëjpˈijxtëp ets jyäˈtët ja xëëw mä nëjkx tˈixtë wiˈixë netyë yäˈädë naxwinyëdë të jyëmbity jantsy oy jantsy tsuj (Sal. 37:10, 11; Is. 35:5).