Nˈokˈëxtäˈäyëm ja mëkjäˈäyˈäjtën diˈib kyaj nyaxy
“Päättë mëtnaymyaayëbëty mët yëˈëgyëjxmë meeny sentääbë diˈib yä naxwiiny” (LUC. 16:9, TNM).
1, 2. ¿Tiko duˈunyëm jyaˈˈatäˈänyë ayoobë jäˈäy yä naxwiiny?
TUKËˈËYË meeny wyinmäˈäny diˈib jaˈäjtp yä naxwiiny, axëktuump ets kyaj tëyˈäjtën myëët tyuˈuyoˈoy. Mayë ënäˈktëjk kyaj tnekypyäättë tyuunk ets mayë jäˈäy tpëjtäˈäktë jyukyˈäjtën oˈkën jëjpˈam parë nyëjkxtë wiink paˈis mä jyapëtyë meeny sentääbë. Mëkjäˈäytyëjk niˈigyë myëkjäˈäytyaknëdë etsë ayoowbë jäˈäy niˈigyë yˈayoowdëjkëndë. Të näämnëm yaˈëxpëjkpëtsëmy ko jantsy niwaanë jäˈäy abëtsemy nyaxwinyëdë diˈib mëkjäˈäy, ets nuˈun wyinjäˈtyë myëkjäˈäyˈäjtën nanduˈun wyinjäˈty ko yaˈˈawijtsmujktäˈäy nuˈun tmëdattë meeny sentääbë niˈamukë jäˈäy, per naa tsip yajxon yajmaytsyoowbëtsëmët. Diˈibën tëyˈäjtën, yëˈë ko jaˈäjtp miyonkˈamë jäˈäy diˈib nëgooyë yˈayoownëdë, mientrësë wiinkpë tmëdattë mayë meeny sentääbë diˈib axtë tyukmëwëˈëmëdëp kanäk naskaˈaxë yˈuˈunk yˈok. Duˈunë duˈun, päätyë Jesus jyënany: “Ja ayoobëtëjkëty dëˈënyëm xymyëdattët mä miitsëty” (Mar. 14:7). ¿Tiko tuknax ngamëdäjtëmë meeny sentääbë?
2 Jesus nyijäˈäwëbë nety ko yëˈëyë Diosë yˈAnaˈam Kyutujkën mbäät tˈyaˈoyë tyäˈädë jotmay. Ko mä Diˈibʉ Jatanʉp 18:3 yajmaytyaˈagyë “ajuuy adoˈkpë”, yëˈë yˈandijpy tukëˈëyë ja meeny wyinmäˈäny diˈib jaˈäjtp yä naxwiiny. Tyäˈädë yëˈë tuk pëky diˈibë Satanás kyëˈamˈäjtypy, per nanduˈunë politikë winmäˈäny etsë relijyonk diˈib kyaj tyëyˈäjtënëty. Dios mëduumbëty ninuˈun tkatuktëkëdë politikë ets ni relijyonk diˈib kyaj tyëyˈäjtënëty. Perë nimaybyë, kyaj mbäät tyim awäˈätspëtsëëmdäˈäytyë mä meeny wyinmäˈäny.
3. ¿Tijaty yajtëˈëwën nˈatsoowëmbitäˈänëm?
3 Pääty extëmë Dios mëduumbë, oy ko nwinmäˈäyëm wiˈix nˈijxëmë meeny sentääbë o jukyˈäjt madakën. Nˈoknayajtëˈëwëm: “¿Wiˈixëts mbäät nyajtunyë njukyˈäjt nmadakën parëts nyajnigëxëˈëgët ko ntsojkypyëtsë Dios? ¿Tits mbäät nduny parëts jagam nnaybyëjtäˈägëdët mä ja meeny wyinmäˈäny diˈib jaˈäjtp yä naxwiiny? ¿Wiˈix kanäägë nmëguˈukˈäjtëm tˈyajnigëxëˈëktë ko tyukˈijxpajttëp amumduˈukjotë Dios?”.
JA TUUMBË DIˈIB KYAJ TI TTUUNY TËYˈÄJTËN MYËËT
4, 5. 1) ¿Wiˈix jyajty ja tuumbë diˈibë Jesus myaytyak? 2) ¿Wiˈixë Jesus tˈanmääy ja yˈëxpëjkpëty?
4 (Käjpxë Lukʉs 16:1-9). * Xyyajwinmäˈäyëm extëmë Jesus tnimaytyaky ja tuumbë diˈib kyaj ti ttuuny tëyˈäjtën myëët. Tyäˈädë tuumbë yaˈëxkaxäämbë nety mët ko yajniwäämbejty ko axëëk tˈyajtuunë ja wyintsënë myeeny syentääbë. * Pääty yˈijty “kuwijy” ets nyaymyaaybyëjkë mëdë jäˈäy diˈib mbäät pyudëkëty ko ja tyuunk tˈyajtëgoyët. ¿Yëˈë netyë Jesus tyukjaygyukëyaampy ja yˈëxpëjkpëty ko oy ko duˈun yˈadëˈëtstët parë tˈyajnaxtëdë xyëëw jyukyˈäjtën? Kyaj. Pes ojts jyënaˈany ko pënaty “tyunandëp extëm ja Dios ttsekyën, kyaj dëˈën yˈadëˈëtstë”. Pääty, ¿ti diˈib xytyukniˈˈijxëm ko Jesus tmaytyakyë tyäˈädë tuumbë?
5 Jesus nyijäˈäwëbë nety ko duˈun extëmë tyäˈädë mëduumbë jyotmaybyaty, nanduˈunë nety ja yˈëxpëjkpëty tsip nimëjääw tˈyajnaxäˈändë jyukyˈäjtën. Pääty tˈanmääytyë: “Päättë mëtnaymyaayëbëty mët yëˈëgyëjxmë meeny sentääbë diˈib yä naxwiiny”. ¿Tiko? Jaˈko pën tëgooytyaapy ja jukyˈäjt madakën diˈib nmëdäjtëm, Jyobaa mëdë Jesus diˈib mëët të nnaymyaaybyëjkëm, nëjkxëp xykyupëjkëm “mä tsënääytyaknë winë xëëwbë”.
6. ¿Tiko njënäˈänëm ko Dios kyaj ojts ttuknibëjtäägë etsë naxwinyëdë jäˈäy twinmäˈänyˈattëdë meeny sentääbë?
6 Biiblyë yajxon tnigajpxy ko Dios kyaj ojts ttuknibëjtäägë etsë naxwinyëdë jäˈäy twinmäˈänyˈattëdë meeny sentääbë. ¿Tiko duˈun njënäˈänëm? Jaˈko Adán mëdë Eva, yajmooytyë tijatyë nety yajtëgoyˈäjttëp, axtë naniˈigyë (Gén. 2:15, 16). Ets ko Dios ttuknigejxyë myëjääw pënatyë nety nëjkxandëp tsäjpotm mä primer siiglë, nipën kyajënany “ëjtsë njaˈa” pën jamë nety ti tmëdat tjaygyaptë. “Nidëgekyë twinmääytyë ko tëgekyë diˈibë naty myëdäjttëp yëˈë [parë] nandëˈën dyajtundët nidëgekyëty” (Apos. 4:32). Ja kugajpxy Isaías ojts tnaskäjpxë ko jäˈtäämbë tiempë mä niˈamukë jäˈäy ttukxondäˈägäˈändë tijaty ijt windëëp Naxwiiny (Is. 25:6-9; 65:21, 22). Per mientrës jyaˈtyë tyäˈädë tiempë, tsojkëbë nety ja Jesusë yˈëxpëjkpëty yˈittët wijy parë tˈyajnaxtëdë jyukyˈäjtën “mët yëˈëgyëjxmë meeny sentääbë diˈib yä naxwiiny”, per nanduˈun ttundët tijatyë Dios tyukjotkëdakypy.
NˈOKˈYAJTUˈUNËM YAJXONË “MEENY SENTÄÄBË DIˈIB YÄ NAXWIINY”
7. ¿Ti xytyukniˈˈijxëm extëm jyënaˈanyë Lukʉs 16:10-13?
7 (Käjpxë Lukʉs 16:10-13). Ja mëduumbë diˈibë Jesus myaytyak, yˈëxtääyë myëtnaymyaayëbë parë këˈëm ttukˈoyˈatäˈäny. Per yëˈë ojts tˈanëëmë ja yˈëxpëjkpëty parë tˈëxtäˈäytyët ja myëtnaymyaayëbë jam tsäjpotm, per kyaj parë këˈëm ttukˈoyˈattët. Ko duˈun jyënany, yëˈë parë njaygyujkëm ko wiˈix nyajtuˈunëm ja meeny sentääbë, ja nyigëxëˈëgäˈäny pën ntsojkëmë Dios o kyaj.
8, 9. ¿Wiˈix näägë nmëguˈukˈäjtëm tˈyajtundë “meeny sentääbë diˈib yä naxwiiny”?
Mat. 24:14). Min nˈokˈijxëm wiˈix näägë nmëguˈukˈäjtëm ttundë. Extëm jap India, tuˈugë kixyuˈunk japë meeny tnikoombejty mä tuˈugë käjuˈunk, axtë kyaj tnekyjyuuy ja yˈiˈk. Ets ko yˈujtsy, ta tnayajky ja meeny parë myëjwindëkëdë Diosë tyuunk. Ja tuˈugë nmëguˈukˈäjtëm diˈib mä tyäˈädë paˈis, yëˈë myëdäjtypyë kokë kam. Nyayäjk mayˈaambyë kokë mä tyundë pënaty kyäjpxnäjxtëbë ëxpëjkpajn mä ayuk malayálam. Jyënany ko mas oy ko tnayakyë kokë en lugäärë meeny sentääbë, pes yajtëgoyˈäjttëbë nmëguˈukˈäjtëm mä ofisinë, duˈunë tyäˈädë nmëguˈukˈäjtëm tˈyaˈixyëtyë wijyˈäjtën. Etsë nmëguˈukˈäjtëm diˈib tsënääytyëp Grecia, janääm jatsojk tkaxtë Betel, aceite de oliva, keesë etsë wiinkpë jëˈxy pëky.
8 Ja tuk pëky wiˈix mbäät nyajnigëxëˈkëm ko ntsojkëmë Dios, ja ko nyajtuˈunëm tijaty nmëdäjtëm parë niˈigyë myëjwindëkët ja tuunk abëtsemy diˈibë Jesus ojts tnaskäjpxë (9 Ja tuˈugë nmëguˈukˈäjtëm jap kyugäjpnëty Sri Lanka, per kyaj jap tsyëënë. Jeˈeyë ko tapë tyëjk etsë nyax diˈib tyukˈanuˈkxypyë nmëguˈukˈäjtëm parë jap ryeunyonkˈattët, yˈasambleeˈattët ets jap jyäjtäˈäktë pënaty Dios mëduundëp. Tyäˈädë nmëguˈukˈäjtëm yajtuumbyë myeeny syentääbë, per duˈun tpudëkë ja myëguˈuktëjk diˈib ayoowdëp. Ets mä it lugäär mä kyubokyë Diosë tyuunk, yäjktëbë nmëguˈukˈäjtëmë tyëjk parë jap tyuˈukmuktët. Duˈuntsoo nimayë nmëguˈukˈäjtëm diˈib ayoowdëp tmëdattë tuˈugë lugäär mä tyuˈukmuktë ets kyaj tˈajuytyuktë.
10. ¿Wiˈix ndukˈoyˈäjtëm ko nˈoyjyaˈaytyakëm?
10 Tyäˈädë ijxpajtën yëˈë xytyukˈijxëm ko Dios mëduumbëty kyuytyuundëp mä “ja waanëbë” (Luk. 16:10). Yajtuundëp ja jyukyˈäjt myadakën parë ttukpudëkëdë wiinkpë. ¿Wiˈix nyayjawëdë tyäˈädë Dios mëduumbëty ko duˈun nyayoxëdë? Jantsy jotkujk nyayjawëdë ko duˈun yˈoyjyaˈaytyäˈäktë, pes nyijäˈäwëdëp ko jam tˈyajnipattë tsäjpotm ja jaantsypyë mëkjäˈäyˈäjtën (Luk. 16:11). Tuˈugë nmëguˈukˈäjtëm xëmë tnayakyë meeny sentääbë parë Diosë tyuunk ets jyënaˈany ko nuˈun kujkë xëëw tiempë nyaxy, mëjwiin kajaa ttukˈoyˈaty ko duˈun yˈoyjyaˈaytyaˈaky. Jyënaˈany: “Tëts nˈixy ko mientrësëts niˈigyë nayaky tijatyëts nmëdäjtypy, niˈigyëts nˈoyjyaˈaytyaˈaky parëts nbokymyaˈkxëdë nmëguˈuktëjk, nmaˈkxtukëdëts, ngupëkëdëts ja käjpxwijën o nˈoyjyaˈaytyäˈägëdëts kots pën axëëk xyyajnayjawëty”. Wiinkpë nan nmëguˈukˈäjtëm të tˈixtë ko mëjwiin kajaa ttukˈoyˈattë ko yˈoyjyaˈaytyäˈäktë (Sal. 112:5; Prov. 22:9).
11. 1) ¿Tiko njënäˈänëm ko nyajnigëxëˈkëmë netyë wijyˈäjtën ko nˈoyjyaˈaytyakëm? 2) ¿Wiˈix tyam jyaˈˈaty “ja tiˈigyëˈat” mä Diosë kyäjpn? (Ixë dibujë mä tsyondaˈaky).
11 Nan mbäät nyajnigëxëˈkëm ko nmëdäjtëmë wijyˈäjtën, ko nyajtuˈunëm tijaty nmëdäjt njaygyajpëm mä Diosë tyuunk. Per pën kyaj mbäät aduˈuk nyajtuˈunëmë tiempë mä Diosë tyuunk o nëjkxëm wiink lugäär mä tyëgoyˈatyë käjpxwäˈkxpë, mbäät duˈunyëm nbudëjkëmë wiinkpë (Prov. 19:17). Extëm nˈokpëjtakëm, ko nˈyäjkëmë meeny sentääbë, ta mbäät kyojˈyë ëxpëjkpajn ets wyaˈkxy, ets nan yëˈë tuump parë tyuˈuyoˈoyë Diosë tyuunk mä jäˈäy jyantsy yˈayowdë ets tjantsy myëdowäˈändë Diosë yˈayuk. Ta paˈis extëm Congo, Madagascar ets Ruanda mä jantsy tsooxë Biiblyë yajtooky, ja jäˈäy tniduny tuk sëmään o axtë tuk poˈo. Ets tsojkëp ijtyë nmëguˈukˈäjtëm twinˈixtët pën jyuyandëbë Biiblyë o ja kyaˈay yˈukënë parë fyamilyë. Per ko mayë nmëguˈukˈäjtëm tˈyaktë meeny sentääbë, ta jyaˈˈaty “ja tiˈigyëˈat”. Päätyë netë Diosë kyäjpn tkäjpxnaxyë Biiblyë, tˈyajwaˈkxy namayˈäjtën ets yajmoˈoytyë familyë niˈuˈunk niˈënäˈk ets nanduˈun pënaty yˈixyˈatandëbë Dios (käjpxë 2 Korintʉ 8:13-15). Duˈun nyaymyayëdë mëdë Jyobaa, pënaty yäjktëp ets pënaty yˈaxäjëdëp.
NˈOKNAYBYËJTAKËM JAGAM MÄ JA MEENY WYINMÄˈÄNY
12. ¿Wiˈixë Abrahán tˈyajnigëxëˈky ko tyukˈijxpajtë Dios?
12 Ja tuk pëky wiˈix mbäät nnaymyaaybyëjkëm mëdë Jyobaa, jaˈko jagam naybyëjtakëm mä ja meeny wyinmäˈäny diˈib jaˈäjtp yä naxwiiny ets ko nˈëxtäˈäyëm ja mëkjäˈäyˈäjtën diˈib kyaj nyaxy. Duˈun ttuunyë Abrahán, ja diˈib myëdäjtë mëbëjkën. Kom naymyayanëbë nety mëdë Jyobaa, ta tmëmëdooy ets tmastuty ja myëkjäˈäyˈäjtën jam Ur, ets yëˈë tyuktsënäˈäyë wittëjk (Eb. 11:8-10). Abrahán nyijäˈäwëbë nety ko ja jaantsypyë mëkjäˈäyˈäjtën jam tsyoony mä Jyobaa. Pääty xëmë ttukˈijxpejtyë Jyobaa en lugäär ja jyukyˈäjt myadakën (Gén. 14:22, 23). Jesus yˈanmääyë jäˈäy ets tmëdattëdë duˈumbë mëbëjkën, extëm tëgok duˈun tˈanmääy tuˈugë mixyë mëkjäˈäybyë: “Pën mˈitäämp wäˈäts, toˈktäˈäy diˈibë mmëdäjtypy es mmoˈoy ja ayoobë jäˈäyëty, es xymyëdatët pëjkeˈeky ja mˈoyˈäjtënë tsäjpotmëdë. Es net mjëmbitët es xypyaminëdëts” (Mat. 19:21). Tyäˈädë mixy kyaj nety duˈunë mëbëjkën tmëdaty extëmë Abrahán. Per të jyukyˈattë jäˈäy diˈib amumduˈukjot myëbëjktë Jyobaa.
13. 1) ¿Wiˈixë Pablo tˈanmääyë Timoteo? 2) ¿Wiˈix tyam mbäät nbaduˈunëm tyäˈädë käjpxwijën?
13 Timoteo yëˈë jatuˈugë yetyëjk diˈib yajnigëxëˈkë mëbëjkën. Päätyë Pablo ojts tyijˈyëty: “Tuˈugë Jesukristë yˈoysyoldäädë”, ta net yˈanmääyë: “Nituˈugë yetyëjk diˈib tuump extëmë soldäädë tkatuktëkë wiink tuunk wiink negosyë parë kyupëkëdët ja diˈib të tyuunkmoˈoyëty extëmë soldäädë” (2 Tim. 2:3, 4, TNM). Tyam, pënaty Dios mëduundëp, tyuundëbë mëjääw parë tpanëjkxtë tyäˈädë käjpxwijën. Ets ja jyaˈˈaty naxy tuk miyonk diˈib aduˈugë xyëëw tiempë yajtuundëp mä Diosë tyuunk. Niˈamukë jyëjpkudijëdëp tijatyë naxwinyëdë jäˈäy yˈawäˈänëdëp, nan nyijäˈäwëdëp ko ja “diˈib nuˈkxp yëˈë tuumbëˈäjtëp ja diˈib yajnuˈkxëp” (Prov. 22:7). Diˈibë Satanás tsyojkypy, yëˈë ets jamë xëëw tiempë nyajtuˈunëm etsë jot mëjääw mä jukyˈäjt madakën. Ta nääk diˈib naynyinuˈkxëdëp mëjwiin kajaa parë tkujuytyë tuˈugë tëjk, tuˈugë karrë, o ko yˈëxpëktë mä unibersidad o ko ttundë tuˈugë mëj xëëw mä pyëktë. Pën kyaj nnaygyuentˈäjtëm, mbäät nnaynyuˈkxytyëjkëm jëmëjtˈam. Per pën ijtëm “kuwijy”, ta adëyë njukyˈäjtëm, kyaj nëgooyë ngastëtuˈunëm ets kyaj nëgoo nnaynyinuˈkxëm. Duˈuntsoo awäˈätstum nyajpatëm parë nmëduˈunëmë Dios ets kyaj xytyuumbëˈäjtëm ja jukyˈäjt madakën (1 Tim. 6:10).
14. ¿Wiˈix mbäät ja winmäˈäny nbëjtakëm? Nimaytyäˈäk ti näägë nmëguˈukˈäjtëm të ttundë.
14 Tsojkëbë Diosë tyuunk nbëjtakëm jëjpˈam parë njukyˈäjtëm adëyë. Tuˈugë kasäädë jäˈäy myëdäjttëp ijty tuˈugë negosyë mä kajaa gyanarattë. Per tsyojkënyëˈäjttëbë nety jatëgok tˈyajtunäˈändë kajaa xyëëw tiempë mä Diosë tyuunk, pääty ttoˈktë ja nyegosyë ets tijatyë nety myëdäjttëp. Ta nyayˈawäˈänëdë parë tyunäˈändë mä nety kyojˈyë Betel jap Warwick, Nueva York. Myëjjäˈäw kyunyuˈkxyjäˈäwëdë tyäˈädë tuunk, pes tuˈugyë jap tyuundë mët ja nyëëx etsë myëˈt. Tyäˈädë nmëguˈukˈäjtëm diˈib tyoˈk ja nyegosyë nan kanäk sëmään tyuuny mët ja tyääk tyeety jap Warwick. Ja tuˈugë prekursoora regulaar diˈib tsënaapy Colorado (Estados Unidos), pyatë tyuunk mä bankë mä kyaj xëëwbääty tyuny. Ja wyintsënëty jyantsy tyukjotkëdaktë extëm
tyuny, ta yˈanmääyë parë xëëwbääty tyunët ets yajmëjuyaˈany tëgëk duˈunën extëmë nety yajmëjuy. Per kyaj tkupëjky, mët ko yajtuˈuˈadukanëbë nety mä Diosë tyuunk. Duˈun extëmë tyäˈädë majtskpë ijxpajtën, nan taa nimayë Dios mëduumbë diˈib tiiyëm të tmastuˈuttë parë ttuunëdë Diosë tyuunk. Pën të winmäˈäny nbëjtakëm ko yëˈë jëjpˈam nbëjtäˈägäˈänëmë Diosë tyuunk, ta nyajnigëxëˈkëm ko niˈigyë nmëjjäˈäwëm ja mëkjäˈäyˈäjtën diˈib kyaj nyaxy ets ko oy nˈijtëm mëdë Dios, ets kyaj dyuˈunëty ja jukyˈäjt madakën.KO KYËX NYAXËT JA MEENY SENTÄÄBË DIˈIB YÄ NAXWIINY
15. ¿Diˈibë mëkjäˈäyˈäjtën niˈigyë agujk jotkujk xyyajnayjawëm?
15 Ko nmëdäjtëmë jukyˈäjt madakën kyaj yëˈë ttimˈandijy ko xykyunuˈkxëmë Dios. Pesë Jyobaa kyunuˈkxypy pënaty “[nayyajmëkjäˈäytyakëdëp] mët ja oybyë tuunk” (käjpxë 1 Timotee 6:17-19). Extëm nˈokpëjtakëm, tuˈugë nmëguˈukˈäjtëm diˈib xyëwˈäjtypy Lucia, * ojts tnijawë ko jap Albania tëgoyˈäjtpë naybyudëkë. Pääty mä jëmëjt 1993 tsyoˈony Italia ets ojts nyijkxy Albania, tyukˈijxpajtë Jyobaa amumduˈukjot oyë nety tkanijawë wiˈix japë xyëëw tiempë tˈyajnaxët. Jyäjtë ayuk albanés, ets ja kujk tpudëkë 60 naxyë jäˈäy diˈib të nyëbattë. Waˈan mä ëtsäjtëm ngäjpxwäˈkxëm kyaj duˈun oy tyim wyimbëtsëmy. Per oy ti nduˈunëm parë wiinkpë tˈixyˈattëdë Jyobaa ets mëët nyaymyaaybyëkëdët, yëˈë diˈib agujk jotkujk xyyajnayjawëyäˈänëm (Mat. 6:20).
16. 1) ¿Wiˈix tim tsojk jyatäˈänyë meeny sentääbë diˈib yä naxwiiny? 2) ¿Wiˈixë net mbäät nˈijxëmë jukyˈäjt madakën?
16 Jesus kyaj jyënany pën këjx näjxp ja meeny sentääbë diˈib yä naxwiiny, yajxonën ojts tnigajpxy ko këxäämp naxäämp (Luc. 16:9, TNM). Ko mä bankë tyëgoyë may myeeny ets ko mä tuˈugë paˈis jyantsy tsyowbajtäˈäy tijaty, ninuˈun kyayaˈijxkijpxyë mëët tijaty tim tsojk tunan jatanëp. Kujijtnaxäämp tukëˈëyë tijaty tyamë Satanás kyëˈamˈäjtypy, extëmë politikë, relijyonk diˈib kyaj tyëyˈäjtënëty etsë meeny wyinmäˈäny. Ja kugajpxy Ezequiel etsë Sofonías ojts tnaskäjpxëdë ko oorë ets platë ninuˈun kyanekytsyoowbäädäˈäny, oyë nety jëjpˈam të yˈity mä jäˈäy jyuy tyooktë (Ezeq. 7:19; Sof. 1:18). Ko jyäˈtët ja oˈk tëgoˈoyën, ¿wiˈix nëjkx nnayjäˈäwëm ko tëdëm nwingubëjkëm ja mëkjäˈäyˈäjtën diˈib kyaj nyaxy mët diˈib näjx këjxp? Mbäät duˈun nnayjäˈäwëm extëm tuˈugë jäˈäy diˈib të tnidunyë meeny sentääbë nuˈunë xyëëw jyukyˈäjtën ets net tpëkyë kuentë ko kyajtëm ja meeny tyuny (Prov. 18:11). Yëˈë mëkjäˈäyˈäjtën diˈib yä naxwiiny këxäämp naxäämp. Pääty, oy ko nyajtuˈunëm parë nnaymyaaybyëjkëm mëdë Jyobaa etsë Jesus. Pes tijaty ndukmëduˈunëmë Jyobaa ets ja yˈAnaˈam Kyutujkën, yëˈë duˈun diˈib xymyoˈoyäˈänëm ja jaantsypyë jotkujkˈäjtën.
17, 18. ¿Ti yˈawijx jyëjpˈijxtëp pënaty mëdë Dios nyaymyayëdë?
17 Ko myinët ja Diosë yˈAnaˈam Kyutujkën, nipën kyatëjkˈajuytyukäˈäny, kyanuˈkxäˈäny, tkanekyyajtëgoyˈatäˈänyë doktoortëjk ets ni ääy tsooy. Jaˈˈatäämp mëjwiin kajaa jëˈxy pëky ets namayˈäjtën. Niˈamukë Jyobaa myëtnaymyaayëbë diˈib yä Naxwiiny ttukxondäˈägäˈändë ja jëˈxy pëkyë oyatypyë diˈib itäämp windëwäämp. Oorë, platë etsë tsääjë tsujjatypyë, tyunäˈäny parë nnayajtsujtëjkëm, kyaj parë nnayajmëkjäˈäytyakëm. Etsë kepyë oyatypyë, tsää ets pujxn, nyajtunäˈänëm parë ngojëmë jëën tëjkë tsujatypyë. Nmëtnaymyaayëbëˈäjtëm xypyudëkëyäˈänëm mët ko ttsojkënyëˈattë kyaj mët ko yajmëjuyäˈändë. Nixim niyam nnaymyoˈoyäˈänëm tijaty ijt windëëp yä Naxwiiny.
18 Tyäˈädë yëˈë jeˈeyë tuk pëky diˈib yajtukumayandëp pënaty naymyaaybyëjkëp mëdë Jyobaa etsë Jesus. Niˈamukë pënaty myëduundëbë Jyobaa, agujk jotkujk nyayjawëyäˈänëdë ko netyë Jesus yˈanëˈëmxëdë: “Mindë miitsëty diˈibëts ja nDeety të kyunuˈxëdë. Axäjëdë ja oyˈäjtën mä ngutujkënëts diˈibë Dios [të] mduknibëjtäägëty axtë mä oj dyajkojy ja naxwinyëdë” (Mat. 25:34).
^ parr. 4 Lucas 16:9, TNM: “Nan nˈanmääytyëp miitsëty: Päättë mëtnaymyaayëbëty mët yëˈëgyëjxm ja mëkjäˈäyˈäjtën diˈib yä naxwiiny, net ko kyëx nyaxët, yëˈëjëty mbäät mgupëkëdë mä tsënääytyaknë winë xëëwbë”.
^ parr. 4 Jesus kyaj ojts tnigajpxy pën tëyˈäjtën extëm yajniwäämbejty ja tuumbë. Ko mä Lukʉs 16:1 tˈyajtunyë tyäˈädë ayuk “yaˈˈawäˈänë”, mä ayuk grieegë mbäät yëˈë tˈandijy ko yajniwäämbajtp. Perë Jesus kyaj yëˈë ojts tnimaytyaˈaky tiko yaˈëxkejxy, yëˈë duˈun ti tyuun ja mëduumbë.
^ parr. 15 Yˈeksperiensyë Lucia Moussanett jap yajnimaytyaˈaky mä ¡Despertad! 22 äämbë junië 2003, pajina 18 axtë 22.