Diˈib nääk të nyayajtëwëdë
¿Oyëdaa ko Dios mëduumbë tmëdatët ti mëët nyaygyuwäˈänëdët extëmë tujn pistolë?
Dios mëduumbë yëˈë pyanëjkxtëbë Biiblyë kyäjpxwijën parë tˈixtë wiˈix mbäät nyaygyuwäˈänëdë o nyaynyitsiptunëdë. Etsë tyäˈädë käjpxwijën jyënaˈany ko kyaj yˈoyëty tˈyajtundëdë tujn pistolë o jam ti diˈib mëët nyaygyuwäˈänëdët. Min nˈokˈijxëm tijaty käjpxwijën mbäät xypyudëjkëm.
Jyobaa mëj tˈixyë naxwinyëdë jäˈäyë jyukyˈäjtën. David tkujäˈäyë ko mä Jyobaa “jam myuxyë jukyˈäjtën” (Sal. 36:9). Pääty, pën tuˈugë Dios mëduumbë naynyitsiptunanëp o nyitsiptunaampy ja jyukyˈäjt myadakën, tsojkëp nyaygyuentˈatëdët parë kyaj pën tˈyaˈoogët ets kyaj tnikëjxmˈatët ja nëë neˈpyny (Deut. 22:8; Sal. 51:14).
Mbäädë jäˈäy oytyiijëty tˈyajtuny parë yajjäˈäyˈoogët. Per mëdë tujn pistolë mas pojënë jäˈäy nyayaˈoogëdë, mbäät mët ko yˈayoˈonˈaty o mët ko duˈun ttuknibëjtäägë. * Pën tuˈugë maˈtspë tam jyatsëˈkëbë ets tˈixy ko ja jäˈäy tamë tyujn, mbäät niˈigyë ja jotmay myëjwindëkë ets pën niduˈuk yˈoogët.
Ja ux mä netyë Jesus yajmatsanë yˈanmääy ja yˈëxpëjkpëty ets tjuytyëdë espäädë, per kyaj parë nyaytyukuwäˈänëdët (Luk. 22:36, 38). Yëˈë duˈun parë ttukniˈˈixëyandë ko kyaj yˈoyëty tsyiptundët, ni jaa mä jäˈäy nyiminëdë mëdë tujn pujxn (Luk. 22:52). Ko Pedro tˈyajtsayujty ja saserdotë wintsënë tyuumbë, ta Jesus yˈanmääyë: “Pëjkëˈëgë mˈespäädë mä xyaˈity”. Ta net tˈyajnaxkëdaky tuˈugë anaˈamën diˈib axtë tyambäät naytyuktuˈumooyëdëbë Dios mëduumbë: “Nidëgekyë diˈibë tsiptuump mëdë espäädë, nan mëdë espäädë yˈoogët” (Mat. 26:51, 52).
Miqueas 4:3 jyënaˈany ko Dios mëduumbëty tˈyajjëmbitäˈändë “yˈespäädë extëmë aräädë etsë lyansë extëm diˈibë ujts yajtukwimbujxp”. Dios mëduumbëty yaˈixyˈattë ko kyaj tsyipjäˈäyˈattë, yëˈë pyaduundëp extëmë Dios ojts tniˈanaˈamë mët yëˈëgyëjxmë apostëlë Pablo: “Katë xytyuunëmbity axëëk” ets “ëxtäˈäytyë wiˈix miits mjikyˈattët tiˈigyë mët nidëgekyë jäˈäyëty” (Rom. 12:17, 18). Apostëlë Pablo kanäk naxë jotmay tpaty, axtë näjx nëˈam tuˈam mä jyamëtyë “maˈtspëty” (2 Kor. 11:26). Per ninäˈä ojts tkakutëjë Biiblyë kyäjpxwijën parë nyaygyuwäˈänëdët, yëˈë tyukˈijxpajtë Dios ets ja käjpxwijën diˈib yajpatp mä Biiblyë, diˈib niˈigyë yˈoyëty këdiinëm ja “tujn diˈib mëdë jäˈäy tsyiptuny” (Ecl. 9:18).
Parë Dios mëduumbëty niˈigyë jyëjpˈamëty ja jyukyˈäjtën ets kyaj dyuˈunëty ja jyukyˈäjt myadakën. Nnijäˈäwëm ko “kyaj jäˈäy yëˈëyë ttimtukjikyˈaty ko mayë pyëjtaˈaky tmëdaty” (Luk. 12:15). Ko tuˈugë jäˈäy xymyaatsäˈänëm diˈibë tujn pistolë myëdäjtypy, oy ko yuunk naxypy nmëtmaytyakëm, ets pën kyaj tjaygyukë, oy nduˈunëm extëmë Jesus jyënany: “Ko ja jäˈäyëty mdunäˈänëdët axëëk, katë miits xynyiwäˈkˈoyëdë”. Tyäˈädë yëˈë yˈandijpy nasˈijxëm parë tmënëjkxët tijaty tyim mënëjkxaampy (Mat. 5:39, 40; Luk. 6:29). * Per diˈib oy, yëˈë ko nnaygyuentˈäjtëm, pes mbäät kyaj nyajmaˈtsëm pën kyaj ndukˈijxëmë jäˈäy tijaty nmëdäjtëm ets pën nyijäˈäwëdëp ja nmëdëjkpäˈäˈäjtëm ko nDestiigëˈäjtëm ets kyaj ntsiptuˈun ntsipkäjpxëm (Prov. 18:10; 1 Fwank 2:16).
Dios mëduumbëty nwingutsëˈkëm wiˈix wyinmaytyë wiinkpë (Rom. 14:21). Ko yajnijawët ko tuˈugë Dios mëduumbë tam tmëdaty tuˈugë tujn diˈib naytyukuwäˈänanëp mä wiink jäˈäy, mbäät näägë nmëguˈukˈäjtëm tëgatsy tˈixtë o kyäjpxtëgoytyë. Pääty pën ntsojkëm ja nmëguˈukˈäjtëm, yëˈë xypyudëkëyäˈänëm parë nwingutsëˈkëm wiˈix wyinmaytyë oy ja ley tjanasˈixë ets nmëdäjtëmë tujn (1 Kor. 10:32, 33; 13:4, 5).
Dios mëduumbëty nduˈunëmë mëjääw parë nˈyäjkëmë oybyë ijxpajtën (2 Kor. 4:2; 1 Peed. 5:2, 3). Nˈokpëjtakëm ko tuˈugë nmëguˈukˈäjtëm tmëdatyë tujn diˈib naytyukuwäˈänanëp mä wiink jäˈäy. Pën të jyayajkäjpxwijy ets duˈunyëm tmëdaty, kyaj nety tˈyakyë oybyë ijxpajtën. Pääty, ni diˈibë tuunk mbäät tkanikëjxmˈaty mä nduˈukmujkëm. Nanduˈun jyaty mëdë nmëguˈukˈäjtëm diˈib tsyëëmëdijtypyë tujn mä myëduny. Pääty mas oy ko wiinkpë tyuunk tˈëxtäˈäyët. *
Niduˈuk niduˈuk mbäädë Dios mëduumbë twinmay wiˈix mët ja fyamilyë nyaygyuwäˈänäˈänëdë, wiˈix tkuwäˈänäˈändë tijaty myëdäjttëp ets diˈibë tuunk kyupëkandëp. Per mä tkawinˈixynyëm, oy ko tˈyaˈitët wyinmäˈänyoty wiˈixë Biiblyë kyäjpxwijën jyënaˈany, pes japë Dios xyˈëwij xykyäjpxwijëm mët ko xytsyojkëm. Dios mëduumbëty diˈib yajxon jyaygyujkëdëbë tyäˈädë käjpxwijën, të wyinmäˈäny tpëjtäˈäktë ko kyaj tmëdatäˈändë tujn pujxn diˈib naytyukuwäˈänanëp mä wiink jäˈäy. Pes nyijäˈäwëdëp ko pën tyukˈijxpajttëbë Dios ets pyanëjkxëdëbë Biiblyë kyäjpxwijën, nëjkxëp jukyˈattë winë xëëw winë tiempë mä nitii kyaˈˈatsëˈëgëdët (Sal. 97:10; Prov. 1:33; 2:6, 7).
Dios mëduumbëty yëˈë tyukˈijxpatandëbë Jyobaa ko myinët ja mëk ayoˈon kyaj këˈëm nyaynyitsiptunäˈänëdë.
^ parr. 3 Waˈan tuˈugë Dios mëduumbë tmëdaty tuˈugë tujn diˈib yajtuumpy parë tmatsyë jëyujk animal o parë nyaytyukuwäˈänyëty mä awäˈän jëyujk. Ko ja tyujn tkayajtunët, oy ko tkuniˈawiidët, ttukjaˈanëtyaˈayët o ja tujnbäjk tˈyajpëtsëëmdäˈäyët. Ets pën mä ntsënäˈäyëm yajkubojkypyë ley ko jäˈäyë tujn tmëdaty, ta nmëmëdoˈowëmë tyäˈädë anaˈamën (Rom. 13:1).
^ parr. 1 Mä ¡Despertad! 8 äämbë marsë 1993, jap tnimaytyaˈaky wiˈix mbäädë jäˈäy nyaynyitsiptunyëty ko pën yˈaguanëˈatäˈänëdët, mä jyënaˈany “Cómo evitar una violación”.
^ parr. 3 Ix mä La Atalaya 1 äämbë nobiembrë 2005, pajina 31, etsë 1 äämbë nobiembrë 1983, pajina 25 etsë 26, mä tnimaytyaˈaky pën oy ko nˈaxäjëm tuˈugë tuunk mä yajtsëëmëdityë tujn.