JA Dios mëduumbëty diˈib primer siiglë, mëk ojts tyundë parë jäˈäy ttuknijäˈäwëdë ja “oybyë ayuk” nuˈun ttimpattë (Mat. 24:14). Nääk axtë ojts nyëjkxtë wiink paˈis. Extëmë apostëlë Pablo, ojts kanäkˈok nyijkxy mä ja lugäär diˈib tyam xyëwˈäjtypy Turquía, mä kajaa ojts yˈëwaˈkxy kyäjpxwaˈkxy. * Ets mä jëmëjt 2014, kyum majtsk mil jëmëjt, ta ojts yajtukniwitsë tuˈugë kampanyë jap Turquía. ¿Pënaty ojts tyundë, ets tiko?

Turquía ja jyapˈatyë käjpxwäˈkxpë naxy 2,800, per ja tsyëënëdë japë jäˈäy naa 79 miyonk. Diˈib yˈandijpy ko tuˈukpë käjpxwäˈkxpë ja pyaatyëtyë jäˈäy tmëtmaytyäˈägët 28 mil. Tyäˈädë yëˈë xytyukˈijxëm ko nmëguˈukˈäjtëm niwaanënëm jeˈeyë jäˈäy tmëtmaytyäˈäktë. Pääty ko ojts yajtukniwitsë ja kampanyë, yëˈë ets nimayë jäˈäy yajmëtmaytyäˈägët mä waanë tiempë. Mä tyäˈädë kampanyë ja jyäjttë 550 nmëguˈukˈäjtëm diˈib tsoˈondëp kanäk paˈis ets jyäjttëbë turco, parë kyäjpxwäˈkxäˈändë mëdë nmëguˈukˈäjtëm diˈib jap tsënääytyëp. ¿Wiˈix wyimbëtsëëmy?

Ojts nimayë jäˈäy yajmëtmaytyäˈäktë. Tuˈugë tuˈukmujkën diˈib Estambul tkujäˈäyë: “Kom oymyääjëtyë jäˈäy tˈijxtë Jyobaa tyestiigëty, tats xyyajtëëwdë pën yëˈë tuˈugë asamblee tunanëp”. Ets tuˈugë tuˈukmujkën diˈib Izmir, duˈun tkujäˈäyëdë: “Tuˈugë yetyëjk diˈibë nety tuump mä taksi tsyoony jyaˈty, ojts tmëwingony tuˈugë nmëguˈukˈäjtëm ets tˈyajtëëy: ¿Ti tuun jäjtëp? ¿Niˈigyë tyamë mduunk myëjwindëkëdë?”. Pyëjktë kuentë jäˈäy ko nimay ja nmëguˈukˈäjtëm ojts kyäjpxwäˈkxtë.

Nan mëjwiin kajaa ttukxondaktë tyäˈädë kampanyë pënaty tsoˈondë wiink paˈis. Steffen, diˈib tsoˈomp Dinamarca, jyënany: “Tuˈuk tuˈugë xëëw, nbatëtsë jäˈäy diˈibë nety niwindimnëm tkamëdowdë ko Jyobaa yajnimaytyaˈaky. Pääty njäˈäwëts ko yëˈëtsë netyë Jyobaa xyëëw njantsy nyimaytyakëp”. Jatuˈugë nmëguˈukˈäjtëm diˈib tsoˈomp Francia, Jean-David tkujäˈäyë: “Mä tuˈukpë kaye kanäk oorëts ojts nwëˈëmëdë parëts nimaytyaktë Diosë yˈayuk. ¡Jantsy jotkujkëts nnayjäˈäwëdë! Kyaj nety nimayë jäˈäy tnijawëdë pënën Jyobaa tyestiigëty. Kanäk tëjkëts ojts nmëtmaytyäˈäktë jäˈäy, ndukˈijxtëtsë bideo ets nmooytyëtsë ëxpëjkpajn”.

Nuˈun nyajxy majtsk sëmään, ja 550 nmëguˈukˈäjtëmë tkëyäjktë 60 milë ëxpëjkpajn. Extëm nˈijxëm, ko yajtuunyë tyäˈädë kampanyë, ta nimay ojtsë jäˈäy yajmëtmaytyäˈäktë.

 Ojts tˈyajmëjwiinëdë ja tsyojkën mä Diosë tyuunk. Mëjwiin kajaa pyudëjkëdë ja nmëguˈukˈäjtëm diˈib Turquía ko tyuunë ja kampanyë. Ojts nimayë wyinmäˈäny tpëjtäˈäktë parë tyunäˈändë prekursoor. Nuˈun nyajxy tuk jëmëjt, ja ojts nyimayëdë prekursoor 82.

Pënaty ojts nyëjkxtë mä tyäˈädë kampanyë, nan pudëjkëdë mëjwiin kajaa axtë ko jyëmbijttë mä pyaˈis. Extëmë Şirin, diˈib tsoˈomp Alemania, duˈun tkujäˈäyë: “Yëˈë nmëguˈukˈäjtëm diˈib Turquía ninuˈun kyatsiptakxëdë kyäjpxwäˈkxtët oymyääjëty. Ëjts kajaats xytsyiptakxë mët ko wintsoytyuˈunëts. Per ojts duˈun ngäjpxwaˈkxy kots nˈojtsy mä kampanyë, kots ja nmëguˈukˈäjtëm xymyooytyë tyäˈädë ijxpajtën ets kots njantsy nyuˈkxtaky. ¡Axtë ojtsë jäˈäy nmëtmaytyaˈaky mä metrë ets ngëyäjkëtsë trataadë! Kyajts duˈun nekywyintsoytyuˈunëty extëm ijty”.

Johannes, jatuˈugë nmëguˈukˈäjtëm diˈib Alemania, jyënany: “Kanäk pëkyëts tijaty njäjty diˈibëts mbäät nyajtuny mäts ngäjpxwaˈkxy. Yëˈë nmëguˈukˈäjtëm diˈib Turquía wingëm ttsojkënyëˈäjnëdë tmëtmaytyäˈägäˈändë jäˈäy nääk ttimpäättë ets käjpxwäˈkxtëp oytyim määjëty ets oytyim näˈäjëty. Kots njëmbijty Alemania, tats nanduˈunë nwinmäˈäny nbëjtaky ndunäˈäny. Ets duˈunëts tyam nduny, käjpxwäˈkxpëts mas niˈigyë”.

Zeynep, tuˈugë nmëguˈukˈäjtëm diˈib Francia, jyënany: “Kots të nˈotsy mä kampanyë mëjwiin kajaats të xypyudëkë, xypyudëjkëts parëts jantsy jotmëk nˈitët ets parëts niˈigyë ndukˈijxpatëdë Jyobaa”.

Ja nmëguˈukˈäjtëm tuˈugyë yˈijttë. Extëm ja nmëguˈukˈäjtëm tˈyajnigëxëˈktë tsojkën etsë tuˈugyëˈäjtën diˈib tsoˈondëp kanäk paˈis, tyimˈyajwëˈëmdë mä jyot wyinmäˈäny. Jean-David, diˈib të yˈokˈyajmaytyakpë, jyënany: “Jantsy oyëts ojts xyˈagëˈë xyˈaxäjëdë ja nmëguˈukˈäjtëm, duˈunëts xyjäˈäwëdë extëmë myëtnaymyaayëbë ets extëmë fyamilyë. Yaˈˈawatstë jyënˈääw tyëjkˈääw. Nnijäˈäwëbëtsë nety ko abëtsemy nyaxwinyëdë nnayjäˈäwëm tukmëguˈuk mët ko tëts kanäkˈok duˈun ngajpxy mä ëxpëjkpajn, per tyam këˈëmëts të ndimˈixy ko dyuˈunëty. Kotsë Jyobaa nmëduny jantsy oyëts nnayjawëty ets nmoobyëtsë dyoskujuyëm kots duˈun të xytyukˈixy”.

Claire, tuˈugë nmëguˈukˈäjtëm diˈib Francia, jyënany: “Tuk familyëts nˈijttë niˈamukë oyëtsë nety  määyëm ntsoondë, tam diˈib tsoˈondëp Alemania, Dinamarca, Francia ets Turquía. Duˈunxyëp extëmë Dios tjoˈtsy mët tuˈugë mëj joˈtsn mäjatyë tsëbäˈän”.

Stéphanie, diˈib tsoˈomp Francia, jyënany: “Tyäˈädë kampanyë yëˈëts xytyukniˈˈijxë ko kyaj yëˈë xyyajtuˈugyëm ja ayuk diˈib ngäjpxëm o ja kostumbrë diˈib nmëdäjtëm, yëˈë duˈun xyyajtuˈugyëm ko niˈamukë ntsojkëmë Jyobaa”.

Nimay ja nmëguˈukˈäjtëm diˈib ojtstë mä ja kampanyë, ojts ttukniwinmayëdë ko jyëmbitäˈändë Turquía parë tpudëkëyäˈändë ja myëguˈuktëjk mä ja kajaaduunk diˈib japˈäjtp. Të nääk jap nyëjkxnëdë tsënaabyë ets mëjwiin kajaa yajkukäjpxëdë ko duˈun tyundë.

Extëm mä tuˈugë lugäär, tapë nety tuˈugë grupë mä tyundë 25 käjpxwäˈkxpë, ets kanäk jëmëjt jeˈeyë jyapˈäjty tuˈugë nmëguˈukˈäjtëm diˈib tuump mëjjäˈäy. Per mä jëmëjt 2015, ta nidëdujkë nmëguˈukˈäjtëm jyäjttë diˈib tsoˈondëp Alemania ets Países Bajos parë pyudëkëyäˈänëdë. ¡Jantsy jotkujk nyayjäˈäwëdë ja nmëguˈukˈäjtëm!

¿Wiˈix nyayjawëdë nmëguˈukˈäjtëm diˈib tuk tiempë kujk tyundë Turquía? Të näˈäty jam tii tsyiptakxëdë, per nan të tˈaxäjëdë mëjwiin kajaa kunuˈkxën. Min nˈokˈijxëm wiˈix nääk tnimaytyäˈäktë.

Federico, diˈib tsoˈomp España ets naa 40 jyëmëjt, yëˈë niduˈuk diˈib jäjt Turquía. Yëˈë jyënaˈany: “Awäˈätstumëts nnayjawëty kots kyaj nëgoo tijaty nmëdaty njaygyepy ets xypyudëjkëbëts parëts jamë nwinmäˈäny nbëjtäˈägët mä diˈib jëjpˈam”. ¿Wiˈixë Federico tˈixy ko nmëduˈunëmë Dios? Yëˈë jyënaˈany: “¡Nitii duˈun kyaˈoyëty extëm ko mnëjkxët wiink paˈis parë xypyudëkëdë jäˈäy ets tˈixyˈattëdë Jyobaa!, duˈunxyëp extëm mnaybyëjtaˈagyëty Jyobaa kyëˈëjoty. Ets mˈixëp wiˈixë Jyobaa mˈijxˈity mguentˈatyëty”.

Rudy, diˈib tsoˈomp Países Bajos, ja jyëmëjt naa 60 ets tamë kyudëjk, jyënaˈany: “Jantsy jotkujkëts xyyajnayjawëdë kots ndundë mä mëjwiin kajaa  tsyokyëtyë naybyudëkë, etsëts nimayë jäˈäy nduknijawëdë Diosë yˈayuk diˈib kyajnëm ttimmëdowdë. Kots nˈixyë jäˈäy jantsy jotkujk nyayjawëty ko tnijawëdë ja tëyˈäjtën yëˈëts diˈib mëjwiin kajaa xyyajxondakp”.

Sascha, diˈib tsoˈomp Alemania, ja jyëmëjt naa 40 ets tamë kyudëjk, yëˈë jyënaˈany: “Koogoots nëjkxy tëjkˈayeˈebyë xëmëts nbäätyë jäˈäy diˈib kyajnëm ttimmëdoyë Diosë yˈayuk. Jantsy jotkujkëts nnayjawëty kots mbäät nduknijawë tëyˈäjtën”.

Atsuko, diˈib tsoˈomp Japón, ja jyëmëjt naa 35 ets tamë myëmëjjäˈäy, yëˈë jyënaˈany: “Të yˈity njantsy tsyojknëbëts etsë Armajedon myinët, per kots tyam yä nˈity Turquía, nmoobyëtsë dyoskujuyëmë Jyobaa ko myaˈkxtuky. Mientrësëts niˈigyë nˈixy wiˈixë Jyobaa tˈyajtuˈuyoˈoyë tyäˈädë tuunk mä ngäjpxwäˈkxëm, niˈigyëts ntsojkënyëˈaty nmëwingonäˈäny”.

Alisa, diˈib tsoˈomp Rusia ets ja jyëmëjt naa 30, tnimaytyaˈaky: “Kots duˈunë Jyobaa nmëduny, tats xytyukˈixy ko yëˈë nëgooyë yˈoyjyaˈayëty” (Sal. 34:8). Ta yˈakjënäˈäny: “Jyobaa kyajts jeˈeyë nDeetyˈaty, nan yëˈëtsë nwingon nmëtnaymyaayëbë diˈibëts mas niˈigyë nˈixyˈajtypy kots wiˈixëm nyaˈixy nyajpääty. Agujk jotkujkëtsë njukyˈäjtënë nyajnaxy, tëts nmëdatyë oyatypyë eksperiensyë ets tëts nˈaxäjë jantsy mayë kunuˈkxën”.

Ko yajtuunyë tyäˈädë kampanyë jap Turquía, ta nimayë jäˈäy të tnijawëdë ja oybyë ayuk diˈib nyimaytyakypy ja Diosë kyutujkën. Per taanëmë lugäär yˈakwëˈëmy mä kyajnëm yajkäjpxwaˈkxy. Yëˈë nmëguˈukˈäjtëm diˈib të nyëjkxtë Turquía bom bom tpäättë jäˈäy diˈibë nety niwindimnëm tkamëdowdë wiˈixë Jyobaa yajnimaytyaˈaky. ¿Mdunäämp mä tuˈugë territooryë extëmë tyäˈädë? Pën duˈun, jamyats wiˈix jyënaˈanyë Fwank 4:35: “¡Ixtë [ja] kam! Të pëjtaˈaky tyëtsnë es të tpääty ja tiempë es pyëdëˈëgët”. ¿Mbäät xyyakyë naybyudëkë mä të tyëtsnë ja pëjtaˈaky ets “të tpääty ja tiempë es pyëdëˈëgët? Pën duˈun, ix tijaty mbäät ogäˈän xytyuny parë mnëjkxët mä tyëgoyˈatyë naybyudëkë. Ets it seguurë ko pën mgäjpxwäˈkxp mas niˈigyë axtë mä jagambäätpë naxwinyëdë, ¡nëjkxëp xyˈaxäjë mëjwiin kajaa kunuˈkxën! (Apos. 1:8).